KWÈSYON JENN MOUN KA MANDÉ
Ès I Vwéman Mové Pou Sèvi Mo Sal?
“Mwen ja abitwé ka tann moun ka jiwé, sa pa ka distwé mwen pyès. Sé konsa i yé jòdi jou, sa nòmal.”—Christopher, 17.
“Mwen té ka toujou jiwé lè mwen té pli jenn. I té byen ézé pou di mò sal mé i té byen wèd pou doubout.”—Rebecca, 19.
Kisa ou té kay di?
Kouman ou ka santi lè ou ka tann lòt moun jiwé?
Sa pa ka fè mwen anyen, mwen abitwé épi sa.
Délè, i ka anbété mwen, mé mwen pa ka di yo anyen.
M’a kontan’y pyès! M’a sa janmen abitwé épi sa!
Ès ou ka jiwé?
Awa! M’a ka jiwé pyès.
Wi, tanzantan.
Wi, byen souvan.
Ès ou kwè i sé an mové bagay lè moun ka jiwé?
Non, m’a ka kwè sa.
Wi, sa sé an mové bagay.
Ès kalité langaj-la ou ka sèvi enpòtan?
Si ou mandé an moun, “Ès ou kwè i sé an mové bagay pou sèvi mo sal?” Pitèt moun-lan pé di’w: “Non, m’a kwè sa. Tout moun ka jiwé. La pa ni anyen an sa.” Mé, ès i vwé tout moun ka sèvi mo sal?
Non. Lavéwité-a sé, la ni an chay moun jòdi ki pa ka sèvi mo sal. Èk yo ni bon wézon pouki yo pa ka sèvi mò sal. Annou konsidiwé yonndé wézon:
Sé pawòl-la ou ka sèvi ka moutwé ki kalité moun ou yé. Si ou sèvi mo sal, sa ka moutwé ou pa mélé épi santiman moun. Ès ou vwéman sé an moun kon sa?
Bib-la di: “Sé mové bagay-la ki andidan tjè an moun ki ka sòti an bouch li.”—Mafyou 15:18.
Lè yon moun ka sèvi mo sal, sé akonmsi i ka sali lézè-a. Konsa, pa sèvi pawòl ki kay blésé’w èk blésé lézòt?
Lè ou ka sèvi mo sal, sa ka annékòz lézòt pou kwè ou pa an bon moun. Liv–la Cuss Control ka di: “Mannyè-a nou ka palé sa détèminé ki kalté moun ki kay jan nou. Èk osi, si fanmi nou épi moun nou ka twavay épi kay wèspèkté nou èben si yo kay enmen nou. Mé sé pa sa tousèl, i sa détèminé si nou kay twapé an twavay èben twapé an pli gwo pozisyon an twavay-la. I kay osi détèminé ki mannyè moun ki pa konnèt nou kay gadé nou.” Liv-la ka osi di: “Ou sa mandé kò’w, ès wilasyon mwen épi lézòt té kay pli mèyè si mwen pa té ka jiwé?”
Bib-la di: “Sé pou zòt doubout hélé dèyè ében ensilté moun.”—Èfésòs 4:31.
Lè ou ka sèvi mo sal, sa pa ka fè moun wèspèkté’w èben kontan’w pli. An liv li, How Rude!, Dr. Alex Packer di: “Moun ka las épi moun ki ka toujou jiwé.” Dr. Packer osi di: “Moun ki ka sèvi mo sal byen souvan pa ka di bagay pou fè moun wi, bagay ki savan èben bagay ki wèspèktab. Si’w ka toujou sèvi mo sal, sa pa ka fè’w an moun ki entélijan èben an pli mèyè moun.”
Bib-la di: “Pa kité pyès vyé konmézasyon sòti an bouch ou.”—Èfésòs 4:29.
Sa ou sa fè
Fè’y objèktiv ou pou pa sèvi mo sal. Ou sa koumansé piti. Pou ègzanp, pou yon mwa, éséyé pou doubout sèvi mo sal. Èk ou sa ékwi pwogwé’w adan an liv èben asou an kalennda. Mé pou doubout sèvi mo sal konplètman, ou ni pou fè pli.
Pa gadé, kouté èben li bagay ki benyen mo sal. Bib-la di: “Swiv mové konpanni épi ou oblijé twapé kò’w an dézagwéman.” (1 Kòrint 15:33) Lè lévanjil-la mansyonnen “mové konpanni”, i pa ka sèlman palé konsèné moun, i ka osi palé konsèné anmizman tèl kon: pòtwé, vidéyo gémz èk mizik. Kenneth, an jenn tibway ki disèt-an (17) di: “Lè mizik-la dou, i tèlman ézé pou chanté chanson-an èk pa menm wéyalizé i ni mo sal adan’y.”
Moutwé ou sé an moun ki matwité. Adan moun ka sèvi mo sal paski yo kwè sa ka fè moun wè yo kon gwan moun. Mé sa pa vwé. Okontwè, mi sa Bib-la di konsèné moun ki matwité. I di: “Yo ja apwann diféwans ant bon èk mové èk yo abitwé fè sa ki bon.” (Hibrou 5:14) Wi, moun ki matwité abitwé fè sa ki bon èk yo pa ka kité lézòt moun enflouwansé yo pou fè sa ki pa bon. Konsa, yo pa ka chanjé pwensip yo djòs pou plè moun.
Lavéwité-a sé, sé pa anyen bon ki ka wézilta lè moun ka sèvi mo sal. Anfen, lè an moun ka sèvi mo sal, sa ka sali lidé’y èk lidé lòt moun ki owon’y. Èk nou sav, latè-a plen moun ki ka sèvi mo sal. Konsa, liv-la Cuss Control di: “Pa swiv sé moun-lan ki ka sèvi mo sal-la.” Liv-la osi di: “Fè tout sa ou pé pou sèvi bon langaj lè’w ka palé épi moun. Lè’w fè sa, ou kay ni tjè kontan èk moun kay kontan’w èk ni wèspé pou ou osi.”