Jenn Moun, Ki Kalité Lavi Ou Vlé?

1. Lè Josaya, Ouzaya, èk Jèhowach vini wa, pouki twavay yo pa té ézé?

IMAJINÉ sa, si Jéhova té sèvi’w pou kondwi pèp li lè’w té jenn, ki mannyè ou té kay santi? Ki mannyè ou té kay sèvi lotowité’w? Bib-la ka di nou konsèné plizyè jenn moun ki té vini wa Jouda. Pou ègzanp, Jèhowach té annèk sèt (7) lanné, Ouzaya té sèz (16) lanné, èk Josaya té wit (8) lanné, lè yo vini wa. Ès twavay yo té ézé? Non! Èk sa sé paski yo té jenn, yo pa té ni èspéyans, mé yo té ni an chay lotowité. Konsa, i pa té kay ézé pou yo fè bon disizyon, ében pou yo kondwi adan on bon mannyè. Alò yo té bouzwen èd. Èvèk Jéhova èk lòt moun édé yo fè an chay bon bagay.

2. Pouki i bon pou apwann konsèné Josaya, Ouzaya, èk Jèhowach?

² Magwé pyès adan di nou pa wa ében wenn, i bon pou nou apwann konsèné Josaya, Ouzaya, èk Jèhowach. Mé pouki? Ében, sa sé paski nou sa apwann an chay bagay hòd ègzanp yo. Wi, nou sa apwann hòd sé bon disizyon-an èk sé mové disizyon-an yo té fè. Konsa an atik sala, kon nou ka konsidiwé ègzanp sé twa (3) wa sala, nou kay apwann pouki i enpòtan pou chwazi bon jan, pou toujou abésé kò nou, èk pou toujou wèsté pwé Jéhova.

CHWAZI BON JAN

3. Ki mannyè Chèf Pwèt Jèhòyada té édé Wa Jèhowach pou fè bon disizyon?

³ Fè bon disizyon menm kon Wa Jèhowach. Lè Wa Jèhowach té jenn, papa’y mò, èk Chèf Pwèt Jèhòyada lévé’y, èk enstwi’y konsèné Jéhova. Konsa, Jèhowach té savan, paski i kouté sé konsèy-la Jèhòyada té ka ba’y. Alò, a kòz di ègzanp Jèhòyada, Jèhowach désidé pou adowé Jéhova èk pou édé sé moun-lan adowé Jéhova osi. An plis di sa, Jèhowach fè asiwé sé moun-lan wanjé tanp Jéhova.—2 Kw. 24:1, 2, 4, 13, 14.

4. Silon Pwovèb 2:1, 10-12, ki bennéfis nou ka twapé lè nou enmen èk obéyi konmand Jéhova? Ba yon ègzanp.

⁴ Jenn moun, si pawan’w ében an lòt moun ka enstwi’w pou enmen Jéhova, èk pou swiv sé pwensip li-a an lavi’w, ou ka wisivwè an bon kado. (Li Pwovèb 2:1, 10-12.) Wi, pawan’w sa entwennen’w an plizyè mannyè. Annou gadé yon ègzanp. Katya sé on sè ki èspliké mannyè papa’y édé’y fè bon disizyon. Toulé jou lè papa’y té ka mennen’y lékòl, papa’y té ka diskité tèks-la pou jounen-an épi’y. Katya di: “Sé diskasyon-an papa mwen té ka ni épi mwen, té ka édé mwen pou fè bon disizyon lè mwen té ni pwòblenm.” Osi, pawan’w pé mété lwa ki bazé asou Bib-la. Èk pitèt kon an jenn moun ou pé santi lwa pawan’w ka anpéché’w fè sé bagay-la ou vlé fè. Kisa ki sa édé’w pou obéyi lwa pawan’w? Ében an sè, non’y sé Anastasia, ka chonjé mannyè pawan’y té ka fè’y konpwann sé wézon-an yo té ba’y sèten lwa. Anastasia di: “Pawan mwen édé mwen konpwann yo pa té ka mété lwa pou kontwolé lavi mwen, mé yo té vlé pwotéjé mwen paski yo enmen mwen.”

