KWÈSYON JENN MOUN KA MANDÉ
Poutji Mwen Sipozé Pwédyé?
An chay jenn moun di, yo ka pwédyé. Mé yo osi di, yo pa ka pwédyé touléjou. Èk adan jenn moun ka katjilé, ‘ès lapwiyè sé senpléman an bagay pou fè mwen santi byen?’ Ében, ‘ès lapwiyè sé an bagay ki byen enpòtan?’
Kisa lapwiyè yé?
Lè nou ka pwédyé, nou ka vwéman konminiké épi Kwéyatè-a, Jéhova. Katjilé asou kisa sa vlé di. Magwé Jéhova otan pli ho pasé lézòm an tout mannyè, lévanjil-la an Twavay 17:27 di: “I pa lwen nou pyès.” Anfen, an Jémz 4:8, Bib-la ka ban nou an bèl envitasyon. I di: “Vini pwé Bondyé èk i menm kay vini pwéʼw.”
Kisa ki sa édé’w pou vini pwé Bondyé?
Yonn an sé bagay-la ki sa édé’w pou vini pwé Bondyé sé lapwiyè. Paski lè’w ka pwédyé ou ka palé épi Bondyé.
An lòt bagay ki sa édé’w vini pwé Bondyé sé lè’w étidyé Bib-la. Paski lè’w ka étidyé Bib-la, Bondyé ka “palé” épi’w.
Konsa lè’w ka pwédyé èk étidyé Bib-la, sa sé konminikasyon ant ou épi Bondyé. Kalité konminikasyon sala ant ou èk Bondyé kay édé’w pou fòtifyé wilasyon’w épi’y.
Jeremy di: “Lè nou ka palé bay Jéhova, nou ka konminiké épi Moun-lan ki Pli Ho-a, épi sa sé yonn an sé pli gwo pwivilaj-la lézòm sa ni.”
Miranda di: “Lè mwen pwédyé èk mwen di Jéhova tout sa ki an tjè mwen, sa ka fè mwen santi pli pwé’y.”
Ès Bondyé ka kouté lapwiyè?
Menm si ou ka kwè an Bondyé èk ou ka pwédyé, ou pé twapé’y difisil pou kwè Bondyé ka vwéman kouté lapwiyè’w. Kanmenm, an Sam 65:2 Bib-la ka kwiyé Jéhova, ‘Moun-lan Ki Ka Tann Lapwiyè.’ Èk an 1 Pita 5:7, Bondyé ka envité’w pou mété “tout bagay ou ni ki ka baʼw mal tèt an [lanmen’y].” Pouki i vlé’w fè sa? I vlé’w fè sa “paski i ka gadé apwé’w.”
Katjilé asou sa: Ès ou ka toujou fè tan pou palé épi bon jan’w? Ében ou sa fè menm bagay-la épi Bondyé. Toujou fè tan pou’w palé épi Bondyé an lapwiyè. Èk lè’w ka palé épi’y sèvi non’y, Jéhova. (Sam 86:5-7; 88:9) Anfen an 1 Tèsalonnika 5:17, Bib-la ka ankouwajé’w pou “toujou pwédyé.”
Moises di: “Lapwiyè sé an konmézasyon ant mwen èk Papa mwen ki an syèl. Èk lè mwen ka pwédyé, mwen ka di Jéhova tout sa ki an tjè mwen èk an lidé mwen.”
Karen di: “Lè mwen ka pwédyé mwen ka palé épi Jéhova ofon tjè mwen, menm kon lè mwen ka palé épi manman mwen ében épi an bon jan.”
Konsèné kisa mwen sa pwédyé?
Filipay 4:6 di: “An tout lapwiyèʼw, mandé Bondyé sa ou bizwen-an épi toujou wimèsyéʼy lè ou ka pwédyé.”
Ès sa vlé di, mwen sa pwédyé konsèné népòt pwoblenm mwen ni? Wi! Anfen, an Sam 55:22, Bib-la ka di’w: ‘Ladjé tout twaka’w asou Jéhova, èvèk i kay sipòté’w.’
Kanmenm, lè’w ka pwédyé bay Bondyé, ou pa sipozé palé konsèné pwoblenm ou tousèl. An jenn madanm yo ka kwiyé Chantelle di: “Si sé sèlman lè mwen bizwen èd mwen té ka pwédyé, mwen pa té kay ni an bon wilasyon épi Jéhova. Mwen ka kwè, pwèmyé bagay-la mwen sipozé fè lè mwen ka pwédyé, sé wimèsyé Jéhova. Èk mwen sipozé wimèsyé Jéhova pou an chay bagay.
Katjilé asou sa: Ki diféwan bagay an lavi’w ou vlé wimèsyé Jéhova pou? Ès ou sa katjilé asou twa (3) bagay ou sa wimèsyé Jéhova pou jòdi-a?
Anita di: “Nou sa jis wimèsyé Jéhova pou an bagay ki senp. Pou ègzanp. Lè nou wè an bèl flè, nou sa di an ti lapwiyè pou wimèsyé Jéhova pou bèl flè-a.”
Brian di: “Ou sa mèdité asou an bagay Jéhova fè ou vwéman kontan, ében ou sa mèdité asou an lévanjil ki ka touché tjè’w. Èk apwé, ou sa wimèsyé Jéhova pou sé bagay sala.”