Mannyè Nou Sa Ankouwajé Yonn A Lòt An Sé Mitin Nou-an

1. Pouki nou ka wéponn kwèsyon an sé mitin-lan?

NOU kontan atandé mitin. Èk pli enpòtan wézon-an nou ka atandé mitin, sé pou glowifyé Jéhova. (Sam 26:12; 111:1) Osi, nou ka atandé mitin pou ankouwajé yonn a lòt, sitou kon nou ka viv an sé dènyé jou-a. (1 Tèsa. 5:11) Alò, lè nou wéponn kwèsyon an sé mitin-lan, nou ka glowifyé Jéhova, èk nou ka ankouwajé sé fwè èk sè nou-an.

2. Ki diféwan chans nou ni pou bay wépons an sé mitin nou-an?

² Chak simenn, nou ni plizyè chans pou wéponn kwèsyon an sé mitin nou-an. Pou ègzanp, asou bout simenn-lan nou sa wéponn kwèsyon diwan Létid Gad-la. Osi, diwan mitin nou an mitan simenn-lan, nou ni plizyè chans pou bay wépons. Pou ègzanp, nou sa wéponn kwèsyon diwan sé pa sala: Fouyé Bib-la Pou Twapé Wichès, Létid Bib-la Pou Kongwigasyon-an, èk adan lòt pòsyon koté kongwigasyon-an sa wéponn kwèsyon.

3. Kisa ki pé fèʼy difisil pou wéponn on kwèsyon an sé mitin nou-an? Èk ki mannyè sa zapòt Pòl di an Hibrou 10:24, 25 sa édé nou?

³ Nou tout vlé glowifyé Jéhova èk ankouwajé yonn a lòt. Mé lèʼy vini pou nou wéponn kwèsyon an sé mitin nou-an délè sa difisil pou fè. Pou ègzanp, nou pé santi pè pou wéponn on kwèsyon, ében nou vwéman vlé wéponn pli kwèsyon, mé délè sé fwè-a pa ka kwiyé asou nou lè nou lévé lanmen nou. Alò, kisa ki sa édé nou lè nou èspéyansé sitiwasyon kon sa? Ében, sa Pòl ékwi sé fwè Hibrou-a sa édé nou wéponn kwèsyon sala. Lè zapòt Pòl té ka diskité wézon-an i enpòtan pou asanblé ansanm, i di, nou ni pou fiksé asou mannyè nou sa “ankouwajé yonn a lòt”. (Li Hibrou 10:24, 25.) Konsa, lè nou toujou chonjé ki, jis on ti wimak ki byen senp sa ankouwajé sé fwè èk sè nou-an, sa kay pousé nou pou lévé lanmen nou pou wéponn on kwèsyon menm si nou pè. Èk, menm si sé fwè-a pa kwiyé nou asé souvan, nou kay kontan lézòt an kongwigasyon-an kay twapé on chans pou wéponn on kwèsyon.​—1 Pita 3:8.

4. Kisa nou kay diskité an atik sala?

⁴ An atik sala nou kay diskité twa (3) bagay. (1) Mannyè nou sa ankouwajé yonn a lòt lè nou adan on piti kongwigasyon. (2) Mannyè nou sa ankouwajé yonn a lòt lè nou adan on gwan kongwigasyon koté on chay moun ka mété lanmen yo anlè pou wéponn kwèsyon. Èk (3), mannyè nou sa ankouwajé yonn a lòt épi wépons nou.

MANNYÈ NOU SA ANKOUWAJÉ YONN A LÒT LÈ NOU ADAN ON PITI KONGWIGASYON

5. Ki mannyè nou sa ankouwajé yonn a lòt si nou adan on piti kongwigasyon ében nou adan on gwoup?

⁵ Adan on piti kongwigasyon ében adan on gwoup, la pa ni on chay moun pou wéponn kwèsyon. Konsa, délè, fwè-a ni pou èspéwé on ti monman avan on moun mété lanmenʼy anlè. Èk lè sa fèt sé konmsi mitin-lan pa ni gou, èk sa pa kay ankouwajé nou pyès. Konsa, kisa ou sa fè? Ében, ou sa éséyé pou mété lanmenʼw anlè souvan, èk lèʼw fè sa, ou kay motivé lézòt pou wéponn kwèsyon pli souvan.

6-7. Kisa ou sa fè pou ni mwens pèwèz lèʼw vlé wéponn on kwèsyon?

