Gwan Lawmé Jéhova

Benn-hédad, wa Siriya, té ka toujou ataké Izwayèl. Mé chak fwa i té éséyé ataké yo, pwofèt Ilaycha té ka fè wa Izwayèl sav. Kon sa wa-a té sa chapé. Alò Benn-hédad désidé pou sézi Ilaycha. I vin sav Ilaycha té an vil Dofann, kon sa i voyé lawmé Siriya ay pwan’y.

Lawmé Siriya wivé vil Dofann gwo lannwit. Denmen bonmaten, lè sèvant Ilaycha ay dèwò i wè yon gwo lawmé tout oliwon vil-la. I té pè tèlman, i hélé: ‘Ilaycha, ki sa nou kay fè?’ Ilaycha di’y: ‘La ni pli moun ki épi nou pasé la ni moun ki épi yo.’ La menm, Jéhova fè sèvant Ilaycha wè tibwen chouval èk kawòs ki plen difé an sé mòn-nan tout owon vil-la.

Lè sòlda Siriya éséyé sézi Ilaycha, Ilaycha pwédyé pou Jéhova édé’y. La menm Jéhova toublé sé sòlda-a kon sa yo pa té menm sav ko yo té yé. Alò Ilaycha di sé sòlda-a: ‘Nonm-lan zòt ka aché-a pa an vil sala. Swiv mwen, n’ay mennen zòt ko i yé.’ Kon sa sé sòlda-a swiv Ilaycha pou wivé jis Sanmariya, ko wa Izwayèl té ka wété.

Tan sé sòlda-a konpwann kò yo, i té ja twò ta. Wa Izwayèl mandé Ilaycha: ‘Ou vlé mwen tjwé yo?’ Ès Ilaycha té sèvi lokazyon sala pou pwan wivanj asou sé sòlda-a? Non, i pa fè sa. Pito sa Ilaycha di: ‘Pa tjwé yo. Ba yo an bagay pou manjé èk voyé yo alé.’ Kon sa wa-a fè yon gwo fèsten ba yo èk apwé yo manjé, i voyé yo viwé an péyi yo.