Pèp Jéhova Enmen Fè Sa Ki Dwèt

1. Ki sitiwasyon difisil Jozèf té ni pou aji épi? Èk kisa i té fè?

JOZÈF, gason Jakòb, té on moun ki ta ka toujou éséyé fè sa ki dwèt. Jozèf sété yon èslav an kay Pòtifa. I té ni on sitiwasyon ki té difisil pou aji épi. Madanm mèt li té ka toujou diʼy : “Kouché épi mwen.” Mé Jozèf té ka toujou wifizéʼy. Jòdi jou, adan moun pé di: ‘Mawi madanm-lan, Pòtifa, I pa té janmen an kay-la. Konsa, pouki Jozèf pa té kouché épi madanm-lan?ʼ Èk sé pa sa tousèl. Chonjé, Jozèf sété on èslav an kay sala. Konsa, pou wifizé madanm-lan, té sa fè bagay vini pli mové pouʼy. Kanmenm, Jozèf tjenbé fò. Pouki? Jozèf di: “Ki mannyè mwen sa fè gwo movèzté sala èk péché kont Bondyé?”​—Jen. 39:7-12.

2. Ki mannyè Jozèf té sav, pou fè adiltè sé on “gwo movèzté” èk on “péché kont Bondyé”?

² Lwa Moziz té byen klè lèʼy di: ‘Zòt pa dwé fè adiltè.ʼ (Ègz. 20:14) Mé lwa sala pa té la an tan Jozèf. Anfen, lwa sala vini dé san (200) lanné apwé Jozèf mò. Konsa, koumannyè Jozèf té sav, pou fè adiltè sé on “gwo movèzté” èk on “péché kont Bondyé”? Èben, Jozèf té konnèt Bondyé byen asé pouʼy sav koumannyè Bondyé ka santi lè i vini pou adiltè. Jozèf té sav awanjman mawiyaj Jéhova té mété an plas, sété ant yon nonm èk yon fanm. Pou ègzanp, i té sav Jéhova té bay Adanm yon madanm, èk i bay Èv yon mawi. Osi, i té tann konsèné mannyè Jéhova té pwotéjé gwan gwanmanmanʼy Sara. Jéhova té anpéché on lòt nonm kouché épiʼy. Épi sé pa Sara tousèl Jéhova té pwotéjé, I té osi pwotéjé Ribèka, madanm Ayzak, hòd on sitiwasyon ki té menm konsa. (Jen. 2:24; 12:14-20; 20:2-7; 26:6-11) Konsa, Jozèf té sa wézonnen asou sé bagay sala pouʼy sa wè kisa ki dwèt èk kisa ki mové an zyé Bondyé. Paski Jozèf té enmen Bondyé, i té ditèminé pou fè sa Jéhova té vléʼy fè.

3. Kisa nou kay diskité an atik sala?

³ San dout, ou enmen sa ki dwèt. Ès pa? Mé nou pyès pa pawfé. Konsa, nou ni pou pwan pwokosyon pou nou pa swiv “mannyè latè-a.” (Izay. 5:20; Ronm 12:2) Alò, nou kay konsidiwé kisa ladwati vlé di èk ki mannyè nou sa ni on pli mèyè lavi lè nou fè sa ki dwèt. Èk apwé, nou kay diskité twa (3) bagay ki sa édé nou fòtifyé lanmityé nou pou wèg Jéhova.

KISA LADWATI VLÉ DI?

4. Lèʼy vini pou moun ki dwèt, ki atitid an chay moun ka kwè yo ni?

⁴ An chay moun ka kwè, on moun ki dwèt, sé on moun ki ni tèlman lògèy, ki enmen jijé lòt moun èben ki ka kwè i pli bon pasé lézòt. Mé ès Jéhova enmen sé atitid sala? Awa! Jéhova pa kontan sa pyès! Chonjé, lè Jézi té asou latè-a, i té kondanné sé mèt wilizyon-an paski yo té kwè yo té pli bon pasé lézòt. (Éklé. 7:16; Louk 16:15) On moun ki ka fè sa Jéhova di ki dwèt, pa kay janmen kwè i pli bon pasé lézòt.

