Twa «3» Pwèmyé Plég-la Ki Té Tonbé Asou Péyi Éjip

Nasyon Izwayèl té èslav an péyi Éjip, èk sé Éjipsyen-an té ka maltwété yo an chay. Yo té ka fòsé yo pou twavay byen wèd. Konsa, Jéhova voyé Moziz épi Éronn pou pòté on konmisyon bay Féro. I di yo pou alé di Féro: ‘Mi sé sa Jéhova di, ‘Voyé pèp mwen alé, pou yo sa adowé mwen an savan sèk-la.’’ Lè Moziz épi Éronn bay Féro konmisyon-an, mannyè-a i wéponn yo té ka moutwé, i té ni an chay lògèy. Tann sa i di yo. I di: ‘Mwen pa mélé épi sa Jéhova di, mwen pa kay kité jan Izwayèl alé.’ Èk apwé sa, i fòsé jan Izwayèl pou twavay pli wèd ankò. Mé, Jéhova té kay wanjé Féro. Ès ou sav kisa Jéhova fè? Ében, Jéhova voyé dis «10» plég asou péyi Éjip. Annou diskité twa «3» pwèmyé plég-la. Plég limowo 1: Jéhova fè lawivyè Nay-la tounen san. Jéhova di Moziz: ‘Féro pa ka kouté mwen. Mé denmen bonmaten, i kay bò lawivyè Nay-la. Alé la èk di’y, tout dlo-a ki an lawivyè Nay-la kay tounen san, paskè i pa ka ladjé pèp mwen.’ Konsa, Moziz épi Éronn alé oti Féro bò lawivyè Nay-la. Lè Éronn fwapé lawivyè-a épi baton’y, tout dlo-a ki té an lawivyè-a tounen san, tout pwéson ki té an lawivyè-a mò, èk lawivyè-a koumansé santi. Moun pa té sa bwè dlo lawivyè-a. Magwé Féro wè miwak sala épi dé zyé’y, i wifizé pou voyé jan Izwayèl alé.

Plég limowo 2: Sèt «7» jou apwé pwèmyé plég-la, Jéhova voyé Moziz oti Féro ankò. Jéhova di’y pou di Féro: ‘Si ou pa voyé pèp mwen alé, péyi Éjip kay plen kwapo.’ Mé Féro pa kouté yo. Konsa, Éronn annèk lévé baton-an i té ni an lanmen’y-lan, épi kwapo koumansé kouvè péyi Éjip. La té ni kwapo andidan kay moun, an kabann yo, èk an vésèl yo. Anfen, la té ni kwapo toupatou an péyi Éjip! Lè Féro wè sa, i di Moziz: ‘Plédé épi Jéhova pou’y sa tiwé sé kwapo sala asou mwen, èk asou pèp mwen. Mwen kay kité jan Izwayèl alé.’ Konsa, Jéhova doubout plég-la, épi sé kwapo-a koumansé mò toupatou. Sé Éjipsyen-an sanblé sé kwapo-a, èk yo mété yo an plizyè pil. Èk, péyi-a koumansé santi. Mé, Féro pa kité jan Izwayèl alé.

Plég limowo 3: Apwé sa, Jéhova di Moziz: ‘Di Éronn pou fwapé pousyè-a ki atè-a épi baton’y, èk pousyè-a kay tounen moustik ki ka mòdé.’ Ében sé sa menm ki fèt. Kon Éronn fwapé baton’y atè-a, moustik simen toupatou. Adan sé Éjipsyen-an di Féro: ‘Sé Bondyé ki voyé plég sala.’ Mé jik toujou, Féro pa kité jan Izwayèl alé.