Jéhova Voyé Jérémaya Pwéché

Jéhova chwazi Jérémaya pou wann sèvis kon an pwofèt. Jéhova di’y pou ay pwéché bay jan Jouda èk di yo doubout fè sa ki mové. Mé Jérémaya pa té kwè i té kay sa fè twavay sala. Kon sa i di Jéhova: ‘Mwen sé annèk an tibway. M’a konnèt mannyè pou palé épi moun.’ Alò Jéhova di’y: ‘Ou pa ni pou pè. Mwen kay di’w sa’w ni pou di. Mwen kay édé’w.’

Jéhova di Jérémaya pou asanblé tout sé ansyen-an. I di’y pou kasé an jè douvan yo èk di yo: ‘Sé kon sa yo kay kwazé Jérouzalèm.’ Lè Jérémaya fè sa Jéhova di’y fè, pa dé faché sé ansyen-an té faché. Yon pwèt yo ka kwiyé Pacha bat Jérémaya. Apwé sa Pacha mété dé «2» pyé, dé «2» lanmen èk kou Jérémaya anmitan gwo tjò bwa. I osi anchenné lanmen’y. Jérémaya wété la tout lannwit san bwennen. Li denmen bonmaten Pacha ladjé’y. Kon sa Jérémaya di: ‘M’a sa pwan’y ankò. Ou wè mwen, m’a kay pwéché ankò.’ Mé ès i té vwéman doubout? Non. Lè Jérémaya wété èk i wéfléchi, i di: ‘Pawòl Jéhova menm kon an difé andidan mwen. M’a sa doubout pwéché.’ Alò Jérémaya kontiné vèti sé moun-nan.

Apwé plizyé lanné pasé, an lòt wa koumansé kondwi Jouda. Sé pwèt-la èk sé fo pwofèt-la té hayi tann sa Jérémaya té ka di. Kon sa yo di sé pwens-lan: ‘Nonm sala méwité mò.’ Jérémaya di: ‘Si zòt tjwé mwen, zòt kay tjwé an nonm ki inosan. Sé pawòl Jéhova mwen ka palé, sé pa pawòl mwen.’ Lè sé pwens-lan tann sa Jérémaya di, yo di: ‘Nonm sala pa méwité mò.’

Jérémaya kontiné pwéché. Apwé an tan, sé pwens-lan osi vin byen faché. Kon sa yo mandé wa-a pou tjwé Jérémaya. Wa-a di yo, yo sa fè népòt sa yo vlé épi Jérémaya. Alò yo pwan Jérémaya èk yo ladjé’y adan an pi ki té byen fon, ko yo kwè i té kay mò. Paski pi-a té ni tèlman labou, Jérémaya koumansé désann an labou-a.

Yon ofisyé yo ka kwiyé Ibèdmilèk di wa-a: ‘Sé pwens-lan jété Jérémaya adan an pi! Si nou kité’y la, i kay mò.’ Kon sa wa-a di Ibèdmilèk pou pwan twant «30» nonm épi’y, pou yo sa hédi Jérémaya sòti an pi-a. Ès nou pa sipozé fè menm kon Jérémaya ki pa té kité anyen anpéché’y pwéché?