Kisa Jéhova Ka Fè Pou Édé Nou Tjenbé Fò Épi Lajwa

1-2. (a) Ki kwèsyon nou kay diskité an atik sala? (b) Ki mannyè nou sav Jéhova vwéman vlé édé nou?

JÉHOVA sa édé nou pou tjenbé fò lè nou ka èspéyansé pwoblenm an lavi nou, èvèk pou ni lajwa an sèvis li. Mé, kisa Jéhova ka fè pou édé nou? Èk ki bennéfis nou ka twapé an èd-la Jéhova ka ban nou? Nou kay wéponn sé kwèsyon sala an atik sala. Kanmenm, avan nou wéponn sé kwèsyon sala annou wéponn on lòt kwèsyon: Ès Jéhova vwéman vlé édé nou?

² Pou twapé wépons-lan pou kwèsyon sala annou gadé sa zapòt Pòl té ékwi sé fwè Hibrou-a. Zapòt Pòl ékwi: “Sé [Jéhova] ki ka édé mwen, mwen pa kay pè. Ki sa pyèsonn sa fè mwen?” (Hib. 13:6) Diféwan liv ki ka sipòté Bib-la di, mo pawòl-la “édé” ki an vèwsé sala ka palé konsèné on moun ki ka kouwi pou édé on lòt moun ki ka pléwé pou èd. Imajiné sa, lè nou ni on pwoblenm èvèk nou pléwé bay Jéhova pou édé nou, sé akwèdi Jéhova ka kouwi pou ban nou èd. Ès ou pa kay dakò vèwsé sala ka moutwé Jéhova vwéman vlé édé nou? Wi, népòt pwoblenm nou pé èspéyansé an lavi nou, nou sa tjenbé fò épi djwèté, paski Jéhova la pou édé nou.

3. Ki twa (3) bagay Jéhova ka fè pou édé nou tjenbé fò épi lajwa lè nou ka èspéyansé pwoblenm?

³ An ki diféwan mannyè Jéhova ka édé nou tjenbé fò épi lajwa lè nou ni pwoblenm? Pou nou twapé wépons-lan annou li on pòsyon an liv Izaya. Pouki? Sé paski an chay an sé pwofèsi-a Jéhova té fè Izaya ékwi ni pou fè épi sèvant li jòdi. Osi, souvan Izaya ka palé konsèné Jéhova adan an mannyè ki ézé pou nou konpwann. Izaya chapit 30 ni déotwa ègzanp. An chapit sala Izaya ka sèvi bèl ilistwasyon pou di nou mannyè Jéhova ka édé pèp li. I moutwé, Jéhova ka édé nou an sé twa (3) diféwan mannyè sala: (1) i ka kouté èvèk wéponn lapwiyè nou, (2) i ka djidé nou, èvèk (3) i ka benni nou atjwèlman épi i kay benni nou an tan pou vini. Apwézan annou diskité sé twa mannyè sala.

JÉHOVA KA KOUTÉ LAPWIYÈ NOU

4. (a) Kisa Jéhova té kwiyé sé Jwif-la an tan Izaya, èk kisa i té kité wivé yo? (b) Ki bèl èspwa Jéhova té bay sé Jwif-la ki té fidèl? (Izaya 30:18, 19)

⁴ An pwèmyé pòsyon-an an Izaya chapit 30, Jéhova ka kwiyé sé Jwif-la ‘gason ki ni tèt diʼ ki ka ‘mété péché asou péchéʼ. I osi di: ‘Yo sé on bann moun ki wébèl, . . . ki pa vlé tann lwa Jéhova.ʼ (Izay. 30:1, 9) Pèp Izwayèl pa té vlé kouté Jéhova, konsa Izaya di, Jéhova té kay kité kalamité èvèk hontèz tonbé asou yo. (Izay. 30:5, 17; Jér. 25:8-11) Sa té vwéman fèt lè jan Babilonn té détwi vil Jérouzalèm èk yo pwan sé Jwif-la lapwiz. Kanmenm, adan sé Jwif-la té fidèl èk Izaya té ni on konmisyon ki té kay ba yo on bèl èspwa. I di yo, yon jou Jéhova té kay délivwé yo èk yo té kay viwé Jérouzalèm. (Li Izaya 30:18, 19.) Èk sé ègzaktiman sa ki té fèt. Jéhova té délivwé sé Jwif-la anba Babilonn. Mé yo té ni pou èspéwé pou on ti tan avan Jéhova délivwé yo. Èspwèsyon-an ‘Jéhova ka èspéwé épi pasyans pou moutwé zòt favèʼ ka di nou, an ti tan té kay pasé avan Jéhova délivwé sé Jwif-la ki té fidèl. Anfen, pèp Izwayèl pasé swasant dis (70) lanné an pwizon an Babilonn avan adan di yo té sa viwé Jérouzalèm. (Izay. 10:21; Jér. 29:10) Lè jan Izwayèl té an pwizon an Babilonn yo té ka pléwé paski yo té an twistès, mé lè yo viwé Jérouzalèm yo té ka pléwé paski pa dé kontan yo té kontan.

