Yo Détwi Jérouzalèm

Byen souvan, jan Jouda té ka kité Jéhova pou adowé fo dyé. Pou plizyè lanné, Jéhova voyé an chay diféwan pwofèt vèti yo, mé yo pa té kouté. Pito sa, yo pwan sé pwofèt-la sèvi wizib. Ki sa Jéhova fè pou fè yo doubout adowé fo dyé?

Nèbyoukadnéza, wa Babilonn, té ka bat yon nasyon apwé lòt. Pwèmyé fwa i bat Jérouzalèm, i pwan Wa Jèhòyakin, sé pwens-lan, sé sòlda-a, èk sé atizan-an, épi i mennen yo tout Babilonn. I osi pwan tout twézò ki té an tanp Jéhova. Apwé sa, i mété Zèdikaya asid kon wa an Jouda.

An koumansman, Zèdikaya té ka obéyi Nèbyoukadnéza. Kanmenm, sé nasyon-an ki té tou pwé-a, èk sé fo pwofèt-la ankouwajé Zèdikaya pou wivòlté kont Babilonn. Mé Jérémaya vèti Zèdikaya. I di’y: ‘Si ou wivòlté, la kay ni lanmò, lafen, èk maladi an Jouda.’

Apwé Zèdikaya kondwi pou ywit «8» lanné, i désidé pou wivòlté kont Babilonn. I mandé lawmé Éjip pou vin édé’y. La, Nèbyoukadnéza voyé lawmé’y ataké Jérouzalèm, èk yo kanpé tout owon vil-la. Jérémaya di Zèdikaya: ‘Jéhova di si ou ladjè kò’w an lanmen Babilonn, ni ou ni jan vil-la kay chapé. Mé si ou pa fè sa, lawmé Babilonn kay bwilé Jérouzalèm, èk yo kay fè’w pwizonnè.’ Zèdikaya di: ‘M’a kay ladjé kò mwen an lanmen Babilonn!’

Yon lanné é dimi apwé, lawmé Babilonn kasé pak Jérouzalèm pou yo antwé. Yo pwi vil-la difé èk yo bwilé tanp-lan. Yo osi tjwé an chay moun èk pwan plizyè mil lézòt kon pwizonnè.

Zèdikaya kouwi kité Jérouzalèm, mé sòlda Babilonn pwan kouwi dèyè’y. Yo tjenbé’y tou pwé vil Jèriko èk yo pòté’y bay Nèbyoukadnéza. Wa Babilonn oblijé Zèdikaya gadé kon yo tjwé sé gason’y-lan. Apwé sa Nèbyoukadnéza tiwé zyé Zèdikaya èk i mété’y an pwizon. Pli ta, Zèdikaya mò an pwizon. Mé Jéhova pwonmèt jan Jouda: ‘Apwé swasant dis «70» lanné, mwen kay fè zòt viwé Jérouzalèm.’

Ki sa ki té kay wivé sé jenn moun-nan yo té mennen Babilonn? Ès yo té kay wèsté fidèl pou Jéhova?