Ki Mannyè Sakwifis Jézi Sé On Wanson Pou “Sové An chay Moun”?
Mi sa Bib-la ka di
Bondyé ka sèvi sakwifis Jézi pou délivwé, ében sové lézòm anba péché épi lanmò. Silon Bib-la, san Jézi, ében lavi’y, sé pwi-a i péyé kon yon wanson pou sové lézòm. (Èfésòs 1:7; 1 Pita 1:18, 19) Sé pou wézon sala Jézi menm di, i té vini ‘pou bay lavi’y kon yon wanson pou sové an chay moun.’—Mafyou 20:28, King Jémz Version.
Pouki yon wanson pou “sové an chay moun” té nésésè?
Ében lè Bondyé fè pwèmyé nonm-lan Adanm, i té pawfé. Wi, Adanm pa té ni pyès péché. Èk i té ni òpòtyounité-a pou viv pou tout tan. Mé i pèd bèl òpòtyounité sala, paskè i désidé pou dézobéyi Bondyé. (Jennésis 3:17-19) Lè Adanm dézobéyi Bondyé, i vini yon péchè, èvèk lè’y fè ich, tout ich li éwityé péché hòd li. (Ronm 5:12) Sé pou wézon sala Bib-la ka moutwé, Adanm vann kò’y épi ich li kon “èslav” anba péché épi lanmò. (Ronm 7:14) Tout désandan Adanm sé moun ki enpawfé, konsa pa yonn di yo ki té sa péyé pwi-a pou ganyen sa Adanm té pèdi-a.—Sam 49:7, 8.
Wi, tout désandan Adanm té adan an mové sitiwasyon, épi yo pa té ni pyès èspwa. Mé, Bondyé té ni konpasyon pou yo. (Jan 3:16) Kanmenm, Bondyé pa té sa annèk inyowé péché désandan Adanm san yon bon wézon, paskè i sé on Dyé ki jis. (Sam 89:14; Ronm 3:23-26) Èvèk Bondyé enmen lézòm an chay, konsa i mété yon bèl awanjman an plas, ki té kay fè’y posib pou lézòm twapé pawdonnasyon pou péché yo apwézan. Bondyé kay osi sèvi menm awanjman sala pou édé lézòm vini pawfé an tan pou vini. (Ronm 5:6-8) Bèl awanjman-an Bondyé mété an plas, sé wanson sakwifis Jézi.
Kisa ki wanson-an?
An Bib-la, mo pawòl-la “wanson,” ni pou fè épi twa (3) bagay:
On wanson sé on pèyiman.—Limowo 3:46, 47.
On wanson sé pwi-a ou ka péyé pou libéwé on moun, ében pou achté an bagay ki té pèd.—Ègzodòs 21:30.
On wanson ni menm valè épi bagay-la i ka kouvè-a, ében péyé pou-a.a
Alò, annou konsidiwé mannyè wanson sakwifis Jézi ka akonpli sé twa (3) bagay sala.
Péyiman. Bib-la di, “Jézi péyé an pwi pou” achté Kwityen. (1 Kòrint 6:20; 7:23) Pwi-a Jézi péyé-a sé san’y, ében lavi’y. Kon lévanjil-la di, Jézi sèvi san’y pou achté, ‘moun ki ka palé tout diféwan langaj, èk ki sòti an tout lafanmi, an tout péyi épi an tout nasyon,’ bay Bondyé.—Wévélasyon 5:8, 9.
Libéwasyon. Wanson sakwifis Jézi ka “libéwé nou” anba péchè, paskè sé gwanmèsi sakwifis Jézi nou sa twapé pawdonnasyon pou péché nou.—1 Kòrint 1:30; Kòlòsé 1:14; Hibrou 9:15.
Menm valè. Lè Adanm péché, i pèd lavi pawfé-a i té ni-an. Èk, Jézi bay lavi pawfé-a i té ni-an kon wanson-an. Alò, wanson sakwifis Jézi ni menm valè épi sa Adanm pèdi. (1 Kòrint 15:21, 22, 45, 46) Kon Bib-la di: “Menm kon an chay moun vini péchè paski yon nonm [Adanm] dézobéyi Bondyé, sé menm mannyè-a Bondyé kay mété an chay moun dwèt épiʼy paski yon nonm [Jézi Kwi] obéyiʼy.” (Ronm 5:19) Konsa, sa ka édé nou konpwann, mannyè i posib pou lanmò yon nonm péyé wanson-an pou sové an chay péchè. Anfen, wanson sakwifis Jézi ka “péyé pwi-a pou délivwé” tout moun ki fè sa ki nésésè pou twapé bennéfis an sakwifis li.—1 Timòfi 2:5, 6.
a An sé langaj-la yo té ékwi Bib-la, mo pawòl-la yo twadwi kon “wanson,” sé an mo ki vlé di on pwi yo péyé, ében on bagay valowab yo boukanté pou on lòt bagay. Pou ègzanp, an langaj Hibrou, mo pawòl-la kafa vlé di “kouvè.” (Jennésis 6:14) Souvan, yo ka sèvi mo pawòl sala pou palé konsèné kouvè pou péché. (Sam 65:3) An lòt mo pawòl an langaj Hibrou ki tou pwé kafa sé kofè. Èk mo pawòl sala vlé di, pwi-a ou ka péyé pou kouvè ében sové on bagay. (Ègzodòs 21:30) An menm mannyè-a, an langaj Gwik mo pawòl-la yo twadwi pou “wanson” sé litronn. Èvèk yo ka sèvi mo pawòl sala pou palé konsèné pwi-a ou ka péyé pou “libéwé ében sové on moun, ében on bagay ki té pèd.” (Mafyou 20:28; The New Testament in Modern Speech, by R. F. Weymouth) Ékwiven Gwik té ka sèvi mo pawòl-la litronn lè yo té ka ékwi konsèné pwi-a ou ka péyé kon on wanson pou libéwé on pwizonnyé ében yon èslav.