5. An ling épi Bib-la, kisa mo pawòl-la “ladwati” vlé di? Bay ègzanp.

⁵ Ladwati sé on bèl kawaktè. Mé kisa ladwati yé? Pou météʼy senp, ladwati vlé di, pou fè sa ki dwèt an zyé Jéhova. An Bib-la, mo pawòl-la “ladwati” ka di nou, moun sala ka swiv wèg Jéhova. Pou ègzanp, Jéhova di on machann sipozé onnèt èk i pa sipozé vòlè pwa on moun. (Dito. 25:15) An langaj Hibrou, ou sa sèvi mo pawòl-la “dwèt” pou mo pawòl-la “onnèt.” Konsa, on kwityen ki vlé fè sa ki dwèt an zyé Bondyé, sipozé onnèt an tout sa i ka fè. On moun ki dwèt enmen jistis èk i hayi enjistis. Èk osi, on moun ki dwèt ka fè asiwé, sé disizyon-an i ka fè-a ka “toujou plè Bondyé.”​—Kòl. 1:10.

6. Pouki Jéhova sé pli mèyè moun-lan pou di nou sa ki dwèt èk sa ki pa dwèt? (Izaya 55:8, 9)

⁶ Bib-la ka di nou, Jéhova sé sous tout ladwati. (Jér. 50:7) Èk kon Kwéyatè nou, sé li sèlman ki ni dwa-a pou di nou sa ki dwèt èk sa ki pa dwèt. An plis di sa, nou pyès pa pawfé. Mé Jéhova pawfé, èk ‘mannyè-a i ka katjilé pli ho pasé mannyè-a nou ka katjilé.ʼ (Pwov. 14:12; li Izaya 55:8, 9.) Bon. Bondyé fè nou an imaj li, alò nou sa fè sa Jéhova di ki dwèt. (Jen. 1:27) Èk nou kontan fè sa Jéhova di! Paski nou enmen Papa nou Jéhova, nou ka fè tout sa nou pé pou imitéʼy.​—Èfés. 5:1.

7. Pouki nou bizwen bon wèg nou sa dépan asou? Ba yon ègzanp.

⁷ I bon pou ni wèg; wèg nou sa dépan asou. Pouki nou ka di sa? Èben, imajiné kisa ki té kay fèt si tout dòktè èk tout nòs té ka fè sa yo vlé, èk pa té ka swiv wèg médikal. Bagay té ka mové toubonnman, paski anpil moun té kay mò. Alò, sé pou sa i bon pou ni wèg, wèg nou sa dépan asou, paski i sé on pwotèksyon pou nou. Èk wèg Jéhova sé on wèg nou sa dépan asou; nou sa konfyéʼy! Menm kon wèg médikal sé on pwotèksyon pou nou, wèg Jéhova sé on pwotèksyon pou nou.

8. Ki bennédiksyon Jéhova pwonmèt pou bay tout moun ki ka fè sa ki dwèt?

⁸ Jéhova pwonmèt pou benni tout sa ki ka swiv wèg li. I di an Sam 37:29: “Sé moun-an ki dwèt-la kay éwityé tè-a Bondyé té pwonmèt yo-a, èk yo kay viv adanʼy pou tout tan.” Anni imajiné lavi an tan sala. Lavi kay dou! Paski an tan sala moun ki ka swiv wèg Jéhova kay ni lilyon, lapé èk lakontantman. Yo tout kay an bon santé èk kay ni on bon lavi. Nou asiwé ou té kay avoudwé la! Èk sa sé kalité lavi-a Jéhova vlé nou ni. Konsa, nou tout ni bon wézon pou nou enmen sa Jéhova di ki wèt. Alò, ki mannyè nou sa fòtifyé lanmityé nou pou fè sa ki dwèt? Annou gadé twa (3) bagay nou sa fè.

MANNYÈ-A POU FÒTIFYÉ LANMITYÉ NOU POU WÈG JÉHOVA

9. Kisa ki kay édé nou fè sa ki dwèt?

⁹ Pwèmyé bagay-la nou ni pou fè: Sé pou nou vwéman enmen Jéhova, moun-lan ki ka fè sé wèg-la. Pou nou enmen fè sa ki dwèt, nou ni pou agwandi lanmityé nou pou Jéhova. Nou pa vlé fè kon Adanm épi Èv ki pa té ni asé lanmityé pou Jéhova. Si yo té vwéman enmen Jéhova, yo pa té kay janmen dézobéyiʼy èk kasé lwaʼy. (Jen. 3:1-6, 16-19.) Alò, pli nou enmen Jéhova, sé pli nou kay vlé swiv wèg li.

