Kisa Bib-la Ka Di Konsèné Moun Ki Ka Viv Ansanm San Yo Mayé?

Wépons Bib-la Ka Bay

Bib-la di Bondyé pa vlé moun viv “pyès vyé lavi.” (1 Tèsalonnika 4:3) Kisa Bib-la ka palé konsèné lè’y sèvi èspwèsyon-an “vyé lavi”? Bib-la ka palé konsèné bagay tèl kon: adiltè, lè nonm ka kouché épi nonm ében fanm ka kouché épi fanm, èk sèks ant on nonm èk on fanm ki pa mayé épi yonn a lòt.

• Avan on nonm èk on fanm sa viv ansanm, pouki Bondyé vlé yo mayé?

• Ès on nonm èk on fanm sipozé viv ansanm avan yo mayé pou yo wè si yo kay ni lakontanman lè yo mayé?

• Ki mannyè an mawi èk madanm li sa ni an bon mawiyaj?

Avan on nonm èk on fanm sa viv ansanm, pouki Bondyé vlé yo mayé?

• Sé Bondyé ki établi mawiyaj. Bondyé établi awanjman sala, lè’y té mennen pwèmyé nonm-lan èk pwèmyé fanm-lan ansanm. (Jennésis 2:22-24) Èvèk Bondyé té vlé on nonm èk on fanm mayé èk wèsté fidèl pou yonn a lòt. I pa té janmen vlé on nonm èk on fanm pou viv ansanm san yo mayé.

• Bondyé konnèt sa ki pli mèyè pou lézòm. Bondyé vlé on nonm èk on fanm mayé èk viv ansanm pou tout tan. Wézon-an pou sa, sé paski i sav tout moun an fanmi-a kay twapé an chay bennéfis èk sa kay pwotéjé yo. Annou konsidiwé ègzanp sala. Lè nou achté an bagay, nou ka twapé an ti liv épi’y. Ti liv sala ka ban nou enstwiksyon pou édé nou konpwann mannyè pou sèvi’y byen. An menm mannyè-a, Bondyé ka ban nou enstwiksyon an pawòl li pou édé nou ni lakontanman an fanmi nou. Alò, si nou fè éfò pou swiv wèg Bondyé, nou kay twapé an chay bennéfis.—Izaya 48:17, 18.

  

• Lè moun ni sèks san yo mayé, sa pé mennen an chay pwoblenm. Pou ègzanp, fanm-lan pé vini ansent èk sa sé an bagay yo pa pwépawé pou, yo pé twapé mové maladi èben yo pé ni katjil négativ.

• Bondyé bay nonm èk fanm abilité-a pou fè ich lè yo ni sèks. An zyé Bondyé, lavi sé an bagay ki sen. Èk abilité-a Bondyé ja bay lézòm pou fè ich sé an kado ki byen spésyal. Konsa, Bondyé vlé nou ni sèks sèlman lè nou mayé. Èk lè nou obéyi Bondyé, nou ka moutwé nou vwéman apwésyé kado sala.—Hibrou 13:4.

Ès on nonm èk on fanm sipozé viv ansanm avan yo mayé pou yo wè si yo kay ni lakontanman lè yo mayé?

Pou an mawiyaj ni lakontanman, on nonm èk on fanm pa ni pou viv ansanm pou an tan avan yo mayé. Okontwè, yo kay ni lakontanman an mawiyaj yo lè yo ni lanmityé ki fò pou yonn a lòt. Èk osi, yo ni pou wèsté fidèl èvèk yo ni pou fè lidé yo pou twavay ansanm pou wanjé népòt pwoblenm yo pé èspéyansé. Anfen, pwonmèt-la mawi-a èk madanm-lan fè pou yonn a lòt lè yo mayé, ka pousé yo pou wèsté ansanm.—Mafyou 19:6.

Ki mannyè moun ki mayé sa ni an bon mawiyaj?

La pa ni pyès mawiyaj ki pawfé. Kanmenm, moun ki mayé sa ni an bon mawiyaj, si yo swiv konsèy-la ki an Bib-la. Annou gadé déotwa ègzanp:

• Mété labizwen mawi’w èben labizwen madanm ou avan sa’w.—1 Kòrint 7:3-5; Filipay 2:3, 4.

• Fè éfò pou moutwé lanmityé èk wèspé pou yon a lòt.—Èfésòs 5:25, 33.

• Apwann mannyè pou kontwolé sa ou ka di.—Pwovèb 12:18.

• Moutwé pasyans èk pa tadé pou pawdonnen.—Kòlòsé 3:13, 14.