⁶ Siʼw ka santi pè pou bay on wépons diwan mitin-lan, kisa ou sa fè? Ében chonjé, an chay di nou ka santi menm mannyè-a. Kanmenm nou tout vlé ankouwajé yonn a lòt. Alò, pou nou sa santi mwens pè lè nou vlé wéponn kwèsyon an sé mitin-lan, nou sa gadé pou diféwan sijèsyon ki sa édé nou santi mwens pè. Mé, ki koté nou sa twapé sé sijèsyon sala?

⁷ Nou sa twapé on chay sijèsyon konsèné mannyè pou bay wépons an sé Gad-la.b Konsa, siʼw wivizé sé sijèsyon sala, sa kay édéʼw pou ni mwens pèwèz lèʼw vlé wéponn on kwèsyon. Pou ègzanp yonn an sé Gad-la di, pwépawé byen. (Pwov. 21:5) Sa sé paski, siʼw okouwan épi enfòmasyon-an, i kay pli alèz pou wéponn on kwèsyon. Osi, tjenn wépons ou kout. (Pwov. 15:23; 17:27) Siʼw tjenn wépons ou kout, ou kay ni mwens pèwèz pasé siʼw bay on wépons ki lonng. Anfen, i kay pli ézé pou sé fwè èk sè-a konpwann on wépons ki kout pasé on wépons ki lonng. Èk lèʼw tjenn wépons ou kout, èk ou diʼy mannyè-a ou konpwann li, sa ka moutwé ou té pwépawé byen èk ou byen konpwann enfòmasyon-an.

8. Ki mannyè Jéhova ka santi konsèné éfò-a nou ka fè pou wéponn kwèsyon an sé mitin nou-an?

⁸ Mé siʼw ja éséyé fè adan sé sijèsyon sala, èk ou ni pèwèz toujou, ki asiwans ou sa ni? Ében ou sa ni asiwans-lan ki, Jéhova ka apwésyé tout éfò-a ou ka fè pou wéponn kwèsyon an sé mitin-lan. (Louk 21:1-4) Osi toujou chonjé, Jéhova pa ka janmen mandéʼw pou fè pli pasé ou sa fè. (Filip. 4:5) Konsa, gadé pou wè ki mizi kwèsyon ou sa wéponn an sé mitin-lan, èk pwédyé bay Jéhova pou fèʼw kam. Pou koumansé, pitèt ou sa chwazi pou bay on wépons ki kout.

MANNYÈ NOU SA ANKOUWAJÉ YONN A LÒT SI NOU ADAN ON GWAN KONGWIGASYON

9. Siʼw adan on gwan kongwigasyon ki difikilté ou pé èspéyansé?

⁹ Siʼw adan on kongwigasyon ki ni on chay pwoklanmatè ou pé èspéyansé on lòt difikilté. Pitèt la ni si tèlman fwè èk sè ki ka lévé lanmen yo pou bay wépons, konsa, fwè-a ki ka kondwi Létid Gad-la pa ka kwiyéʼw souvan. Èk sé sa ki té wivé yon sè yo ka kwiyé Danielle. Sè sala kontan wéponn kwèsyon an sé mitin-lan an chay.c Danielle santi lèʼy bay wépons i ka adowé Jéhova, i ka ankouwajé sé fwè èk sè-a, èk i ka fòtifyé lafwaʼy. Mé lèʼy koumansé atandé mitin adan on pli gwan kongwigasyon, sé fwè-a pa té ka kwiyé asouʼy souvan. Délè sé fwè-a pa té ka kwiyé asouʼy pa menm yon fwa diwan tout mitin-lan. Danielle di: “Mwen té ka santi kontwayé, sé konmsi mwen té ka mantjé on bèl pwivilaj. Èk sé pa yonn ében dé fwa sa té fèt. Konsa, mwen té jis di sé fwè-a té ka fè sa èspwé.”

