Yo Pa Tjenn Pwonmèt Yo

Jéhova di Moziz: ‘Vin jwenn mwen anlè mòn-nan. Mwen kay ékwi lwa mwen asou plak wòch èk mwen kay ba ou’y.’ Kon sa Moziz mouté mòn-nan èk i wété la pou kawant «40» jou èk kawant «40» swè. Padan’y té asou mòn-nan, Jéhova ékwi Dis «10» Koumandman-an asou dé «2» plak wòch èk i bay Moziz sé plak-la.

Apwé tjèk tan pasé, jan Izwayèl té kwè Moziz té anbandonnen yo. Alò yo di Éronn: ‘Nou bizwen an moun pou djidé nou. Kon sa fè an dyé ban nou!’ Éronn di yo: ‘Pòté lò-a zòt ni ban mwen.’ Éronn pwan lò-a, i fonn li èk i fè an ti bèf épi’y. Apwé sa sé moun-nan di: ‘Ti bèf lò sala sé dyé nou, sé li ki tiwé nou an Éjip!’ Sé moun-nan koumansé adowé ti bèf lò-a èk yo té fè an gwo fèt. Ou kwè sa yo fè-a té bon? Non! Pouki? Paski sé moun-nan té pwonmèt pou adowé Jéhova sèlman. Mé apwézan yo té ka kasé pwonmèt sala.

Jéhova té ka wè tout sa ki té ka fèt. Kon sa i di Moziz: ‘Désann ay jwenn sé moun-nan. Yo ka dézobéyi mwen èk yo ka adowé an fo dyé.’ Alò Moziz désann mòn-nan épi dé plak-la an lanmen’y.

Lè Moziz wivé tou pwé kanp-lan, i tann sé moun-nan ka chanté. Lè’y byen gadé i wè sé moun-nan ka dansé èk yo té ka pòstèné douvan ti bèf lò-a. Sa té fè Moziz faché. Anfen i té si tèlman faché i jété dé plak-la atè èk yo kasé an plizyè mòso. La menm i kwazé ti bèf lò-a sé moun-nan té fè-a. Apwé, i mandé Éronn: ‘Ki mannyè ou kité sé moun-nan fè’w fè an mové bagay kon sa?’ Éronn di: ‘Pa faché. Ou ja konnèt mannyè sé moun sala yé. Yo té vlé an dyé. Kon sa mwen ladjé tout lò yo an difé-a èk ti bèf sala pawèt!’ Mé Éronn pa té janmen sipozé fè an bagay kon sa. Apwé sa Moziz viwé mouté mòn-nan ankò èk i plédé épi Jéhova pou pawdonnen sé moun-nan.

Jéhova pawdonnen sé moun-nan ki té vlé obéyi’y. Ès ou konpwann pouki’y té tèlman enpòtan pou manmay Izwayèl kouté Moziz?