KWÈSYON JENN MOUN KA MANDÉ
Ès had sala bon?
Pouki nou sipozé mélé épi sa nou ka mété asou nou? Nou sipozé mélé paski had nou ka wévélé an chay bagay konsèné nou. Konsa, i bon pou mandé kò’w: Kisa had mwen ka di konsèné mwen?
Twa lèwè moun ka fè lè yo ka chwazi abiman èk pwensip ki sa édé’w fè on pli bon chwa
Pwèmyé lèwè-a: Yo ka swiv lamòd-la yo ka wè asou télévizyon-an, intannèt-lan ében an sé magazin-lan.
An jenn fi non’y sé Theresa di: “Délè, mwen vlé achté an sèten had paski mwen ka wè an chay bagay asou télévizyon-an konsèné’y. Lè ou ka toujou wè moun épi on sèten kalité had, ou vlé ni had sala tou!”
Sé pa tifi tousèl ki vlé achté sa yo ka wè asou télévizyon-an, intannèt-lan ében an sé magazin-lan. Liv-la, The Everything Guide to Raising Adolescent Boys ka di: “Sé tibway-la osi, ka swiv lamòd-la yo ka wè-a.” I ka kontiné di: “Moun ka pibliyé bagay pou enflouwansé sé tibway-la dépi yo tou piti.”
Pwensip ki sa édé’w fè on pli bon chwa: Bib-la ka di an Pwovèb 14:15: ‘Moun-lan ki sòt ka kwè tout sa moun di. Mé moun-lan ki ni lèspwi ka byen gadé koté i ka mété pyé’y.’ A ling épi pwensip sala, katjilé byen asou sa ou ka wè asou télévizyon-an, intannèt-lan èk an sé magazin-lan. Lè yo di’w, “had sala sèksi, i kay fè’w gadé pli bèl”, “had sala popilè”, èben “had sala, sé sa ki pli nèf” mandé kò’w:
‘Si mwen swiv mòd sala, ki moun ki kay twapé bennéfis-la?’
‘Kisa moun kay di lè yo wè had-la ki asou mwen?’
‘Ès had sala ka wiflèkté sé pwensip-la mwen ka swiv-la?’
Mi an sijèsyon: Pou yon simenn, népòt lè ou wè moun ka pwomoté had pitèt asou télévizyon-an, intannèt-lan èben an sé magazin-lan, mandé kò’w sé kwèsyon sala: Ki kalté lavi had sala ka pwomoté? Ès yo ka fè mwen kwè mwen ni pou achté had sala? Yon jenn fi, non’y sé Karen di: “La ni an chay chalè pou abiyé bèl épi had ki byen awanjé ki kout èben séwé, ki ka moutwé tout kò’w. Sé jan-an ki ka pwomoté had-la sav sé jenn moun-lan kontan gadé bèl. Konsa yo ka pwan lavantaj asou yo.”
Dézyenm lèwè-a: Ou ka abiyé menm kon tout moun pou yo aksèpté’w.
On jenn tibway non’y sé Manuel di: “Si on kalté had popilè èk ou pa ni’y, moun kay jijé’w.” Anna, on jenn fi, san dout té kay ka dakò épi sa. Mi sé sa i di: “Sé pa had-la ki enpòtan, mé sé pou moun aksèpté’w!”.
Pwensip ki sa édé’w fè on pli bon chwa: Bib-la ka di: “Sé pa pou ou swiv mannyè latè-a.” (Ronm 12:2) An ling épi lévanjil sala, gadé tout sé had-la ou ni-a èk mandé kò’w:
‘Kisa ki ka enflouwansé mwen pou chwazi had kon sa?’
‘Ès i enpòtan pou ni had moun ki popilè fè èben had hòd on konpanni ki popilè?’
‘Ès mwen ka kòtstayl asou moun épi had mwen?’
Mi an sijèsyon: Délè, on moun pé kwè sé dé (2) chwa tousèl i ni—swé i abiyé menm kon tout moun pou yo aksèpté’y, èben i pa swiv lamòd yo èk yo widjèkté’y. Mé lavéwité-a sé sa, ou ni on twazyenm chwa. Èk sa sé pou doubout asou dé pyé’w! Ni konfyans an kò’w èk pa kité lòt moun enflouwansé’w. Épi an lè sala ou pa kay ni on tjè antjèt lè i vini pou wipinyon lòt moun.
Twazyenm lèwè-a: Katjil-la ki, ‘Si ou vlé gadé pli byen, ou ni pou abiyé pli sèksi.’
On jenn fi non’y sé Jennifer di: “Pou di’w lavéwité-a, délè mwen ka anvi mété had ki kout, séwé, èben dékòlté.”
Pwensip ki sa édé’w fè on pli bon chwa: Bib-la di “Bèltéʼw pa sipozé dépan asou bagay ou ka abiyé kòʼw. . . Bèltéʼw sipozé sòti an tjèʼw.” (1 Pita 3:3, 4) A ling épi lévanjil sala, katjilé asou kisa ki pli enpòtan, bèlté’w èben bèl kawaktè’w?
Mi an sijèsyon: Chonjé, bagay-la ki ka fè on moun vwéman bèl sé imilité. Wi i vwé, imilité pa on bagay ki popilè jòdi jou, mé katjilé’y mannyè sala:
Ès ou janmen ni on konmézasyon épi on moun ki sé on palapata, ki enmen bavadé konsèné kò’y? I vlé moun kontan’y. Mé sa i pa sav-la sé sa, paski i twò bava, moun pa djè enmen wèsté owon’y.
Anpil moun pa enmen wèsté owon moun ki ka abiyé pou yo jwenn atansyon menm kon yo pa enmen wèsté owon on palapata ki ka bavadé twòp
Ou wè, sèten abiman ou mété asou’w sa fè lézòt gadé’w menm kon palapata sala. Wi, abiman’w sa fè moun kwè ou vlé yo gadé’w. Épi osi, i sa fè yo kwè, ou ka katjilé konsèné kò’w tousèl. Anplis di sa, moun pé kwè ou pa mélé èk kay fè népòt bagay pou jwenn atansyon. Épi wi, délè, ou pé jwenn atansyon sala hòd moun ki pa bon.
Si ou pa vlé atansyon hòd sé kalité moun sala, abiyé andan on mannyè ki pwòp épi wèspèktab. On jenn fi non’y sé Monica di: “Lè ou ni imilité, sa pa vlé di ou ni pou abiyé kon gwan manman’w. Non. I senpliman vlé di abiman’w sipozé moutwé ou ka wèspèkté lézòt, èk ou vlé yo wèspèkté’w.”