5. Ki mannyè pawan’w èk Jéhova kay santi lè’w kouté sé konsèy-la ki an Bib-la? (Pwovèb 22:6; 23:15, 24, 25)

⁵ Jenn moun, pawan’w kay kontan lè’w kouté sé konsèy-la hòd Bib-la. Èk sé pa pawan’w tousèl ou kay fè kontan, paski ou kay fè tjè Jéhova kontan osi, èk ou kay vansé pli pwé’y. (Li Pwovèb 22:6; 23:15, 24, 25.) Wi, ès sa pa ka enkouwajé’w pou swiv ègzanp Wa Jèhowach lè’y té jenn?

6. Apwé Jèhòyada mò, ki moun Jèhowach koumansé kouté? Èk kisa ki té wézilta-a? (2 Kwonnikèl 24:17, 18)

⁶ Apwann hòd sé mové disizyon-an Jèhowach té fè. Apwé Chèf Pwèt Jèhòyada mò, Jèhowach té swiv mové konpanni. Èk yo enflouwansé’y pou fè bagay ki pa bon. (Li 2 Kwonnikèl 24:17, 18.) Jèhowach koumansé kouté konsèy sé pwens Jouda-a ki pa té enmen Jéhova. Pitèt an lidé’w ou ka katjilé, Jèhowach té sipozé konnèt mèyè èk pa swiv sé moun sala, paski yo té ka fè bagay ki pa bon. (Pwov. 1:10) Mé malèwèzman, Jèhowach té kouté mové konsèy yo. Anfen, jik Zèkaraya, kouzen’y, té éséyé kowijé’y. Mé Jèhowach tjwé’y. (2 Kw. 24:20, 21; Maf. 23:35) Sa i fè-a té mové toubonnman! Sa osi ka moutwé i pa té ni bon sans. Nou ka wè, an koumansman-an Jèhowach sété an wa ki té fidèl, mé pli ta an lavi’y i doubout sèvi Jéhova èk i vini an mòdara. Èk kisa ki té wivé’y? Èben sé sèvant li-a tjwé’y. (2 Kw. 24:22-25) Alò, si Jèhowach té kontiné kouté Jéhova èk moun ki enmen Bondyé, lavi’y té kay pli mèyè. Konsa, ki lison ou ka apwann hòd mové ègzanp sala?

7. Kisa nou ni pou tjenn an lidé lè nou ka chwazi jan? (Gadé pòtwé-a osi.)

⁷ Yon lison nou sa apwann hòd mové ègzanp Jèhowach sé sa: Lè nou ka chwazi jan, nou ni pou chwazi moun ki enmen Jéhova èk ki vlé ba’y tjè kontan. Osi, nou sa fè jan épi moun ki ni pli laj pasé nou èben sa ki pli jenn pasé nou. Chonjé, Jèhowach té bon jan épi Jèhòyada magwé Jèhòyada té otan pli gwan pasé’y. Alò, i kay bon pou mandé kò’w kèstyon tèl kon: ‘Ès sé jan mwen-an ka édé mwen fòtifyé lafwa mwen an Jéhova? Ès yo ka obéyi wèg Bondyé, èk ès yo ka ankouwajé mwen pou fè menm bagay-la. Ès yo kontan palé konsèné Jéhova èk konsèné sa yo apwann an Bib-la? Ès jan mwen sé moun ki ka annèk di mwen sa mwen vlé tann? Ében ès yo ni kouwaj-la pou ban mwen konsèy lè mwen bouzwen’y?’ (Pwov. 27:5, 6, 17) Lavéwité-a sé sa: Si jan’w pa enmen Jéhova, i kay bon pou ladjé yo, paski yo pa bon jan pou ou. Mé si ou ni jan ki enmen Jéhova, pa janmen ladjé yo, paski yo sé bon jan ki kay toujou la pou édé’w!​—Pwov. 13:20.

