LISON 27
Ki Mannyè Lanmò Jézi Sa Sové Nou?
Wézon-an nou ka péché, soufè èk mò, sé paski pwèmyé pawan nou, Adanm épi Èv, té dézobéyi Bondyé.a Mé sa pa vlé di, nou pa ni èspwa. Jéhova kay sèvi Gason’y, Jézi Kwi, pou tiwé malédiksyon péché èk lanmò. Touswit, nou pa kay èspéyansé sé mové bagay sala ankò. Bib-la ka enstwi, lè Jézi mò, i potjiwé on wanson. On wanson sé pwi-a on moun ka péyé pou délivwé on lòt moun. Pwi-a Jézi té péyé-a, sé lavi pawfé-a i té ni kon on nonm. (Li Mafyou 20:28.) Kon on nonm ki té pawfé, Jézi té ni dwa-a pou viv asou latè-a pou tout tan. Mé lè i mò, i boukanté dwa sala, pou ouvè chimen-an pou nou sa twapé tout sa Adanm épi Èv pèd. Osi, Jézi moutwé nou ki mizi enmen li èk papa’y Jéhova, enmen nou. Lison sala kay édé nou fòtifyé apwésiyasyon nou pou lanmò Jézi.
1. Ki mannyè lanmò Jézi sa édé nou jòdi?
Paski nou éwityé péché, nou ka fè an chay bagay ki ka déplè Jéhova. Kanmenm, si nou vwéman an lapenn pou péché nou fè, nou sa pwédyé ba Jéhova an non Jézi, èk mandé’y pou pawdonnen nou. Èk osi, nou ni pou fè tout sa nou pé pou pa fè sé menm lèwè sala ankò. Lè sala, nou sa enjwi on bon wilasyon épi Bondyé. (1 Jan 2:1) Bib-la di an 1 Pita 3:18: “Jézi mò yon sèl fwa pou bon, épi lanmòʼy sé pou tout tan. Sa ki té ka viv dwèt-la mò pou lapéti sé sa ki pa té ka viv dwèt-la, pou i té sa mennen nou bay Bondyé.”
2. An tan ki ka vini, ki mannyè lanmò Jézi kay édé nou?
Jéhova voyé Jézi pou bay lavi pawfé’y pou lézòm. Konsa, “Tout moun ki kwè an [Jézi] pa kay pèd lavi yo, mé yo kay ni lavi étonnèl.” (Jan 3:16) Gwanmèsi sakwifis Jézi, Jéhova kay wanjé tout sé mové bagay-la dézobéyisans Adanm annékòz. Sa vlé di, si nou ni lafwa an sakwifis Jézi, nou kay enjwi lavi pou tout tan an pawadi asou latè-a!—Izaya 65:21-23.
ANNOU APWANN PLI
Apwézan, annou apwann pli konsèné wézon-an Jézi bay lavi’y pou lézòm. Èk osi, ou kay apwann kouman sakwifis Jézi sa édé’w.
3. Lanmò Jézi ka délivwé nou hòd péché èk lanmò
Annou gadé VIDIYO-A, èk apwé nou kay kozé asou kwèsyon sala:
Adanm sété on nonm ki té pawfé, mé i dézobéyi Bondyé. Èk a kòz di sa, nou ka péché èk nou ka mò
Jézi sété on nonm ki té pawfé, èk i obéyi Bondyé. Èk a kòz di sa, lézòm sa vini pawfé èk yo sa ni lavi pou tout tan
4. Lanmò Jézi sa édé tout moun
Annou gadé VIDIYO-A, èk apwé nou kay kozé asou kwèsyon sala:
Ki mannyè lanmò yon nonm sa édé tout moun?
Annou li 1 Timòfi 2:5, 6, èk apwé nou kay kozé asou kwèsyon sala:
Adanm sété on nonm ki té pawfé. Mé paskè i péché, tout lézòm ni péché èk yo ka mò. Jézi sété on nonm ki té pawfé menm kon Adanm té pawfé. Konsa, ki mannyè Jézi té sa délivwé lézòm hòd péché èk lanmò?
5. Wanson-an sé on kado Jéhova ba’w
Moun ki vini jan épi Jéhova ka gadé wanson-an kon on kado Jéhova ba yo. Pou ègzanp, annou li Galécha 2:20, èk apwé nou kay kozé asou kwèsyon sala:
Kisa zapòt Pòl té di ki ka moutwé i té ka gadé wanson-an kon on kado Jéhova ba’y?
Lè Adanm té péché, Jéhova kondanné’y èk tout désandan’y pou lanmò. Mé Jéhova voyé Gason’y Jézi pou mò ban nou. Konsa, nou ni òpòtyounité-a pou enjwi lavi pou tout tan.
Kon’w ka li sé lévanjil sala, imajiné mannyè Jéhova té ka santi lè i té ka gadé Gason’y soufè. Annou li Jan 19:1-7, 16-18, èk apwé nou kay kozé asou kwèsyon sala:
Kouman ou ka santi, konsèné sa Jéhova èk Jézi té fè ba’w?
ADAN MOUN PÉ MANDÉ: “Ki mannyè yon nonm sa mò bay tout moun?”
Ki mannyè ou té kay wéponn?
CHONJÉ SÉ PWEN SALA
Paski Jézi mò ban nou, Jéhova sa pawdonnen péché nou èk nou sa ni òpòtyounité-a pou viv tout tan.
Annou Wivizé Sa Nou Ja Apwann
Pou ki wézon Jézi mò?
Ki mannyè Jézi té sa délivwé lézòm hòd péché èk lanmò?
Ki mannyè lanmò Jézi sa édé’w?
LÒT ENFÒMASYON OU SA GADÉ
Apwann pouki Bib-la ka kwiyé sakwifis Jézi on wanson.
“Ki Mannyè Sakwifis Jézi Sé On Wanson Pou Sové An Chay Moun?” (yon atik asou jw.org)
Apwann sa nou ni pou fè pou twapé lavi.
Ès Jéhova ka pawdonnen, jis péché ki gwav?
Apwann mannyè nòlaj-la konsèné Jézi, té édé on nonm pou chanjé kawaktè’y.
a Péché sé pa sèlman lè nou fè on bagay ki mové. Péché osi vlé di, tout sé défo-a nou éwityé hòd Adanm épi Èv.