“Lè Sala Tout Moun Kay Sav Zòt Sé Disip Mwen”

1. Lè moun atandé mitin nou pou pwèmyé fwa-a, kisa yo ka òbzòvé? (Gadé pòtwé-a osi.)

IMAJINÉ on mawi épi madanm li ka atandé mitin an Sal Wéyòm-lan pou pwèmyé fwa-a. Lè yo wè mannyè sé fwè èk sè-a janti, èk mannyè yo ka moutwé yonn a lòt lanmityé sa touché tjè yo. Padan yo té ka viwé lakay yo, madanm-lan di mawiʼy: ‘Mwen kontan nou té atandé mitin sala. La ni on bagay ki diféwan épi sé moun sala, yo pa kon lòt moun nou konnèt.ʼ

2. Kisa ki ja annékòz adan fwè èk sè pou doubout sèvi Jéhova?

² Lanmityé-a ki anpami pèp Bondyé sé on bagay ki èstòdinè. Kanmenm, Témwen Jéhova pa pawfé. (1 Jan 1:8) Alò, pli nou vini konnèt yonn a lòt an kongwigasyon-an, sé pli nou ka wè défo yonn a lòt. (Ronm 3:​23) Mé malèwèzman, adan fwè èk sè ja kité défo lézòt an kongwigasyon-an fè yo doubout sèvi Jéhova.

3. Ki mannyè moun kay sav ki moun ki vwéman disip Jézi? (Jan 13:34, 35)

³ Annou gadé lévanjil-la atik sala bazé asou. (Li Jan 13:34, 35.) Alò, silon lévanjil-la, ki mannyè moun kay sav ki moun ki vwéman disip Jézi? Lévanjil-la pa té di sé disip Jézi-a té kay pawfé. I di sé lanmityé ki kay idantifyé disip Jézi. Osi, Jézi pa té di: ‘Sé lè sala zòt kay sav zòt sé disip mwen.ʼ Mé i di: “Sé lè sala tout moun kay sav zòt sé disip mwen.” Konsa, Jézi té ka moutwé a klè, jis moun ki pa Témwen Jéhova ki té kay konnèt ki moun ki vwéman disip li, pa lanmityé-a yo ni pou yonn a lòt.

4. Ki kwèsyon adan moun ki pa Témwen Jéhova pé mandé?

⁴ Adan moun ki pa Témwen Jéhova pé mandé sé kwèsyon sala: ‘Ki mannyè lanmityé ka idantifyé sé disip Jézi-a? Ki mannyè Jézi té moutwé sé zapòt li-a lanmityé? Èk jòdi jou, ki mannyè i posib pou moun moutwé lanmityé menm kon Jézi?ʼ Wi, sa sé bon kwèsyon, èk i bon pou Témwen Jéhova wéfléchi asou wépons-lan pou sé kwèsyon sala. Paski sa sa édé nou pou moutwé pli lanmityé, èspwèsman lè nou ka aji épi défo yonn a lòt.—Èfés. 5:2.

KI KALITÉ LANMITYÉ KI KA IDANTIFYÉ SÉ DISIP JÉZI-A?

5. Kisa pawòl Jézi an Jan 15:12, 13 vlé di?

⁵ Jézi té moutwé a klè, sé on lanmityé ki byen èstòdinè ki té kay idantifyé sé disip li-a. (LiJan 15:12, 13.) Ès ou wéyalizé Jézi bay sé disip li-a on koumand? Wi, i di yo: “Sé pou zòt enmen yonn a lòt menm kon mwen enmen zòt.” Konsa kisa sa vlé di? Ében, Jézi menm èspliké ki, Kwityen ki vwé sipozé enmen lézòt pli pasé yo enmen kò yo. Anfen, lanmityé yo sipozé si tèlman fò, yo sipozé pawé pou jis mò pou yonn a lòt.b

6. Ki mannyè Bib-la ka moutwé lanmityé sé on kawaktè ki vwéman enpòtan?

⁶ Bib-la ka enstwi nou ki, lanmityé sé on kawaktè ki vwéman enpòtan. Èk la ni on chay lévanjil ki ka palé konsèné lanmityé. Adan sé lévanjil sala on chay moun enmen, sé lévanjil tèl kon: “Lanmityé sé kawaktè Bondyé.” (1 Jan 4:8) “Enmen pwochenʼw menm kon ou enmen kòʼw.” (Mafyou 22:39) “Lanmityé ka kouvè an latilyé péché.” (1 Pita 4:8) “Lanmityé ka diwé pou tout tan.” (1 Kòrint 13:8) Sé vèwsé sala èk plizyè lòt lévanjil ka moutwé i vwéman enpòtan pou nou dévlopé èk moutwé bèl kawaktè sala.

