Josaya Té Enmen Lwa Bondyé

Josaya té ni ywit «8» lanné lè’y vini wa. An tan sala, sé moun-nan té ka fè maji nwè èk yo té ka adowé idòl. Lè Josaya té ni sèz «16» lanné, i éséyé apwann bon mannyè-a pou adowé Jéhova. Lè Josaya té ven «20» lanné, i koumansé détwi tout idòl èk lotèl toupatou an péyi-a. Èk lè’y wivé vennsis «26» lanné, i mété bagay an plas pou wanjé tanp Jéhova.

Padan gwan pwèt Hilkaya té an tanp-lan, i twapé an woulo ki té ni Lwa Jéhova ékwi asou’y. Pitèt sa té menm woulo-a Moziz té ékwi. Alò Chéfann, sigwétè wa-a, mennen woulo-a bay Josaya. Lè’y wivé, i koumansé li lwa-a pou Josaya tann. Silon sa Josaya tann, i vin wéyalizé sé moun-nan té ka dézobéyi Jéhova pou plizyè lanné. Kon sa Wa Josaya di Hilkaya: ‘Pa dé faché Jéhova faché épi nou. Alé palé épi Jéhova. I kay di nou sa nou sipozé fè.’ Jéhova sèvi Houlda, an madanm ki sété an pwofèt, pou ba yo wépons li. Jéhova di: ‘Jan Jouda ja kité mwen. Mwen kay pini yo. Kanmenm, mwen pa kay fè’y padan Josaya sé wa, pas i pawé pou fè chanjman silon sa ki ékwi an Lwa mwen.’

Lè Wa Josaya tann wépons Jéhova, i alé an tanp-lan èk i voyé kwiyé tout jan Jouda. Apwé yo asanblé, i li Lwa Jéhova asé fò pou tout sé moun-nan tann. Josaya épi sé moun-nan pwonmèt pou obéyi Jéhova épi tout tjè yo.

Bon, tibwen lanné té ja pasé dépi nasyon Jouda té sélébwé Fèt Délivwans-lan. Mé lè Josaya té li Lwa-a, yo vin apwann, yo té ni pou tjenn Fèt Délivwans-lan toulé lanné. Alò Josaya di sé moun-nan: ‘Nou kay fété Fèt Délivwans-lan pou Jéhova.’ Kon sa Josaya fè pwépawasyon pou ofè plizyè sakwifis. I osi fè awanjman pou moun chanté an tanp-lan. Apwé yo fè tout pwépawasyon-an, yo fété Fèt Délivwans-lan. Apwé sa, yo fété Fèt Pen San Lèlven-an pou sèt «7» jou. Dènyé fwa sé moun-nan té ni an Fèt Délivwans kon sa sété an tan Sanmyèl. Josaya té vwéman enmen Lwa Bondyé. Bon, kon’w ka vini konnèt Jéhova pli mèyè, ès ou enmen sa’w ka apwann?