10. Kisa ou sa fè ki sa baʼw pli òpòtyounité pou bay wépons an sé mitin-lan?

¹⁰ Ès ou ja santi mannyè-a Danielle té ka santi? Ében si sé sa, pitèt ou ka di, mwen pa kay wéponn kwèsyon ankò, mwen kay annèk kouté. Nou konpwann mannyè ou ka santi, mé, pa doubout wéponn kwèsyon. Konsa, kisa ou sa fè ki sa baʼw pli òpòtyounité pou wéponn kwèsyon an sé mitin-lan? Ében ou sa pwépawé plizyè wépons pou chak mitin. Èk siʼw koumansé wéponn kwèsyon bonnè an sé mitin-lan, ou kay ni plizyè òpòtyounité pou bay lòt wépons diwan mitin-lan. Osi, lèʼw ka pwépawé Gad-la, katjilé asou mannyè chak pasay ka sipòté tit atik-la. Siʼw fè sa, ou kay ni bon wépons pou bay diwan Létid Gad-la. Èk an plis di sa, adan pasay ka diskité enstwiksyon Bib ki difisil pou èspliké, konsa, ou sa pwépawé pou bay wépons asou sé pasay sala. (1 Kòr. 2:10) Pouki wézon? Sa sé paski mwens moun ka lévé lanmen yo anlè pou bay wépons asou sé pasay sala. Mé, siʼw apliké sé sijèsyon sala, èk apwé plizyè mitin ou pa wéponn on kwèsyon, kisa ou sa fè? Ében, pitèt avan mitin koumansé, ou sa di fwè-a ki ka kondwi Gad-la ki kwèsyon ou vlé wéponn.

11. Ki mannyè nou sa swiv konsèy-la an Filipay 2:4 padan nou an mitin?

¹¹ Li Filipay 2:4. Zapòt Pòl té bay sé fwè èk sè-a an pwèmyé syèk-la bon konsèy. I té ankouwajé yo pou pa gadé pou kò yo tousèl, mé pou toujou gadé pou lòt moun osi. Konsa, ki mannyè nou sa swiv konsèy sala padan nou an mitin-lan? Ében nou ni pou chonjé, sé pa nou tousèl ki vlé bay wépons, mé la ni lòt fwè èk sè ki vlé wéponn kwèsyon osi.

12. Kisa nou sa fè pou ankouwajé sé fwè èk sè nou-an an sé mitan-lan? (Gadé pòtwé-a osi.)

¹² Annou mèdité asou sa. Lèʼw ka kozé épi janʼw, ès ou ka palé si tèlman ou pa ka menm ba yo on chans pou palé? Mé non! Èk sa sé paski ou vlé sav kisa ki asou lidé yo. An menm mannyè-a, lè nou an mitin, nou vlé plizyè an sé fwè èk sè nou-an wéponn kwèsyon. Konsa, nou vlé ba yo on chans pou bay on wépons. Anfen, yonn an sé mannyè-a nou sa ankouwajé sé fwè èk sè nou-an, sé lè nou ba yo on chans pou wéponn kwèsyon an sé mitin-lan. (1 Kòr. 10:24) Alò, annou diskité mannyè nou sa fè sa.

13. Kisa nou sa fè pou bay pli fwè èk sè on chans pou bay an wépons an sé mitin-lan?

¹³ Yon mannyè nou sa ankouwajé sé fwè èk sè nou-an, sé lè nou tjenn wépons nou kout. Konsa, pli fwè èk sè kay twapé on chans pou bay on wépons. Alò, lè sé ansyen-an èk lòt fwè èk sè ki ni èspéyans tjenn wépons yo kout, sa kay ankouwajé lòt moun. Èk menm si wépons ou kout, éséyé pou pa palé asou tout pwen ki an pasay-la. Sa sé paski, siʼw palé asou tout pwen ki an pasay-la, la pa kay wèsté djè pou lòt moun di. Pou ègzanp, an pawagwaf sala nou diskité dé (2) bagay nou sa fè pou ankouwajé sé fwè èk sè-a. Pwèmyé-a sé, tjenn wépons nou kout, èk dézyenm-lan sé, éséyé pou pa palé asou tout pwen ki an pasay-la. Alò, si fwè-a kwiyéʼw pwèmyé pou wéponn kwèsyon-an pou pasay sala, ou sa palé asou yonn an sé pwen sala tousèl.

14. Kisa ki sa édé nou pou désidé konmen fwa pou lévé lanmen nou an sé mitin-lan? (Gadé pòtwé-a osi.)

¹⁴ Lèʼw ka désidé konmen fwa ou kay lévé lanmenʼw pou wéponn kwèsyon, sèvi bon jijman. Siʼw mété lanmenʼw anlè twò souvan, ou kay ba fwè-a ki ka kondwi Létid Gad-la tèt cho. Pouki? Sa sé paski pitèt i kay santi i oblijé kwiyé nou menm si lézòt moun pʼòkò twapé an chans pou bay yon wépons. Èk a kòz di sa, sa pé jis dékouwajé sèten moun. Èk pitèt yo kay di, yo pa kay lévé lanmen yo pou wéponn kwèsyon ankò.​—Éklé. 3:7.

