Sé Pou Nou Kontiné Ankouwajé Èk Édé Yonn A Lòt

1. Silon 1 Tèsalonnika 5:11, ki twavay enpòtan nou tout ka fè?

SÉ PA ti kontan nou kontan lè nou bati yon Lasal Wéyòm. Sé Lasal Wéyòm nou-a, ka glowifyé Jéhova. Ès kongwigasyonʼw té janmen ni pou bati èben wanjé on Lasal Wéyòm? Nou asiwé ou ka chonjé pwèmyé mitin-lan ou té atandé la. Èvèk pitèt ou té si tèlman kontan, ou pa té menm chanté pwèmyé chanson-an byen. Jou sala, pitèt sé pa dé mèsi ou di Bondyé. Kanmenm, menm si ou té ni òpòtyounité-a pou twavay asou yon Lasal Wéyòm opa, la ni lòt twavay nou tout sa fè. Twavay sala pli enpòtan pasé twavay-la asou yon Lasal Wéyòm. Kisa ki twavay sala? Pòl té mansyonnen an 1 Tèsalonnika 5:11 (Liʼy). Wi, twavay enpòtan sala sé pou ankouwajé èk édé sé fwè èk sè nou-a.

2. Kisa nou kay diskité an atik sala?

² Zapòt Pòl té sav koumannyè pou ankouwajé sé fwè èk sèʼy-la. I té ni konpasyon pou yo èk i té byen konpwann mannyè yo té ka santi. An atik sala, nou kay konsidiwé ki mannyè i té édé sé fwè èk sèʼy-la pou (1) tjenbé fò lè yo té ka èspéyansé difikilté; (2) pou fè lapé épi yonn é lòt; èk (3) pou fòtifyé lafwa yo an Jéhova. Apwézan, annou wè kouman nou sa imité ègzanp li pou nou sa kontiné ankouwajé èk édé sé fwè èk sè nou-a.​—1 Kòr. 11:1.

PÒL TÉ ÉDÉ SÉ FWÈ ÈK SÈʼY-LA POU TJENBÉ FÒ, LÈ YO TÉ KA ÈSPÉYANSÉ DIFIKILTÉ

3. Kisa Pòl té fè lè i pa té ni asé lajan? Èk kisa ki té pli enpòtan pouʼy?

³ Pòl té kontan sé fwè-a an chay. Konsa, I té ka fè sa i pé pou édé sé fwè èk sèʼy-la. I té èspéyansé an chay difikilté an laviʼy. Alò i té sa édé sé fwè èk sè-a, lè yo menm té ka èspéyansé difikilté. Pou ègzanp, yon fwa, Pòl pa té ni asé lajan. Konsa, i té ni pou twavay wèd pou sipòté ni kòʼy ni sé janʼy-lan. (Twav. 20:34) Konsa, lè i wivé an Kòrint, I té ka twavay épi Prisilya épi Akwila pou fè tant. Mé “toulé jou sabaf Pòl té ka...[pwéché bay] ni Jwif ni jan péyi Gris...Épi lè Saylas épi Timòfi wivé sòti Masédonnya, Pòl sèvi tout tanʼy ka pwéché.” (Twav. 18:2-5) Wi, Pòl pa té janmen obliyé, sa ki té pli enpòtan an laviʼy; èk sa sé, pou sèvi Jéhova. Pòl té ka twavay wèd an minis-la, mé an menm di tan, i té ka twavay wèd pou otjipé kòʼy. Konsa, i té adan on bon pozisyon pou ankouwajé sé fè èk sèʼy-la. I di yo menm si lavi wèd èk yo ni pou otjipé fanmi yo, yo pa ni pou kité sé bagay sala anpéché yo fè “sa ki pli bon-an”. Sa vlé di, tout sé diféwan mannyè-a nou ka adowé Jéhova.​—Filip. 1:10.

4. (a) Kisa Pòl té fè pou édé sé fwè-a kontiné tjenbé fò anba pèsikasyon? (b) Koumannyè Timòfi té sa édé sé fwè èk sè-a? Èk pouki i té sa fè sa?

