Kwentif Pou Bondyé Ka Pwotéjé Nou

1-2. Jòdi jou, ki mannyè sitiwasyon nou menm kon sitiwasyon-an Lòt té èspéyansé?

LÈ NOU wè mové kondwit moun jòdi jou, nou ka santi menm mannyè-a Lòt té ka santi. Lévanjil-la di: “[Lòt] té ka bouwi [andidan] lè i wè malpwòpté sé mové moun sala.” (2 Pita 2:7, 8) Wi, sa Lòt té ka wè-a, té ka afèkté’y, paski i té konnèt Jéhova pa enmen mové kondwit. Anfen, paski Lòt té ni an chay wèspé pou Bondyé èk i té enmen’y, i té hayi sé malpwòpté-a sé moun-lan oliwon’y-lan té ka fè. Èk jòdi jou nou ni menm pwoblenm-lan, sa sé paski moun oliwon nou pa ni an chay wèspé pou wèg Bondyé, ében yo pa kontan wèg Bondyé pyès. Mé magwé sa, si nou tjenn lanmityé nou pou Bondyé fò èk nou dévlopé kwentif pou li, nou sa wèsté nèt an zyé’y.​—Pwov. 14:2.

² Wi, nou sa wèsté nèt an zyé Bondyé, paski an liv Pwovèb Jéhova ka ban nou ankouwajman-an èk èd-la nou bizwen pou nou sa fè sa. Anfen, tout Kwityen ni jenn ni vyé, ni nonm ni fanm, sa vwéman twapé bennéfis an bon konsèy-la ki an liv Pwovèb.

KWENTIF POU BONDYÉ KA PWOTÉJÉ NOU

3. Silon Pwovèb 17:3, pou ki wézon nou vlé pwotéjé tjè nou? (Gadé pòtwé-a osi.)

³ Yonn an sé wézon-an nou vlé pwotéjé tjè nou, sé paski Jéhova ka ègzanminé tjè nou. Sa vlé di, i ka wè pli pasé sa lézòt moun sa wè, èk i konnèt ki kalité moun nou vwéman yé. (Li Pwovèb 17:3.) Chonjé, Jéhova kay enmen nou si nou ka toujou apwésyé konsèy li. Wi, konsèy Jéhova sa édé nou viv pou tout tan. (Jan 4:14) Alò, si nou ka toujou tjenn konsèy Jéhova an lidé nou, sa kay pwotéjé nou hòd mansonj Satan. Èk an plis di sa, sa kay anpéché nou swiv mové kawaktè èk malpwòpté moun an latè-a. (1 Jan 5: 18, 19) Osi, kon nou ka vansé pli pwé Jéhova, nou kay dévlopé pli wèspé èk pli lanmityé pou li. Èk, nou kay jis hayi katjil-la pou péché, paski nou pa vlé kasé tjè Jéhova. Konsa, lè’w twapé tantasyon pou fè sa ki pa bon, mandé kò’w: ‘Ki mannyè mwen sa kasé tjè Jéhova, Moun-lan ki ja moutwé mwen tèlman lanmityé?’—1 Jan 4:9, 10.

4. Ki mannyè kwentif pou Jéhova pwotéjé yon sésé?

⁴ Marta sé on sésé ki ka wèsté an péyi Croatia. I té twapé tantasyon pou fè fònikasyon. I di: “I té wèd pou mwen katjilé a klè épi pou mwen goumen kont dézi-a pou fè kéchòy ki pa bon. Mé, paski mwen té ni kwentif pou Jéhova sa pwotéjé mwen.”b Alò, an ki mannyè kwentif pou Jéhova té pwotéjé Marta? Ében, Marta di i té ka katjilé asou sé mové bagay-la ki té kay fèt si’y té péché kont Jéhova. Èk nou vlé fè menm kon Marta. Népòt tantasyon nou pé èspéyansé nou vlé katjilé asou sé mové bagay-la ki kay fèt si nou péché kont Jéhova. Pou ègzanp, adan sé pli mové bagay-la ki sa fèt sé sa; nou kay kasé tjè Jéhova, èk nou kay pèd chans-lan pou adowé Dyé nou Jéhova pou tout tan.—Jen. 6:5, 6.

