Plég Limowo Dis «10»

Moziz pwonmèt Féro, i pa té kay éséyé pou wè’y ankò. Mé avan i kité Féro, i di’y: ‘A mennwit, tout pwèmyé gason ki té fèt an péyi Éjip, kay mò. Ki sé gason Féro, ében gason yon èslav, yo tout kay mò.’

Mé, pou jan Izwayèl sa sové lavi yo, Jéhova ba yo diwèksyon asou mannyè pou yo fè on wipa spésyal. Mi sé sa Jéhova di yo: ‘Tjwé on bélyé mouton ében on bouk kabwit ki ni yon lanné, èk pasé san’y asou poto lapòt zòt. Woti vyann-lan, èk manjé’y ansanm épi pen ki pa ni lèlven. Bon, fè asiwé zòt ni had asou zòt, èk soulyé an pyé zòt lè zòt ka manjé wipa sala. Èk fè asiwé zòt pawé pou kité, paskè mwen kay délivwé zòt òswè-a.’ Ès ou sa imajiné mannyè jan Izwayèl té kontan pou tann sa?

Swè sala, lè’y té mennwit, nanj Jéhova pasé an tout kay ki té an péyi Éjip, èk i tjwé tout pwèmyé gason ki té an sé kay-la ki pa té ni san asou lapòt-la. Konsa, chak fanmi Éjipsyen té ni on moun ki mò. Mé anpami jan Izwayèl pyèsonn pa mò.

Jis gason Féro ki mò. Lè Féro wè sa, i pa té sa pwan’y ankò. La menm i di Moziz épi Éronn: ‘Annou, sòti isi-a. Alé adowé Dyé zòt. Pwan zannimo zòt èk foukan!’

Swé sala lalin-lan té plen. Jan Izwayèl sépawé kò yo. Yo fòmé plizyè gwoup silon lafanmi yo, épi yo kité Éjip. La té ni sis san mil «600,000» nonm, apa di an chay madanm épi manmay. Osi, an chay lòt moun ki pa té jan Izwayèl kité Éjip swè sala, épi yo alé pou yo sa adowé Jéhova ansanm épi jan Izwayèl. Alafen, Jéhova té délivwé jan Izwayèl!

Chak lanné apwé sa, jan Izwayèl té ka fè menm wipa spésyal sala, pou yo té sa chonjé mannyè Jéhova té délivwé yo. Sé sa yo té ka kwiyé Fèt Délivwans-lan.