Ywit «8» Moun Chapé Délij-la

Nowa, fanmi’y, èk sé zannimo-a antwé an batiman-an. Apwé, Jéhova fèmé lapòt-la èk lapli koumansé tonbé. Lapli tonbé si tèlman, gwo batiman-an koumansé floté. Apwé an tan, dlo kouvè tout latè-a. Tout sé mové moun-nan ki té dèwò batiman-an mò. Mé Nowa épi fanmi’y té senn é sòv andidan batiman-an. Ou pa kwè yo té byen kontan yo té obéyi Jéhova?

Lapli dévidé pou kawant «40» jou èk kawant «40» swè èk apwé sa i doubout. Piti an piti dlo-a désann. Finalman, gwo batiman-an vin pozé asou sé montany-lan. Mé, toupatou asou latè té benyen dlo toujou. Kon sa, Nowa épi fanmi’y p’òkò té sa kité batiman-an.

Tizing pa tizing dlo-a chéché. An tout, Nowa épi fanmi’y wèsté andidan batiman-an pou pli pasé yon lanné. Apwé sa Jéhova di yo, yo sa sòti an batiman-an. Yo té vwéman kontan Jéhova té sové yo. Alò pou moutwé yo apwésyé sa Bondyé té fè ba yo, yo ofè’y an lofwann.

Jéhova té aksèpté lofwann-nan. I jis pwonmèt i pa té kay janmen détwi tout bagay asou latè adan an délij ankò. Èk pou fè moun chonjé pwonmèt sala, Bondyé bay an sin. Pou pwèmyé fwa, i fè an lakansyèl pawèt an syèl-la. Ès ou janmen wè an lakansyèl?

Apa di sa, Jéhova té di Nowa èk fanmi’y pou fè ich èk pléplé latè-a.