Lòt Sis «6» Plég-la Ki Té Tonbé Asou Péyi Éjip

Annou gadé lòt sis «6» plég-la ki té tonbé asou péyi Éjip. Plég limowo 4: Moziz épi Éronn alé oti Féro ankò, pou ba’y on lòt konmisyon. Jéhova té voyé yo pou di Féro: ‘Si’w pa kité pèp mwen alé, mwen kay voyé gwo mouch an péyi-a.’ Ében, Féro pa kouté. Konsa, Jéhova voyé an chay gwo mouch toupatou an péyi Éjip. Sé mouch-la té ka antwé an kay tout sé Éjipsyen-an, wich kon pòv. Mé, pa yon gwo mouch ki té an plas-la koté jan Izwayèl té ka wèsté-a. Yo té ka kwiyé plas sala Gochenn. Plég sala épi tout sé lézòt-la ki vini apwé, té afèkté sèlman sé Éjipsyen-an. Féro plédé épi Moziz. I di’y: ‘Sipliyé Jéhova pou’y tiwé sé gwo mouch sala an péyi-a. Èk apwé sa, pèp ou sa alé.’ Mé lè Jéhova tiwé sé mouch-la, Féro chanjé lidé’y. Ès ou kwè Féro té kay janmen obéyi Jéhova?

Plég limowo 5: Jéhova di: ‘Si Féro pa kité pèp mwen alé, zannimo sé Éjipsyen-an kay vini malad, èk yo kay mò.’ Li denmen, zannimo sé Éjipsyen-an koumansé mò. Mé, anyen pa wivé zannimo jan Izwayèl. Wannman, Féro kontiné kasé bwa an zòwèy li. I pa kouté Jéhova.

Plég limowo 6: Jéhova di Moziz pou viwé oti Féro, èk voyé sann an lézè-a. Lè Moziz fè sa, sann-lan tounen on kalité lapousyè ki té toupatou an lézè-a. I té ka tonbé asou sé Éjipsyen-an èk asou zannimo yo, èk i té ka fè bobo sòti asou kò yo. Sé pa dé doulè sa té ka ba yo. Mé, wannman, Féro pa kité pèp Jéhova alé.

Plég limowo 7: Jéhova voyé Moziz oti Féro pou bay on lòt konmisyon. Kou sala, Jéhova di’y: ‘Ès ou ka wifizé pou voyé pèp mwen alé toujou? Ében, lapli laglas kay tonbé asou péyi-a denmen.’ Èk vwéman, li denmen, Jéhova voyé yon kalité mové tan asou péyi Éjip! La té ni lapli laglas, loway, épi difé. Anfen, mové tan sala sété pli mové tan-an jan Éjip té janmen èspéyansé. Lapli laglas-la détwi tout jaden sé Éjipsyen-an, èk i détwi tout pyé bwa ki té an péyi-a. Mé, anyen pa wivé jan Izwayèl an Gochenn. Lè sala Féro di Moziz: ‘Sipliyé Jéhova pou plég sala doubout! Èk apwé sa, zòt sa alé.’ Mé kon lapli laglas-la doubout, Féro chanjé lidé’y ankò.

Plég limowo 8: Jéhova di Moziz pou alé di Féro: ‘Si’w pa voyé pèp mwen alé, mwen kay voyé kwitjèt pou kouvè péyi-a denmen. Èk sé kwitjèt sala kay manjé tout sé plan-an lapli laglas-la pa té détwi-a.’ Mé Féro pa kouté Moziz. Konsa, konmen milyon kwitjèt kouvè péyi Éjip. Èk sa sété on gwo kalité kwitjèt. Yo manjé tout bagay ki té wèsté an jaden sé Éjipsyen-an èk asou sé pyé bwa-a, apwé lapli laglas-la té pasé. Lè Féro wè sa, i plédé épi Moziz ankò. I di Moziz: ‘Sipliyé Jéhova pou’y tiwé sé kwitjèt sala isi-a.’ Mé, apwé Jéhova tiwé sé kwitjèt-la, Féro kontiné kasé bwa an zòwèy li. I pa voyé jan Izwayèl alé.

Plég limowo 9: Apwé sa, Jéhova di Moziz: ‘Lévé lanmen’w an diwèksyon syèl-la.’ Lè Moziz lévé lanmen’y, la menm syèl-la vini nwè. Èk pou twa «3» jou, péyi Éjip té adan yon kalité nwèsè! Sé Éjipsyen-an pa té sa wè pyèsonn, èk yo pa té sa wè anyen. Sé sèlman jan Izwayèl ki té ni klèté an kay yo.

Finalman, Féro di Moziz: ‘Ou épi pèp ou sa alé. Sèl sa mwen ka di’w, kité zannimo zòt isi-a.’ Moziz di Féro: ‘Mé nou ni pou mennen sé zannimo-a épi nou, paskè nou ni pou ofè yo kon sakwifis douvan Bondyé nou.’ Ében lè Féro tann sa, i twapé kò’y tèlman faché, i koumansé hélé. I di Moziz: ‘Sòti douvan mwen! Èk si mwen janmen wè’w ankò, mwen kay tjwé’w.’