5. Ki asiwans Izaya 30:19 ka ban nou?

⁵ Jòdi jou vèwsé sala sa enkouwajé nou: ‘I kay vwéman moutwéʼw favè lèʼw pléwé pou èd.ʼ (Izay. 30:19) Izaya ban nou asiwans-lan ki, Jéhova kay kouté nou lè nou pléwé ba Li épi i kay wéponn lapwiyè nou vitman. Izaya osi di: ‘I kay wéponn ou konʼy tann ou ka kwiyéʼy.ʼ Vèwsé sala ka ban nou on bèl asiwans ki, Papa nou Jéhova vwéman vlé édé moun ki mandéʼy pou èd. Alò lè nou konnèt sé bagay sala, sa kay édé nou tjenbé fò épi lajwa.

6. Kisa Izaya di ki ka moutwé nou Jéhova ka kouté lapwiyè chak sèvant li?

⁶ Izaya 30:19 ka osi ban nou asiwans-lan ki, Jéhova ka pwan tanʼy pou kouté lapwiyè chak di nou. Pouki nou sa di sa? Sé paski an pwèmyé pòsyon-an an Izaya chapit 30 Jéhova ka palé bay pèp li kon on gwoup, konsa i ka sèvi mo pawòl-la ‘zòtʼ. Mé an vèwsé 19 i pa ka di ‘zòtʼ i ka di ‘ouʼ. Izaya di: ‘Ou pa kay pléwéʼ; ‘i kay vwéman moutwéʼw favèʼ; ‘i kay wéponn ouʼ. Wi Jéhova sé on Papa ki plen lanmityé. Konsa lè yonn di nou dékouwajé èk nou mandé Jéhova pou èd, i pa kay janmen di nou: “Ou twò fèb, pouki ou pa ka tjenbé fò kon tèl fwè ében tèl sè.” Non. Jéhova enmen chak di nou, i ka kouté lapwiyè chak di nou, épi i kay ban chak di nou atansyon-an nou bouzwen.​—Sam 116:1; Izay. 57:15.

7. Ki mannyè pwofèt Izaya èk Jézi ka moutwé i enpòtan pou kontiné pwédyé?

⁷ Lè nou pwédyé bay Bondyé èk nou diʼy sa ki ka afèkté nou, pwèmyéman i pé ban nou fòs-la pou aji épi sitiwasyon-an. Mé si pwoblenm-lan kontiné nou kay ni pou kontiné mandé Jéhova pou fòs pou nou sa tjenbé fò. Sé sa i vlé nou fè. Nou sav sa, paski Izaya di nou: ‘Pa ba [Jéhova] pyès chans pou pozé.ʼ (Izay. 62:7) Mé kisa sa vlé di? Sa vlé di, nou ni pou kontiné pwédyé bay Jéhova konmsi nou pa ka baʼy on chans pou pozé. Pawòl pwofèt Izaya ka fè nou chonjé ilistwasyon Jézi konsèné lapwiyè an Louk 11:8-10, 13. Jézi di lè nou ka pwédyé, nou ‘pa ni pou hont pou kontiné plédéʼ épi Bondyé èvèk pou ‘kontiné mandéʼyʼ pou lisentèspwiʼy. Èk osi nou ni pou kontiné pwédyé bay Jéhova pou djidé nou pou fè bon disizyon.

