Pa Kité Anyen Fèʼw Doubout Mété Konfyans An Jéhova

1. Ki mannyè nou sav Jéhova vlé vini pwé nou?

JÉHOVA vlé nou sav i vlé vini Bondyé nou, Papa nou èk Jan nou. Alò, i ka envité nou pou vini pwéʼy. (Jémz 4:8) Kisa Jéhova ka fè pou moutwé i vlé vini pwé nou? Mi adan sé bagay-la i ka fè-a: I ka wéponn lapwiyè nou èk i ka édé nou lè nou ni twaka. Osi, i ka sèvi ògannizasyonʼy pou enstwi nou èk pou pwotéjé nou. Mé kèstyon-an sé: Kisa nou menm ni pou fè pou vini pwé Jéhova?

2. Ki mannyè nou sa vini pwé Jéhova?

² Nou sa vini pwé Jéhova, lè nou pwédyé ba li, èvèk lè nou li pawòl li èk mèdité asouʼy. Lè nou fè sa, nou kay ni pli lanmityé èk apwésiyasyon pouʼy. Èk sa ka pousé nou pou obéyiʼy èk onnowéʼy. (Wév. 4:11) Alò, pli nou vini konnèt Jéhova mèyè, sé pli nou ka mété konfyans nou an li èk ògannizasyonʼy.

3. (a) Ki mannyè Démou-a ka éséyé fè nou pèd konfyans an Jéhova? (b) Ki mannyè nou sa ganyen a bout sé vyé plan Satan-an? (Sam 31:13, 14)

³ Lè nou ka aji épi pwòblenm, Denmou-a ka fè tout sa i pé pou fè nou pèd konfyans an Jéhova. Ki mannyè i ka fè sa? I ka fè sa piti a piti jis lè nou pèd tout konfyans nou an Jéhova épi ògannizasyonʼy. Mé nou sa ganyen a bout sé vyé planʼy-lan. Koumannyè nou sa fè sa? Sé pou nou fè asiwé lafwa nou fò èk konfyans nou an Jéhova byen solid. A lè sa-a, nou kay sa fè asiwé, nou pa kay abandonnen Jéhova èben ògannizasyonʼy.​—Li Sam 31:13, 14.

4. Kisa nou kay diskité an atik sala?

⁴ An atik sala nou kay diskité twa sitiwasyon nou pé ni pou aji épi. Chak di yo sa afébli konfyans nou an Jéhova èk an ògannizasyonʼy. Konsa, nou kay wè kouman pou nou aji épi sé sitiwasyon sala, épi sa nou sa fè pou tjenn konfyans nou an Jéhova èk ògannizasyonʼy fò.

LÈ NOU KA ÈSPÉYANSÉ PWÒBLENM

5. Koumannyè pwòblenm sa afébli konfyans nou an Jéhova épi ògannizasyonʼy?

⁵ Koumannyè pwòblenm sa afébli konfyans nou an Jéhova épi ògannizasyonʼy? Nou tout kay dakò, délè nou ni pou aji épi pwòblenm tèl kon òpozisyon an fanmi-a, èben nou pèd twavay nou. Lè nou èspéyansé pwòblenm kon sa pou an chay tan, sa sa akablé nou ében sa sa twakasé tjè nou. Alò, lè nou anba sé sitiwasyon sala, Satan ka pwan lavantaj. I pa ka pèdi pyès tan pou fè nou kwè, Jéhova pa enmen nou. Sé pa sa tousèl! Satan osi vlé nou kwè, sé Jéhova èk ògannizasyonʼy ki wèskonsab pou tout soufwans nou. Mé sa pa ka sipwi nou. Nou tout sav sé pa apwézan Satan ni vyé mès sala paski on bagay menm kon sa té fèt an tan lontan. Ès ou chonjé sé jan Izwayèl-la ki té an Éjip? An koumansman-an, yo pa té ni pyès dout sété Jéhova ki té apwenté Moziz épi Éronn pou délivwé yo anba èslavaj an Éjip. (Ègz. 4:29-31) Mé lè Féro fè bagay pli wèd asou yo, yo koumansé blanmé Moziz épi Éronn pou tout pwòblenm yo. Yo di: ‘Zò fè Féro èk sé sèvant li-a hayi nou, èk zò mété on sab an lanmen yo pou yo tjwé nou.ʼ (Ègz. 5:19-21) Sa oblijé té kasé tjè Moziz èk Éronn, sé sèvant fidèl Bondyé-a. Wi, sé pa jòdi Denmou-a ka sèvi pwòblenm pou afébli moun. Konsa, nou sa mandé: Koumannyè nou sa tjenn konfyans nou an Jéhova èk ògannizasyonʼy byen solid magwé nou ka èspéyansé pwòblenm?