8. Lè nou ka sèvi intannèt-la pou konminiké épi moun, kisa nou ni pou tjenn an lidé?

⁸ Jòdi jou, la ni plizyè bon mannyè pou palé épi fanmi nou ében jan nou asou intannèt-la. Kanmenm, an chay moun ka sèvi intannèt-la adan an mannyè pou jwenn antansyon. Pou ègzanp, yo ka mété pòtwé èk vidiyo asou intannèt-la, pou moutwé tout moun sa yo fè, ében sa yo achté. Alò, si ou ka sèvi intannèt-la pou konminiké épi moun, i kay bon pou mandé kò’w kèstyon tèl kon: ‘Pouki wézon mwen vlé mété enfòmasyon sala asou intannèt-la? Ès sé paski mwen vlé ankouwajé moun, ében ès sé paski mwen vlé laglwa? Ès mwen ka kité lézòt moun asou intannèt-la enflouwansé katjil mwen, pawòl mwen, èk aksyon mwen adan an mové mannyè?’ Wi, tout sa sé bon kèstyon pou mandé kò nou. Èk i kay bon pou nou swiv konsèy-la fwè Nathan Knorr té bay plizyè lanné pasé. I sété yon manm Pwensipal Konmité-a, èk i té di: “Pa éséyé plè moun. Si’w éséyé pou fè sa, ou pa kay plè pyèsonn. Éséyé pou plè Jéhova, èk ou kay plè tout moun ki enmen’y.”

TOUJOU ABÉSÉ KÒ’W

9. Kisa Jéhova té fè ba Wa Ouzaya? (2 Kwonnikèl 26:1-5)

⁹ Fè bon disizyon menm kon Wa Ouzaya. Lè Wa Ouzaya té on jenn gason i té ka toujou abésé kò’y. Osi ‘i kontiné chaché pou Bondyé’ èk i dévlopé ‘kwentif pou li’. (Li 2 Kwonnikèl 26:1-5.) Jéhova édé Ouzaya pou bat plizyè lèlmi pèp li. Èk Ouzaya fè asiwé i byen pwotéjé vil Jérouzalèm, èk Jéhova benni éfò’y. (2 Kw. 26:6-15) I mò lè’y té ni swasant wit (68) lanné, èk pou pwèskè tout lavi’y Jéhova benni’y. Wi, Wa Ouzaya té byen kontan épi tout sa Jéhova té édé’y pou fè.—Éklé. 3:12, 13.

10. Kisa ki té wivé Wa Ouzaya?

¹⁰ Apwann hòd mové disizyon Wa Ouzaya. Wa Ouzaya té akoutimé di moun sa pou fè, èk pitèt sa té fè’y kwè i té sa fè népòt sa i vlé. Pou ègzanp, yon jou Ouzaya antwé tanp Jéhova èk i éséyé bwilé lansan asou lotèl Jéhova. Mé chonjé, sé wa-a pa té ni dwa-a pou fè sa. (2 Kw. 26:16-18) Èvèk lè Chèf Pwèt Azaraya éséyé pou kowijé’y, i lévé faché. Malèwèzman, Ouzaya pa té wèsté fidèl pou Jéhova, èk Jéhova pini’y épi lad. (2 Kw. 26:19-21) Wi, lavi Ouzaya té kay otan pli mèyè si’y té kontiné abésé kò’y!

11. Kisa ki sa édé nou pou toujou abésé kò nou? (Gadé pòtwé-a osi.)

¹¹ Lè Wa Ouzaya té twapé an chay pouvwa, i obliyé tout sé bon bagay-la Jéhova té fè ba li. Alò, kisa nou sa apwann hòd ègzanp Ouzaya? Ében, nou pa janmen vlé obliyé, sé Jéhova ki ban nou tout sé bèl bagay-la nou ka enjwi ni an lavi nou ni an sèvis li. Konsa, pito nou bavadé konsèné sa nou ja fè, nou vlé toujou wimèsyé Jéhova pou sa nou sa fè.b (1 Kòr. 4:7) Osi, nou vlé abésé kò nou èk toujou chonjé nou pa pawfé, èk nou bouzwen kowijman. Pou ègzanp, yon fwè ki apipwé swasant (60) lanné di: “Mwen ja apwann pou pa vini ofwansé ében dékouwajé lè moun wè lèwè mwen. Konsa, lè mwen fè yon lèwè ki kouyon èk mwen twapé kowijman, mwen ka aksèpté kowijman-an èk mwen ka kontiné bay Jéhova pli mèyè mwen.” Bon, lè nou obéyi Jéhova èk nou ka toujou abésé kò nou, nou kay viv on lavi ki plen lakontantman.—Pwov. 22:4.