⁴ Touswit apwé yo établi yon kongwigasyon an Tèsalonnika, sé fwè èk sè-a koumansé èspéyansé an chay òpozisyon. Pou ègzanp, yon jou, lè yon gany moun pa té sa jwenn Pòl épi Saylas, “yo twennen [déotwa] fwè douvan sé majèstwa vil-la épi yo tout hélé fò, yo di, “Sé nonm sala ja bay twaka toupatou...Yo tout ka kasé lwa Siza wa Ronm-lan.”” (Twav. 17:6, 7) San dout, pa ti pè sé fwè èk sè-a an Tèsalonnika té pè lè sé nonm vil-la tounen kont yo. Òpozisyon sala té sa fè yo doubout an sèvis yo pou Jéhova. Mé Pòl pa té vlé sa fèt. Konsa, menm si Pòl èk Saylas té ni pou kité vil-la, i fè asiwé sé fwè èk sè-a té ni sa yo té bizwen pou fòtifyé lafwa yo èk kontiné tjébé fò. An 1 Tèsalonnika 3:2, 3 Pòl di yo: “Nou voyé fwè nou Timòfi kotéʼw... Nou voyéʼy pouʼy sa ankouwajéʼw épi pouʼy sa édéʼw pou kontiné kwè an Senyè Jézi Kwi pou zòt pyès pa tounen dèyè lè yo ka pèsikité zòt kon sa.” Pitèt Timòfi té èspéyansé pèsikasyon an vil li, Listra. Èk i té wè mannyè Pòl té ankouwajé èk fòtifyé kongwigasyon-an an Listra. Timòfi té wè mannyè Jéhova té édé, sipòté èk benni kongwigasyon-an. Konsa, i té sa asiwé sé fwè èk sè-a an Tèsalonnika, Jéhova té kay fè menm bagay-la pou yo osi.—Twav. 14:8, 19-22; Hib. 12:2.

5. Ki èd yon ansyen té bay Bryant? Èk ki bennéfis Bryant té twapé?

⁵ An ki lòt mannyè Pòl té édé sé fwè èk sèʼy-la pou tjenbé fò? Lè Pòl èk Bannabas déviwé Listra, Ikonnyòm épi Antiyòk, yo apwenté ansyen an chak kongwigasyon. (Twav. 14:21-23) San dout, sé nonm-la yo té apwenté-a té édé sé kongwigasyon-an, menm kon sé ansyen-an ka édé nou jòdi jou. Pou ègzanp, annou konsidiwé èspéyans Bryant. Tann sa fwè Bryant té di: “Lè mwen té kenz (15) lanné, papa mwen kité kay-la, èk manman mwen té èskonminiké. Mwen té santi yo abandonnen mwen èk mwen té dékouwajé toubonnman.” Kisa ki té édé Bryant tjenbé fò padan tan difisil sala? I di: “Tony, yon an sé ansyen-an, té ka toujou pwan on ti tan pou kozé épi mwen lè mwen alé mitin èk an lòt lè. I té di mwen konsèné sé moun-lan ki té ni tjè kontan magwé yo té ni pou aji épi difikilté. I li Sam 27:10 épi mwen. Èk i té ka toujou di mwen konsèné Hèzikaya ki té wèsté fidèl magwé papaʼy pa té on bon ègzanp.” Kouman sa té édé Bryant pou tjébé fò? Mi sé sa Bryant di: “Ankouwajman-an Tony té ban mwen-an pousé mwen pou fè an sèvis Jéhova. Gwanmèsi ankouwajman sala, mwen antwé sèvis an plen. Èk sa té ban mwen an chay tjè kontan.” Menm kon Bryant, la ni moun ki bizwen ‘an bèl ti pawòlʼ pou ankouwajé yo. Konsa, sé pou sé ansyen-an gadé pou lokazyon pou yo ankouwajé sé fwè èk sè yo-a.​—Pwov. 12:25.