6. Kisa ki té édé Habakòk pou aji épi pwòblenm li? Èk kisa ki lison-an pou nou? (Habakòk 3:17-19)

⁶ Nou ni pou vidé tjè nou ba Jéhova èk apiyé asouʼy pou sipò. Pwòfèt Habakòk té èspéyansé an chay pwòblenm. La té ni on lè, lè i té ni dout konsèné si Jéhova té vwéman mélé épiʼy. Alò, i vidé tjèʼy ba Jéhova an lapwiyè. I di: “Dyé Jéhova, konmen tan mwen ni pou hélé èk mandéʼw soukou avan ou tann mwen? . . . Pouki ou ka tolowé moun ki ka opwésé lòt moun?” (Hab. 1:2, 3) Ou sav Jéhova wéponn lapwiyè-a ki sòti ofon tjè sèvant fidèl li? Wi. (Hab. 2:2, 3) Èk apwé pwòfèt-la twapé wépons-lan pou lapwiyèʼy, i mèdité asou mannyè Jéhova té sové pèp li èk sa baʼy lajwaʼy ankò. I vin asiwé ki Jéhova té kay otjipéʼy èk i té kay édéʼy tjenbé wèd anba népòt pwòblenm. (Li Habakòk 3:17-19.) Kisa ki lison-an pou nou? Èben, lè nou anba twaka, nou ni pou pwédyé ba Jéhova èk diʼy tout sa ki asou tjè nou. Èk nou ni pou dépan asouʼy pou sipò. Lè nou fè sa, nou kay ni tout konfyans-lan ki, Jéhova kay ban nou tout fòs-la nou bizwen-an pou aji épi sé pwòblenm nou-a. Èk lè nou wè mannyè Jéhova ka sipòté nou, sa ka fè lafwa nou vini pli fò.

7. Kisa fanmi Shirley té diʼy? Èk kisa Shirley té fè pouʼy pa pèd konfyans li an Jéhova?

⁷ Kontiné fè sè bagay-la ki kay édéʼw wété pwé Jéhova. Annou konsidiwé mannyè konsèy sala té édé on sésé lè i té ni tèt cho. Non sésé-a sé Shirley, ki ka wèsté Papua New Guinea.b Fanmi Shirley té pòv èk délè yo pa té menm ni asé manjé. An plis di sa, on moun an lafanmiʼy té ka baʼy tèt cho pou fèʼy pèd konfyans li an Jéhova. I di Shirley: “Ou di lisentèspwi Bondyé té kay édéʼw. Mé mʼòkò wè èd-la an! Ou pli pòv. Ou ka anni gaspiyé tan ka pwéché.” Shirley di: “Sa twakasé mwen. Mwen mandé kò mwen: ‘Ès Bondyé vwéman mélé épi nou?ʼ La menm mwen pwédyé ba Jéhova èk mwen diʼy tout sa ki té asou tjè mwen. Mwen kontiné pou li Bib-la èk sé piblikasyon-an. Mwen pa té doubout pwéché, èk mwen kontiné atandé sé mitin-lan.” Shirley vin wéyalizé ki Jéhova té toujou la épi yo, paski fanmiʼy pa té janmen wèsté fen èk yo té toujou ni tjè kontan. Shirley di: “Mwen sav Jéhova té ka wéponn lapwiyè mwen.” (1 Tim. 6:6-8) Konsa fwè èk sè, si ou kontiné fè sè bagay-la ki kay édéʼw wété pwé Jéhova, ou pa kay kité pyès pwòblenm èben dout fèʼw doubout sèvi Jéhova.

