Kisa Bib-la Ka Di Nou Konsèné Jéhova, Mèt Bib-la?

1. Pou ki wézon ou ka wimèsyé Jéhova pou Bib-la?

NOU ka wimèsyé Jéhova toubonnman pou Bib-la! Jéhova ka sèvi Bib-la pou ban nou bon konsèy ki sa édé nou pou aji épi sé pwòblenm-lan nou ni an lavi nou jòdi jou. I osi ka sèvi Bib-la pou ban nou an bèl èspwa pou tan ki ka vini. Èk pli enpòtan toujou, Bib-la ka di nou konsèné kawaktè Bondyé. Konsa, lè nou mèdité asou sé bèl kawaktè-a Bondyé ni, sa ka vwéman touché tjè nou, èk sa ka pousé nou pou ni an bon wilasyon épiʼy.​—Sam 25:14.

2. Kisa Jéhova ja sèvi pou fè lézòm konnèt li?

² Jéhova vlé moun konnèt li. Nou sav sa paski an tan pasé i té sèvi wèv, vizyon èk nanj pou fè moun konnèt li. (Lim. 12:6; Twav. 10:3, 4) Kanmenm, nou pa té kay konnèt konsèné sé wèv-la, sé vizyon-an ében sé konmisyon-an hòd sé nanj-lan, si moun pa té ékwi konsèné yo. Èk sé pou wézon sala Jéhova sèvi nonm pou ‘ékwi sé bagay-laʼ i té vlé nou konnèt. (Wév. 21:5) Kon Sam 18:30 di, ‘chimen Dyé-a ki vwé-a pawfé,ʼ alò Jéhova ka sèvi Bib-la pou palé épi nou jòdi jou. Konsa nou sav sa sé an bon disizyon Jéhova fè èk nou kay twapé bennéfis.

3. Kisa Jéhova té fè pou nou sa ni Bib-la jòdi jou? (Izaya 40:8)

³ Li Izaya 40:8. Pou plizyè mil lanné, nonm èk fanm fidèl ja sèvi Pawòl Bondyé pou twapé bon diwèksyon. Mé koumannyè sa posib? Sa sé an bon kèstyon paski chonjé, moun té ékwi lévanjil-la asou matwiyo ki pa té ka diwé pou an chay tan. Konsa, nou pa ni pyès an sé dòkyouman-an yo té ékwi Bib-la asou an koumansman-an. Kanmenm, Jéhova fè asiwé moun té kontiné kòpi Bib-la pou nou té sa niʼy jòdi jou. Magwé sé moun-lan ki té ka kòpi Bib-la pa té pawfé, yo té ka pwan an chay pokosyon lè yo té ka kòpi Bib-la. Anfen, yon nonm ki ka étidyé manniskwit Bib, palé konsèné sé lévanjil-la ki té ékwi an langaj Hibrou. I di: “Nou sa di épi konfyans, anpami tout liv lontan moun ja kòpi, Bib-la sé sèl liv-la ki pa chanjé.” Alò, menm si Bib-la té ékwi konmen mil lanné ki pasé, asou matwiyo ki té ka pouwi, èk sé nonm-lan ki té kòpi Bib-la pa té pawfé, nou sa ni asé konfyans ki, sa nou ka li an Bib-la jòdi jou vwéman sé Pawòl Bondyé.

4. Kisa nou kay diskité an atik sala?

⁴ Sé Jéhova ‘ki ka ban nou tout bon kado èk tout bon bagay ki pa ni défo.ʼ (Jémz 1:17) Èk Bib-la sé yonn an sé pli bèl kado-a Jéhova ja ban nou. Lè an moun ban nou an kado, kado-a ka moutwé moun-lan byen konnèt nou èk i sav sa nou bizwen. Èk an menm mannyè-a, lè nou ègzanminé bèl kado-a Jéhova ban nou-an, Bib-la, nou ka apwann an chay konsènéʼy. Pou ègzanp, nou ka apwann i byen konnèt nou èk i konnèt sa nou bizwen. An atik sala, nou kay diskité sa Bib-la ka di nou konsèné twa (3) an sé kawaktè Bondyé-a: lasajès li, jistis li, èk lanmityéʼy. Pwèmyéman, annou konsidiwé mannyè Bib-la ka moutwé Bondyé ni lasajès.

