Pouki Ladjè Èk Vyolans Ka Kontiné Fèt?

NOU TOUT NI PÉCHÉ

Bondyé té kwéyé pwèmyé pawan nou, Adanm épi Èv, an imaj li. (Jennésis 1:27) Sa vlé di, yo té kay sa wiflèkté kawaktè Bondyé èk moutwé lanmityé èk fè lapé. (1 Kòrint 14:33; 1 Jan 4:8) Malèwèzman, Adanm épi Èv dézobéyi Bondyé èk yo vini péchè. Konsa, nou tout kon ich yo, éwityé péché èk lanmò. (Ronm 5:12) Alò, paski tout moun sé péchè, mové katjil ka vini an lidé moun tanzantan, èk sa ka pousé yo pou fè mové bagay.—Jennésis 6:5; Mak 7:​21, 22.

LÉZÒM PA SIPOZÉ KONDWI KÒ YO

Bondyé pa té kwéyé nou pou nou sa kondwi kò nou. Bib-la di: “Sé pa dwa an nonm pou désidé ki koté pou mété pyé’y.” (Jérémaya 10:23) Sé pou wézon sala gouvèdman lézòm pa sa mété an bout pou ladjè èk vyolans konplètman.

ENFLOUWANS SATAN ÈK SÉ ZÉLÈV LI-A

Bib-la di: “Tout latè-a anba pouvwa Denmou-an.” (1 Jan 5:19) Denmou-an sé menm mové lèspwi-a Bib-la ka kwiyé Satan. I kontan tjwé moun. Èk i épi sé zélèv li-a ka enflouwansé moun pou fè vyolans èk koumansé ladjè. (Wévélasyon 12:​9, 12, Jan 8:44)