LÈ YO MALTWÉTÉ SÉ FWÈ-A KI KA PWAN DOUVAN AN ÒGANNIZASYON JÉHOVA

8. Kisa ki pé wivé sé fwè-a ki ka pwan douvan an ògannizasyon Jéhova?

⁸ Lèlmi nou ka sèvi wadyo, télévizyon èk intannèt-la pou simen mansonj kont sé fwè-a ki ka pwan douvan an ògannizasyon Jéhova. (Sam 31:13) Yo ja awété adan sé fwè nou-a, èk kondanné yo kon kwiminèl. Mé sa pa ka sipwi nou. Pouki? Paski on bagay kon sa té fèt an pwèmyé syèk-la lè yo té awété zapòt Pòl èk kondannéʼy. Ki mannyè sa té afèkté sé kwityen-an an pwèmyé syèk-la?

9. Kisa adan kwityen té fè lè Pòl té an pwizon?

⁹ Adan kwityen an pwèmyé syèk-la té tounen do yo asou zapòt Pòl lè i té an pwizon an Ronm. (2 Tim. 1:8, 15) Pouki? Ès yo té hont paski sé moun-lan té ka gadé Pòl kon on moun “ki fè an mové kwim”? (2 Tim. 2:8, 9) Ében, ès yo té pè moun té kay pèsikité yo osi? Nou pa sav kisa ki té an lidé yo. Mé nou sa imajiné mannyè Pòl té ka santi. Pòl té ni pou andiwé an chay pwòblenm. Èk i té jis mété laviʼy an wis pou lapéti yo. (Twav. 20:18-21; 2 Kòr. 1:8) Mé yo abandonnenʼy. Konsa fwè èk sè, annou pa janmen vini kon sé moun-lan ki té abandonnen Pòl lè i té byen bizwen yo! Mé kèstyon-an sé sa: Kisa nou ni pou tjenn an lidé lè yo ka pèsikité sé fwè-a ki ka pwan douvan an ògannizasyon Jéhova?

10. Ki moun ki dèyè pèsikasyon-an? Èk kisa ki atansyonʼy?

¹⁰ Chonjé pouki nou ka jwenn pèsikasyon èk ki moun ki dèyèʼy. Pou ki wézon nou ka jwenn pèsikasyon? 2 Timòfi 3:12 ka di nou wézon-an. Mi sé sa i ka di: “An fen, tout moun ki vlé viv an lavi ki nèt, menm kon Jézi Kwi moutwé yo pou fè, kay jwenn pèsikasyon.” Mé ki moun ki dèyè pèsikasyon sala? 1 Pita 5:8 ka di nou sé lèlmi nou, Denmou-a, Satan. Konsa, ki sa ki atansyonʼy? I vlé fè sé fwè-a ki ka pwan douvan doubout sèvi Jéhova. Èk i vlé mété an fwiyè an nou pou nou doubout sèvi Jéhova. Lè nou chonjé sé bagay sala, i ka édé nou tjenn konfyans nou an ògannizasyon Jéhova fò.

11. Ki lison nou apwann an ègzanp Onézifò? (2 Timòfi 1:16-18)

¹¹ Kontiné sipòté sé fwè nou-a èk pa abandonnen yo. (Li 2 Timòfi 1:16-18.) Onézifò, on nonm kwityen an pwèmyé syèk-la, pa té fè kon sé lézòt kwityen ki té abandonnen Pòl. I pa té tounen doʼy asou Pòl lè Pòl té an pwizon èk i “pa té hont paski [Pòl] té an pwizon”. Non. Mé pito i alé gadé pou Pòl, èk lè i jwenn épiʼy, i fè tout sa i pé pou édé Pòl twapé tout sa i té bizwen menm si sa té ka mété laviʼy an wis. Kisa nou sa di ki lison-an pou nou? Ankò, fwè èk sè, nou pa ni pou kité fwiyè nonm anpéché nou sipòté sé fwè nou-a lè yo ka jwenn pèsikasyon. Pito sa, nou vlé fè défans yo èk nou vlé édé yo. (Pwov. 17:17) Yo bizwen lanmityé nou èk sipò nou.

12. Kisa nou sa apwann hòd sé fwè èk sè-a ki an Russia?

¹² Annou gadé ègzanp sé fwè èk sè-a an Russia, èk mannyè yo ka édé sé fwè èk sè-a ki an pwizon. Lè adan di yo ni pou alé lodyans, an chay di yo ka alé kay lodyans-lan pou sipòté yo. Kisa ki lison-an pou nou? Lè moun manti anlè sé fwè-a ki ka pwan douvan, awété yo èben pèsikité yo, sé pa pou nou vini pè. Mé sé pou nou kontiné pou pwédyé pou yo, édé pwan ka fanmi yo èk gadé pou lòt mannyè nou sa sipòté yo.​—Twav. 12:5; 2 Kòr. 1:10, 11.

