Bib-la Ka Chanjé Lavi Moun
Ki mannyè an jenn madanm ki té ka soufè an chay lè’y té piti twapé lakontantman? Kisa ki té pousé an nonm ki té vyolan èk ki té wébélé kont gouvèdman-an an péyi’y vini an Témwen Jéhova? Annou konsidiwé sa sé moun sala ni pou di.
“Mwen té pawé pou fè népòt bagay pou twapé afèksyon èk soulajman.”—INNA LEZHNINA
MWEN FÈT AN LANNÉ: 1981
MWEN FÈT AN PÉYI: WISI
AVAN: MWEN TÉ SOUFÈ AN CHAY LÈ MWEN TÉ PITI
LAVI MWEN AN TAN PASÉ: Mwen té fèt soud èk pawan mwen té soud osi. Pwèmyé sis lanné-a an lavi mwen té bèl, mwen té ni djèwté. Mé bagay chanjé lè pawan mwen dévosé. Menm si mwen té byen jenn, mwen té sav pawan mwen pa té kay wèsté ansanm ankò. Konsa, sa té fè mwen lapenn an chay, sé konmsi tjè mwen té kasé. Apwé yo dévosé, papa mwen èk pli gwan fwè mwen wèsté an vil Troitsk, mé manman mwen èk mwen alé vil Chelyabinsk. Apwé tjèk tan, manman mwen mayé ankò. Bopè mwen té toujou sou, èk souvan i té ka bat mwen èk manman mwen.
An lanné 1993, pli gwan fwè mwen, mwen té kontan an chay-la néyé. Aksidan sala té an gwo sézisman pou fanmi mwen. Manman mwen koumansé bwè wonm èk i té ka maltwété mwen menm kon bopè mwen. Alò, mwen koumansé chaché pou an pli mèyè lavi. Anfen, mwen té pawé pou fè népòt bagay pou twapé afèksyon èk soulajman. Konsa, mwen koumansé atandé diféwan légliz, mé m’a té sa twapé afèksyon èk soulajman pyès koté.
MANNYÈ BIB-LA CHANJÉ LAVI MWEN: Lè mwen té twèz (13) lanné, la té ni an tifi an klas mwen ki té yon Témwen Jéhova. I té ka di mwen deotwa listwa an Bib-la. Pa dé kontan mwen té kontan pou apwann konsèné moun an Bib-la, tèl kon Nowa èk Jòb. Magwé sitiwasyon yo té difisil, yo kontiné sèvi Bondyé. Sé sa ki té ankouwajé mwen pou étidyé Bib-la épi Témwen Jéhova èk atandé sé mitin yo-a.
Lè mwen koumansé étidyé Bib-la, mwen apwann an chay bèl bagay. Pou ègzanp, lè mwen apwann Bondyé ni an non, sa touché tjè mwen. (Sam 83:18) Osi, mwen té étonnen pou wè mannyè Bib-la aplon lè’y dékwi atitid moun an “sé dènyé jou-a.” (2 Timòfi 3:1-5) An plis di sa, pa dé kontan mwen té kontan pou apwann konsèné wèzèwèksyon-an. Sa vlé di mwen kay wè fwè mwen ankò!—Jan 5:28, 29.
Mé, sé pa tout moun ki té kontan mwen té ka étidyé Bib-la. Manman mwen épi bopè mwen pa té enmen Témwen Jéhova. Yo té ka fè tout sa yo pé pou fè mwen doubout étidyé Bib-la. Mé mwen té kontan sa mwen té ka apwann, konsa mwen té détèminé pou kontiné étidyé.
Mé, I pa té ézé pou mwen tjénbé fò paski fanmi mwen té ka ban mwen tèt chò. Èk an lòt sézisman pwan mwen lè pli jenn fwè mwen néyé. I té ka atandé mitin Témwen Jéhova épi mwen. Diwan tout sé difikilté sala, sé fwè èk sè-a té toujou la pou sipòté mwen. Pou pwèmyé fwa-a an lavi mwen, mwen twapé afèksyon èk soulajman, sé bagay-la mwen té ka toujou chaché pou. Mwen té sav sé Témwen Jéhova ki ni wilizyon-an ki vwé. An lanné 1996, mwen té batizé kon an Témwen Jéhova.
MANNYÈ MWEN TWAPÉ BENNÉFIS: Mwen mayé pou sis (6) lanné. Non mawi mwen sé Dmitry èk I sé an bon nonm. Nou ka wann sèvis an òfis bwanch Témwen Jéhova an vil St. Petersburg. Èk kon tan pasé, atitid pawan mwen chanjé, èk yo vin aksèpté disizyon mwen pou sèvi Jéhova.
Pa dé kontan mwen kontan mwen konnèt Jéhova! Atjwèlman, lavi mwen ni pli valè paski mwen ka sèvi’y.
“Mwen té ni an chay kwèsyon ki té ka twakasé lidé mwen.”
—RAUDEL RODRÍGUEZ RODRÍGUEZ
MWEN FÈT AN LANNÉ: 1959
MWEN FÈT AN PÉYI: KUBA
AVAN: MWEN TÉ KA WÉBÉLÉ KONT GOUVÈDMAN-AN AN PÉYI MWEN
LAVI MWEN AN TAN PASÉ: Mwen té fèt an Havana, an péyi Kuba. Mwen té lévé adan an konmin ki té ni moun ki pòv èk yo té ka toujou goumen an lawi-a. Kon mwen té ka pwofité, mwen té vin entéwésé an judo èk lézòt spò kon sa.