JÉHOVA KA DJIDÉ NOU

8. Ki mannyè Izaya 30:20, 21 té fèt vwé an tan pasé?

⁸ Li Izaya 30:20, 21. Lawmé Babilonn plasé kò yo tout oliwon vil Jérouzalèm èk yo wèsté la pou yon lanné é dimi. Diwan tan sala sé Jwif-la té soufè on chay. Anfen sé Jwif-la té ka èspéyansé soufwans épi difikilté menm kon moun té ka manjé pen èk bwè dlo touléjou. Mé an Izaya 30:20, 21, Jéhova di sé Jwif-la si yo wépanti èvèk chanjé vyé atitid yo i té kay sové yo. Izaya di, Jéhova sé ‘Gwan Titjaʼ pèp li épi i té kay enstwi yo pou adowéʼy an mannyè-a i vlé moun adowéʼy. Sa Izaya té di té fèt vwé lè Jéhova té délivwé sé Jwif-la ki té an Babilonn. Anba diwèksyon Jéhova sé Jwif-la éwisi établi adowasyon ki vwé. Jòdi osi, Jéhova sé Gwan Titja nou, èk pa dé kontan sa ka fè nou kontan.

9. Ki mannyè Jéhova ka djidé nou jòdi jou?

⁹ An Izaya 30:20, 21 pwofèt Izaya konpawé nou épi étidyan ki ka apwann anba Jéhova an dé (2) mannyè. Pwèmyéman Izaya di: ‘Ou kay wè Gwan Titjaʼw èvèk zyéʼw menm.ʼ An ilistwasyon sala, sé konmsi nou sé étidyan an klas Jéhova épi i doubout douvan klas-la ka enstwi nou. I sé vwéman on lonnè pou ni Jéhova kon titja nou jòdi. Mé ki mannyè Jéhova ka enstwi nou jòdi? Ében Jéhova ka sèvi ògannizasyonʼy pou enstwi nou. Èk nou ka wimèsyé Jéhova pou diwèksyon-an i ka sèvi ògannizasyonʼy pou ban nou. Tout sé enfòmasyon-an Jéhova ka ban nou an sé mitin-lan, sé konvansyon-an, sé piblikasyon-an, sé broadcast-la èk an plizyè lòt mannyè, ka édé nou tjenbé fò épi lajwa menm si nou ka èspéyansé pwoblenm.

10. An ki mannyè nou ka tann ‘vwa Jéhova dèyè nouʼ?

¹⁰ Pwofèt Izaya palé konsèné on dézyenm mannyè Jéhova ka enstwi nou. I di: ‘Zòwèy ou kay tann an vwa dèyèʼw.ʼ An ilistwasyon sala pwofèt Izaya ka dékwi Jéhova kon on titja ki ka maché dèyè étidyanʼy, èk i ka gadé yo byen konʼy ka djidé yo èk di yo ki koté pou alé. Mé an ki mannyè nou ka tann vwa Jéhova dèyè nou jòdi jou? Pawòl Bondyé ki an Bib-la té ékwi plizyè mil lanné ki pasé. Konsa nou sa di Pawòl Bondyé té ékwi an tan ki dèyè nou. Alò lè nou li ében kouté Pawòl Bondyé ki an Bib-la, sé konmsi nou ka tann vwa Jéhova dèyè nou.​—Izay. 51:4.

11. Pou tjenbé fò épi lajwa kisa nou ni pou fè, èk pouki?

¹¹ Jéhova ka sèvi ògannizasyonʼy épi pawòl li pou djidé nou. Mé kisa nou ni pou fè pou twapé pli bennéfis hòd diwèksyon-an Jéhova ka ban nou? Pwofèt Izaya di dé (2) bagay ki sa édé nou sav sa nou ni pou fè. Pwèmyéman, i di ‘mi chimen-anʼ. Èk dézyenman, i di ‘maché asouʼyʼ. (Izay. 30:21) Konsa i pa asé pou annèk konnèt ‘chimen-anʼ. Nou ni pou ‘maché asouʼyʼ. Gwan mèsi Jéhova, ògannizasyonʼy ka èspliké Pawòl li ban nou, alò nou ka apwann sa Jéhova vlé nou fè. Nou ka osi apwann mannyè pou mété sa nou apwann an pwatik. Konsa pou tjenbé fò épi lajwa, nou ni pou apwann sa Jéhova ka enstwi nou, èvèk nou ni pou mété sa nou apwann an pwatik an lavi nou. Si nou fè sé dé (2) bagay sala nou sa asiwé Jéhova kay benni nou.

