Lasajès Ki Vwé Ka Hélé Byen Fò

1. Ki diféwan katjil moun ni konsèné lasajès-la ki an Bib-la? (Pwovèb 1:20, 21)

SOUVAN, adan an chay péyi nou ka wè sé fwè èk sè-a ka pwéché koté an chay moun ka pasé, èk yo ka byen kontan lè moun pwan sé piblikasyon-an hòd yo. Siʼw ja patisipé an twavay sala, pitèt sa sa fèʼw katjilé konsèné lévanjil-la an Pwovèb koté i di, lasajès ka hélé byen fò an plas piblik pou moun tann. (Li Pwovèb 1:20, 21.) Bib-la èk sé piblikasyon-an ni lasajès ki vwé adan yo. Sa sé, lasajès Jéhova. Moun bizwen lasajès sala pou yo sa twapé lavi étonnèl. Konsa nou ka byen kontan lè moun aksèpté yonn (1) an sé piblikasyon nou-an. Mé sé pa tout moun ki ka aksèpté yo. Adan moun pa antéwésé pou apwann sa Bib-la ka di. Lézòt ka jis wi nou. Yo ka di Bib-la twò vyé pou yo twapé bennéfis hòd li. Èk la ni moun ki ka kwititjé pwensip Bib. Yo ka di, moun ki swiv pwensip Bib pa janti èk yo ka kwè yo pli bon pasé lézòt. Mé Jéhova ka fè lasajès li avélab pou tout moun. An ki diféwan mannyè i ka fè sa?

2. Ki koté nou sa twapé lasajès ki vwé? Mé kisa plizyè moun ka chwazi pou fè?

² Yonn (1) an sé bagay-la Jéhova ka sèvi pou fè lasajès li avélab sé Bib-la. Èk Bib-la avélab pou pwèskè tout moun asou latè-a. Jéhova osi ka sèvi sé piblikasyon nou-an ki bazé asou Bib-la pou fè lasajès li avélab. Èk moun sa twapé sé piblikasyon sala, an pli pasé yon mil (1,000) langaj. Konsa moun ki kouté, sa sé, moun ki li èk fè sa yo apwann, kay twapé bennéfis. Kanmenm, plizyè moun pa vlé kouté lasajès Jéhova. Konsa, lè yo ni disizyon pou fè yo ka dépan asou kò yo ében yo ka swiv sa lézòm ka di. Èk délè yo ka gadé nou kon moun ki kouyon paski nou ka swiv sa Bib-la ka di. An atik sala, nou kay diskité pouki moun ka katjilé konsa. Mé pwèmyéman, annou diskité koumannyè nou sa twapé lasajès hòd Jéhova.

NÒLAJ JÉHOVA KA BA MOUN LASAJÈS

3. Kisa nou ni pou fè pou twapé lasajès ki vwé?

³ Lasajès sé abilité-a pou sèvi sa nou konnèt pou fè bon disizyon. Kanmenm lasajès ki vwé sé pli pasé sa. Bib-la di: ‘Kwentif pou Jéhova sé koumansman lasajès, èk nòlaj Moun-lan Ki Pli Sen-an ka fè nou ni lakonpwann.ʼ (Pwov. 9:10) Konsa lè nou ka fè yon disizyon, nou sipozé bazéʼy asou katjil Jéhova. Sa sé ‘nòlaj Moun-lan Ki Pli Sen-anʼ. Alò, nou sa fè sa lè nou li Bib-la èk sé piblikasyon nou-an ki bazé asou Bib-la. Lè nou fè sa, nou kay moutwé nou ni lasajès ki vwé.​—Pwov. 2:5-7.

4. Pouki sé Jéhova sèlman ki sa ba nou lasajès ki vwé?

⁴ Sé sèlman Jéhova ki sa ba nou lasajès ki vwé. (Ronm 16:27) Mé pouki nou sa di Jéhova sé Sous lasajès? Pwèmyéman, nou sa di sa paski sé Jéhova ki fè tout bagay. Èk i konnèt tout bagay konsèné tout sa i fè. (Sam 104:24) Dézyenmman, tout aksyon Jéhova ka moutwé i ni lasajès. (Ronm 11:33) Èk twazyenmman, nou ka toujou twapé bennéfis hòd tout bon konsèy Jéhova lè nou apliké yo an lavi nou. (Pwov. 2:10-12) Konsa si nou vlé ni lasajès ki vwé, nou ni pou aksèpté sé twa (3) lavéwité sala, èk fè yo djidé disizyon nou èk aksyon nou.