Paski mwen tè fè byen an lékòl, pawan mwen ankouwajé mwen pou alé inivèsité apwé mwen fini lékòl sèkondè. Paditan mwen té ka atandé inivèsité, mwen koumansé santi gouvedman-an an péyi mwen bizwen chanjé. Konsa, mwen désidé pou wébélé kont gouvèdman-an. Yon jou, mwen èk jan mwen ataké on polis pou nou sa vòlè fizi’y. Lè nou té ka goumen épi polis-la, i té blésé mové an tèt li. A kòz di sa, yo mété mwen èk jan mwen an pwizon èk yo kondanné nou pou mò. Mwen té annèk ven (20) lanné, mé mwen té kay mò!
Paditan mwen té an pwizon, mwen té ni an chay tan pou katjilé. Mwen té ka katjilé asou mannyè-a mwen té kay konpòté kò mwen douvan sé moun-lan ki té kay tjwé mwen. Sa sé paski m’a té vlé moutwé yo mwen té pè. Mwen té ka osi katjilé konsèné lavi. Alò, mwen té ka mandé kò mwen: ‘Pouki la ni tèlman enjistis an latè-a? Ès lavi sala sé tout?’
MANNYÈ BIB-LA CHANJÉ LAVI MWEN: Apwé tjèk tan, yo chanjé pinisyon nou. Pito yo tjwé nou, yo kondanné nou pou twant (30) lanné an pwizon. An tan sala, mwen té jwenn déotwa Témwen Jéhova ki té an pwizon pou lafwa yo. Mannyè-a yo té ka konpòté kò yo vwéman touché tjè mwen. Yo té ni an chay kouwaj. Èk magwé sé Témwen-an pa té fè anyen pou yo mété yo an pwizon, yo pa té faché, yo té ka fè lapé épi tout moun.
Sé Témwen-an té énstwi mwen ki, Bondyé ni an wézon pouki I mété lézòm asou latè-a. Èk yo sèvi Bib-la pou moutwé mwen mannyè Bondyé kay tiwé tout sé mové bagay-la ki ka fèt asou latè-a, èk mannyè i kay fè’y vini an pawadi. Osi, yo enstwi mwen sé bon moun tousèl ki kay ni òpòtyounité-a pou viv pou tout tan asou latè nèf-la.—Sam 37:29.
Pa dé kontan mwen té kontan sa sé Témwen-an té ka enstwi mwen. Mé i té difisil pou mwen vini menm kon yo. M’a té kwè i té posib pou mwen kité pòlitiks. Èk mwen pa té kwè mwen té sa tounen lòt fasad-la si an moun té ban mwen an souflé asou fasad fidji dwèt mwen-an. Konsa, mwen désidé pou li Bib-la pou kò mwen. Lè mwen fini li Bib-la, mwen wéyalizé sé sèlman Témwen Jéhova ki ka viv lavi yo menm kon sé Kwityen-an an pwèmyé syèk-la.
Pli mwen étidyé Bib-la sé pli mwen wéyalizé mwen té ni pou fè gwo chanjman an lavi mwen. Pa ègzanp, mwen té ni pou chanjé mannyè-a mwen té ka palé èk mwen té ni pou doubout sèvi mo sal. Osi, mwen té ni pou doubout fimen. Èk an plis di sa, mwen té ni pou doubout pwan pa an zafè pòlitiks. Sé chanjman sala pa té ézé pyès, mé piti an piti épi èd Jéhova mwen té fè yo.
Yonn an sé bagay-la ki té pli difisil pou mwen fè, sé pou kontwolé kò mwen. Mwen té bizwen apwann mannyè pou pa vini faché vit. Konsa, mwen té ka toujou mandé Jéhova pou édé mwen kontwolé kò mwen. Yon lévanjil ki té vwéman édé mwen sé Pwovèb 16:32, i di: “Moun-lan ki pa ka vini faché vit pli mèyè pasé an nonm ki ni an pil fòs, èk moun-lan ki ka kontwolé kò’y pli mèyè pasé an moun ki ka pwan an vil.”
An lanné 1991, mwen té batizé kon an Témwen Jéhova. Yo té sèvi an bawi pou batizé mwen an pwizon. An lanné 1992, yo té ladjé adan sé pwizonnyè-a. Yo té voyé nou Èspann paski nou té ni fanmi an péyi sala. Lè mwen wivé Èspann, mwen koumansé atandé mitin Témwen Jéhova la menm. Sé Témwen-an byen vini mwen, yo anbwasé mwen èk sé konmsi yo té ja konnèt mwen pou plizyè lanné. Yo té édé mwen koumansé on lavi ki nèf an Èspann.
MANNYÈ MWEN TWAPÉ BENNÉFIS: Apwézan mwen ka viv an lavi ki plen lakontantman. Mwen ka sèvi Bondyé épi madanm mwen èk dé fi nou. I sé an bèl pwivilaj pou mwen sèvi tan mwen pou édé moun apwann sa Bib-la ka enstwi. Délè, mwen ka katjilé konsèné lè yo té kondanné mwen pou mò, èk sa ka fè mwen ni an pil apwésiasyon pou tout sa mwen ni jòdi-a. Mwen ni an bèl lavi èk an plis di sa, mwen ni an bèl èspwa pou tan ki ka vini. Mwen ka gadé pou tan-an lè latè-a kay vini an pawadi. An tan sala, toupatou kay ni lapé èk la pa kay ni lanmò ankò.—Wévélasyon 21:3,4.
[Blurb]
“Lè mwen apwann Bondyé ni an non, sa touché tjè mwen.”
[Blurb]
Mawi mwen èk mwen byen kontan pou patajé piblikasyon an langaj sin épi moun ki soud