LISON 2

Kozé Adan An Mannyè Ki Natiwèl

2 Kòrint 2:17

WÉZIMÉ: Palé menm kon ou ka palé toulé jou. Palé adan an mannyè ki sensè. Èk osi, palé adan an mannyè ki kay moutwé mannyè-a ou ka santi konsèné sijé-a èk sé moun-lan ki ka kouté’w.

MANNYÈ POU FÈ’Y:

Pwédyé èk pwépawé byen. Mandé Jéhova pou édé’w pou fiksé asou konmisyon-an, èk pa asou kò’w. Katjilé asou sé pwen-an ki pli enpòtan ou vlé moun konpwann. Pito ou annèk li sa ki douvan’w, éséyé pou èspliké’y an pawòl ou menm.

Si ou kay li an pasaj an Bib-la, èben an pasaj adan an lòt piblikasyon, éséyé pou konpwann pasaj-la byen pou ou sa li’y byen. Si ou ka li pawòl an lòt moun, éséyé pou mété lavi an pawòl ou. Mé, fè sa adan an mannyè ki natiwèl.
Palé hòd tjè’w. Katjilé asou wézon-an moun bizwen tann konmisyon-an. Si ou tjenn lidé’w asou sé moun-lan ki ka kouté’w-la, yo kay wè sa an konpòtman’w, an sin ou fè épi lanmen’w, èk an sé èspwèsyon-an asou fidji’w. Lè sala, sé moun-lan kay wè ou sensè èk ou sé jan yo.

Palé menm kon ou ka palé toulé jou, mé palé épi wèspé. Palé byen èk palé adan an mannyè ki klè, pou moutwé moun konmisyon’w enpòtan.
Gadé sé moun-lan ki ka kouté’w. Si sa pa kay ofwansé moun, gadé yo an zyé yo. Lè ou ka bay an diskou, éséyé pou gadé diféwan moun pito ou annèk gadé toupatou.