5. Lè moun pa ka dépan asou lasajès Jéhova, kisa ki wézilta-a?

⁵ Plizyè moun owon latè-a ka di sé bagay-la an nati bèl èk yo byen ògannizé mé, yo pa ka kwè la ni an Kwéyatè. Lézòt ka kwè an Bondyé mé, yo pa ka kwè sé pwensip-la ki an Bib-la sé pou tan nou. Èk yo ka chwazi pou fè sa yo vlé. Mé kisa ki wézilta katjil konsa? Ében yon wézon latè-a adan an mové léta kon sa, sé paski moun ka dépan asou lasajès yo pito yo dépan asou lasajès Bondyé. Osi, an pil moun pa ni lakontantman, èk yo pa ni pyès èspwa pou tan ki ka vini. Lè nou wè mannyè latè-a yé jòdi jou, nou ka dakò épi lavéwité-a ki an Pwovèb 21:30 ki di: ‘La pa ni pyès lasajès, lakonpwann, ében konsèy ki sa doubout kont Jéhova.ʼ Alò, lévanjil sala ban nou bon wézon pou kontiné mandé Jéhova pou ban nou lasajès ki vwé. Mé malèwèzman, an chay moun pa ka fè sa. Pouki?

SÉ WÉZON-AN MOUN KA WIDJÈKTÉ LASAJÈS KI VWÉ

6. Silon Pwovèb 1:22-25, ki twa (3) gwoup moun ki ka widjèkté lasajès ki vwé?

⁶ An chay moun pa vlé kouté lè lasajès ki vwé ka ‘hélé byen fò an lawi-aʼ. Silon Bib-la, la ni twa (3) gwoup moun ki ka widjèkté lasajès ki vwé: (1) ‘moun ki pa konnèt anyenʼ, (2) ‘moun ki ka pwan moun sèvi wizibʼ, èk (3) ‘moun ki kouyonʼ. (Li Pwovèb 1:22-25.) Apwézan annou diskité pli konsèné pouki sé twa (3) gwoup moun sala ka widjèkté lasajès ki vwé, èk sa nou sa fè pou nou pa vini kon yo.

7. Pouki adan moun ka chwazi pou wèsté kon ‘moun ki pa konnèt anyenʼ?

⁷ Pwèmyé gwoup-la ki ka widjèkté lasajès Bondyé sé ‘moun ki pa konnèt anyenʼ. Sé moun sala pwésé pou kwè tout sa yo tann èk i ézé pou kwennen yo. (Pwov. 14:15) Byen souvan nou ka jwenn moun kon sa an minis nou. Pou ègzanp, katjilé asou sé plizyè milyon moun-lan owon latè-a sé mèt wilizyon-an èk sé politisyen-an ka kwennen. Adan di yo ka byen sipwi pou apwann sé mèt wilizyon-an èk sé politisyen-an té ka manti ba yo. Kanmenm sé moun sala Pwovèb 1:22 mansyonnen ka chwazi pou wèsté kon moun ki pa konnèt anyen paski yo enmenʼy kon sa. (Jér. 5:31) Yo vlé fè sa yo vlé èk yo pa vlé apwann lavéwité-a ki an Bib-la ében swiv wèg Bondyé. An chay di yo menm kon an madanm ki ka wèsté an Quebec, Kannada, ki di: “Si pwèt nou manti ban nou, sa sé fòt li, pa fòt nou!” Konsa nou pa vlé imité sé moun sala ki ka chwazi pou wèsté inyowan.​—Pwov. 1:32; 27:12.