JÉHOVA KA BENNI NOU

12. Silon Izaya 30:23-26, ki mannyè Jéhova té kay benni pèp li?

¹² Li Izaya 30:23-26. Ki mannyè pwofèsi sala té fèt vwé lè sé Jwif-la kité Babilonn? Lè sé Jwif-la viwé Jérouzalèm Jéhova benni yo on chay. I ba yo on pil bon manjé. Mé sa ki pli enpòtan sé sa, i ba yo tout sa yo té bouzwen pou yo vansé pwéʼy èk pou yo adowéʼy an mannyè-a ki dwèt-la. Sa sété pwèmyé fwa-a pèp Bondyé wisivwè tout sé bèl bagay sala hòd Jéhova. Kon nou li an vèwsé 26, Jéhova édé pèp li pou konpwann Pawòl li pli mèyè. (Izay. 60:2) Épi tout sé bennédisyon sala, pèp Jéhova té ni lajwa èk fòs-la pou kontiné sèvi Jéhova. San dout yo té ni ‘tjè kontanʼ.​—Izay. 65:14.

13. Jéhova té pwonmèt i té kay libéwé sé Jwif-la hòd Babilonn, èk édé yo établi adowasyon ki vwé ankò. Kisa sa ni pou fè épi nou jòdi?

¹³ Jéhova té pwonmèt i té kay libéwé sé Jwif-la hòd Babilonn, èk i té kay édé yo établi adowasyon ki vwé ankò. Ès sa ni kéchòy pou fè épi nou jòdi? Absoliman! An ki mannyè? Dépi lanné mil nèf san diznèf (1919) an lépòk nou, plizyè milyon moun ja kité Gwan vil Babilonn-an. Gwan vil Babilonn-an sé tout fo wilizyon ki oliwon latè-a. Jéhova mennen yo adan an plas ki pli bèl pasé Tè Pwonmèt-la. Yo adan on plas ki sòv épi yo ka adowé Jéhova an lilyon. (Izay. 51:3; 66:8) Mé ki mannyè nou ka antwé an plas sòv-la?

14. Ki bennéfis sé annonté-a èk sé moun-lan ki ni èspwa pou viv asou latè-a ka twapé an plas sòv-la?

¹⁴ Dépi lanné mil nèf san diznèf (1919) an lépòk nou, sé moun-lan ki ni èspwa pou alé an syèl ja antwé an plas sòv-la, èk yo ka adowé Jéhova an lilyon. Osi, piti an piti sé moun-lan ki ni èspwa pou viv asou latè-a ka antwé plas sòv-la, épi Jéhova ka benni yo tout alabondans. Pou ègzanp, Jéhova libéwé yo hòd fo wilizyon, i ba yo twavay-la pou pwéché bon nouvèl-la konsèné Wéyòm Li, èk i ka édé yo tout pou ni on bon wilasyon épiʼy. Osi yo ka viv an lapé épi yonn a lòt èk sa ka édé yo tjenbé fò lè yo ka èspéyansé pwoblenm. Konsa lè nou koumansé adowé Jéhova an mannyè-a i vlé-a, èk nou fè tout sa nou pé pou imitéʼy, nou ka antwé an plas sòv sala.​—Jan 10:16; Izay. 25:6; 65:13.

15. Ès plas sòv-la an yon péyi asou latè-a?

¹⁵ Bon, ès nou sa di plas sòv-la an yon péyi asou latè-a? Non, nou pa sa di sa, paski pèp Jéhova ka viv toupatou owon latè-a. Konsa plas sòv-la ka ègzisté toupatou owon latè-a. Sa vlé di népòt koté nou yé asou latè-a dépi nou kontiné sipòté adowasyon ki vwé, nou andidan plas sòv-la.

