Ki Moun Ki Té Jòb?

Jòb sété on nonm ki té ka adowé Jéhova. I té ka viv adan on péyi yo té ka kwiyé Òz. I té ni on bèl gwo fanmi, i té wich, èk i té ka édé moun ki té pòv, tèl kon madanm ki pèd mawi yo an lanmò, èk manmay ki pa té ni pawan. Wi, Jòb té ka fè sa ki té dwèt an zyé Bondyé. Mé, i té jwenn an chay gwo pwoblenm an lavi’y. Anfen, annou gadé adan sé mové bagay-la Jòb èspéyansé.

Jòb pa té sav sa, mé Satan té ka véyé’y. Konsa, Jéhova di Satan: ‘Ès ou ja òbzòvé sèvant mwen, Jòb? La pa ni pyèsonn kon li asou latè-a. I ka obéyi mwen, èk i ka fè sa ki dwèt.’ Lè sala, Satan di Jéhova: ‘Wi, i ka obéyi’w. Mé, wézon-an i ka obéyi’w, sé paski ou bay an chay bagay. Annèk gadé sa, ou bay Jòb tè, ou ba’y zannimo, ou ka pwotéjé’y, èk ou ka benni’y. Pwan tout sé bagay sala èk asiwé, i pa kay obéyi’w ankò.’ Konsa, Jéhova di Satan: ‘Mi! Tout bagay Jòb ni, i an lanmen’w. Sèl bagay mwen ka di’w sé sa, pa lévé lanmen’w asou Jòb.’ Ès ou konnèt wézon-an pouki Jéhova kité Satan mété Jòb anba tès? Ében, sé paski Jéhova té ni konfyans ki, Jòb té kay wèsté fidèl anba népòt tès Satan té mennen asou’y.

Apwé Satan fini palé épi Jéhova, i alé èk i ladjé an chay gwo pwoblenm asou Jòb, yonn dèyè lòt. Èk Jòb èspéyansé tout sé pwoblenm sala an yon jou. Pwèmyé bagay-la Satan fè sé sa, i voyé on gany moun hòd on péyi yo té ka kwiyé Sébé, pou vòlè tout bèf Jòb, èk tout bouwik li. Apwé sa, Satan voyé on difé pou détwi tout sé mouton-an Jòb té ni-an. Twazyenm bagay-la Satan fè Jòb sé sa, i sèvi on gany moun ki té sòti péyi Kaldiya pou vòlè tout kanmèl li. Èk menm gany moun sala tjwé sé sèvant-la ki té ka otjipé sé zannimo-a. Mé sa ki fè Jòb pli lapenn sé sa, i té ni sèt «7» gason èk twa «3» fi, èk Satan tjwé yo tout. Sé jenn moun-lan té lakay pli gwan fwè yo ka manjé èk bwè épi yonn a lòt. Paditan yo té la, Satan voyé on gwo van pou détwi kay-la koté yo té yé-a, èk yo tout mò. Mésyé! Sa kasé tjè Jòb, èk i té twis toubonnman. Mé, i pa janmen doubout adowé Jéhova.

Ès ou sa imajiné yon moun ka èspéyansé tout sé mové bagay sala an yon jou! Mé, Satan p’òkò té fini. I té vlé Jòb soufè plis toujou. Konsa, i fè Jòb twapé on mové maladi. Maladi sala té ka fè klou sòti toupatou asou Jòb, dépi an tèt li pou wivé jis anba pyé’y. Sé pa dé doulè sa té ka bay Jòb. Wi, i soufè an chay. Èk a lè sala, Jòb pa té sav pouki tout sé mové bagay sala té ka wivé’y, mé wannman, i kontiné adowé Jéhova. Bon, Jéhova té ka wè mannyè Jòb té ka soufè, èk ou sa asiwé, sa fè Jéhova an chay lapenn. Mé an menm di tan-an, i té kontan pou wè, Jòb té ka wèsté fidèl pou li.

Apwé Satan fè Jòb tout méchansté sala, i voyé twa «3» nonm pou wè Jòb. Sé nonm-lan sété jan Jòb, mé yo kité Satan sèvi yo pou mété Jòb anba on lòt tès. Tann sa yo di Jòb. Yo di’y: ‘San dout, ou fè an mové bagay, èvèk ou ka éséyé pou tjenn li an sigwé. Sé pou sa Bondyé ka pini’w.’ Jòb di yo: ‘Mwen p’òkò fè anyen ki mové.’ Mé wannman, sa yo di-a mété dout an lidé Jòb konsèné Jéhova, épi i koumansé kwè, sé Bondyé ki té ka mennen sé pwoblenm sala asou’y. Konsa i di, Jéhova pa té ka twété’y byen.

Bon, paditan sé twa «3» nonm-lan té ka palé épi Jòb, on jenn nonm yo té ka kwiyé Ilayou, té ka kouté konmézasyon-an. Apwé yo fini palé, Ilayou di yo: ‘Tout sa zòt di-a sé mansonj. Jéhova twòp pli gwan pasé nou sa konpwann. I pa sa janmen fè anyen ki méchan. I ka wè tout bagay, èk i ka édé moun lè yo ni pwoblenm.’

Osi, Jéhova palé épi Jòb. I di Jòb: ‘Koté ou té yé lè mwen fè syèl-la èvèk latè-a? Pouki ou ka di, mwen pa ka twété’w byen? Ou ka palé, mé ou pa sav pouki sé bagay sala ka wivé’w.’ Lè sala, Jòb dakò i té fè on lèwè. Konsa i di Jéhova: ‘Mwen antò. Apwézan mwen konnèt ou sav tout bagay. Mwen té tann konsèné’w, mé atjwèlman mwen vwéman vini konnèt ou. La pa ni anyen ki enposib pou’w fè. Pawdonnen mwen souplé, pou sé bagay-la mwen té di-a.’

Jòb wèsté fidèl pou Jéhova anba tout sé tès-la Satan té mennen asou’y. Èk apwé sa, Jéhova benni Jòb. I bay Jòb bon santé, èvèk i ba’y pli bagay pasé sa’y té ni avan. Jòb té ni on bon lavi, èk i viv pou an chay tan. Wi, magwé i pa té toujou ézé, Jòb obéyi Jéhova. Èk, Jéhova benni’y pou sa. Ès ou kay fè menm kon Jòb, èk kontiné obéyi Jéhova, menm si i pa toujou ézé pou’w fè sa?