An Avètisman An Tan Pasé

Jehovah pa kay kité mové moun détwi Pawadi. Jan Bondyé tousèl ki kay viv an Pawadi. Ki sa ki kay wivé mové moun? Pou konnèt wépons-lan, konsidiwé listwa-a ki vwé konsèné Nowa. Nowa viv konmen mil lanné ki pasé. I sété an bon nonm ki toujou éséyé wèd pou fè divwa Jehovah. Mé lézòt moun asou latè-a fè sa ki pa bon. Jehovah di Nowa I té kay mennen an déliz pou détwi tout lé méchan. I di Nowa pou bati an batiman ki fèt kon an bwèt pou li èvèk fanmi’y pa mò lè Déliz-la vini.—Jennésis 6:9-18.

Nowa èvèk fanmi’y bati batiman-an. Nowa vèti moun ki Déliz-la té ka vini, mé yo pa kouté’y. Yo kontiné fè sa ki mové. Apwé batiman-an fini bati, Nowa mennen zannimo an batiman-an, èvèk li èvèk fanmi’y antwé osi. Apwé sa Jehovah mennen yon gwo mové tan. Lapli tonbé pou 40 jou èvèk 40 swè. Dlo-a kouvè tout latè-a.—Jennésis 7:7-12.

Sé méchan-an pèd lavi yo, mé Nowa èvèk fanmi’y sové. Jehovah sové yo sòti an Déliz-la pou an latè ki nétwayé hòd movèzté. (Jennésis 7:22, 23) Bib-la di tan-an ka vini ankò lè Jehovah kay détwi tout moun ki wifizé fè sa ki dwèt. Bon moun pa kay détwi. Yo kay viv pou tout tan an Pawadi-a asou latè.—2 Pita 2:5, 6, 9.

An tan jòdi an chay moun ka fè movèzté. Latè-a plen twaka. Jehovah ka voyé Témwen’y tan apwé tan pou vèti moun, mé majòwité di moun pa vlé kouté Pawòl Jehovah. Yo pa vlé chanjé lavi yo. Yo pa vlé aksèpté sa Bondyé di asou bon èvèk mové. Ki sa ki kay wivé sé moun sala? Ès si yo kay janmen chanjé? Plizyè pa kay janmen chanjé. Tan-an ka vini lè lé méchan kay détwi èvèk pa kay janmen viwé viv ankò.—Sam 92:7.

Latè-a pa kay détwi; I kay vini an Pawadi. Moun ki vini jan Bondyé kay viv pou tout tan an Pawadi-a asou latè.—Sam 37:29.