Adanm Épi Èv Dézobéyi Bondyé

Yon jou lè Èv té pa kò’y an jaden-an, an sèpan vin palé épi’y. Sèpan-an di’y: ‘Ès sa vwé Bondyé pa ka kité’w manjé fwi an tout sé pyé bwa-a ki an jaden-an?’ Èv wéponn èk i di: ‘Nou sa manjé fwi an tout pyé bwa ki an jaden-an antiwan yon sèl pyé. Si nou manjé fwi ki sòti an pyé sala, nou kay mò.’ Kon sa sèpan-an di Èv: ‘Ou pa kay mò. Anfen, si ou manjé fwi sala ou kay vini menm kon Bondyé.’ Mé ès sa té vwé? Non, sèpan-an té manti. Mé Èv té kwè sèpan-an. Alò Èv kontiné gadé fwi-a. Èk pli i gadé’y, sé pli i té anvi manjé’y. Kon sa i pwan fwi-a, i manjé’y èk i bay Adanm adan’y osi. Bon, ès Adanm té sav yo té kay mò si yo manjé fwi-a? Wi i té sav. Mé wannman i manjé’y.

Pli ta menm jou sala, Jéhova té vin palé épi Adanm èk Èv. I mandé yo pouki yo té dézobéyi’y. Èv blanmé sèpan-an èvèk Adanm blanmé Èv. Kon sa, paskè Adanm épi Èv té dézobéyi Jéhova, i fè yo kité jaden-an. Èk pou fè asiwé yo pa té kay sa janmen viwé antwé, Bondyé mété an sab difé ki ka tounen èk nanj an bayè jaden-an.

Sé pa Adanm épi Èv tousèl Jéhova té pini. Anfen Jéhova té di, moun-nan ki manti bay Èv té kay twapé pinisyon osi. Bon sé pa on sèpan ki té vwéman palé épi Èv, paskè Jéhova pa té fè sèpan pou yo sa palé. Alò, ki moun ki té palé épi Èv? An mové nanj. I té fè sa pou kwennen Èv. Yo ka kwiyé mové nanj sala Satan ében Denmou-an. Kanmenm, an tan ki ka vini, Jéhova kay détwi Satan. Lè sala, Satan pa kay sa kontiné kwennen moun pou fè yo fè bagay ki pa bon.