8. Kisa nou sa fè pou édé nou katjilé kon gwan moun èk pa kon moun ki pa konnèt anyen?

⁸ Pawòl Bondyé ka ankouwajé nou pou pa wèsté kon moun ki pa konnèt anyen, mé pou fè éfò pou “katjilé kon gwan moun”. (1 Kor. 14:20) Nou sa fè sa lè nou apliké sé pwensip-la ki an Bib-la an lavi nou. Èvèk mizi an mizi, nou ka wè mannyè sé pwensip sala ka édé nou tjenn kò nou hòd pwòblenm èk pou fè bon disizyon. Konsa i bon pou ègzanminé kò nou pou wè si nou ka kité pwensip Bib djidé disizyon nou. Pou ègzanp, si ou ka étidyé Bib-la èk ou ka atandé mitin, mé ou pʼòkò dèdiké laviʼw pou Jéhova èk batizé, ou sipozé katjilé asou poutji ou pʼòkò fè sa. Mé si ou ja batizé, ès ou ka fè pwogwé lèʼy vini pou mannyè ou ka pwéché èk enstwi bon nouvèl-la? Lè ou ka fè disizyon, ès ou ka apliké sa ou ja apwann an Bib-la? Ès ou ka fè disizyon ki ka moutwé ou ka swiv pwensip ki an Bib-la? Ès ou ka twété moun mannyè Jézi té kay twété yo? Si nou wè nou ni pou fè chanjman, annou fè éfò pou apliké lasajès ki an Bib-la ki ka “bay lakonpwann pou tout moun ki pa ni”.​—Sam 19:7.

9. Ki mannyè ‘moun ki ka pwan moun sèvi wizibʼ ka moutwé yo ka widjèkté lasajès Bondyé?

⁹ Dézyenm gwoup-la ki ka widjèkté lasajès Bondyé sé ‘moun ki ka pwan moun sèvi wizibʼ. Délè nou ka jwenn moun kon sa lè nou ka pwéché, èvèk yo ka kontan lè yo ka pwan nou sèvi wizib. (Sam 123:4) Chonjé Bib-la té ja di nou, an sé dènyé jou-a la kay ni an chay moun ki kay pwan moun sèvi wizib. (2 Pita 3:3,4) Èk menm kon sé bofis Lòt-la, adan moun jòdi jou pa ka kouté sé avètisman-an hòd Jéhova. (Jen. 19:14) An chay di yo ka wi moun ki ka swiv pwensip Bib, èk yo ka fè sa paski yo ka kité “dézi lachè-a kondwi yo”. (Joud 7, 17, 18) Mannyè Bib-la ka dékwi ‘moun ki ka pwan moun sèvi wizibʼ, ka fè nou chonjé moun ki apòsta èk moun ki tounen do yo asou Bondyé.

10. Silon Sam 1:1, kisa nou sa fè pou nou pa vini kon moun ki ka pwan moun sèvi wizib?

¹⁰ Mé kisa nou sa fè pou nou pa vini kon moun ki ka pwan moun sèvi wizib? Yon bagay nou sa fè sé pou pa pasé tan épi moun ki ka bougonnen konsèné tout ti bagay. (Li Sam 1:1.) Sa vlé di, nou pa sipozé kouté ében li anyen hòd moun ki apòsta. Konsa i byen enpòtan pou nou pwan pokosyon, paski si nou pa fè sa nou osi pé koumansé bougonnen. Anfen nou pé jis koumansé ni dout konsèné Jéhova èk sé diwèksyon-an ògannizasyonʼy ka ban nou. Pou nou pa tonbé an zatwap sala i kay bon pou nou mandé kò: ‘Ès mwen toujou ni an bagay négatif pou di lè nou twapé diwèksyon ében enstwiksyon nèf hòd ògannizasyon-an? Ès mwen ni labitid pou fiksé asou lèwè sé fwè-a ki ka pwan douvan?ʼ Lè nou vit pou fè chanjman an atitid nou, nou kay fè tjè Jéhova kontan.​—Pwov. 3:34, 35.