KONTINÉ VANSÉ PWÉ JÉHOVA

12. Lè Josaya té on jenn gason, ki mannyè i moutwé i té vlé vansé pwé Jéhova? (2 Kwonnikèl 34:1-3)

¹² Fè bon disizyon menm kon Wa Josaya. Lè Josaya té sèz (16) lanné, i té vlé vansé pwé Jéhova. Alò i té vlé apwann konsèné Jéhova èk obéyi’y. Mé, lavi pa té ézé pou jenn wa sala. Èk sa sé paski, a lè sala, majòwité di moun té ka adowé fo dyé. Konsa, Wa Josaya té bouzwen on chay kouwaj pou tiwé fo adowasyon anpami pèp Jéhova. Èk i vwéman moutwé kouwaj! Wi, avan Josaya té ven (20) lanné, i koumansé tiwé fo adowasyon anpami pèp Jéhova.—Li 2 Kwonnikèl 34:1-3.

13. Lè’w dèdiké lavi’w pou Jéhova, ki mannyè sa kay enflouwansé mannyè-a ou ka viv lavi’w?

¹³ Magwé ou jenn, ou sa swiv ègzanp Josaya. Wi menm kon Josaya, ou sa fè éfò-a pou apwann pli konsèné Jéhova èk sé bèl kawaktè’y-la. Lè ou fè sa, sa kay pousé’w pou dèdiké lavi’w pou Jéhova. Èk lè’w fè dèdikasyon’w, ki mannyè sa kay enflouwansé mannyè-a ou kay viv lavi’w? Èben Luke, sé an fwè ki té batizé lè’y té katòz (14) lanné. Jou-a i dèdiké lavi’y pou Jéhova i di: “Mwen kay mété Jéhova pwèmyé an lavi mwen, èk mwen kay éséyé pou fè tjè’y kontan.” (Mak 12:30) Wi, pa dé bon lavi’w kay bon si ou ni menm dézi-a épi Luke!

14. An ki mannyè jenn moun ka imité ègzanp Wa Josaya? Ba an ègzanp.

¹⁴ Ki difikilté ou ka èspéyansé kon on jenn moun? La ni plizyè jenn moun ki ka èspéyansé difikilté tou, mé yo ka éséyé imité Wa Josaya. Pou ègzanp, Johan sé yon fwè ki té batizé lè’y té douz (12) an. I di jenn moun an lékòl li ka ba’y chalè pou’y sèvi sigawèt ilèktronnik. An Anglé yo ka kwiyé sa ‘vaping’. Kisa ki bay Johan fòs-la pou pa kouté sé jenn moun-lan an lékòl li? Ében, Johan ka toujou chonjé, si’y koumansé sèvi sigawèt ilèktronnik, sa sa donmajé ni santé’y ni wilasyon’y épi Jéhova. Osi, Rachel, on sè ki batizé lè’y té katòz (14) lanné, èspliké sa ki ka wédé’y pou débat épi sé difikilté-a i ka twapé an lékòl. Rachel di: “Mwen ka éséyé gadé pou bagay ki ka fè mwen chonjé Jéhova èk Bib-la. Pou ègzanp, an bagay mwen apwann an lékòl, pé fè mwen chonjé an listwa an Bib-la ében an sèten pwofèsi. Ében délè, lè mwen ka palé épi an moun an lékòl, mwen ka katjilé asou kilès lévanjil mwen sa patajé épi’y.” Alò, menm si ou pa ka èspéyansé sé menm difikilté-a Wa Josaya té ni, ou sa fè bon disizyon èk ou sa wèsté fidèl pou Jéhova menm kon Josaya. Anfen, sé difikilté-a ou ka débat épi an jennès ou kay pwépawé’w pou lòt difikilté ou kay èspéyansé pli ta an lavi’w.