6. Pouki Pòl té sèvis listwa “gwan popilas moun-lan” pou ankouwajé sé fwè èk sèʼy-la?

⁶ Pòl fè sé fwè èk sèʼy-la chonjé “tout gwan popilas moun[-lan] ki té moutwé ki yo té ni lafwa an Bondyé-a”. (Hib. 12:1) Sé moun sala té sa andiwé tout kalité twaka, paski Jéhova té ba yo fòs. Pou ki wézon Pòl té mansyonnen sé moun sala? Paski i té sav ègzanp yo, listwa yo, té kay édé sé fwè èk sè-a pwan kouwaj èk wèsté fiksé asou “vil Bondyé vivan-an.” (Hib. 12:22) Èk lè nou li konsèné mannyè Jéhova té moun tèl kon Gidiyonn, Barak, David, Sanmyèl, èk lézòt, sa ka ban nou fòs. Ès pa? (Hib. 11:32-35) Osi byen, lè nou li konsèné sé fwè èk sè nou-an jòdi jou ki ka andiwé difikilté, sa ka ban nou fòs osi. Byen souvan, pwensipal ofis ka wésouvwé lèt hòd sé fwè èk sè-a ki ka èspliké mannyè lafwa yo vini pli fò paski yo té listwa sé fwè èk sè-a ki té wèsté fidèl anba tout difikilté yo.

PÒL TÉ MOUTWÉ SÉ FWÈ ÈK SÈʼY-LA MANNYÈ POU YO “VIV AN LAPÉ” ÉPI YONN A LÒT

7. Kisa ou apwann an konsèy-la Pòl té bay an Ronm 14:19-21?

⁷ Nou ka ankouwajé sé fwè èk sè nou-a, lè nou di èk fè bagay ki ka pwomoté lapé an kongwigasyon-an. Menm si nou pa ka wè bagay menm mannyè-a, nou pa ka kité sa mété divizyon anpanmi nou. Èk nou ka moutwé nou wézonnab lè moun fè chwa yo, èk chwa yo pa ka alé kont pwensip Bib. Bon. Konsidiwé ègzanp sala. Kongwigasyon-an an Ronm té ni ni Jwif ni moun ki pa té Jwif. Sé Kwityen-an pa té anba Lwa Moziz ankò. Konsa, yo pa té ni pou obéyi Lwa Moziz-la ki té di yo, yo pa sipozé manjé sèten manjé. (Mak 7:19) Dépi tan sala, adan Jwif ki té kwityen santi lib pou manjé népòt kalté manjé. Mé la té ni lézòt Jwi ki té Kwityen, ki twouvéʼy wèd manjé kalté manjé sa-a. Annékòz di sa, la té ni on divizyon an kongwigasyon-an. Konsa, Pòl enfòsé enpòtans-lan pou tjenn lapé. I di yo: “I bon si ou pa té kay manjé vyann, ében bwè diven, anfen fè anyen ki té kay annékòz fwèʼw tonbé.” (Li Ronm 14:19-21.) Pòl édé sé fwè èk sè-a wè, mannyè sé chikann sala, sa afébli lafwa yo, donmajé wilasyon yo épi yonn-a-lòt, èk donmajé kongwigasyon-an. Alò, Pòl menm, té pawé pou fè chanjman si sa té kay anpéché sé fwè èk sèʼy-la tonbé. (1 Kòr. 9:19-22) An menm mannyè-a, nou osi sa ankouwajé lézòt èk tjenn lapé, si nou pa fè chikann lè i vini pou chwa, ki sé chwa nou ki sé chwa lézòt.