10. Kisa Abrahanm té fè pou i sa konpwann Jéhova pli mèyè?

¹⁰ Nou asiwé, nou pyès pa vlé fè lèwè-a Adanm èk Èv té fè-a. Kisa ki sa édé nou pou pa fè lèwè sala? Nou bizwen kontiné apwann konsèné Jéhova. Nou ni pou apwésyé bèl kawaktèʼy. Èk nou ni pou éséyé pou konpwann mannyè Jéhova ka katjilé. Èk lè nou fè sa, lanmityé nou pou Jéhova kay pwofité. Bon. Annou konsidiwé Abrahanm. I té vwéman enmen Jéhova. Menm si i té twouvéʼy difisil pou konpwann adan sé disizyon-an Jéhova té fè, i pa té wébélé. Non. Pito sa, i éséyé pou konpwann Jéhova pli mèyè. Pou ègzanp, lè Abrahanm té tann Jéhova té kay détwi Sòdonm èk Gomòra, sa twakasé lidéʼy. Konsa, i mandé Jéhova: ‘Ès ou kay détwi ni moun ki dwèt ni moun ki mové?ʼ Magwé Abrahanm té mandé Jéhova kèstyon sala, i pa té kwè Jéhova té kay fè sa. Épi imilité, i mandé Jéhova an chay kèstyon. Èk épi pasyans, Jéhova wéponn tout kèstyon Abrahanm té ni. Èk sa édé Abrahanm pou wè, Jéhova ka ègzanminé tjè tout lézòm èk i kay détwi moun ki méchan. Mé i kay sové moun ki dwèt. ​—Jen. 18:20-32.

11. Kisa Abrahanm té fè pou moutwé i enmen Jéhova èk i ka konfyéʼy?

¹¹ Ti konmézasyon-an Abrahanm té ni épi Jéhova konsèné Sòdonm èk Gomòra té fèʼy ni pli wèspé èk lanmityé pou Jéhova. Wi pli pasé saʼy té ni avan! Détwa nanné apwé, Jéhova mandé Abrahanm pou fè on bagay nou sav ki té kay difisil pou népòt pawan fè. Jéhova mandé Abrahanm pou tjwé gasonʼy Ayzak èk ofèʼy kon on sakwifis. Kanmenm, kou sala, Abrahanm pa té ni pyès kèstyon pou Jéhova. Pouki? Paski i té vini konnèt Jéhova pli mèyè. Konsa, Abrahanm té pawé pou fè tout sa Jéhova té mandéʼy pou fè. Nou asiwé, si ou sé on pawan, ou sa imajiné penn-lan Abrahanm té ni an tjèʼy kon i té ka pwépawé pou tjwé gasonʼy. Mé menm si Abrahanm té ni penn sala an tjèʼy, i té sav Jéhova pa té kay janmen mandéʼy pou fè on bagay ki pa dwèt. Pouki? Paski i té byen konnèt Papaʼy Jéhova. Jéhova té pwonmèt ki, sé an Ayzak tout désandan Abrahanm té kay sòti. Mé a lè sala, Ayzak pa té ni pyès ich. (Jen. 22:1-12) Konsa, “Abrahanm té katjilé ki Bondyé té ni asé pouvwa pou fè Ayzak wésisité, menm si i té mò.” (Hib. 11:17-19) Bon. Abrahanm té enmen Papaʼy Jéhova. I té ka konfyéʼy. Èk i té ni lafwa ki, Jéhova ka toujou fè sa ki dwèt. Konsa, menm si i té difisil, èk i té ni penn an tjèʼy, I té pawé pou obéyi.

12. Koumannyè nou sa imité Abrahanm? (Sam 73:28)

¹² Koumannyè nou sa imité Abrahanm? Pou nou sa imité Abrahanm, nou ni pou kontiné apwann pli konsèné Jéhova. Kon nou ka fè sa, nou kay vini pli pwé Jéhova èk nou kay enmenʼy pli. (Li Sam 73:28.) Osi, kon nou ka kontiné pou apwann pli konsèné Jéhova, konsyans nou kay byen entwennen. Èk sa kay fè nou katjilé, menm kon Jéhova ka katjilé. (Hib. 5:14) Konsa, lè on moun tanté nou pou fè on bagay ki pa bon, nou kay sa wifizé. Anfen, nou pa kay janmen vlé fè anyen ki sa kasé tjè Papa nou ében donmajé wilasyon nou épiʼy. Ki lòt bagay nou sa fè pou fòtifyé lanmityé nou pou wèg Jéhova?