15. Kisa ki té édé Wa Josaya pou adowé Jéhova épi fidèlité? (2 Kwonnikèl 34:14, 18-21)

¹⁵ Lè Wa Josaya té vennsis (26) lanné, i koumansé an pwojé pou wanjé tanp-lan. Paditan yo té ka twavay, Hilkaya, pwèt-la, twouvé ‘liv lwa Jéhova. Bondyé té sèvi Moziz pou bay pèp li sé lwa-a’. Èk lè wa-a tann sa ki té ékwi an liv-la, lamenm i fè chanjman pou’y sa obéyi lwa Bondyé. (Li 2 Kwonnikèl 34:14, 18-21.) Konsa, kon an jenn moun, ès ou vlé li Bib-la toulé jou? Pitèt ou ja ka li’y toulé jou. Ès ou ka kontan sa’w ka li? Ében Luke nou té palé konsèné an pawagwaf twèz (13), ka ékwi adan an ti liv sé bèl pwen-an i twapé lè’y li Bib-la. Alò si’w fè sa, sa kay édé’w pou chonjé sé lévanjil-la ében sé lison-an ou apwann an Bib-la. Wi, pli ou konnèt sa ki an Bib-la èk pli ou enmen Bib-la, sa kay vwéman pousé’w pou adowé Jéhova. Èk menm mannyè-a Pawòl Bondyé té édé Wa Josaya pou fè sa ki dwèt, Bib-la sa édé’w tou.

16. Kisa ki annékòz Josaya pou fè an lèwè ki fè’y pèd lavi’y? Èk ki lison nou apwann an sa?

¹⁶ Apwann hòd mové disizyon-an Josaya té fè. Lè Josaya té apipwé twant nèf (39) lanné, i fè an lèwè ki fè’y pèd lavi’y. Èk wézon-an i fè lèwè sala, sé paski i dépan asou kò’y pito i mandé Jéhova pou diwèksyon. (2 Kw. 35:20-25) Ki lison nou sa apwann hòd mové disizyon-an Josaya té fè? Ében, menm si nou pé ni an chay laj ében nou ka étidyé Bib-la pou an chay tan, i enpòtan pou nou toujou apiyé asou Jéhova. Èk nou ka fè sa lè nou: (1) pwédyé pou diwèksyon’y, (2) étidyé Pawòl li, èk (3) kouté konsèy Kwityen ki ni èspéyans ka ba nou. Wi, si nou fè sé bagay sala, i kay difisil pou nou fè lèwè ki gwav, èk lavi nou kay ni pli lakontantman.​—Jémz 1:25.

JENN MOUN, OU SA NI AN BON LAVI

17. Ki lison nou sa apwann hòd wakont sé twa (3) jenn gason-an ki té vini wa Jouda?

¹⁷ Jenn moun sa fè plizyè bon bagay an jennès yo. Alò, sé wakont-la konsèné Jèhowach, Ouzaya, èk Josaya ka moutwé ki, jenn moun sa moutwé lasajès èk viv an lavi ki kay plè Jéhova. Sé vwé, délè sé jenn wa sala té fè lèwè ki mennen mové wézilta. Kanmenm, si ou imité bon ègzanp yo èk si’w pa fè sé lèwè-a yo té fè-a, ou sa ni an lavi ki plè lakontantman.

18. Ki ègzanp an Bib-la ki ka moutwé ou sa ni an bon lavi? (Gadé pòtwé-a osi.)

¹⁸ Bib-la ni lòt wakont konsèné jenn moun ki té vansé pwé Jéhova èk ki té viv an bon lavi. Yonn an sé jenn moun sala sété David. Lè David té byen jenn, i chwazi pou vini jan Jéhova. Èk pli ta an lavi’y, i vini an wa ki té fidèl pou Jéhova. Èk menm si délè I té fè lèwè, Jéhova té gadé’y kon an moun ki té fidèl. (1 Wa 3:6; 9:4, 5; 14:8) Konsa, si ou étidyé konsèné lavi David, sa kay édé’w wèsté fidèl pou Jéhova tou. Èben ou sa chwazi pou étidyé konsèné lòt jenn moun an Bib-la, tèl kon Mak èben Timòfi. Yo osi té koumansé sèvi Jéhova lè yo té byen jenn, èk yo wèsté fidèl pou li. Wi, sa fè Jéhova si tèlman kontan, èk sa bay yo an chay lakontantman tou.

19. Jenn moun, ki kalité lavi ou sa ni?

¹⁹ Jenn moun, mannyè ou sèvi lavi’w apwézan, kay enflouwansé ki kalité lavi ou kay ni an tan pou vini. Konsa si ou apiyé asou Jéhova pito asou kò’w, i kay édé’w pou fè bon disizyon an lavi’w. (Pwov. 20:24) Chonjé, Jéhova ka vwéman apwésyé tout sa ou ka fè ba li, èk i vlé’w ni an bon lavi. Wi, pli mèyè bagay-la ou sa fè épi lavi’w sé pou sèvi Papa nou Jéhova.