7. Pouki Satan pa sa janmen enstwi moun pou enmen yonn a lòt èk pou viv an lilyon?

⁷ An chay moun ka mandé: ‘Ki mannyè i posib pou konnèt ki wilizyon ki vwé? Yo tout ka di yo ni lavéwité-a, mé chak di yo ka enstwi diféwan bagay konsèné Bondyé.ʼ Wi sa vwé, mé sa pa ka sipwi nou, paski sé Satan ki mèt tout fo wilizyon. Èk a kòz di sa, i difisil pou moun konnèt ki wilizyon ki vwé. Mé Satan pa kay éwisi, paski Satan pa sa mennen moun ki ka viv tout oliwon latè-a ansanm kon yon fanmi ki enmen yonn a lòt. Anfen Jéhova tousèl ki sa fè sa, paski sé li ki sous lanmityé. Alò, sé sèlman moun ki ni lisentèspwiʼy èk bennédiksyonʼy ki sa moutwé kalité lanmityé sala. (1 Jan 4:7) Èk sé pou wézon sala Jézi di sé lanmityé ki kay idantifyé sé disip li-a.

8-9. Ki mannyè lanmityé-a Témwen Jéhova ni pou yonn a lòt ja afèkté an chay moun?

⁸ Jézi té di, an chay moun kay idantifyé sé disip li-a paski yo ka moutwé yo enmen yonn a lòt. Èk sa vwé. Pou ègzanp, yon fwè, nonʼy sé Ian di, pwèmyé konvansyon-an i té atandé sété adan on pak ko yo ka jwé spò. Déotwa mwa avan, Ian té alé an menm pak sala pou gadé spò. Kanmenm i di: “An konvansyon-an, sé Témwen-an té konpòté kò yo diféwan hòd sé moun-lan ki té ka gadé spò-a. Yo té janti, yo té byen abiyé èk sé manmay yo-a té ni bon mès. An plis di sa, sé moun sala té ni lakontantman èk lapé. Èk sé sa mwen té vlé an lavi mwen. Magwé mwen pa ka chonjé pyès an sé diskou-a, mwen pa kay janmen obliyé mannyè sé Témwen-an té konpòté kò yo. Sa té vwéman touché tjè mwen.”c Wi, Témwen Jéhova ka twété yonn a lòt épi jantiyès èk wèspé. Èk wézon-an nou ka fè sa sé paski nou vwéman enmen yonn a lòt.

⁹ Yon fwè yo ka kwiyé John té santi menm kon Ian lèʼy koumansé atandé sé mitin nou-an. I di: “Sé moun-lan té tèlman janti, mwen té jis kwè yo té pawfé. Mannyè yo moutwé yo enmen yonn a lòt, té fè mwen asiwé mwen té twapé wilizyon-an ki vwé-a.”d Wi èspéyans John èk èspéyans Ian, èk plizyè lòt èspéyans ka moutwé a klè, Témwen Jéhova sé vwéman disip Jézi.

10. Ki sitiwasyon ki ka ban nou on bèl òpòtyounité pou moutwé nou enmen sé fwè èk sè nou-an? (Gadé nòt-la ki an bout paj-la osi.)

¹⁰ Kon nou té ja di, pyès an sé fwè èk sè nou-an pa pawfé. Alò, délè yo kay di, ében fè bagay ki kay ofwansé nou.e (Jémz 3:2) Konsa, lè on fwè ében on sè ofwansé nou, sa sé on bèl òpòtyounité pou moutwé nou vwéman enmen yo pa mannyè-a nou twété yo. Bon, ki mannyè ègzanp Jézi sa édé nou pou fè sa?—Jan 13:15.

KI MANNYÈ JÉZI TÉ MOUTWÉ I ENMEN SÉ ZAPÒT LI-A?

11. Ki vyé kawaktè Jémz èk Jan té ni? (Gadé pòtwé-a osi.)

¹¹ Jézi té byen sav sé disip li-a pa pawfé. Konsa, i té édé yo pou fè chanjman, èk i té édé yo pou dévlopé bèl kawaktè pou yo sa fè Jéhova kontan. Pou ègzanp, yon jou Jémz èk Jan, dé an sé zapòt Jézi-a té di manman yo, pou mandé Jézi pou bay yo gwo pozisyon an Wéyòm Bondyé. (Maf. 20:20, 21) Alò, sa Jémz èk Jan té fè, té moutwé yo té ni vyé kawaktè tèl kon lògèy èk yo té vlé vini pli enpòtan pasé lézòt.​—Pwov. 16:18.