13. Koumannyè nou sa kontiné fè sa ki dwèt? (Pwovèb 15:9)

¹³ Dézyenm bagay-la nou ni pou fè: Kontiné twavay wèd pou dévèlopé lanmityé pou fè sa ki dwèt chak jou. Si nou vlé dévlopé lanmityé pou wèg Jéhova ki dwèt, nou ni pou toujou mété éfò. Sé pa pou nou kwè sa sé on bagay ki twò difisil pou fè. Jéhova byen wézonnab. I konnèt sa nou sa fè èk sa nou pa sa fè. (Sam 103:14) Jéhova ka asiwé nou, ‘i enmen moun-lan ki ka kontiné fè sa ki dwèt.ʼ (Li Pwovèb 15:9.) Pou nou kontiné fè sa ki dwèt, nou ni pou kontiné mété éfò-a, épi Jéhova, ki plen pasyans, kay édé nou èk ban nou fòs. Épi nou kay fè pwogwé.​—Sam 84:5, 7.

14. Kisa wèg Jéhova kay fè ban nou? Ba yon ilistrasyon.

¹⁴ Jéhova enmen nou an pil, èk i pa kay janmen di nou pou fè on bagay nou pa sa fè. Sa sé poutji i asiwé nou, sé “konmandmanʼy-lan pa wèd pou swiv”. (1 Jan 5:3) Épi yo sé vwéman on pwotèksyon pou nou! San dout, ou kay dakò, nou bouzwen pwotèksyon sala touléjou. Sé pou wézon sala zapòt Pòl di nou pou abiyé menm kon on sòlda. (Èfés. 6:14-18) Lè nou gadé abiman on sòlda, kisa ki ka pwotéjé tjèʼy? Nou sav, “i ni on bagay asou lèstonmak li pou pwotèkté” tjèʼy! An menm mannyè-a, wèg Jéhova ka pwotéjé tjè nou; sa vlé di, moun-nan nou yé adidan. Alò, nou ni pou fè asiwé nou swiv wèg Jéhova, pou nou pwotéjé tjè nou.​—Pwov. 4:23.

15. Koumannyè nou sa fè asiwé nou ka swiv wèg Jéhova?

¹⁵ Koumannyè nou sa fè asiwé nou ka swiv wèg Jéhova? Nou sa fè sa, lè nou katjilé asou sa Jéhova té kay vlé nou fè, lè nou ka fè chwa. Lè nou ka désidé ki konmézasyon pou ni, ki liv pou li, ki anmizman pou gadé èben ki mizik pou kouté, nou ni pou mandé kò nou: ‘Ès si sé chwa-a nou ka fè-a, ka afèkté nou adan on mannyè ki pòzitif? Ès Jéhova kay dakò épi sé chwa sala? Ès yo ka pwomoté bagay ki pa ka plè Bondyé tèl kon vyolans, imowalité, èk vowasité?ʼ (Filip. 4:8) Si chwa nou a ling épi wèg Jéhova, sa kay on bon bagay; paski i kay pwotèkté moun-nan nou yé adidan.

16-17. Kouman Izaya 48:18 ka asiwé nou, nou kay sa viv pa wèg Jéhova pou tout tan?

¹⁶ Ès ou janmen katjilé si ou kay sa kontiné pou fè sa ki dwèt touléjou? Annou konsidiwé yon ilistrasyon Jéhova té sèvi an Izaya 48:18. (Liʼy. ) Alò, Jéhova pwonmèt nou, ‘ladwati [nou] kay menm kon lanm lanmè-a.ʼ Dépi ou konnèt kòʼw, ès ou janmen tann lanm lanmè-a doubout woulé? Ès ou kwè yon jou, lanm lanmè-a kay doubout toubonnman konsa? Mé non! Dépi ou konnèt kòʼw, ou sav lanm lanmè-a ka toujou woulé, èk yo té ja la pou plizyè mil lanné. Èk sé konsa, yo kay toujou la.

¹⁷ Konsa, nou sa toujou fè sa ki dwèt! Ki mannyè? Èben, lè nou ni on disizyon pou fè, nou kay konsidiwé sa Jéhova vlé nou fè, èk nou vlé fè asiwé nou fèʼy. Mé délè, i kay difisil pou fè sa Jéhova di nou pou fè. Mé nou asiwé, Papa nou Jéhova ki enmen nou an chay-la, toujou la pou ban nou fòs èk pou édé nou kontiné fè sa ki dwèt touléjou.​—Izay. 40:29-31.