8. Kisa Pòl té fè pou tjenn lapé-a an kongwigasyon-an?

⁸ Menm si nou pa ka dakò épi moun asou sèten bagay, nou ni bon ègzanp Pòl sa édé nou tjenn lapé. Annou konsidiwé ègzanp li. An pwèmyé syèk-la,adan kwityen ki té Jwif té vlé fòsé sa ki pa té Jwif pou sikonsayz. Pitèt yo té fè sa paski yo pa té vlé lòt Jwif kwititjé yo. (Gal. 6:12) Mé Pòl pa té dakò épi sa pyès. Èk i pa té fòsé sa i té kwè-a asou lézòt. Mé pito sa, épi imilité, i mandé sé zapòt-la èk sé ansyen-an an Jérouzalèm, kisa pou fè. (Twav. 15:1, 2) Konsa, paski Pòl té aji épi matyè sala an mannyè sala, sa édé sé fwè èk sè-a pou tjenn lajwa yo èk lapé an kongwigasyon-an.​—Twav. 15:30, 31.

9. Ki mannyè nou sa pwomoté lapé?

⁹ Lè on chikann lévé konsèné chwa moun fè, nou vlé fè menm kon Pòl èk pwomoté lapé. Èk nou sa fè sa lè nou chaché pou djid hòd sé moun-an Jéhova apwenté pou pwan ka kongwigasyon-an. Osi, nou sa pwomoté lapé, si nou swiv sé diwèksyon-an ki an sé piblikasyon-an, èk sé enstwiksyon-an ògannizasyon-an ka potjiwé. Byen souvan, sé diwèksyon sala èk sé enstwiksyon sala bazé asou Bib-la. Konsa, pito nou pwomoté chwa nou menm, nou vlé pwomoté lapé.

10. Ki lòt bagay nou sa fè pou pwomoté lapé?

¹⁰ Pòl té ka pwomoté lapé lè i té ka palé byen konsèné sé fwè èk sèʼy-la. I pa té mal palé yo. I té ka toujou palé konsèné bèl kawaktè yo. Pou ègzanp, lè Pòl té ékwi sé kwityen-an an Ronm, an bout lèt li i mansyonnen non plizyé fwè èk sè. Èk i mansyonnen bagay ki bon konsèné yo. Konsa, nou sa imité Pòl, èk nou sa mansyonnen bon kawaktè sé fwè èk sè nou-a lè nou ka palé. Si nou fè sa, nou kay bay fwè èk sè nou pli wézon pou yo vini pli pwé yonn a lòt. Èk sa kay édé kongwigasyon-an pou vini pli fò an lanmityé.

11. Si nou ni on chikann ében on dézagwéman épi on fwè ében on sè, kisa nou sa fè pou tjenn lapé an kongwigasyon-an?

¹¹ Délè, jis moun ki Kwityen ki ni an chay èspéyans an lavéwité-a pé ni dézagwéman ant yonn a lòt; yo pé jis babiyé épi yonn a lòt. Sé sa ki té wivé zapòt Pòl èk bon janʼy Bannabas. Sé dé nonm sala té ni on dézagwéman konsèné si sé pou pwan Mak asou voyaj-la épi yo opa. Bib-la di, “la té ni on gwo chikann ant yo dé-a” èk yo désidé pou pa voyajé ansanm. (Twav. 15:37-39) Magwé sa, Pòl, Bannabas, èk Mak pa té kité sa donmajé wilasyon yo. Yo pa té mété pli valè asou katjil yo èk santiman yo. Non. Mé pito, yo té mété pli valè asou lapé-a èk lilyon-an an kongwigasyon-an. Èk pli ta, Bib-la di nou, Pòl té palé byen konsèné ni Bannabas ni Mak. (1 Kòr. 9:6; Kòl. 4:10) An menm mannyè-a, nou osi ni pou twavay wèd pou wanjé népòt chikann ében dézagwéman nou pé ni épi lézòt an kongwigasyon-an. Èk osi, nou vlé kontiné fiksé asou sé bon kawaktè-a yo ni. Si nou fè sa, nou kay enkouwajé sé fwè èk sè-a pou tjenn lapé-a èk lilyon-an ki an kongwigasyon-an.​—Èfés. 4:3.