BIB-LA NI LASAJÈS BONDYÉ

5. Kisa ki ka moutwé Bib-la vwéman ni lasajès Bondyé?

⁵ Jéhova sav nou bizwen bon konsèy. Èk kadoʼy, Bib-la, plen épi lasajès li. Konsèy-la ki an Bib-la sa édé moun viv an pli mèyè lavi. Anfen, Bib-la ka chanjé lavi moun. Lè Moziz té ékwi sé senk (5) pwèmyé liv-la ki an Bib-la, i di jan Izwayèl: ‘Pawòl sala sé pa pawòl ki pa enpòtan. Paski laviʼw ka dépan asouʼy.ʼ (Dito. 32:47) Jan Izwayèl ki té obéyi Pawòl Bondyé té sa enjwi an bon lavi ki té plen épi lakontantman. (Sam 1:2, 3) Menm si Pawòl Bondyé té ékwi an chay tan ki pasé, i ni pouvwa-a pou fè lavi moun pli mèyè toujou. Pou ègzanp, an sé atik-la “Bib-la Ka Chanjé Lavi Moun,” asou jw.org, ou kay twapé plizyè èspéyans konsèné moun ki té fè gwo chanjman an lavi yo. Èk lavi yo té vini pli mèyè paski yo koumansé obéyi konsèy-la ki an Bib-la.​—1 Tèsa. 2:13.

6. Poutji nou sa di la pa ni pyès lòt liv kon Bib-la?

⁶ La pa ni pyès lòt liv kon Bib-la. Poutji nou sa di sa? Sé paski Mèt Bib-la sé Dyé Jéhova. Èk Dyé Jéhova sé Dyé Toupisan-an. I ka viv pou tout tan èk la pa ni pyès lòt moun ki ni lasajès kon li. Osi, la ni plizyè liv moun ka kontiné li apwé mèt sé liv sala mò. Mé byen souvan moun pa sa sèvi konsèy sé liv sala ankò. Okontwè, lè i vini pou sé pwensip-la ki an Bib-la, moun sa toujou sèvi yo. Èk sé pwensip sala ja édé moun an tout jennenwasyon. Konsa lè nou li Bib-la èk lè nou mèdité asou pwensip Bib, Jéhova ka sèvi lisentèspwiʼy pou édé nou swiv sé pwensip sala an lavi nou. (Sam 119:27; Mala. 3:16; Hib. 4:12) Wi, Mèt Bib-la vwéman vlé édéʼw! Alò, ès sa pa ka ankouwajéʼw pou li Bib-la touléjou?

7. Ki mannyè Bondyé té sèvi sé lévanjil-la pou tjenn pèp li an lilyon an tan pasé?

⁷ Mi an lòt bagay ki ka moutwé Bib-la ni lasajès Bondyé. Bib-la ka édé pèp Bondyé ni lilyon anpami yo. Pou ègzanp, lè nasyon Izwayèl té antwé Tè Pwonmèt-la, yo tout pa té ka wèsté an menm plas-la. Mé paski péyi-a té byen gwan yo té ka wèsté diféwan koté an péyi-a. Osi, yo té ka fè diféwan kalté twavay. Adan di yo té péchè. Adan di yo té ka otjipé zannimo èk adan di yo té fama. Alò i té byen ézé pou jan Izwayèl ki té ka viv yon plas an péyi-a, pou obliyé lòt jan Izwayèl ki té ka viv lòt koté an menm péyi-a. Kanmenm Dyé Lasajès-la Jéhova anpéché sa fèt, paski i fè an wanjman pou tout jan Izwayèl vini ansanm asou sèten lokazyon pou yo tann moun li èk èspliké Pawòl li. (Dito. 31:10-13; Néhi. 8:2, 8, 18) Imajiné mannyè chak jan Izwayèl té ka santi lè i wè pitèt milyon di lòt jan Izwayèl ki sòti oliwon péyi-a vini ansanm an Jérouzalèm pou adowé Jéhova! Wi, an mannyè sala Jéhova tjenn pèp li an lilyon. Osi, pli ta lè kongwigasyon Kwityen-an té établi, i té ni fwè èk sè ki té ka palé diféwan langaj. Adan di yo té ni gwo pozisyon èk adan di yo té moun òdinè. Osi, adan di yo té wich èk adan di yo té pòv. Mé paski yo tout té enmen sé lévanjil-la, yo té ka adowé Dyé Vwé-a an lilyon. Èk sèl mannyè moun ki té vini Kwityen té sa konpwann Pawòl Bondyé, sé si yo té aksèpté èd lòt Kwityen èk si yo té ka asanblé ansanm épi yo.​—Twav. 2:42; 8:30, 31.

