SA POU FÈ LÈ’W VIWÉ KOZÉ ÉPI ON MOUN
LISON 7
Fè Tout Sa’w Pé Pou Kontiné Pwéché Bon Nouvèl-la
Pwensip-la: “Yo kontiné enstwi sé moun-an épi pwéché Bon Nouvèl-la.”—Twavay 5:42.
Mannyè-a Zapòt Pòl Té Fè Tout Sa’y Pé Pou Kontiné Pwéché Bon Nouvèl-la
1. Gadé VIDIYO-A, Zapòt Pòl Té Kontiné Enstwi Sé Moun-lan An Vil Èfésòs ében li ében kouté Twavay 19:8-10. Èk apwé nou kay kozé asou dé (2) kwèsyon:
Menm si adan moun wifizé kwè sa zapòt Pòl té ka di, ki mannyè i té fè tout sa’y pé pou kontiné pwéché bay moun ki moutwé lantéwé?
Konmen fwa zapòt Pòl té witounen pou enstwi moun ki té moutwé lantéwé an Bon Nouvèl-la? Èk pou konmen lanné i té fè sa?
Kisa Nou Apwann Hòd Ègzanp Zapòt Pòl?
2. Nou ni pou fè tan èk mété éfò pou witounen asou moun ki moutwé lantéwé an bon nouvèl-la. Osi, nou ni pou fè éfò pou koumansé létid Bib épi yo.
Swiv Ègzanp Zapòt Pòl
3. Fè éfò-a pou witounen a lè-a ki pli bon pou moun-lan. Ou sa mandé kò’w: ‘Kilè ki kay bon pou mwen jwenn épi moun-lan ankò? Èvèk kilè èk ki koté ki kay fè’y pli ézé pou moun sala palé épi mwen ankò?’ Osi, menm si lè-a ki bon pou moun-lan pa bon pou ou, éséyé pou fè éfò-a pou jwenn moun-lan lè-a ki bon pou li.
4. Fè awanjman épi moun-lan. Apwé chak konvézasyon épi moun-lan, mandé’y ki lè èk ki jou ki kay bon pou zòt palé ankò. Èk fè asiwé ou witounen jou-a èk lè-a zòt dakò asou.
5. Pa pèd èspwa. Menm si ou witounen plizyè fwa èk moun-lan anbawasé ében ou pa jwenn li, sé pa pou’w twò pwésé pou kwè moun-lan pa antéwésé. (1 Kòrint 13:4, 7) Pito sa, fè éfò pou jwenn moun-lan. Mé an menm di tan, fè asiwé ou ka byen sèvi tan’w an minis-la.—1 Kòrint 9:26.