Mannyè Ou Sa Ni Lapé Magwé La Ni Ladjè Èk Vyolans
Gary ki té an militè-a di: “Avan mwen té étidyé Bib-la, mʼa té sa konpwann pouki la té ni tèlman movèsté, enjistis épi twaka an latè-a. Mé apwézan mwen ni lapé. Paski mwen sav Jéhova kay fè latè-a an plas ki sòv.”
Sé pa Gary tousèl ki ka santi mannyè sala. Konsidiwé mannyè Bib-la ja édé lòt moun.
BIB-LA DI: “Dyé Jéhova, ou bon èk ou pawé pou pawdonnen.”—Sam 86:5.
KI MANNYÈ VÈWSÉ SALA KA ÉDÉ? “Vèwsé sala ka ban mwen asiwans-lan ki Jéhova ni anpil mizèwikòd. Èk mwen sav i pawé pou pawdonnen mwen pou tout sa mwen ja fè lè mwen té ka goumen ladjè.”—Wilmar, Colombia.
BIB-LA DI: “Gadé! Mwen kay fè on latè nèf èk yon syèl nèf. Èk moun pa kay chonjé sé mové bagay-la ki té ka fè yo soufè. Sé mové bagay sala pa kay menm vini an lidé yo èk yo pa kay vini an tjè yo non plis.”—Izaya 65:17.
KI MANNYÈ VÈWSÉ SALA KA ÉDÉ? “Èspéyans mwen an militè-a afèkté lidé mwen anpil. Mwen ka soufè épi dipwèsyon èk mwen ka pannik anpil lè mwen anba strès. Mé lévanjil sala ka fè mwen chonjé touswit Jéhova kay fè mwen obliyé tout sé mové èspéyans sala. Èk anyen pa kay fè yo viwé an lidé mwen èben an tjè mwen ankò. Épi sa vwéman sé on bèl kado!”—Zafirah, Lanméwik.
BIB-LA DI: “Padan kondwit li, moun ki dwèt kay fléwi, èk lapé kay débondé jis tan lalin-lan dispawèt.”—Sam 72:7.
KI MANNYÈ VÈWSÉ SALA KA ÉDÉ? “Mwen toujou ka katjilé konsèné sa lévanjil sala ka di. Touswit, ladjè èk tout sé mové bagay-la ladjè ka annékòz kay dispawèt. Épi nou pa kay ni pou twakasé kò nou paskè tout moun nou enmen kay sòv.”—Oleksandra, Ukraine.
BIB-LA DI: “Sé moun ou-a ki mò-a kay viv ankò. . . . Zòt ki anba tè-a an lapousyè-a, lévé èk andjélé épi lajwa!”—Izaya 26:19.
KI MANNYÈ VÈWSÉ SALA KA ÉDÉ? “Lè yo té ka éséyé tjwé tout sé moun Tutsi-a, yo tjwé pwèskè tout fanmi mwen. Mé vèwsé sala ka ban mwen asiwans-lan ki, mwen kay wè yo ankò. Mwen ka gadé pou tan-an lè yo wésisité èk mwen kay sa tann vwa yo ankò!”—Marie, Rwanda.
BIB-LA DI: “Sé méchan-an kay dispawèt touswit. . . . Mé moun ki ka abésé kò yo kay éwityé tè-a Bondyé té pwonmèt yo-a. Yo kay pwan plézi an kantité lapé-a yo kay ni-an.”—Sam 37:10, 11.
KI MANNYÈ VÈWSÉ SALA KA ÉDÉ? “Magwé ladjè-a ja doubout, la ni enjistis èk mové moun toujou. Konsa, sé vèwsé sala ja édé mwen anpil. Jéhova ka wè tout bagay épi i ka konpwann sitiwasyon mwen. I pwonmèt pou mété an bout pou tout soufwans touswit. Épi nou pa kay menm chonjé sé bagay sala ankò.”—Daler, Tajikistan.
Bon. Sé moun sala anpanmi sé milyon Tèmwen Jéhova-a Bib-la ja édé pou jwenn lapé. Yo ja apwann mannyè pou ganyen a bout tout kalité hayisans tèl kon hayisans a kòz di diféwan was, kilti, èk péyi. Jis hayisans pou moun ki fè yo ditò. (Èfésòs 4:31, 32) Lè i vini pou patizan politik, Tèmwen Jéhova pa ka sipòté ni yonn ni lòt. Èk yo wifizé pwan pa an vyolans.—Jan 18:36.
Menm kon an fanmi, Tèmwen Jéhova ni lanmityé pou yonn a lòt, èk yo ka sipòté yonn a lòt. (Jan 13:35) Pou ègzanp, Oleksandra, nou té mansyonnen pli bonnè-a, té ni pou kouwi épi sésé’y, èk alé andan an lòt péyi annékòz di ladjè. Oleksandra di: “Kon nou antwé péyi-a, la menm nou wè sé fwè èk sè-a té la pou byenvini nou. Sipò-a yo ban nou-a, vwéman édé nou pou vini abitwé èk lavi adan an péyi nèf.”
Nou ka envité’w pou vini jwenn nou an sé mitin nou-a. La, nou ka apwann konsèné pwonmèt Bondyé pou on latè nèf ki plen lapé, èk nou ka apwann an Bib-la mannyè nou sa twapé lapé atjwèlman. Souplé, alé asou jw.org pou twouvé on plas mitin ki pwé’w. Èben sèvi wèbsayt-la pou mandé pou yon Tèmwen Jéhova étidyé Bib-la épi’w. Épi yo kay sèvi liv-la Ou Sa Ni On Bon Lavi Pou Tout Tan! pou djidé diskasyon-an.