Moziz Chwazi Pou Adowé Jéhova

Apwé Jakòb mò, fanmi’y pa kité péyi Éjip. Yo kontiné viv la. Èk sé a lè sala yo koumansé kwiyé yo, jan Izwayèl. Bon, bò lè sala, fanmi Jakòb té ka agwandi an chay an péyi Éjip. Anfen, i té jis sanm, jan Izwayèl té kay vini pli fò pasé sé Éjipsyen-an. Mé Féro-a ki té ka kondwi péyi Éjip apwé Jakòb épi Jozèf mò, pa té kontan sa pyès. Konsa, i mété jan Izwayèl anba èslavaj pou anpéché yo agwandi. Féro sala épi pèp li té ka fè jan Izwayèl twavay byen wèd pou fè blòk, épi twavay jaden. Wi, yo té ka manstipé asou jan Izwayèl. Mé pli yo maltwété jan Izwayèl, sé pli jan Izwayèl té ka pléplé. Konsa Féro pasé on lwa. I di pèp li, lè on madanm an jan Izwayèl fè on ti bébé, si sé on tibway madanm-lan fè, tjwé ti bébé-a. Ès ou sa imajiné mannyè jan Izwayèl té pè, lè yo tann sa?

La té ni on madanm anpanmi jan Izwayèl yo té ka kwiyé Jòchibèd. Madanm sala té fè on bèl ti bébé, on tibway. Jòchibèd té konnèt lwa-a Féro té pasé-a, èk ou sa asiwé, i pa té vlé yo tjwé ti bébé’y. Konsa, i pwan on panyen, èvèk i mété on kalité bagay andidan panyen-an pou’y pa koulé. Lè’y fini, i mété ti bébé-a andidan panyen-an, èk i séwé panyen-an anpanmi wazyé ki té bò lawivyè Nay-la. Bon, Jòchibèd té ni on pli gwan fi. Non fi-a sété Miriyam. Konsa, lè Jòchibèd kité ti bébé-a an panyen-an bò lawivyè-a, Miriyam wèsté tou pwé ka véyé pou’y wè kisa ki té kay fèt.

Ében apwé on ti tan, fi Féro vini bò lawivyè-a pou benyen, èk i wè panyen-an. Lè’y ouvè’y, i wè ti bébé-a andidan panyen-an ka pléwé, épi sa kasé tjè’y. Lè sala, Miriyam alé èk i di fi-a: ‘Ès ou vlé mwen alé gadé pou on madanm ki sa otjipé ti bébé-a ba’w?’ Fi-a di’y: ‘Wi, alé.’ Miriyam alé kwiyé manman’y. Lè Jòchibèd vini, fi Féro-a di’y, ‘Pwan ti bébé sala, otjipé’y ban mwen, èk mwen kay péyé’w pou sa.’

Jòchibèd té byen kontan paskè, yo pa té kay tjwé ti bébé-a. Konsa i pwan ti bébé’y èk i alé. Lè ti bébé-a vini pli gwan, Jòchibèd mennen’y viwé bay fi Féro-a. Fi-a kwiyé’y Moziz, èk i lévé’y kon ich li. Moziz té sa twapé népòt sa’y té vlé, paskè i lévé kon on ti pwens lakay Féro. Mé, i pa janmen obliyé Jéhova. Èk i pa janmen kwè, i sété jan Éjip. Wi, Moziz té sav i sété jan Izwayèl, èk i désidé pou sèvi Jéhova.

Mé chonjé, diwan tout tan sala, jan Éjip té ka manstipé asou jan Izwayèl. Konsa, lè Moziz té ni kawant «40» lanné, i désidé pou édé jan Izwayèl. Yon jou, lè’y té ka pasé, i wè yon Éjipsyen ka bat yon èslav. Mé èslav-la sété jan Izwayèl. Lè Moziz wè sa, i gadé anho i gadé anba, i pa wè pyèsonn. Konsa i tjwé Éjipsyen-an, èk i séwé kadav nonm-lan an sab. Lè Féro vini konnèt sa Moziz té fè, i té vlé tjwé Moziz. Konsa Moziz mawon. I kité Éjip, èk i alé wèsté adan on péyi yo té ka kwiyé Midiyann. Mé Jéhova té ka otjipé’y paditan i té la.