Nanj Jéhova Pwotéjé Hèzèkaya

Nasyon Asiriya té ja sézi wéyòm Izwayèl. Èk apwézan Sinakèrib, wa Asiriya, vlé sézi wéyòm Jouda osi. Kon sa i koumansé pwan sé vil-la an Jouda yonn apwé lòt. Mé vil-la i té pli vlé-a sété vil Jérouzalèm. Kanmenm sa Sinakèrib pa té sav-la, sé Jéhova té ka pwotéjé Jérouzalèm.

Hèzèkaya, wa Jouda, té bay Sinakèrib an chay lajan pou’y pa ataké Jérouzalèm. Sinakèrib pwan lajan-an, mé wannman i voyé gwo lawmé’y-la ataké Jérouzalèm. Sé moun-nan an vil-la té byen pè, paski lawmé Asiriya té ka vansé pli pwé yo. Alò Hèzèkaya di yo: ‘Zòt pa ni pou pè. Lawmé Asiriya fò, mé Jéhova kay fè nou twòp pli fò pasé yo toujou.’

Sinakèrib voyé konmisyonnè’y, ében sa yo ka kwiyé an Rabchakè, Jérouzalèm. I voyé’y la pou pwan sé moun-nan sèvi wizib. Kon sa Rabchakè-a doubout dèwò vil-la èk adan an vwa ki byen fò i di: ‘Jéhova pa sa édé zòt. Pa kité Hèzèkaya kwennen zòt. La pa ni pyès dyé ki kay sa pwotéjé zòt.’

Hèzèkaya mandé Jéhova ki sa pou’y fè. Jéhova wéponn li: ‘Pa kité sa Rabchakè-a di fè’w pè. Sinakèrib pa kay pwan Jérouzalèm.’ Apwé sa Hèzèkaya wisivwè déotwa lèt Sinakèrib voyé ba li. Mi sa sé lèt-la té di: ‘Las wézisté. Jéhova pa kay sa sové’w.’ Alò Hèzèkaya pwédyé: ‘Tanpwi souplé Jéhova, sové nou. Lè sala tout moun kay sav sé ou yonn ki Bondyé.’ Jéhova wéponn li: ‘Wa Asiriya pa kay mété pyé an Jérouzalèm. Mwen kay pwotéjé vil mwen.’

Sinakèrib té asiwé i té kay pwan Jérouzalèm touswit. Mé menm swè sala, Jéhova voyé yon nanj koté sòlda Asiriya té ka kanpé. Nanj-lan tjwé yon san katwiven senk mil «185,000» sòlda! Wa Sinakèrib pèd sé sòlda’y-la ki té pli bon. Alò sèl sa’y té sa fè, sé viwé lakay li. Jéhova pwotéjé Hèzèkaya èk Jérouzalèm menm kon i té pwonmèt. Si’w té an Jérouzalèm an tan sala, ès ou té kay konfyé Jéhova?