LÈ MOUN PWAN NOU SÈVI WIZIB

13. Lè moun ka pwan nou sèvi wizib, ki mannyè sa sa afébli konfyans nou an Jéhova èk ògannizasyonʼy?

¹³ Moun tèl kon fanmi nou, jan twavay nou èben jan lékòl nou, pé pwan nou sèvi wizib paski nou ka pwéché èk nou ka swiv lwa Jéhova. (1 Pita 4:4) Yo pé di: “Mwen enmenʼw, mé ou wè wilizyonʼw, zò ni twòp wèg. Sa sé wilizyon jan lontan.” Yo osi pé kwititjé nou pou mannyè nou ka aji épi moun ki èskonminiké. Yo ka jik lévé faché èk ka di: “Ki mannyè zòt ka di zò ni lanmityé, èk zòt ka twété moun-lan kon sa?” Sé pawòl sala sa mété an chay dout an lidé nou. Konsa, nou pé koumansé mandé kò nou kèstyon tèl kon: ‘Ès ou kwè Jéhova ka mandé mwen pou fè twòp bagay? Ès ou kwè ògannizasyonʼy ni twòp wèg?ʼ Lè nou koumansé ni dout an lidé nou, sa ka afébli konfyans nou an Jéhova èk ògannizasyonʼy. Siʼw ka aji épi on sitiwasyon kon sa, kisa ou sa fè pou wèsté pwé Jéhova épi ògannizasyonʼy?

14. Lè nou ka fè sa Jéhova di ki dwèt, moun pé pwan nou sèvi wizib. Ki mannyè nou sa fè menm kon Jòb, lè moun pwan nou sèvi wizib? (Sam 119:50-52)

¹⁴ Kontiné fè sa Jéhova di ki dwèt. Jòb sété on nonm ki té ka fè sa ki dwèt an zyé Jéhova. Menm si moun té ka pwanʼy sèvi wizib paski i té ka fè sa, i pa té doubout. Yonn an sé nonm-lan ki di i sé janʼy, té vléʼy kwè Bondyé pa mélé si Jòb té ka fè sa ki dwèt an zyé Bondyé opa. (Jòb 4:17, 18; 22:3) Mé Jòb pa té kwè gwo mansonj sala. I té sav wèg Jéhova asou sa ki bon èk sa ki mové toujou dwèt. Alò i té vlé kontiné fè sa ki dwèt, épi i pa té kité pyèsonn fèʼy kasé entègwitéʼy pou Jéhova. (Jòb 27:5, 6) Kisa ki lison-an pou nou? Sé pa pou nou kité moun ki ka pwan nou sèvi wizib fè nou kwèstyonnen wèg Jéhova. Mé i kay bon pou nou pwan tan pou katjilé asou sa nou ja èspéyansé an lavi nou menm. Nou pitèt ja èspéyansé an pli mèyè lavi paski nou fè sa Jéhova di ki dwèt. Osi, nou vlé toujou sipòté ògannizasyon-an ki ka toujou tjenn wèg Jéhova. Konsa, menm si moun pwan nou sèvi wizib, nou pa kay janmen doubout sèvi Jéhova.​—Li Sam 119:50-52.