8. Jòdi jou, ki mannyè Jéhova ka sèvi Bib-la pou tjenn pèp li an lilyon?

⁸ Jòdi jou, Dyé nou ki plen lasajès ka kontiné pou sèvi Bib-la pou enstwi tout pèp li mannyè-a pou adowéʼy. Wi, tout sa nou bizwen konnèt konsèné Jéhova an Bib-la. Alò i ka ban nou on chay plézi pou atandé mitin, asanblé èk konvansyon, paski an sé lokazyon sala nou ka tann sé fwè-a li, èspliké, èk diskité Pawòl Bondyé. An mannyè sala Jéhova ka tjenn pèp li an lilyon. Vwéman, Bib-la sé on bèl zouti Jéhova ka sèvi pou édé pèp li ‘sèviʼy ansanm an lilyon.ʼ​—Zèf. 3:9.

9. Si on moun vlé konpwann Bib-la, ki kawaktè i bizwen? (Louk 10:21)

⁹ Annou konsidiwé on lòt bagay ki ka moutwé Bib-la ni lasajès Bondyé. Jéhova awanjé sèten pòsyon an Bib-la adan an sèten mannyè pou sèlman moun ki ni imilité konpwann yo. (Li Louk 10:21.) Moun tout oliwon latè-a ka li Bib-la. Yon nonm ki ni gwo endikasyon di, “pli moun ja li Bib-la pasé pyès lòt liv, èk osi la pa ni pyès lòt liv moun ja ègzanminé pasé Bib-la.” Kanmenm, magwé otan moun ka li Bib-la, sé sèlman moun ki ni imilité ki ka konpwann li, èk ki ka apliké konsèy li an lavi yo.—2 Kòr. 3:15, 16.

10. An ki lòt mannyè Bib-la ka moutwé i ni lasajès Bondyé?

¹⁰ Annou diskité yon lòt mannyè Bib-la ni lasajès Bondyé. Kon nou ja wè, Jéhova ka sèvi Bib-la pou enstwi pèp li kon on gwoup, mé i ka osi sèvi sé lévanjil-la pou enstwi èk pou soulajé chak di nou. Alò, lè nou li Pawòl Bondyé, nou ka wè byen klè Jéhova vwéman mélé épi chak di nou. (Izay. 30:21) Pou ègzanp, lèʼw ka èspéyansé pwòblenm èk ou li sé lévanjil-la, byen souvan ou ka twapé on vèwsé ki ka sanm i té ékwi ègzaktiman pou ou. Ès pa? Mé sé pa ou yonn ki ka èspéyansé sa. Wi, Bib-la ka édé konmen milyon di moun. Bon, ki mannyè Bib-la sa édé konmen milyon moun, èk an menm di tan-an potjiwé ègzaktiman sa ou bizwen? Sé paski Mèt Bib-la Jéhova plen lasajès.​—2 Tim. 3:16, 17.

