An Ki Mannyè Nou Sa Bay Èd Apwé An Dézas?

Dézas ka fèt pli souvan jòdi jou. Lè an dézas fèt, pou nou sa bay èd i enpòtan pou nou byen ògannizé. Sé pou wézon sala, Pwensipal Konmité-a ja fè awanjman pou chak bwanch ni an Dépatman Pou Pòté Soukou pou lè an dézas fèt.

Lè sé fwè-a an Dépatman sala tann konsèné an dézas, lamenm yo ka kwiyé sé ansyen-an an plas sala pou mandé yo kisa sé fwè èk sè-a bizwen. Si donmaj-la an péyi-a si tèlman mové épi sé fwè èk sè-a pa sa mennajéʼy pa kò yo, bwanch-la kay voyé fwè ki ni èspéyans pou édé yo. Sé fwè-a bwanch-la voyé pou édé pé mandé lòt fwè èk sè pou bay èd, ében yo pé mandé pou sèten bagay tèl kon glo, had èk manjé. Osi, yo pé achté sèten bagay an péyi-a èvèk sépawé sé bagay sala épi sé fwè èk sè-a.

La ni an pli bon wézon pouki nou ni pou swiv awanjman-an Pwensipal Konmité-a mété an plas. Pou ègzanp, i ka anpéché nou fè twavay ki pa nésésè, i ka anpéché konfizyon, èk nou pa kay gaspiyé lajan èk matwiyo.

Sé fwè-a bwanch-la voyé sa désidé konmen lajan épi konmen fwè yo kay bizwen pou pòté soukou. Osi, yo sa palé épi ofisyé gouvèdman pou édé twavay-la fèt pli vit. Alò chak moun pa sipozé pwanʼy asou kont li pou anmasé lajan, pou voyé bagay, ében alé plas-la dézas-la té fèt si bwanch-la pa voyé yo.

Nou enmen sé fwè èk sè nou-an! Épi nou vlé édé yo. (Hibrou 13:16) Mé an ki mannyè nou sa bay èd apwé an dézas? Ében sa ki pli enpòtan sé pou pwédyé bay sé fwè èk sè-a dézas-la té afèkté, èvèk bay sé fwè-a ki ka pòté soukou. Èk osi nou sa bay lajan pou twavay-la ki ka fèt owon latè-a. Anba diwèksyon Pwensipal Konmité-a, sé ofis bwanch-lan kay konnèt ki mannyè pou sèvi sé kontwibisyon sala. Alò si nou vlé édé, nou sa plen fòm-lan Local Design/Construction Volunteer Application (DC-50).

GADÉ VIDIYO-A GWO DLO AN PÉYI BWAZIL, ÈK APWÉ WÉPONN KWÈSYON SALA:

Apwé gwo dlo-a an péyi Bwazil an lanné dé mil ven (2020), kisa ki touché tjèʼw lèʼw wè mannyè-a Témwen Jéhova té pòté soukou bay sé fwè-a?