ZAPÒT PÒL TÉ ÉDÉ SÉ FWÈ ÈK SÈ-A POU FÒTIFYÉ LAFWA YO

12. Ki diféwan pwoblenm sé fwè èk sè nou-an té èspéyansé?

¹² Nou ka enkouwajé sé fwè èk sè nou-an, lè nou enkouwajé yo pou fòtifyé lafwa yo an Jéhova. La ni fwè épi sè ki ka twapé widitjil hòd fanmi yo, moun yo ka alé lékòl épi ében moun yo ka twavay épi. Osi, la ni lézòt ki ka soufè anba mové maladi, ében yo dékouwajé paski on moun di ében fè on bagay ki blésé tjè yo. Apa di sa, la ni lézòt ki ka sèvi Jéhova pou plizyè lanné épi yo anvi wè bout vyé sistèm sala wivé. Tout sé sitiwasyon sala, sa mété lafwa nou anba tès. Sé kwityen-an an pwèmyé syèk-la té èspéyansé pwoblenm menm kon sa nou ka èspéyansé jòdi jou. Kisa zapòt Pòl té fè pou fòtifyé lafwa sé fwè èk sè sala?

13. Ki mannyè zapòt Pòl té édé sé fwè èk sè-a ki té ka èspéyansé widitjil?

¹³ Zapòt Pòl té sèvi sé lévanjil-la pou fòtifyé lafwa sé fwè èk sè-a. Pou ègzanp, Kwityen ki té Jwif pitèt pa té sav sa pou di fanmi yo ki té ka kwè wilizyon sé Jwif-la té pli mèyè pasé wilizyon Kwityen. San dout, lè zapòt Pòl té ékwi sé Kwityen Hibrou-a, i fòtifyé lafwa yo an chay. (Hib. 1:5, 6; 2:2, 3; 9:24, 25) Mannyè Pòl té ka wézonnen an lèt li té sa édé sé fwè èk sè-a konnèt kisa pou di moun ki té ka opozé yo. Alò, si yo pa té sav mannyè pou wéponn moun ki té ka pwan yo sèvi wizib, lèt Pòl té sa édé yo. Jòdi jou nou sa édé fwè èk sè ki ka èspéyansé widitjil pou sèvi sé piblikasyon nou-an pou èspliké wézon-an yo ni konfyans an sa yo ka kwè andan. Osi, si sé jenn moun nou-an ka èspéyansé widitjil an lékòl paski yo ka kwè an kwéyasyon, nou sa édé yo twapé enfòmasyon an sé ti liv-la Was Life Created? èk The Origin of Life​—Five Questions Worth Asking pou moutwé pouki yo ka kwè la ni on kwéyatè.

14. Menm si zapòt Pòl té ka twavay wèd twavay pwèchman-an, kisa i té ka toujou gadé pou?

¹⁴ Zapòt Pòl té enkouwajé sé fwè èk sè-a “pou fè sa ki bon” pou moutwé lanmityé yo pou yonn a lòt. (Hib. 10:24) I édé yo pa sèlman pa sa i té di yo, mé pa aksyonʼy osi. Anfen, menm si zapòt Pòl té ka twavay wèd an twavay pwèchman-an èk an twavay-la pou enstwi moun, i té ka toujou gadé pou mannyè pou édé sé fwè èk sè-a ki té ni labizwen. (Gal. 2:10) Pou ègzanp, lè sé fwè èk sè-a té ka soufè paski la té ni on lafen an péyi Joudiya, zapòt Pòl té édé yo twapé sa yo té bizwen. (Twav. 11:27-30) Wi, pa aksyonʼy, Pòl té édé sé fwè èk sè-a pou fòtifyé konfyans yo ki, Jéhova té kay otjipé yo. Jòdi, lè nou sèvi tan nou, fòs nou, èk abilité nou pou édé sé fwè èk sè-a apwé on dézas, nou ka fòtifyé lafwa yo. Nou osi ka fè sa, lè nou fè donnasyon pou sipòté twavay-la oliwon latè-a. An sé mannyè sala èk lòt mannyè, nou ka édé sé fwè èk sè nou-an pou ni konfyans-lan ki, Jéhova pa kay janmen abandonnen yo.

