An Wéyòm Ki Menm Kon An Gwo Pyé Bwa

Yon swè, Nèbyoukadnéza té ni an wèv ki fè’y byen pè. Kon sa i voyé kwiyé sé nonm-lan ki ka ba’y konsèy pou yo èspityé wèv-la ba li. Mé yo pyès pa té sa èspityé wèv-la. Finalman, wa-a palé épi Dannyèl.

Nèbyoukadnéza di Dannyèl: ‘An wèv-la, mwen wè an pyé bwa. I té si tèlman ho, i té ka wivé syèl. Népòt koté moun té yé asou latè-a, yo té sa wè’y. Pyé bwa-a té ni bèl fèy èk i té chajé épi fwi. Zannimo té ka pwan lonbwaj anba’y èk jibyé té ka fè nich asou bwanch li. Apwé sa, an nanj sòti an syèl, èk i di byen fò: “Koupé pyé bwa-a, èk koupé bwanch li. Mé kité chous-la épi wasin li an tè-a, èvèk bandé’y épi fè èk tjwiv. Tjè pyé bwa-a kay chanjé, i pa kay tjè an moun ankò, mé i kay vini tjè an bèt. Èk i kay wété kon sa pou sèt «7» tan. Lè sala, moun ki vivan kay konnèt sé Bondyé ki ka kondwi èk i sa bay népòt moun i vlé yon wéyòm.”’

Jéhova fè Dannyèl konnèt sa wèv-la vlé di. Lè Dannyèl vin konpwann wèv-la, i vin pè toubonnman. I di: ‘Wa mwen, sé vonmyé wèv sala té ni pou fè épi lèlmi’w. Mé malèwèzman, wèv-la ni pou fè épi’w. Gwo pyé bwa-a yo koupé-a, sé ou. Ou kay pèd wéyòm ou, èk ou kay manjé zèb an savann-nan menm kon an bèt mawon. Mé paski nanj-lan di pou kité chous pyé bwa-a épi wasin li an tè-a, ou kay vini wa ankò.’

Yon lanné apwé, Nèbyoukadnéza té ka maché an koté ki plat asou do kay li. I gadé fòs bèl Babilonn bèl èk i di: ‘Gadé bèl gwo vil sala mwen fè. Ében mwen pa ézé!’ Padan’y té ka palé, yon vwa ki sòti an syèl di: ‘Nèbyoukadnéza! Wéyòm-lan pa sa ou ankò.’

La menm, Nèbyoukadnéza pèd tèt li èk i vini menm kon an bèt mawon. I té oblijé kité kay li èk ay viv an savann-nan anpami sé zannimo-a. Chivé Nèbyoukadnéza vini lonng kon plim an lèg, èk zonng li vini menm kon gwif jibyé.

Apwé sèt «7» lanné, Nèbyoukadnéza vini konpwann kò’y èk Jéhova fè’y wa Babilonn ankò. Lè sala Nèbyoukadnéza di: ‘Mwen ka glowifyé Jéhova, Wa syèl. Apwézan mwen konnèt sé Jéhova ki ka kondwi. I ka fè moun ki ni lògèy abésé kò yo, èk i sa bay népòt moun i vlé yon wéyòm.’