Pouki Bondyé Kité Tèlman Jwif Mò An Dézyenm Gwo Ladjè-a? Èvèk Pouki I Pa Té Doubout Li?

An chay moun vlé wépons pou sé kwèstyon sala èk yo vlé soulajman osi, paski yo soufè an chay akòz di sa ki té fèt diwan dézyenm gwo ladjè-a. Diwan tan sala, gouvèdman péyi Almany anba Hitler té tjwé plizyé milyon Jwif. La ni moun ki ka kwè, bagay sala sé pli gwo movèzté-a lézòm janmen fè. Èk sé moun sala ka twapé’y difisil pou kwè an Bondyé, paski yo ka di, si la té ni on Bondyé, i pa té kay kité sé mové bagay sala fèt.a

Sa moun ka di konsèné Bondyé épi sa ki té wivé sé Jwif-la diwan dézyenm gwo ladjè-a

Sa moun ka di: I pa bon pou mandé, pouki Bondyé kité tèlman Jwif mò an dézyenm gwo ladjè-a.

Lavéwité-a: Jis moun ki té ni an chay lafwa, ki té mandé Bondyé pouki i ka kité mové bagay fèt. Pou ègzanp, pwofèt Habakòk té mandé Bondyé: “Pouki ou ka kité vyolans, movèzté, kwim, èk méchansté simen toupatou kon sa?” (Habakòk 1:3, Contemporary English Version) Pito i té pwi dèyè Habakòk pou sa’y té ka mandé’y-la, Jéhova fè Habakòk ékwi sé kwèstyon sala an Bib-la pou tout moun sa li yo.

Sa moun ka di: Bondyé pa mélé épi soufwans lézòm.

Lavéwité-a: Bondyé hayi tout kalité movèzté, épi soufwans-lan i ka annékòz. (Pwovèb 6:16-19) Bib-la di, lè Bondyé wè movèzté-a lézòm té ka fè toupatou asou latè-a an tan Nowa, tjè’y té an lapenn, ‘èk i té twis.’ (Jennésis 6:5, 6) Konsa san dout, Bondyé té an gwo lapenn, èk tjè’y té ka fè’y mal, lè’y wè sa ki té wivé sé Jwif-la diwan dézyenm gwo ladjè-a.—Malakay 3:6.

Sa moun ka di: Sa ki wivé sé Jwif-la diwan dézyenm gwo ladjè-a, sété pinisyon Bondyé asou was Jwif.

Lavéwité-a: Wi, Bondyé té kité sé jan Ronm-lan détwi vil Jérouzalèm an pwèmyé syèk-la. (Mafyou 23:37–24:2) Mé dépi tan sala, Bondyé pa ka chwazi pyès was moun pou ba yo favè spésyal, ében pinisyon. Pou Bondyé: “La pa ni pyès diféwans ant moun ki Jwif èk moun ki sòti an lòt nasyon.”—Ronm 10:12, Good News Translation.

Sa moun ka di: Si la té ni on Dyé Toupisan ki plen lanmityé, i pa té kay kité tèlman Jwif soufè èk mò diwan dézyenm gwo ladjè-a.

Lavéwité-a: Magwé Bondyé pa ka janmen annékòz soufwans, délè i ka pèwmité soufwans pou on ti tan.—Jémz 1:13; 5:11.

Pouki Bondyé pa té anpéché lanmò tout sé Jwif sala diwan dézyenm gwo ladjè-a?

Bondyé kité mové bagay sala fèt pou wéponn kwèstyon ki té lévé dépi tan lontan. Èk sé pou menm wézon sala Bondyé ka pèwmité soufwans lézòm. Osi, Bib-la ka moutwé a klè, sé pa Bondyé ki ka kondwi latè-a apwézan, sé Denmou-an. Èvèk sa sé on lòt wézon pouki mové bagay ka fèt. (Louk 4:1, 2, 6; Jan 12:31) Alò, annou gadé dé (2) pwen enpòtan an Bib-la, ki sa édé nou konpwann pouki Bondyé kité tèlman Jwif mò diwan dézyenm gwo ladjè-a.

1. Bondyé bay chak moun abilité-a pou fè disizyon yo pou kò yo. Bondyé té di Adanm épi Èv kisa i té vlé yo fè, mé i pa té fòsé yo pou obéyi’y. Yo chwazi pou désidé pou kò yo, kisa ki té bon èk kisa ki té mové. Sa sété on mové disizyon ki annékòz an chay soufwans pou lézòm. Osi, pou tout tan-an lézòm asou latè-a, yo ka fè mové disizyon, èvèk sa ka annékòz soufwans tou. (Jennésis 2:17; 3:6; Ronm 5:12) Anfen, liv-la Statement of Principles of Conservative Judaism di: “Lézòm ka mal sèvi abilité-a yo ni pou fè disizyon pou kò yo, èk sa ka annékòz an gwo pa an soufwans-lan ki an latè-a.” Mé, pito Bondyé pwan abilité-a lézòm ni pou fè disizyon pou kò yo, i ka ba yo tan pou éséyé kondwi kò yo san èd li.

2. Bondyé ni pouvwa-a pou wanjé tout donmaj èk tout soufwans ki té fèt akòz di dézyenm gwo ladjè-a, èk i kay fè sa. Bondyé pwonmèt pou wésisité milyon di moun ki ja mò, èk nou sa asiwé moun ki mò diwan dézyenm gwo ladjè-a kay anpanmi sé moun-lan ki kay wésisité-a. An lòt bagay sé sa, moun ki chapé anba dézyenm gwo ladjè-a ni an chay lapenn an tjè yo, èk lidé yo twakasé paski yo ka chonjé sé bagay téwib-la ki té fèt diwan tan sala. Mé, Bondyé pwonmèt pou éfasi kalité lapenn sala tou. (Izaya 65:17; Twav. 24:15) Bondyé ni an chay lanmityé pou lézòm. Èk sé pou wézon sala nou sa asiwé i kay akonpli tout sé bèl pwonmèt sala.—Jan 3:16.

An chay moun ki soufè akòz di sa ki té fèt diwan dézyenm gwo ladjè-a té sa tjenn lafwa yo fò, èk yo koumansé wè, lavi yo té ni valè. Kisa ki édé yo pou fè sa? Èben yo vini konpwann wézon-an pouki Bondyé ka pèwmité soufwans èk, kisa i kay fè pou wanjé tout donmaj soufwans ka annékòz.