LISON 18
Ki Mannyè Ou Sa Konnèt Moun Ki Vwéman Kwityen?
Bilyon di moun owon latè-a ka di yo sé Kwityen. Mé yo tout pa ka kwè an menm bagay-la. Èk yo tout ka viv lavi yo épi diféwan pwensip. Konsa, ki mannyè nou sa konnèt moun ki vwéman Kwityen?
1. Kisa on Kwityen yé?
Kwityen sé moun ki ka kwè an Jézi èk yo ka swiv li. (Li Twavay 11:26.) Ki mannyè Kwityen ka moutwé yo ka vwéman swiv Jézi? Jézi di: “Si ou kontiné fè sa mwen di-a, sé lè sala ou sé disip mwen pou vwé.” (Jan 8:31) Sa vlé di, moun ki ka vwéman swiv Jézi sipozé obéyi tout sa Jézi enstwi. Jézi té bazé tout enstwiksyon’y asou lévanjil-la. Konsa, moun ki ka vwéman swiv Jézi sipozé aksèpté Bib-la èk bazé tout kwéyans yo asou’y.—Li Louk 24:27.
2. Ki mannyè Kwityen ki vwé ka moutwé lanmityé?
Jézi té di sé disip li-a: “Sé pou zòt enmen yonn a lòt menm kon mwen enmen zòt.” (Jan 15:12) Ki mannyè Jézi té moutwé i té enmen sé disip li-a? I pasé tan épi yo, i enkouwajé yo, èk i édé yo. I jis bay lavi’y pou yo. (1 Jan 3:16) Menm kon Jézi, moun ki ka swiv li pa ka annèk di yo ni lanmityé. Yo ka moutwé yo ni lanmityé pou yonn a lòt ni an pawòl yo ni an aksyon yo.
3. Ki twavay moun ki ka vwéman swiv Jézi ka fè?
Jézi té bay sé disip li-a twavay pou fè. “I voyé yo alé pou di tout moun mannyè Bondyé ka kondwi.” (Louk 9:2) Sa vlé di, Kwityen té ni pou pwéché konsèné Wéyòm Bondyé. An pwèmyé syèk-la, sé Kwityen-an té ka pwéché an sé plas-la yo té ka adowé Bondyé. Osi, yo té ka pwéché toupatou an plas tèl kon, laplas-la, bò lanmè-a, èk lakay moun. (Li Twavay 5:42; 17:17.) An menm mannyè-a, moun ki ka vwéman swiv Jézi jòdi, ka pwéché lavéwité-a ki an Bib-la, népòt plas yo jwenn moun. Èk paski yo enmen vwézinaj yo, yo kontan pou sèvi tan yo, épi fòs yo pou patajé bon nouvèl-la épi yo.—Mak 12:31.
ANNOU APWANN PLI
Apwézan, annou apwann diféwans-lan ant moun ki ka vwéman swiv Jézi, èk moun ki pa ka swiv li.
4. Yo chaché pou lavéwité-a ki an Bib-la
Sé Kwityen-an an pwèmyé syèk-la té enmen Pawòl Bondyé
Adan moun ki ka di yo ka swiv Jézi, pa ka kwè i enpòtan pou konpwann lavéwité-a ki an Bib-la. Ében yo pa ka kwè i enpòtan pou swiv sa yo apwann an Bib-la. Annou gadé VIDIYO-A, Mannyè Kwityen Pèd Chimen Yo èk apwé nou kay kozé asou kwèsyon sala:
Kisa adan wilizyon ja fè pou anpéché moun konnèt lavéwité-a, magwé yo di yo ka swiv Jézi?
Jézi té enstwi lavéwité-a ki an Pawòl Bondyé. Annou li Jan 18:37, èk apwé nou kay kozé asou kwèsyon sala:
Silon sa Jézi di an Jan 18:37, ki mannyè nou sa idantifyé sé moun-lan “ki enmen lavéwité-a”?