15. (a) Si fwè-a pa kwiyé nou pou wéponn an kwèsyon, kisa nou pa vlé kwè konsèné fwè-a? (b) Ki mannyè sé fwè-a ki ka kondwi Létid Gad-la sa moutwé tout moun konsidéwasyon? (Osi, gadé bwèt-la: “Siʼw Ka Kondwi On Pa An Mitin.”)

¹⁵ Lè an chay pwoklanmatè ka lévé lanmen yo diwan an mitin, nou pé pa twapé chans-lan pou wéponn kwèsyon kon nou vlé. Délè, fwè-a pa kay sa kwiyé nou pou wéponn an kwèsyon. Èk lè sa fèt, sa pé dékouwajé nou. Mé, lè fwè-a pa kwiyé nou pou wéponn pyès kwèsyon, annou éséyé pou pa kwè sé èspwé fwè-a ka fè sa.​—Éklé. 7:9.

16. Ki mannyè nou sa ankouwajé lézòt lè yo wéponn kwèsyon an sé mitin-lan?

¹⁶ Toujou chonjé, siʼw pa sa wéponn kwèsyon souvan an sé mitin-lan, byen kouté kon lézòt moun ka patisipé, èk apwé mitin ou sa konplimanté yo. Èvèk lèʼw konplimanté sé fwè èk sè-a, sa kay ankouwajé yo menm kon si ou té bay on wépons. (Pwov. 10:21) Wi, lè nou konplimanté sé fwè èk sè-a lè yo wéponn kwèsyon an sé mitin-lan, nou sa ankouwajé yo.

MANNYÈ NOU SA ANKOUWAJÉ YONN A LÒT ÉPI WÉPONS NOU

17. (a) Ki mannyè pawan sa édé ich yo pou pwépawé on wépons ki apwopwiyab pou laj yo? (b) Silon vidiyo-a, ki kat (4) bagay nou sa fè pou pwépawé pou bay yon wépons? (Gadé nòt-la an bout paj-la osi.)

¹⁷ An ki lòt mannyè nou sa ankouwajé yonn a lòt an sé mitin nou-an? Ében, si ou ni ich, ou sa édé yo pou pwépawé wépons ki apwopwiyab pou laj yo. (Maf. 21:16) Pou ègzanp, délè si nou ka diskité sijé ki byen sèwyé tèl kon, pwoblenm an mawiyaj, ében péché ki ni pou fè épi sèks, la kay toujou ni yonn ében dé pasay ich ou sa wéponn kwèsyon asou. Osi, édé ich ou pou konpwann sé pa chak lè yo mété lanmen yo anlè pou bay on wépons fwè-a kay kwiyé yo. Alò, lèʼw édé ich ou pou konpwann sa, yo pa kay vini faché si fwè-a kwiyé asou on lòt moun pou wéponn on kwèsyon pito i kwiyé asou yo.​—1 Tim. 6:18.d

18. Kisa ki kay anpéché nou fiksé asou kò nou lè nou ka bay wépons? (Pwovèb 27:2)

¹⁸ Nou tout sa pwépawé pou bay bèl wépons ki kay bay Jéhova lonnè èk ankouwajé sé fwè èk sè nou-an. (Pwov. 25:11) Wi, nou sa bay on èspéyans ki pèsonnal, mé nou pa vlé palé twòp konsèné kò nou. (Li Pwovèb 27:2; 2 Kòr. 10:18) Konsa, pito nou palé an chay konsèné kò nou, nou vlé fiksé asou Jéhova, Pawòl li, èk pèp li. (Wév. 4:11) Kanmenm, si on lison ka mandé nou pou bay èspéyans ki pèsonnal, i apwopwiyab pou fè sa. Anfen, nou kay konsidiwé an ègzanp an lòt pasay-la.

19. (a) Kisa ki kay fèt lè nou fiksé asou lòt moun an sé mitin-lan? (Ronm 1:11, 12) (b) Pouki ou kontan bay wépons an sé mitin-lan?

¹⁹ Menm si la pa ni pyès lwa asou mannyè pou bay wépons, nou tout sa fè kon nou pé pou ankouwajé yonn a lòt. Sa vlé di, nou pé ni pou bay wépons pli souvan. Ében, nou kay ni pou kontanté épi sé wépons-lan nou sa bay, èk nou ni pou kontan lézòt ni pwivilaj-la pou bay wépons menm kon nou. Wi, lè nou fiksé asou lézòt moun an sé mitin-lan, nou tout kay ni tjè kontan èk “nou kay édé lafwa yonn a lòt vini [pli] fò”.​—Li Ronm 1:11, 12.