15. Pouki fanmi Brizit té ka pwanʼy sèvi widitjil?

¹⁵ Konsidiwé on èspéyans on sésé ki ka wèsté an India. Nonʼy sé Brizit. Annékòz di lafwaʼy, ni fanmiʼy ni fanmi mawiʼy, té ka pwanʼy sèvi widitjil. Touswit apwé batenm li, an nanné mil nèf san katwiven disèt (1997), mawiʼy ki pa té on Tèmwen Jéhova pèd twavay li. Konsa mawi-a désidé i té kay pwan madanm li épi ich yo épi yo té ka alé wété adan on lòt vil épi pawanʼy. Diwan tan-an yo té ka wèsté épi pawan mawi-a, bagay vini pli mové pou Brizit. Brizit té ni pou twavay pou sipòté fanmiʼy. Èk i pa té ézé pouʼy sa atandé mitin paski kongwigasyon-an té dé san ven (220) lyé hòd plas-la yo té ka wété-a. An plis di sa, fanmi mawiʼy, kontiné baʼy pli chalè pou lapéti lafwaʼy. Chalè-a té si tèlman cho, yo té ni pou kité kay-la. Lè ou kwè bagay té kay vini pli mèyè, mawi Brizit mò sibitman. Touswit apwé, yon fiʼy mò épi kansè. Ti fi-a té douz (12) nanné. Èk sé apwézan tout sé fanmiʼy-la baʼy tèt cho! Yo diʼy, ‘Si ou pa té on Tèmwen Jéhova, tout sé malè sala pa té kay tonbé asou fanmiʼw.ʼ Wannman, Brizit pa té kité sa soukwéʼy. I kontiné mété konfyans an Jéhova, èk i wèsté pwé ògannizasyonʼy.

16. Ki bennédiksyon sésé Brizit wésouvwé paski i té wété pwé Jéhova épi ògannizasyonʼy?

¹⁶ Kon nou tè wè, sésé Brizit té ka wèsté lwen kongwigasyon-an. Konsa, yon ansyen pou sékyout-la ankouwajéʼy pou pwéché an vil-la i té ka wèsté-a, èk pou fè sé mitin-lan an kay li. An koumansman-an sa té wèd pouʼy fè. Mé i swiv diwèksyon-an fwè-a té baʼy-la. Osi, i fè asiwé i fè létid fanmiʼy épi sé fiʼy-la. Kisa ki té wézilta-a? Sésé Brizit koumansé étidyé Bib-la épi plizyè moun èk an chay di yo batizé kon Tèmwen Jéhova. Èk an nanné dé mil senk (2005), i koumansé wann sèvis kon on piyonnè wèglé. Sésé Brizit mété tout konfyans an Jéhova, èk i té wété fidèl pou ògannizasyonʼy. Èk i èspéyansé an chay bennédiksyon. I wè sé fiʼy-la wèsté fidèl pou Jéhova. Èk i wè dé (2) kongwigasyon koumansé an vil li! Sésé Brizit té asiwé, Jéhova té baʼy tout kouway-la pouʼy té sa aji épi tout sé mové sitiwasyon-an i té èspéyansé-a, èk pouʼy té sa andiwé anba widitjil sé fanmiʼy-lan.

WÈSTÉ FIDÈL POU JÉHOVA ÉPI ÒGANNIZASYONʼY

17. Kisa nou sipozé détèminé pou fè?

¹⁷ Satan vlé nou kwè, Jéhova pa kay édé nou lè nou an twaka. I osi vlé nou kwè, lavi kay pli difisil pou nou lè nou ka sipòté ògannizasyon Jéhova. I osi vlé nou vini pè, lè yo ka simen mansonj kont sé fwè-a ki ka pwan douvan, awété yo, pèsikité yo èben mété yo an lajòl. Satan ka fè moun pwan nou sèvi widitjil, paski i vlé afébli konfyans nou an wèg Jéhova èk an ògannizasyonʼy. Kanmenm, nou byen konnèt mannyè Satan ka twavay, èk nou pa kay kitéʼy kwennen nou. (2 Kòr. 2:11) Sé pou nou ditèminé pou widjèkté sé mansonj Satan, èk wèsté pwé Jéhova épi ògannizasyonʼy. Konsa, toujou chonjé, Jéhova pa kay janmen abandonnenʼw. (Sam 28:7) Èk fwè èk sè, pa kité anyen fèʼw doubout sèvi Jéhova!​—Ronm 8:35-39.

18. Kisa nou kay diskité an lòt atik-la?

¹⁸ An atik sala, nou ja diskité twa (3) sitiwasyon nou pé ni pou aji épi. Mé la ni lòt sitiwasyon ki sa mété konfyans nou an Jéhova épi ògannizasyonʼy anba tès; sitou, lèʼy ka fèt an kongwigasyon-an menm. An lòt atik-la, nou kay diskité: Ki mannyè nou sa ni siksé èk tjenn konfyans nou an Jéhova épi ògannizasyonʼy fò, lè sitiwasyon difisil lévé an kongwigasyon-an menm?