Yo Fè Jéhova An Pwonmèt

Apipwé dé «2» mwa apwé manmay Izwayèl kité Éjip, yo wivé bò Mòn Saynay èk yo kanpé la. Padan yo té la, Jéhova kwiyé Moziz èk Moziz mouté mòn-nan. Lè’y wivé la Jéhova di’y: ‘Mwen sové pèp Izwayèl. Alò si yo kouté mwen èk obéyi lwa mwen yo kay vini pèp mwen.’ Kon sa Moziz désann mòn-nan èk i di sé moun-nan sa Jéhova té di’y. Ki mannyè sé moun-nan wéponn? Yo di: ‘Nou kay fè tout sa Jéhova mandé nou fè.’

Apwé yo wéponn Moziz, i viwé mouté mòn-nan. Kou sala, Jéhova di’y: ‘An twa «3» jou, mwen kay palé épi’w. Vèti sé moun-nan. Di yo pa éséyé mouté Mòn Saynay.’ Kon sa Moziz viwé désann èk i di manmay Izwayèl pou pwépawé kò yo pou kouté sa Jéhova té kay di.

Twa «3» jou apwé, manmay Izwayèl wè zéklè èk an nwaj nwè asou mòn-nan. Yo osi tann gwo loway èk an kòn ka kòné. Apwé sa Jéhova désann mòn-nan adan an difé. Manmay Izwayèl té si tèlman pè, yo koumansé twanblé. Mòn-nan té kouvè épi lafimé èk i koumansé soukwé gwo soukwé. An mizi an mizi, son kòn-nan vini pli fò. An lè Bondyé palé èk i di: ‘Mwen sé Jéhova. Zòt pa sipozé adowé pyès lòt dyé.’

Apwé Jéhova fin palé épi sé moun-nan, Moziz viwé mouté mòn-nan ankò. Padan’y té la Jéhova ba’y lwa asou mannyè sé moun-nan sipozé adowé Bondyé. I osi bay Moziz lwa asou mannyè yo sipozé konpòté kò yo. Moziz ékwi sé lwa-a èk apwé i li’y bay manmay Izwayèl. Sé moun-nan di: ‘Nou kay fè tout sa Jéhova mandé nou fè.’ Wi, sé sa yo té pwonmèt Bondyé. Mé kwèsyon-an sé, ès yo té kay tjenn pwonmèt sala?