11. Ki mannyè ‘moun ki kouyonʼ ka santi konsèné pwensip Bondyé?

¹¹ Twazyenm gwoup-la ki ka widjèkté lasajès Bondyé sé ‘moun ki kouyonʼ. Yo kouyon paski yo ka wifizé obéyi wèg Bondyé. Yo simyé fè sa ki ka gadé dwèt an zyé yo. (Pwov. 12:15) Moun kon sa ka widjèkté Jéhova, moun-lan ki Sous lasajès. (Sam 53:1) Délè nou ka jwenn moun ki kouyon lè nou ka pwéché. Èk souvan yo ka kwititjé nou, paski nou ka wèspèkté Bib-la, èk nou ka éséyé swiv pwensip Bondyé. Kanmenm sé moun sala pa sa ban nou on lavi ki pli mèyè. Anfen Bib-la di: ‘Moun-lan ki kouyon pa sa ni lasajès ki vwé, i pa ni anyen pou di an bayè vil-la.ʼ (Pwov. 24:7) Konsa moun ki kouyon pa sa ban nou bon konsèy. Sa sé wézon-an Jéhova ka vèti nou pou ‘pa vini pwé moun-lan ki kouyonʼ.​—Pwov. 14:7.

12. Kisa ki kay édé nou widjèkté konsèy moun ki kouyon?

¹² Pito nou hayi wèg Bondyé, nou enmen mannyè Jéhova ka katjilé èvèk tout lwaʼy osi. Nou sa fòtifyé lanmityé sala lè nou konpawé sé wézilta-a moun ka twapé lè yo obéyi wèg Bondyé épi sé wézilta-a lè yo pa obéyi wèg Bondyé. Konsa pwan tan pou òbzòvé sé pwoblenm-lan moun ka mennen asou kò yo paski yo widjèwté konsèy Bondyé. Èk osi pwan tan pou konsidiwé mannyè lavi nou pli mèyè paski nou ka obéyi Bondyé.​—Sam 32:8, 10.

13. Ès Jéhova ka fòsé nou pou obéyi bon konsèy li?

¹³ Jéhova ka ofè tout moun lasajès li, mé i pa ka fòsé pyèsonn pou aksèptéʼy. Kanmenm, i ka di nou sa ki kay fèt lè moun pa kouté lasajès li. (Pwov. 1:29-32) Pou ègzanp, moun ki chwazi pou dézobéyi Jéhova kay ‘péyé pou sa yo fèʼ. Alò pli ta yo kay èspéyansé an chay penn èk soufwans a kòz di mannyè-a yo ka viv lavi yo. Èk an bout-la Jéhova kay détwi yo. Mé pou moun ki ka obéyi konsèy Jéhova, Bib-la di: ‘Moun-lan ki ka kouté mwen kay viv an lapé. I kay wèsté kam èvèk i pa kay pè kalamité.ʼ​—Pwov. 1:33.

NOU KA TWAPÉ BENNÉFIS LÈ NOU APLIKÉ LASAJÈS KI VWÉ

14-15. Kisa Pwovèb 4:23 ka enkouwajé nou pou fè?

¹⁴ Nou ka toujou twapé bennéfis lè nou apliké lasajès Bondyé. Kon nou ja diskité Jéhova ka fè lasajès li avélab pou tout moun. Pou ègzanp, an liv Pwovèb, Jéhova ka ban nou bon konsèy ki kay toujou twavay an bennéfis nou. Apwézan annou gadé kat (4) ègzanp an sé konsèy sala.

¹⁵ Pwotéjé tjè spiwitwèl ou. Bib-la di: ‘Plis pasé tout lòt bagay pwotéjé tjèʼw, paski sé adanʼy sous lavi ka sòti.ʼ (Pwov. 4:23) Katjilé asou sa nou ni pou fè pou pwotéjé tjè fizikal nou. Nou ni pou manjé byen, nou ni pou fè lézèksis, èk nou ni pou tjenn kò nou hòd vyé labitid. An menm mannyè-a nou ni pou pwotéjé tjè spiwitwèl nou. Konsa, nou ni pou li ében kouté pawòl Bondyé touléjou. Nou ni pou pwépawé pou sé mitin-lan, atandé yo èk ba wimak pou kwèsyon an sé mitin-lan. Osi nou ni pou patisipé wèglé an minis-la. Èk an plis di sa, nou ni pou tjenn kò nou hòd népòt bagay ki sa sali katjil nou, bagay tèl kon vyé anmizman èk mové asosiyasyon.