12. Ès sé Jémz èk Jan tousèl ki té moutwé yo té ni vyé kawaktè? Poutji ou ka di sa?

¹² Asou menm jou sala, sé pa anni Jémz èk Jan ki té moutwé yo té ni vyé kawaktè. Mafyou 20:24 ka di: “Lè dis lézòt disip-la vin konnèt sa, yo té faché kont dé fwè-a an chay.” Ès ou sa imajiné mannyè Jémz, Jan, èk sé lézòt zapòt-la té ka babyé? Wi, pitèt sé lézòt zapòt-la té di Jémz èk Jan kéchòy konsa: ‘Zòt kwè zòt pli mèyè pasé nou? Ès sa sé wézon-an zòt mandé pou gwo pozisyon an Wéyòm-lan? Sé pa zòt tousèl ki twavay wèd épi Jézi. Nou sipozé ni gwo pozisyon menm kon zòt!ʼ Magwé nou pa sav ègzaktiman sa yo té di ében fè asou jou sala, sé zapòt la té obliyé moutwé yonn a lòt lanmityé èk jantiyès.

13. Kisa Jézi té fè lè sé zapòt li-a té moutwé vyé kawaktè? (Mafyou 20:25-28)

¹³ Lè sé zapòt-la moutwé vyé kawaktè, kisa Jézi té fè? Ès i té vin faché épi yo? Ès i té di i té kay alé pou chaché pli mèyè zapòt, nonm ki té ni pli imilité èk ki té kay twété yonn a lòt épi lanmityé? Non, pito sa, épi pasyans Jézi kowijé yo, paski i té sav yo té vlé fè sa ki dwèt. (Li Mafyou 20:25-28.) Wi, magwé sé zapòt-la té ka toujou babyé konsèné ki moun ki pli enpòtan anpami yo, Jézi pa té janmen pèd pasyans épi yo, mé i kontiné moutwé yo lanmityé èk jantiyès.​—Mak 9:34; Louk 22:24.

14. Ki kalté kilti sé zapòt la té lévé adan?

¹⁴ San dout, Jézi té chonjé kilti-a sé zapòt-la té lévé adan-an té enflouwansé yo an chay. (Jan 2:24, 25) Pou ègzanp, sé titja lwa-a èk sé Fawizyen-an té ka di si an moun pa ni gwo pozisyon i pa vo anyen. (Gadé vidiyo-a The Front Seats in the Synagogue an nòt-la pou létid-la pou Mafyou 23:6, an Bib New World Translation) Osi, sé titja lwa-a èk sé Fawizyen-an té kwè yo té pli bon pasé lézòt moun.f (Louk 18:9-12) Alò, Jézi té sav katjil kon sa té sa enflouwansé mannyè sé zapòt-la té ka gadé kò yo èk lézòt moun. (Pwov. 19:11) Konsa, Jézi té sav sé disip li-a té kay fè lèwè, alò i té ni pasyans épi yo. Anfen, Jézi enstwi yo mannyè pou abésé kò yo, èk mannyè pou moutwé lézòt lanmityé, pito yo fè konmsi yo pli bon pasé lézòt. Èk sa sé paski Jézi té sav yo té vlé fè sa ki dwèt.

KI MANNYÈ NOU SA SWIV ÈGZANP JÉZI?

15. Kisa nou sa apwann an sa ki té fèt ant Jémz, Jan èk sé lézòt zapòt-la?

¹⁵ Nou sa apwann plizyè bagay an sa ki té fèt ant Jémz, Jan èk sé lézòt zapòt-la. Sa vwé, Jémz èk Jan té an tò lè yo té mandé pou gwo pozisyon an Wéyòm-lan. Mé sé lézòt zapòt-la té an tò osi, paski yo kité sa distwé lilyon-an anpami yo. Mé Jézi té moutwé yo tout lanmityé èk jantiyès. Konsa, ki lison nou sa apwann an sa? Ében, sa ki pli enpòtan sé pa sa sé fwè nou-an fè, mé sé sa nou fè lè yo ofwansé nou. Alò, kisa ki sa édé nou? Ében lè an fwè ében an sè ofwansé nou, nou sa mandé kò nou kwèsyon tèl kon: ‘Pou ki sa fwè-a fè ka kontwayé mwen kon sa? Ès mannyè-a mwen ka santi ka moutwé mwen ni an vyé kawaktè mwen ni pou chanjé? Ès moun-an ki ofwansé mwen-an ka aji épi an pwòblenm? Menm si mwen ni bon wézon pou vini faché ès mwen sa moutwé moun-an lanmityé èk annèk pawdonnenʼy?ʼ Wi, lè nou moutwé sé fwè èk sè nou-an lanmityé èk jantiyès nou ka bay pwèv ki, nou vwéman sé disip Jézi.