BIB-LA KA MOUTWÉ BONDYÉ JIS

11. Ki mannyè Jéhova pa té moutwé pwéféwans lè sé nonm-lan té ka ékwi Bib-la?

¹¹ On lòt kawaktè Jéhova ni sé jistis. (Dito. 32:4) An moun ki jis pa ka moutwé pwéféwans, èk Jéhova pa ka moutwé pwéféwans. (Twav. 10:34, 35; Ronm 2:11) Nou sav sa, paski Bondyé fè sé nonm-lan ékwi Bib-la an langaj-la plizyè moun té sa konpwann. Pou ègzanp, sé pwèmyé twant nèf (39) liv-la ki an Bib-la té ékwi an langaj Hibrou, paski, sa sété langaj-la pèp Bondyé té ka konpwann pli mèyè a lè sala. Kanmenm pa pwèmyé syèk-la, plizyè moun té ka palé langaj Gwik, alò, sé dènyé vennsèt (27) liv-la ki an Bib-la té ékwi an langaj sala. Konsa i a klè, Jéhova pa té vlé moun ékwi Pawòl li sèlman an yon langaj. Jòdi jou, la ni apipwé ywit bilyon moun asou latè-a ki ka palé plizyè diféwan langaj. Alò, ki mannyè tout sé moun sala sa vin apwann konsèné Jéhova?

12. Ki mannyè Dannyèl 12:4 ka fèt vwé jòdi jou?

¹² Jéhova té sèvi pwofèt Dannyèl pou ékwi, an dènyé tan-an ‘nòlaj-la ki vwéʼ an Bib-la té kay la ‘alabondansʼ. Sa vlé di, an chay moun té kay konpwann Pawòl Bondyé. (Li Dannyèl 12:4.) Yon wézon moun sa konpwann Bib-la jòdi jou, sé paski moun ja twadwi, enpwimé èk simen Bib-la èk piblikasyon ki bazé asou Bib-la. Anfen, la pa ni on lòt liv moun ja twadwi ében simen plis pasé Bib-la. Byen souvan lè moun ki ni biznis twadwi Bib-la, yo ka vann yo byen chè. Mé Témwen Jéhova osi ka twadwi Bib-la, yo ja twadwi tout Bib-la ében pòsyon Bib an plis pasé dé san kawant (240) langaj, èk népòt moun sa twapé on Bib san yo péyé pou li. Konsa, nou ka vwéman wè, sa ki ékwi an Dannyèl 12:4 ka fèt vwé jòdi jou. Èk akòz di sa, moun an tout nasyon ka apwann konsèné “Bon Nouvèl-la” avan bout-la wivé. (Maf. 24:14) Wi, Dyé nou Jéhova jis, konsa, i vlé bay tout moun òpòtyounité-a pou li Bib-la pou yo sa vini konnèt li. Sa sé pwèv ki, Bondyé vwéman enmen nou tout.

BIB-LA KA MOUTWÉ BONDYÉ ENMEN NOU

13. Pouki nou sa di, enfòmasyon-an ki an Bib-la ka moutwé Jéhova vwéman enmen nou? (Jan 21:25)

¹³ Bib-la ka édé nou pou konpwann ki, pli bèl kawaktè Jéhova sé lanmityé. (1 Jan 4:8) Pou ègzanp, katjilé asou enfòmasyon-an Bondyé mété an Bib-la épi sa i pa té mété. Enfòmasyon-an Bondyé mété an Pawòl li sé ègzaktiman sa nou bizwen pou nou sa ni on bon wilasyon épiʼy, pou nou sa viv on bon lavi apwézan, èk pou nou sa twapé lavi étonnèl. Alò, paski Jéhova vwéman enmen nou, i pa té vlé plen tèt nou épi pli enfòmasyon pasé sa nou té bizwen pou nou sa ni on bon wilasyon épiʼy.​—Li Jan 21:25.

14. An ki lòt mannyè Bib-la ka ban nou pwèv ki Bondyé enmen nou?

¹⁴ Jéhova ka osi moutwé i enmen nou an mannyè-a i ka dignifyé nou lè i ka konminiké épi nou. Pou ègzanp, Jéhova pa ka ban nou an chay wèg pou di nou ègzaktiman sa pou fè ében sa pou pa fè. Pito sa, i ka sèvi listwa lavi moun, bèl pwofèsi, èk konsèy nou sa sèvi toulé jou an lavi nou pou nou sa fè bon disizyon. An sé mannyè sala, Pawòl Bondyé ka pousé nou pou enmenʼy èk pou obéyiʼy ofon tjè nou.