5. Moun ki ka swiv Jézi ka pwéché lavéwité-a ki an Bib-la
Sé Kwityen-an an pwèmyé syèk-la té ka pwéché bay lézòt
Avan Jézi alé an syèl, i té bay sé disip li-a an twavay pou fè. Èk yo ka fè twavay sala jis jòdi. Annou li Mafyou 28:19, 20 èk Twavay 1:8, èk apwé nou kay kozé asou kwèsyon sala:
Silon sé dé (2) lévanjil sala, ki mizi pwéché sé disip Jézi-a té kay pwéché bon nouvèl-la?
6. Moun ki ka swiv Jézi ka pwatiké sa yo ka pwéché
Kisa ki té édé Tom pou wè i té twouvé sé moun-lan ki ka vwéman swiv Jézi? Annou gadé VIDIYO-A, èk apwé nou kay kozé asou sé kwèsyon sala:
An vidiyo-a, pouki Tom té dézapwenté épi wilizyon?
Kisa ki té édé Tom pou wè i té twouvé sé moun-lan ki ka vwéman swiv Jézi-a?
Aksyon on moun pli enpòtan pasé pawòl li. Annou li Mafyou 7:21, èk apwé nou kay kozé asou kwèsyon sala:
Kisa Jézi kontan pli, pou nou di nou sé Kwityen, ében pou nou fè sé bagay-la i vlé nou fè-a?
7. Moun ki ka swiv Jézi enmen yonn a lòt
Sé Kwityen-an an pwèmyé syèk-la té enmen yonn a lòt
Ki mannyè moun ki ka vwéman swiv Jézi, ja mété lavi yo anwis pou pwotéjé fwè èk sè yo? Annou gadé VIDIYO-A, I Té Pawé Pou Mò Pou Kanmawad Li èk apwé nou kay kozé asou sé kwèsyon sala:
An vidiyo-a, kisa ki pousé fwè Lloyd pou mété lavi’y anwis pou pwotéjé fwè Johansson?
Ès ou kwè aksyon fwè Lloyd ka moutwé i sé yon Kwityen ki vwé?
Annou li Jan 13:34, 35, èk apwé nou kay kozé asou sé kwèsyon sala:
Silon lévanjil sala, ki mannyè disip Jézi kay twété moun hòd lòt was ében lòt nasyon?
Si yon ladjè pété, ki mannyè disip Jézi kay twété moun hòd lòt was ében lòt nasyon?
ADAN MOUN KA DI: “Sé pa dé méchansté wilizyon ja fè. Mwen pa ni anyen pou fè épi wilizyon.”
Ki lévanjil ou sa sèvi pou moutwé on moun mannyè nou sa konnèt Kwityen ki vwé?
CHONJÉ SÉ PWEN SALA
Moun ki ka vwéman swiv Jézi ka obéyi sa Bib-la ka di, yo enmen yonn a lòt, èk yo ka pwéché bon nouvèl-la.
Annou Wivizé Sa Nou Ja Apwann
Asou kisa disip Jézi sipozé bazé kwéyans yo?
Ki bèl kawaktè ki ka idantifyé Kwityen ki vwé?
Ki twavay moun ki ka vwéman swiv Jézi ka fè?
LÒT ENFÒMASYON OU SA GADÉ
Li konsèné an gwoup moun ki ka fè tout sa yo pé pou swiv ègzanp Jézi èk enstwiksyon’y.
Li konsèné sa ki té édé an danm pou twapé “yon fanmi ki vwéman enmen Bondyé”.
“Yo Té Sèvi Bib-la Pou Wéponn Chak Kwèsyon!” (Gad-la, li 1 Avwi, 2014)
Apwann mannyè Kwityen ki vwé ka édé fwè èk sè yo, lè yo bizwen èd.
Nou Ka Édé Fwè Èk Sè Nou Lè An Dézas Fèt—An Ti Pòsyon (3:57)
Jézi té di kisa ki té kay idantifyé moun ki ka swiv li. Ègzanminé mannyè moun ki ka swiv Jézi jòdi jou ka fè sé menm bagay-la sé Kwityen-an an pwèmyé syèk-la té ka fè.
“Kisa Ki Ka Idantifyé Kwityen Ki Vwé?” (Gad-la, li 1 Mas, 2012)