16. Ki lòt bagay nou sa apwann an ègzanp Jézi?

¹⁶ Ègzanp Jézi ka osi enstwi nou pou éséyé kopwann sé fwè èk sè nou-an. (Pwov. 20:5) Sa vwé, nou pa sa li tjè moun kon Jézi, mé nou sa ni pasyans épi sé fwè èk sè nou-an lè yo ofwansé nou. (Èfés. 4:​1, 2; 1 Pita 3:8) Konsa, si nou fè éfò-a pou vini konnèt sé fwè èk sè nou-an pli mèyè, i kay pli ézé pou nou ni pasyans épi yo lè yo ofwansé nou. Annou konsidiwé yon ègzanp.

17. Ki bennéfis yon ansyen pou sékyout-la té twapé paski i fè éfò-a pou vini konnèt yon fwè pli mèyè?

¹⁷ Yon ansyen pou sékyout-la ka chonjé yon fwè i té jwenn an yonn an sé kongwigasyon-an i té ka vizité an Afwik. I di: “Fwè sala pa té sanm janti pyès.” Konsa, kisa ansyen-an pou sékyout-la fè? Ansyen-an pou sékyout-la di: “Pito mwen tjenn kò mwen hòd fwè-a, mwen fè éfò-a pou vini konnèt li pli mèyè.” Lè ansyen-an pou sékyout-la pasé tan épi fwè-a, i té apwann kilti-a fwè-a té lévé adan-an té enflouwansé mannyè-a i té ka twété lézòt. Ansyen-an pou sékyout-la osi di: “Lè mwen wè tout sé chanjman-an fwè-a ja fè, èk mannyè-a i té ka twavay wèd pou chanjé kawaktèʼy èk pou twété lézòt byen, sa fè mwen apwésyéʼy pli èk nou vini bon jan.” Wi, lè nou fè éfò-a pou vini konnèt sé fwè èk sè nou-an pli mèyè, i kay pli ézé pou moutwé yo lanmityé èk jantiyès.

18. Ki kwèsyon nou sa mandé kò nou si on fwè ében on sè ofwansé nou? (Pwovèb 26:20)

¹⁸ Délè ou pé santi nou ni pou palé épi fwè-a ében sè-a ki ofwansé nou-an. Kanmenm, avan nou palé épi moun-lan, i kay bon pou mandé kò nou kwèsyon tèl kon: ‘Ès mwen vwéman konpwann sa ki té fèt?ʼ (Pwov. 18:13) ‘Ès moun-lan ofwansé mwen èspwé, ében ès i té on lèwè?ʼ (Éklé. 7: 20) ‘Ès mwen ja ofwansé on lòt moun menm mannyè-a?ʼ (Éklé. 7:21, 22) ‘Si mwen palé épi moun-lan ès sa kay fè sitiwasyon-an pli mové?ʼ (Li Pwovèb 26:20.) Alò, lè nou fè tan pou mèdité asou sé kwèsyon sala, nou pé wéyalizé i kay pli mèyè pou annèk padonnen moun-lan, paski nou enmenʼy.

19. Kisa ou détèminé pou fè?

¹⁹ San dout, i a klè, Témwen Jéhova ka bay pwèv ki, yo sé vwéman disip Jézi, paski yo ka moutwé yonn a lòt lanmityé. Èk chak di nou ka bay pwèv ki, nou sé vwéman disip Jézi, lè nou moutwé sé fwè èk sè nou-an lanmityé, magwé yo pa pawfé èk yo ka ofwansé nou délè. Toujou chonjé, lè nou moutwé sé fwè èk sè nou-an lanmityé, sa ka édé lézòt moun pou idantifyé wilizyon vwé-a èk sa ka édé yo pou vini adowé Jéhova ansanm épi nou. Konsa, annou kontiné moutwé sé fè èk sè nou-an lanmityé-a ki ka idantifyé disip Jézi. Wi, sa sé détèminasyon nou.