16. Ki mannyè Pwovèb 23:4, 5 sa édé nou jòdi jou?

¹⁶ Satisfè épi sa ou ni. Bib-la ban nou on bèl konsèy, i di: ‘Pa bay kòʼw tèt cho pou twapé wichès. . . . Ou ka wèʼy mé avan ou bat zyéʼw i ja dispawèt, paski i kay fè zèl menm kon on lèg, èk i kay volé alé an lézè-a.ʼ (Pwov. 23:4, 5) Konsa i byen ézé pou moun pèd lajan yo èvèk pozèsyon yo. Mé jòdi jou, ni moun ki wich ni moun ki pòv ka bay kò yo tèt cho pou twapé wichès. Sé pou wézon sala, souvan, an chay moun ka fè bagay ki ka afèkté wépitasyon yo, wilasyon yo épi lézòt, èvèk santé yo. (Pwov. 28:20; 1 Tim. 6:9, 10) Okontwè, lasajès Bondyé sa édé nou pou pa bay kò nou tèt cho konsèné lajan. Alò lè nou pa bay kò nou tèt cho konsèné lajan, nou kay satisfè épi sa nou ni èvèk nou kay ni tjè kontan.​—Éklé. 7:12.

17. Silon Pwovèb 12:18, kisa nou sa fè pou pawòl nou wéfwéchi moun?

¹⁷ Katjilé avan ou palé. Si nou pa pwan pokosyon, nou sa blésé moun épi pawòl nou. Konsa nou pa vlé palé moun mal, ében mété fòt yo déwò, paski nou vlé pwézèvé lapé. (Pwov. 20:19) Bib-la di: ‘Lè an moun palé san katjilé, pawòl li ka pitjé menm kon an sab. Mé pawòl moun-lan ki ni lasajès sé an djéwizon.ʼ (Pwov. 12:18) Mé kisa nou sa fè pou pawòl nou wéfwéchi moun? Nou ni pou li èk mèdité asou Pawòl Bondyé. (Louk 6:45) Konsa, lè nou mèdité asou sa Pawòl Bondyé ka di, pawòl nou kay vini kon an ‘sous lasajèsʼ ki ka wéfwéchi moun.​—Pwov. 18:4.

18. Lè nou swiv pwensip-la ki an Pwovèb 24:6, ki mannyè sa kay édé nou an minis nou?

¹⁸ Swiv diwèksyon. Bib-la ban nou bon konsèy sala. I di: ‘Lèʼw swiv bon diwèksyon sa kay édéʼw ganyen batay ou. Èk lèʼw ni an pil moun ka baʼw konsèy ou kay ni siksé.ʼ (Pwov. 24:6) Konsa lè nou swiv pwensip sala, ki mannyè sa kay édé nou fè pli mèyè lè nou ka pwéché èk lè nou ka enstwi moun? Pito nou fè minis nou kon nou vlé, nou sipozé éséyé swiv sé diwèksyon-an nou ka twapé. Nou ka twapé bon konsèy lè nou atandé mitin. La nou ka tann diskou ki bazé asou Bib-la, èk nou ka wè bon pwézantasyon ki ka moutwé nou mannyè pou pwéché byen. Osi ògannizasyon Jéhova ja potjiwé bon zouti ban nou, tèl kon sé piblikasyon-an èk sé vidiyo-a. Èk sé bagay sala sa édé nou asisté moun pou konpwann Bib-la. Alò, ès ou ka pwan tan pou apwann mannyè pou sèvi sé zouti sala byen?

19. Ki mannyè ou ka santi konsèné lasajès-la Jéhova ka ban nou? (Pwovèb 3:13-18)

¹⁹ Li Pwovèb 3:13-18. Pa dé kontan nou kontan lasajès-la nou ka twapé an Pawòl Bondyé! Katjilé asou sa: Ki mannyè laviʼw té kay yé san sé bon konsèy-la ki an Bib-la? An atik sala nou diskité plizyè bon konsèy hòd liv Pwovèb. Mé chonjé tout Bib-la ni bon konsèy hòd Jéhova. Konsa annou toujou swiv konsèy Bondyé. Malèwèzman an chay moun an latè-a pa ka apwésyé lasajès Jéhova. Mé nou ni asiwans-lan ki, ‘moun ki tjenbé [lasajès] byen fò kay ni tjè kontanʼ.