LISON 03
Ès Ou Sa Kwè Sa Bib-la Ka Di?
San dout, ou vlé konnèt sa Bib-la ka di. Mé, pitèt ou ka pwan an ti pwokosyon paski Bib-la sé an liv ki ékwi tèlman lontan. Osi, pitèt ou pa asiwé si ou sa sèvi sé konsèy-la i ka ban nou jòdi. Ében ou pa asiwé si Bib-la sa édé’w ni an pli mèyè lavi apwézan. Épi lè’y vini pou sé bèl pwonmèt-la Bib-la ka bay pou tan ki ka vini, ès ou sa vwéman kwè sé pwonmèt sala? La ni milyon di moun ki ja mété konfyans yo an sé konsèy-la ki an Bib-la. Épi yo ka kwè tout sé pwonmèt-la ki an Bib-la. Annou wè ki mannyè ou menm sa kwè sa Bib-la ka di.
1. Ès sé listwa-a ki an Bib-la té vwéman fèt?
Bib-la menm ka di tout sé pawòl-la ki adan’y sé ‘pawòl lavéwité ki aplon.’ (Ékléziyastis 12:10 NWT) Bib-la ka palé kont bagay ki té vwéman fèt, èk moun ki té vwéman viv asou latè-a. (Li Louk 1:3; 3:1, 2.) Anfen, plizyè moun ki ka étidyé mannyè lavi té yé an tan lontan ka dakò épi sé dat-la, non sé moun-lan, èk sé plas-la ki mansyonnen an Bib-la. Osi, yo ka dakò sé listwa-a ki an Bib-la té vwéman fèt.
2. Pouki nou sa ni konfyans an Bib-la magwé i té ékwi tèlman lontan?
Bib-la sé pa an liv siyans, mé i ka palé konsèné sèten bagay ki ni pou fè épi siyans. Kanmenm, lè yo té ékwi Bib-la, moun pa té menm konnèt sé bagay sala èk adan moun pa té vlé kwè sa Bib-la té ka di. Mé apwézan, siyantis èk moun ki ni gwo endikasyon ka di, Bib-la aplon lè’y mansyonnen bagay ki ni pou fè épi siyans. Konsa, sé menm kon lévanjil-la di nou, ‘nou sa toujou konfyé [Bib-la] atjwèlman èk pou tou tan.’—Sam 111:8 (NWT).
3. Pouki nou sipozé konfyé sa Bib-la ka di ki kay fèt an tan pou vini?
An tan pasé Bib-la té mansyonnen bagay ki té kay fèt lontan avan yo fèt. Èk sé bagay sala té vwéman fèt menm kon Bib-la té di. Osi, Bib-la ban nou détay konsèné sé kondisyon-an nou té kay wè an latè-a an tan nou apwézan. Èk nou ka wè tout sé bagay sala ka fèt, menm kon Bib-la di. Konsa, nou sa ni konfyans sé pwofèsi-aa Bib-la ban nou konsèné ‘bagay ki p’òkò fèt’ kay vwéman fèt. (Izaya 46:10 NWT) Alò, an lison sala nou kay gadé déotwa pwofèsi an Bib-la ki fèt menm kon Bib-la té di. Ou kay étonnen pou wè mannyè sé pwofèsi sala aplon!
ANNOU APWANN PLI
Apwézan, annou ègzanminé mannyè siyans ka dakò épi Bib-la. Èk osi, annou gadé déotwa pwofèsi.
4. Siyans ka dakò épi Bib-la
An tan pasé majòwité moun té kwè latè-a té ka pozé asou an bagay. Annou gadé VIDIYO-A, Latè-a Ka Pann San Anyen Tjenbé’y.
Liv Jòb té ékwi pwèskè twa mil senk san (3,500) lanné ki pasé. Annou li Jòb 26:7, épi apwé nou kay kozé asou kwèsyon sala:
Liv Jòb di ‘latè-a ka pann san anyen ka tjenbé’y’. Pouki sa ka sipwi an chay moun?