15. (a) Ki mannyè Bib-la ka ban nou pwèv ki, Jéhova vwéman mélé épi nou? (b) An pòtwé-a, ki moun an Bib-la tifi-a, jenn fwè-a, èk sésé-a ki an laj ka mèdité asou? (Jen. 39:1, 10-12; 2 Wa 5:1-3; Louk 2:25-38)

¹⁵ Bib-la ka ban nou pwèv ki Jéhova vwéman mélé épi nou. Ki mannyè Bib-la ka moutwé nou sa? Nou sav sa paski Pawòl Bondyé plen épi listwa konsèné plizyè moun. Osi, i ka di nou konsèné sitiwasyon yo, èk mannyè yo té ka santi. Wézon-an nou sa konpwann mannyè yo té ka santi, sé paski yo sété moun “menm kon nou.” (Jémz 5:17) Lè nou wè mannyè Jéhova té twété moun an tan lontan, sa ka édé nou konpwann pli byen ki, Jéhova “bon èk i ni konpasyon.”​—Jémz 5:11.

16. Kisa nou ka apwann konsèné Jéhova lè nou li konsèné mannyè i té twété moun ki té péché an Bib-la? (Izaya 55:7)

¹⁶ An ki lòt mannyè Bib-la ka ban nou pwèv ki, Jéhova enmen nou? Ében, Bib-la ka ban nou asiwans-lan ki, Jéhova pa kay janmen abandonnen nou lè nou fè lèwè. Pou ègzanp, nasyon Izwayèl toujou té ka péché kont Jéhova, mé lè yo té vwéman wépanti Jéhova toujou té ka pawdonnen yo. (Li Izaya 55:7.) Osi, sé Kwityen-an an pwèmyé syèk-la pa té ni pyès dout Jéhova té enmen yo an chay. Pou ègzanp, yon nonm an kongwigasyon-an an pwèmyé syèk-la té fè on péché ki té byen gwav. Kanmenm nonm sala wépanti, alò Jéhova diwèkté zapòt Pòl pou enkouwajé sé fwè èk sè-a an kongwigasyon-an pou “pawdonnenʼy épi konsoléʼy.” (2 Kòr. 2:6, 7; 1 Kòr. 5:1-5) Konsa, nou byen kontan pou apwann, Jéhova pa ka widjèkté pèp li lè yo péché. Pito sa, Jéhova épi lanmityé ka édé yo, i ka kowijé yo, épi i ka envité yo pou yo vini jan épiʼy ankò. Anfen Jéhova pawé pou fè menm bagay-la bay tout moun ki wépanti.​—Jémz 4:8-10.

APWÉSYÉ PAWÒL BONDYÉ I SÉ ON “BON KADO”

17. Poutji Pawòl Bondyé si tèlman bèl?

¹⁷ Jéhova ja ban nou on bèl kado. Ès ou sav poutji Pawòl Bondyé si tèlman bèl? Sé paski kon nou ja apwann, Bib-la ka moutwé Bondyé plen lasajès, i sé on Dyé ki jis, èk i enmen nou an chay. Alò Bib-la ka moutwé a klè ki, Jéhova vlé nou vini konnèt li èk i vlé nou vini janʼy.

18. Ki mannyè nou sa moutwé nou ka apwésyé Bib-la ‘bon kado-aʼ Bondyé ban nou?

¹⁸ Nou pa janmen vlé obliyé Pawòl Bondyé sé on “bon kado”. (Jémz 1:17) Alò nou toujou vlé kontiné moutwé apwésiyasyon pou li. Kanmenm, ki mannyè nou sa moutwé apwésiyasyon pou Pawòl Bondyé? Ében nou sa fè sa lè nou ka toujou fè tan pou li Pawòl Bondyé èk lè nou mèdité asou sa nou li. Konsa, lè nou fè sé bagay sala, nou sa ni asiwans-lan ki, Mèt Bib-la kay benni éfò nou èk nou ‘kay twapé nòlaj Bondyé.ʼ ​—Pwov. 2:5.