15-16. Koumannyè nou sipozé twété sé fwè èk sè-a ki lafwa yo vini fèb?

¹⁵ Zapòt Pòl kontiné ankouwajé sé fwè èk sè-a lafwa yo té vini fèb. I moutwé yo konpasyon èk i palé épi yo adan on mannyè ki té janti èk pòzitif. (Hib. 6:9; 10:39) Pou ègzanp, lè i ékwi sé kwityen Hibrou-a, byen souvan i sèvi mo pawòl-la “nou” pou moutwé i menm té ni pou mété an pwatik konsèy-la i té ka ba yo. (Hib. 2:1, 3) Menm kon zapòt Pòl, nou osi vlé kontiné ankouwajé sé fwè èk sè nou-a ki ni lafwa ki fèb. Nou vwéman vlé moutwé yo, nou antéwésé an yo. An mannyè sala nou ka moutwé nou vwéman enmen yo. Bon. Nou sa ankouwajé sé fwè èk sè nou-a an sa nou ka di yo. Èk osi, nou sa ankouwajé yo, lè nou palé épi yo adan on mannyè ki dous èk janti.

¹⁶ Zapòt Pòl bay sé fwè èk sèʼy-la asiwans-lan ki, Jéhova ka wè sé bon twavay-la yo ka fè-a. (Hib. 10:32-34) Èk nou sa fè menm bagay-la lè nou ka asisté on fwè èben on sè ki ni lafwa ki fèb. Pou ègzanp, nou pé mandéʼy pou di nou mannyè pou i apwann lavéwité-a. Osi, nou sa ankouwajéʼy pou chonjé sé lè-a i té èspéyansé sipò Jéhova. Nou sa sèvi lokazyon sala, pou baʼy asiwans-lan ki, Jéhova pa ka obliyé bon twavay li, èk Jéhova pa kay janmen abandonnenʼy. (Hib. 6:10; 13:5, 6) Konmészayon kon sa, sa ankouwajé sé fwè èk sè nou-a pou kontiné an sèvis Jéhova.

“KONTINÉ ANKOUWAJÉ YONN A LÒT”

17. Kisa nou sa kontiné fè?

¹⁷ Menm kon on moun ki ka fè twavay konstwiksyon ka apwann mannyè pou fè twavay li pli mèyè, nou sa apwann pou fè pli mèyè an mannyè-a nou ka ankouwajé yonn a lòt. Nou sa kontiné édé lézòt pou ni fòs-la pou yo tjébé fò anba difikilté, lè nou patajé épi yo ègzanp moun ki té andiwé anba difikilté an tan pasé. Osi, nou sa kontiné ankouwajé lapé, lè nou palé konsèné sé bon bagay-la nou wè an lézòt, lè nou pa kité anyen anpéché nou viv an lapé épi yonn a lòt, èk lè nou fè tout sa nou pé pou ni lapé lè la ni yon dézagwéman. Èvèk nou sa kontiné fòtifyé lafwa sé fwè èk sè nou-a, lè nou palé épi yo konsèné lavéwité-a ki an Bib-la, lè nou ba yo èd-la yo bizwen, èk lè nou sipòté yo si lafwa yo vini fèb.

18. Kisa ou détèminé pou fè?

¹⁸ Sé fwè èk sè-a ki ka twavay asou Lasal Wéyòm èk lòt pwojé ni an chay djwèté èk lakontantman. Nou osi sa èspéyansé djwèté èk lakontantman, lè nou édé fòtifyé lafwa sé fwè èk sè nou-a. Sé plas-la nou ka bati pa kay diwé pou tout tan. Kanmenm, wézilta èfò nou pou fòtifyé lafwa sé fwè èk sè nou-a, kay diwé pou tout tan! Alò, annou fèʼy détèminasyon nou “pou ankouwajé yonn a lòt èvèk édé yonn a lòt.”​—1 Tèsa. 5:11.