FÈ DISIP
LISON 11
Enstwi Moun Adan An Mannyè Ki Senp
Pwensip-la: “Ki mannyè pyèsonn kay konpwann sa ou ka di-a si konmisyon-an ou ka bay-la sé adan an langaj . . . ki pa klè.”—1 Kòrint 14:9.
Mannyè Jézi Té Enstwi Moun Adan An Mannyè Ki Senp
1. Gadé VIDIYO-A, Jézi Sèvi Ilistwasyon Pou Moutwé Mannyè Papa Nou Mélé Épi Nou ében li ében kouté Mafyou 6:25-27. Èk apwé nou kay kozé asou dé (2) kèstyon:
Ki ilistwasyon Jézi sèvi pou moutwé Jéhova vwéman mélé épi nou?
Magwé Jézi té konnèt an chay bagay konsèné jibyé, ki pwen ki té byen senp Jézi mansyonnen konsèné sé jibyé-a? Èk poutji sa té an bon mannyè pou enstwi moun?
Kisa Nou Apwann Hòd Ègzanp Jézi?
2. Lè nou enstwi moun adan an mannyè ki senp, sa kay touché tjè yo, èk yo kay chonjé sa yo apwann.
Swiv Ègzanp Jézi
3. Pa palé twòp. Pito ou palé asou tout sa ou konnèt asou on sijé, i kay pli mèyè pou fiksé asou enfòmasyon-an ki an liv-la ou ka étidyé épi moun-lan. Èk lè’w mandé étidyan’w an kèstyon, ba’y an ti chans pou’y wéponn. Si’y pa konnèt wépons-lan, ében si’y ba’w on wépons ki pa an ling épi Bib-la, ou sa sèvi lòt kèstyon pou édé’y twapé wépons-lan ki dwèt-la. Èvèk chonjé, si étidyan-an konpwann pwen-an ki pli enpòtan-an, kontiné épi lison-an.
4. Sèvi enfòmasyon étidyan’w ja konnèt pou édé’y konpwann lésisyon ki nèf. Pou ègzanp, avan’w koumansé on lison ki ka palé konsèné wézèwèksyon-an, ou sa pwan on ti tan pou wivizé épi étidyan-an sa i ja apwann konsèné kondisyon lé mò.
5. Byen chwazi ilistwasyon ki kay édé moun konpwann pwen-an. Avan ou sèvi on ilistwasyon, mandé kò’w:
‘Ès ilistwasyon sala senp?’
‘Ès étidyan mwen kay konpwann ilistwasyon-an?’
‘Ès ilistwasyon-an kay édé étidyan mwen pou chonjé pwen-an ki pli enpòtan-an? Ében, ès i kay chonjé ilistwasyon-an sèlman?’