Sa Ou Sa Fè Pou’w Sa Viv An Latè Nèf-la

An sé atik-la avan sala, nou apwann mannyè Bondyé kay détwi tout mové moun an latè-a, èk tiwé tout sé pwòblenm-lan yo ka annékòz. Nou asiwé sa kay fèt. Pouki nou di sa? Ében, mi sa Bondyé pwonmèt an Bib-la:

“Latè-a kay fini anyen.”—1 JAN 2:17.

Kanmenm, nou asiwé la ni moun ki kay chapé paski menm vèwsé-a di:

“Moun-an ki fè sa Bondyé vlé’y fè-a kay viv pou tout tan.”

Alò, sèl mannyè pou moun chapé sé pou yo fè sa Bondyé vlé. Mé pou fè sa Bondyé vlé, nou ni pou vin konnèt li avan.

VINI ‘KONNÈT BONDYÉ’ POU’W SA CHAPÉ LAFEN DI MOUN

Collage: 1. A hospital nurse sits on a hospital floor, exhausted and overwhelmed. 2. She takes a break in the cafeteria and notices her workmate happily reading a magazine. 3. The workmate reads a Bible verse to her and gives her a jw.org contact card.

Jézi di: “Lè moun konnèt ou, sèl Bondyé ki ni pou vwé . . . sé lè sala ou ka ba yo lavi étonnèl.” (Jan 17:3) Pou nou chapé lafen di moun èk viv pou tout tan, nou ni pou ‘vini konnèt’ Bondyé. Bon sa pa vlé di i asé pou annèk kwè an Bondyé ében konnèt yonn dé bagay konsèné’y. Nou ni pou fè jan épi Bondyé. Si nou vlé fè bon jan épi an moun, sé pou nou pasé tan épi moun sala. Sé menm bagay-la nou ni pou fè si nou vlé fè bon jan épi Bondyé. Annou ègzanminé déotwa bagay Bib-la di ki sa édé nou fè jan épi Bondyé èk tjenn wilasyon sala fò.

Bagay Nou Apwann An Bib-la

Nou apwann Bondyé té vlé nou viv an Pawadi.

Lè Bondyé fè Adanm épi Èv i té mété yo adan an bèl ti jaden Bib-la kwiyé jaden Éden. Yo té pawfé èk Bondyé potjiwé tout sa yo té ni bizwen pou yo té sa viv an bon lavi. Yo té sa viv pou tout tan. Dépi yo té wété jan Bondyé, yo pa té kay janmen mò. Mé yo chwazi pou dézobéyi yon senp ti konmand Bondyé té bay yo.

Nou apwann pouki nou ka soufè.

Lè Adanm dézobéyi Bondyé, i pèd chans-lan pou viv pou tout tan ni pou kò’y ni pou tout désandan’y. Bib-la di: “Sé yon nonm ki mennen péché an latè sala, épi péchéʼy mennen lanmò . . . kon sa tout moun oblijé mò.” (Ronm 5:12) Menm kon an pawan sa pasé an maladi bay ich li, Adanm pasé péché bay tout ich li. Sé sa ki fè nou ka vin vyé èk nou ka mò.

Nou apwann sa Bondyé ja fè pou édé nou.

Bib-la di: “Bondyé té tèlman enmen sé jan latè-a, i bay sèl Gasonʼy-lan pou yo. Tout moun ki kwè an li pa kay pèd lavi yo, mé yo kay ni lavi étonnèl.” (Jan 3:16) Bondyé voyé Jézi asou latè pou bay lavi’y pou nou. Konsèné lanmityé sala Bondyé moutwé-a, yon misyé Endyen ki katwiven sizan (86 an) di: “Sa ka moutwé mwen Jéhovaa enmen mwen an chay. Sa ka ban mwen èspwa mwen sa viv pou tout tan.”

Nou apwann mannyè nou sa moutwé apwésiyasyon pou sa Bondyé ja fè ban nou.

Silon Labib, lè nou obéyi konmandman Bondyé nou ka moutwé nou apwésyé sa i ja fè ban nou. (1 Jan 2:3) Paski Jéhova enmen nou, i ka moutwé nou sa pou fè pou nou sa viv an bon lavi dépi apwézan. (Izaya 48:17, 18) Bondyé pa vlé nou soufè. Dépi nou swiv diwèksyon’y, i pwonmèt nou kay viv an bon lavi apwézan, èk nou osi kay ni chans-lan pou viv pou tout tan.

LI PAWÒL BONDYÉ TOULÉ JOU

The nurse looking toward heaven after reading the Bible during her lunch break outside. — Ou sa chapé lafen di moun si ou pwédyé pou Bondyé édé’w èk si ou fè divwa’y

Pou nou pa mò, nou ka manjé toulé jou. Mé Jézi di: “Sé pa manjé tousèl nonm bizwen pou yo viv, mé yo bizwen obéyi tout pawòl ki sòti an bouch Bondyé.”—Mafyou 4:4.

Jòdi jou, nou sa twapé pawòl Jéhova an Bib-la. Padan ou ka étidyé liv sen sala, ou kay apwann sa Jéhova té fè an tan pasé, sa i ka fè apwézan, èk sa i kay fè an tan ki ka vini.

PWÉDYÉ POU BONDYÉ ÉDÉ’W

Ki sa ou sa fè si ou vlé obéyi Bondyé mé ou ka twouvé’y difisil pou doubout fè sé bagay-la i di ki pa bon? Ében si ou vin konnèt Bondyé byen, sa kay édé’w an chay.

Ann’ gadé ègzanp yon madanm nou kay kwiyé Sakura. I té ka viv an vyé lavi. Lè i koumansé étidyé Bib-la, i apwann Bondyé konmandé nou pou “pa antanmé vyé lavi.” (1 Kòrint 6:18) Sakura pwédyé pou Bondyé ba li fòs, èk apwé an tan, i té sa doubout vyé labitid sala. Kanmenm, jis toujou i ni pou goumen épi tantasyon. Sakura di: “Si vyé katjil antwé an tèt mwen, n’a vidé tjè mwen bay Jéhova, paski mwen sav m’a sa ganyen batay sala pa kò mwen. Lapwiyè ja édé mwen vansé pli pwé Jéhova.” Menm kon Sakura, plizyè milyon moun ka vini konnèt Bondyé. Bondyé ka bay yo kouway-la yo bizwen pou fè chanjman an lavi yo, èk pou viv an mannyè-a ki ka plè’y.—2 Kòrint 4:7.

Pli ou vini konnèt Bondyé, sé pli Bondyé kay vini konnèt ou kon an bon jan. (Galécha 4:9; Sam 25:14) Lè sala ou kay sa viv an latè nèf-la. Mé ou pé mandé: Ki mannyè bagay kay yé an latè nèf-la? Nou kay jwenn wépons-lan an lòt atik-la.

a An Bib-la non Bondyé sé Jéhova.