16. Kisa nou ni pou fè pou nou wè bèlté-a ki an plas sòv-la?

¹⁶ Yonn an sé bagay-la nou ni pou fè pou wèsté an plas sòv-la sé sa, nou ni pou kontiné moutwé apwésiyasyon pou tout sé fwè èk sè-a oliwon latè-a. Ki mannyè nou sa fè sa? Ében nou ni pou fiksé asou sé bèl kawaktè-a sé fwè èk sè nou-an ni, pa asou sé ti défo-a yo ni. (Jan 17:20, 21) Pouki i enpòtan pou nou fè sa? Katjilé asou sa. An jaden ni an chay diféwan pyé bwa, adan kout, adan ho, la jis ni sa ki kochi. Mé ou pa ka fiksé asou sa, ou ka wè yo tout bèl an jaden-an. An menm mannyè-a sé fwè èk sè nou-an an sé kongwigasyon-an sòti an diféwan kilti èk yo ni diféwan sitiwasyon. Mé menm kon nou pa té kay fiksé asou sé défo-a sé pyé bwa-a an jaden ni, nou pa vlé fiksé asou ti défo sé fwè èk sè nou-an ni. (Izay. 44:4; 61:3) Konsa sé pa pou nou kité lèwè nou èk lèwè sé fwè èk sè nou-an anpéché nou wè bèlté-a ki an plas sòv-la.

17. Kisa nou chak sa fè pou tjenn lilyon an kongwigasyon-an?

¹⁷ Kisa nou chak sa fè pou tjenn lilyon an kongwigasyon-an? Ében nou sa fè tout sa nou pé pou viv an lapé épi yonn a lòt. (Maf. 5:9; Ronm 12:18) Alò chak fwa nou jwenn òpòtyounité-a pou fè lapé épi lézòt an kongwigasyon-an, nou ka fè plas sòv nou-an pli bèl. Osi nou ni pou chonjé sé Jéhova ki mennen chak fwè èk sè an plas sòv-la pou adowéʼy adan on mannyè ki pi. (Jan 6:44) Imajiné mannyè Jéhova ka kontan lè i wè nou chak ka twavay wèd pou tjenn lapé-a, èk pou fòtifyé lilyon-an anpami nou!​—Izay. 26:3; Hag. 2:7.

18. Lè nou ka toujou mèdité asou Pawòl Bondyé, ki bennéfis nou kay twapé?

¹⁸ Jéhova ja bay sèvant li an chay bon bagay. Alò ki mannyè nou sa twapé bennéfis hòd sé bagay-la Jéhova ja ban nou? Lè nou ka étidyé Pawòl Bondyé èk sé piblikasyon nou-an, nou ni pou pwan tan pou mèdité asou sa nou ka apwann. Si nou étidyé èk mèdité sa kay édé nou dévlopé bèl kawaktè Kwityen, èvèk nou kay ni pli “lanmityé pou yonn a lòt menm kon fwè èk sè sipozé fè”. (Ronm 12:10) Osi lè nou mèdité asou sé bennédisyon-an Jéhova ka ban nou apwézan sa kay fòtifyé wilasyon nou épiʼy. Èk lè nou katjilé asou sé bèl bagay-la Jéhova pwonmèt pou fè ban nou an tan ki ka vini, sa kay pousé nou pou sèviʼy pou tout tan. Si nou fè tout sé bagay sala sa kay édé nou sèvi Jéhova épi pli lajwa.

ANNOU FÈ TOUT SA NOU PÉ POU TJENBÉ FÒ

19. (a) Silon Izaya 30:18, kisa nou asiwé? (b) Kisa ki kay édé nou pou tjenbé fò épi lajwa?

¹⁹ Jéhova ‘kay douboutʼ an favè nou lè i ka détwi vyé latè sala. (Izay. 30:18) Jéhova sé ‘an Dyé jistisʼ, konsa nou asiwé i pa kay pèwmité vyé latè Satan-an pou kontiné pli lonng pasé i nésésè. (Izay. 25:9) Alò nou ka moutwé pasyans menm kon Jéhova jis tan jou sala wivé. Konsa kon nou ka èspéyé jou sala annou kontiné pwédyé, étidyé Pawòl Bondyé èvèk swiv konsèy li an lavi nou. Osi annou kontiné mèdité asou sé bèl bennédiksyon-an nou ni apwézan èk sa nou kay enjwi an tan pou vini. Si nou fè sé bagay sala, Jéhova kay édé nou tjenbé fò épi lajwa kon nou ka adowéʼy.