18. Pouki nou pa sipozé jijé lézòt?

¹⁸ Twazyenm bagay-la nou ni pou fè: Sé Jéhova ki jij; konsa, kitéʼy jijé lézòt. Kon nou ka éséyé pou fè sa ki dwèt touléjou, sé pa pou nou kwè nou pli bon pasé lézòt. Osi, sé pa plas nou pou désidé si on moun ka fè sa Jéhova vléʼy fè opa. Konsa, tjenn an lidé, sé Jéhova ‘ki Jij tout latè-a.ʼ (Jen. 18:25) Èk chonjé, Jéhova pa janmen apwenté nou kon jij pou nou jijé lézòt. Anfen, Jézi di an Mafyou 7:1, “Pa jijé lòt moun, épi Bondyé pa kay jijéʼw.”b

19. Kisa Jozèf té fè pou moutwé i kité tout jijman an lanmen Bondyé?

¹⁹ Annou konsidiwé ègzanp Jozèf ankò. I pa té jijé lézòt, menm si yo té mal twétéʼy. Pou ègzanp, tann sa sé fwèʼy-la té fèʼy. Yo té mal twétéʼy. Yo té vann li kon yon èslav. Èk yo té fè papaʼy kwè, i té mò. Plizyè lanné apwé, Jozèf jwenn fanmiʼy ankò. A lè sa-a, i té ni on gwo pozisyon an péyi-a. Konsa, i té sa jijé sé fwèʼy-la byen wèd, èk pwan wivanj asou yo. Mé Jozèf pa té fè sa. Lè sé fwèʼy-la té wè i té ni gwo pozisyon sala, yo té byen pè paski yo té kwè Jozèf té kay pwan wivanj asou yo pou sa yo té fè-a; menm si yo té ja wépanti. Imajiné mannyè yo té ka santi, lè Jozèf di yo: ‘Pa pè. Ès sé mwen ki Bondyé?ʼ (Jen. 37:18-20, 27, 28, 31-35; 50:15-21) Magwé Jozèf té ni gwo pozisyon, i pa té jijé yo. I kité tout jijman an lanmen Bondyé.

20-21. (a) Kisa ki kay édé nou pou pa jijé lézòt? (b) Pouki i pa bon pou kwè nou pli bon pasé lézòt?

²⁰ Menm kon Jozèf, nou vlé kité tout jijman an lanmen Bondyé. Pou ègzanp, nou pa sav kisa ki ka annékòz sé fwè èk sè nou-an pou pwan an sèten aksyon. Chonjé, nou pa sa li tjè pyèsonn. Mé ‘sé Jéhova [tousèl] ki ka ègzanminé motif moun.ʼ (Pwov. 16:2) Jéhova enmen tout kalité moun. I pa ka gadé ni kilti, ni was, ni péyi ni koté yo sòti. Jéhova vlé nou enmen tout moun osi. Èk i ka ankouwajé nou pou enmen sé fwè èk sè nou-an, èk pou “fè lè an tjè” nou ba yo. (2 Kòr. 6:13) Èk lè nou fè sa, sa ka édé nou pou pa jijé yo.

²¹ Osi byen, menm kon nou pa vlé jijé sé fwè èk sè nou-an, nou pa vlé jijé pyès lòt moun. (1 Tim. 2:3, 4) Pou ègzanp, si on manm fanmiʼy pa ka kwè an sa ou ka kwè-a, ès ou kay jijéʼy èk di: ‘Moun sala pa kay janmen vini an lavéwité-a.ʼ Non, nou pa sa fè sa; paski Jéhova ka bay “tout moun toupatou” on chans pou yo “sa tounen kont sé movèzté-a yo ka fè-a.” (Twav. 17:30) Osi, Jéhova pa té ban nou dwa-a pou jijé moun. An plis di sa, nou pa pli bon pasé lézòt. Sé pou nou toujou chonjé, Jéhova ka gadé moun ki kwè yo pli bon pasé lézòt, kon moun ki pa dwèt.

22. Pouki nou ditèminé pou enmen fè sa ki dwèt?

²² Lanmityé nou pou sa Jéhova di ki dwèt kay édé nou ni lakontantman. Épi bon ègzanp nou kay édé moun pou vini pli pwé nou èk Jéhova. Konsa, annou pa janmen doubout “anvi fè sa ki dwèt.” (Maf. 5:6) Jéhova ka wè tout éfò-a nou ka mété-a pou fè sa ki dwèt, épi sa ka plèʼy. Kon vyé sistenm sala ka vini pli èk pli mové, sé pou nou pwan kouwaj! Èk pa janmen obliyé, ‘Jéhova enmen moun ki dwèt.ʼ​—Sam 146:8.