Kisa ki ka fèt pou lapli tonbé? “Sòlèy-la ka fè dlo-a an lanmè-a tounen vapè èk vapè-a ka tounen nwaj. Sé nwaj-la ka fè lapli èk lapli-a ka tonbé asou latè-a. Èk menm dlo sala ka viwé an lanmè-a”. Sé annèk dé san (200) lanné ki pasé moun té sa konpwann kisa ki ka fèt pou lapli tonbé. Mé gadé sa Bib-la té di pwèskè twa mil senk san (3,500) lanné ki pasé. Annou li Jòb 36:27, 28, épi apwé annou kozé asou sé kèstyon sala:
Bib-la ka di nou mannyè nou ka twapé lapli. Pouki ou kwè sa èstòdinè?
Ès sé lévanjil-la nou té diskité an liv Jòb ka ba ou pli konfyans an Bib-la?
5. Bib-la té bay détay konsèné bagay ki ni gwo signifikans ki té kay fèt avan yo fèt
Annou li Izaya 44:27–45:2, èk apwé nou kay kozé asou kwèsyon sala:
Ki détay Bib-la té bay dé san (200) lanné andavans konsèné mannyè vil Babilonn té kay détwi?
Listwa ka dakò ki, an lanné sèk san twant nèf (539) avan lépòk nou, Sayròs Wa péyi Pèwja, èk lawmé’y té ganyen laviktwa asou vil Babilonn. Yo té chéché an lawivyè épi yo té antwé an vil-la adan bayè ki té wèsté ouvè. Yo pa té menm ni pou goumen pou ganyen batay-la. Jòdi, plis pasé dé mil sèk san (2,500) lanné apwé, vil Babilonn sé an pil wòch toujou.
Annou li Izaya 13:19, 20, èk apwé nou kay kozé asou kwèsyon sala:
Ki mannyè pwofèsi sala té fèt vwé?
Jòdi, vil Babilonn sé an pil wòch an péyi Irak
6. Bib-la té ja palé asou bagay nou ka wè ki ka fèt jòdi jou
Bib-la di, nou ka viv an “dènyé tan-an” ében ‘dènyé jou-a’. (2 Timòfi 3:1) Gadé sa i di ki té kay fèt diwan tan sala.
Annou li Mafyou 24:6, 7, èk apwé nou kay kozé asou kwèsyon sala:
Kisa Bib-la di ki té kay fèt an dènyé tan-an?
Annou li 2 Timòfi 3:1-5, èk apwé annou kozé asou sé kwèsyon sala:
Ki kalité atitid Bib-la té di moun té kay ni an dènyé tan-an?
Kilès an sé atitid sala ou ka wè an moun jòdi jou?
ADAN MOUN KA DI: “Sé nonm ki ékwi Bib-la.”
Pou ou menm, pouki ou sa mété konfyans ou an Bib-la?
CHONJÉ SÉ PWEN SALA
Listwa, siyans, èk pwofèsi ka ban nou bon wézon pou konfyé sa Bib-la ka di.
Annou Wivizé Sa Nou Ja Apwann
Ès sé listwa-a ki an Bib-la té vwéman fèt?
Ès ou sa ban nou yon ègzanp ki ka moutwé siyans ka dakò épi Bib-la.
Ès Bib-la sa di nou sa ki kay fèt an tan ki ka vini? Pouki ou di sa?
LÒT ENFÒMASYON OU SA GADÉ
Ès Bib-la aplon lè’y mansyonnen bagay ki ni pou fè épi siyans?
Ki détay Bib-la té bay konsèné “dènyé tan-an”?
“6 Pwofèsi Ki An Bib-la Ki Ka Fèt Vwé Jòdi” (Gad-la, li 1 Mé, 2011)
Annou wè mannyè sa pwofèsi Bib té di konsèné Wéyòm Gris té vini vwé.
Apwann mannyè pwofèsi Bib té édé yon nonm apwésyé Bib-la.
“Mwen Pa Té Ka Kwè La Té Ni An Bondyé” (Gad-la Limowo 5 2017)
a Pwofèsi sé konmisyon hòd Bondyé konsèné sa ki kay fèt an tan pou vini.