An Wéyòm Ki Kay La Pou Tout Tan

Yon swè, Wa Nèbyoukadnéza té ni an wèv ki té byen dwòl. Sa i wévé-a anbété’y tèlman, i pa té sa menm dòmi ankò. Alò i voyé kwiyé tout sé majisyen’y-lan èk i di yo: ‘Èspityé wèv mwen ban mwen.’ Yo di’y: ‘Wa mwen, di nou sa ou wévé.’ Mé Nèbyoukadnéza di yo: ‘Non! Mwen vlé zòt di mwen sa mwen wévé, si pa sa, n’a tjwé zòt tout.’ Yo viwé di wa-a: ‘Ében di nou sa ou wévé, èk apwé, nou kay èspityé’y ba ou.’ I di yo: ‘Sé kwennen zò vlé kwennen mwen. Mwen di zò di mwen sa mwen wévé!’ Yo di wa-a: ‘La pa ni pyèsonn asou latè ki sa fè sa. Sa’w ka mandé-a sé an bagay ki enposib.’

Nèbyoukadnéza té si tèlman faché, i bay lòd pou yo tjwé tout sé majisyen-an èk tout sé nonm-lan ki ka ba li konsèy. Bon Dannyèl, Chadrak, Michak, èk Abèdnigo té anpami sé nonm-lan yo té kay tjwé-a. Kon sa Dannyèl mandé wa-a pou ba’y an ti tan. Apwé sa, Dannyèl èk sé jan’y-lan pwédyé pou mandé Jéhova pou édé yo. Ki sa Jéhova fè?

Jéhova bay Dannyèl an vizyon ko’y moutwé’y wèv-la Nèbyoukadnéza té ni. Jéhova osi èspityé wèv-la bay Dannyèl. Li denmen, Dannyèl ay oti sèvant wa-a èk i di’y: ‘Pa tjwé pyès sé majisyen-an èk sé nonm-lan ki ka bay wa-a konsèy. Mwen sa èspityé wèv-la wa-a té ni.’ Alò sèvant-lan mennen Dannyèl douvan Nèbyoukadnéza. Dannyèl di wa-a: ‘Bondyé ja fè’w sav sa ki kay fèt an tan ki ka vini. Mi sa’w té wévé: Ou té wè an gwo bidim èstati. Tèt li té an lò, lèstonmak li èk bwa’y té an dajan, bouden’y èk tjwis li té an tjwiv, janm li té an fè, èk pyé’y té an fè ki mélé épi tè gwa. Apwé sa, an wòch sòti adan an montany, èk i konyen pyé èstati-a. Èstati-a kwazé an poud èk van-an alé épi’y. Wòch-la vini an gwo montany èk i plen latè-a.’

Apwé sa Dannyèl di wa-a: ‘Mi sa wèv ou vlé di: Tèt lò-a sé wéyòm ou. Dajan-an sé an wéyòm ki kay vini apwé’w. Apwé sala, la kay ni yonn kon tjwiv ki kay kondwi tout latè-a. Wéyòm-lan ki vini apwé’y kay fò kon fè. Finalman, la kay ni an wéyòm ki divizé. I kay an ti mannyè fò kon fè èk i kay an ti mannyè fèb kon tè gwa. Wòch-la ki kay vini an montany sé Wéyòm Bondyé. I kay kwazé tout sé wéyòm sala èk i kay la pou tout tan.’

Lè Nèbyoukadnéza tann sa, i tonbé fas a tè douvan Dannyèl. I di’y: ‘Bondyé’w èspityé wèv-la ba ou. La pa ni pyès Dyé kon li.’ Alò, andji Nèbyoukadnéza tjwé Dannyèl, i mété’y chèf tout sé nonm-lan ki ka bay wa-a konsèy. I osi fè Dannyèl an kondwitè an Babilonn. Ou wè mannyè Jéhova wéponn lapwiyè Dannyèl en?