Ladjè Èk Vyolans Kay Bout—Mé Ki Mannyè?

BONDYÉ KAY DÉTWI GOUVÈDMAN LÉZÒM

Bondyé kay détwi tout sé gouvèdman latè-a an ladjè-a Bib-la ka kwiyé Anmagèdonn.a (Wévélasyon 16:16) Bib-la di, “yo [ka] alé kwiyé tout sé wa-a ki an latè-a pou fè yo asanblé . . . pou fè ladjè asou gwan jou-a lè Bondyé-a ki ni tout pouvwa-a kay moutwé pouvwaʼy-la.” (Wévélasyon 16:14) Bondyé kay sèvi ladjè’y, Anmagèdonn, pou mennen an bout pou tout ladjè. Anmagèdonn sé dènyé ladjè-a ki kay pwan kou asou latè-a.

Bondyé kay wiplasé tout sé gouvèdman latè-a épi ‘wéyòm’ li, ében nou sa di gouvèdman’y. Èk gouvèdman sala kay kondwi hòd syèl-la, èk “i kay wèsté pou tout tan.” (Dannyèl 2:44) Bondyé ja chwazi gason’y Jézi Kwi pou kondwi gouvèdman’y. (Izaya 9:​6, 7; Mafyou 28:18) Sé Gouvèdmanb sala Jézi té enstwi sé disip li-a pou pwédyé pou. (Mafyou 6:​9, 10) Tout moun asou latè-a kay anba yon sèl gouvèdman, èk yo kay an lilyon.

Bon. Jézi pa kon majòwité sé kondwitè latè-a. I pa ka sèvi pouvwa’y pou gadé pou lentéwé’y tousèl. Èk sa sé paski i jis èk i pa ni pwéféwans. Pyèsonn pa kay antjèt annékòz di was yo, koté-a yo sòti-a èben kilti yo. (Izaya 11:​3, 4) Moun pa kay ni pou goumen pou jistis. Pouki? Sé paski Jézi kay fè asiwé chak moun twapé jistis. Wi, Jézi ‘kay délivwé moun ki pòv ki ka kwiyé pou soukou. Osi, i kay délivwé maléwé-a épi népòt moun ki pa ni pyèsonn pou édé yo . . . I kay délivwé yo anba enjistis èk vyolans.’—Sam 72:​12-14.

Gouvèdman Bondyé kay détwi tout fèman yo ka sèvi pou fè ladjè. (Mayka 4:3) I osi kay tiwé tout moun ki méchan ki wifizé doubout goumen ében ki ka distwé lapé lézòt. (Sam 37:​9, 10) Tout moun kay santi sòv népòt koté yo alé asou latè-a. Wi, lapé kay toupatou asou latè-a.—Izikèl 34:28.

Lè gouvèdman Bondyé ka kondwi latè-a, moun kay enjwi on bon lavi. Wi, pli bon lavi-a nou sa janmen ni! Gouvèdman Bondyé kay tiwé sé pwòblenm-lan ki ka annékòz ladjè tèl kon pòvté èk lafen. Èk osi, tout moun kay ni anpil bon manjé, épi yo kay byen konfòtab an kay yo menm.—Sam 72:16; Izaya 65:​21-23.

Gouvèdman Bondyé kay tiwé tout sé pwòblenm-lan ladjè ja annékòz. Ladjè ja annékòz moun pou blésé mové, i ja annékòz moun pou ni tèt cho èben lapenn. Èk san dout, ladjè ja pwan lavi an chay moun. Wi, gouvèdman Bondyé kay tiwé tout sé pwòblenm sala, èk i kay jis fè moun ki mò twapé lavi ankò. (Izaya 25:8; 26:19; 35:​5, 6) Ès sa pa té kay bèl? Absoliman! Moun ki pèd fanmi yo an ladjè kay wè fanmi yo ankò. Konsa, anba gouvèdman Bondyé, “la pa kay ni lapenn ében pléwé ében soufwans ankò, paski tout sé vyé bagay sala ja dispawèt.”—Wévélasyon 21:4.

BONDYÉ KAY TIWÉ PÉCHÉ

Lè gouvèdman Bondyé ka kondwi latè-a tout moun kay adowé’y. Èk Jéhovac, “Bondyé-a ki ni tout lanmityé épi lapé-a kay épi [yo].” (2 Kòrint 13:11) Moun kay apwann mannyè pou viv ansanm an lapé. (Izaya 2:​3, 4; 11:9) Èk moun ki obéyi Bondyé pa kay ni péché ankò. Yo kay vini pawfé.—Ronm 8:​20, 21.

BONDYÉ KAY DÉTWI SATAN ÈK SÉ ZÉLÈV LI-A

Gouvèdman Bondyé kay détwi Satan èk sé zélèv li-a. (Wévélasyon 20:​1-3, 10) Èk paski yo pa kay la pou enflouwansé moun pou fè sa ki mové, “lapé kay débondé jis tan lalin-lan dispawèt.”—Sam 72:7.

Ou sa mété tout konfyans ou an pwonmèt Bondyé pou mété on bout pou ladjè èk vyolans. I ni abilité-a èk dézi-a pou fè’y.

• Bondyé ni lasajès-la èk pouvwa-a pou’y sa mété on bout pou ladjè èk vyolans. (Jòb 9:4) Anyen pa enposib pou’y sa akonpli.—Jòb 42:2.

• Bondyé pa enmen wè moun soufè. (Izaya 63:9) Èk i osi, “hayi népòt moun ki enmen vyolans.”—Sam 11:5.

• Bondyé ka toujou tjenn pawòl li. I pa sa manti.—Izaya 55:​10, 11; Titòs 1:2.