5. Kisa ou sa apwann an ègzanp Leo?

⁵ Lè nou ni kwentif pou Jéhova, nou ka pwan bon pwokosyon pou pa fè jan épi moun ki ka fè bagay ki pa bon. Pou ègzanp, Leo ki ka wèsté an péyi Congo apwann lison sala. Kat (4) lanné apwé Leo batizé, i fè jan épi moun ki té ka fè bagay ki pa bon. Leo té kwè dépi i pa fè sa ki mové, i pa té ka péché kont Jéhova. Mé i pa té pwan djè tan avan sé jan’y-la té enflouwansé’y pou bwè an chay alkòhòl èk pou fè fònikasyon. Apwé sa, Leo koumansé katjilé asou sé bagay-la pawan’y té enstwi’y èk mannyè i té ni an chay djèwté lè’y té ka adowé Jéhova. Èk ki mannyè katjil sala té wédé’y? Ében, Leo koumansé fè chanjman. Èk épi èd sé ansyen-an, i koumansé adowé Jéhova ankò. Jòdi, Leo ni an chay djèwté kon’y ka wann sèvis kon on ansyen èk kon on piyonnè spésyal.

6. Apwézan ki dé (2) fanm nou kay palé konsèné?

⁶ Apwézan annou konsidiwé Pwovèb chapit nèf (9). An chapit sala nou kay li konsèné dé (2) fanm. Yon fanm ka wépwézanté lasajès, èk lòt fanm-lan ka wépwézanté kouyontwi. (Gadé Ronm 5:14; Galécha 4:24.) Alò, kon nou ka konsidiwé Pwovèb chapit nèf, i kay bon pou nou chonjé ki, jòdi jou, dé (2) an sé bagay-la ki pli asou lidé moun an latè Satan, sé sèks èvèk pònografi. (Èfés. 4:19) Konsa i byen enpòtan pou nou dévlopé kwentif pou Bondyé èk tounen hòd sa ki mové. (Prov. 16:6) Wi, népòt moun sa twapé bennéfis an sa Pwovèb chapit nèf ka palé konsèné. Èk sa sé paski, toulédé sé madanm-lan ka envité moun ki pa ni èspéyans ében moun ‘ki pa ni bon sans’. Yo chak ka di: ‘Antwé andidan kay mwen èk vini manjé.’ (Prov. 9:1, 5, 6, 13, 16, 17) Mé envitasyon chak sé madanm sala, ka mennen diféwan wézilta.

WIDJÈKTÉ ENVITASYON-AN HÒD FANM-LAN KI SÒT-LA

7. Silon Pwovèb 9:13-18, kisa ki ka wivé moun ki aksèpté envitasyon hòd fanm-lan ki sòt-la? (Gadé pòtwé-a osi.)

⁷ Annou konsidiwé envitasyon-an ‘fanm-lan ki sòt-la’ ka bay moun. (Li Pwovèb 9:13-18.) Fanm-lan ki sòt-la pa ka santi hont pou di moun ki pa ni bon sans, ‘antwé isi-a’ èk manjé épi mwen. Èk kisa ki ka wivé sé moun sala? Lévanjil-la di: ‘Yo ka antwé andidan kay li san yo konnèt la ni moun ki mò.’ Pitèt sa ka fè’w chonjé lòt vèwsé an liv Pwovèb ki sèvi èspwèsyon menm kon sa. Wi, sé vèwsé sala ka vèti nou konsèné ‘fanm-lan ki pa ni bon mès’ èk ‘fanm vyé lavi-a’. Yo ka di nou: ‘Si’w alé lakay li ou asou chimen lanmò.’ (Pwov. 2:11-19) Anfen, Pwovèb 5:3-10 ka vèti nou konsèné ‘fanm-lan ki pa ni bon mès’, ki ni ‘pyé ki ka désann an lanmò’.

8. Ki disizyon nou chak ni pou fè?

⁸ Jòdi jou, moun ki tann envitasyon ‘fanm-lan ki sòt-la’, ni pou désidé si yo kay aksèpté ében widjèkté envitasyon’y. Èk nou osi ni pou fè disizyon sala. Pou ègzanp, kisa nou kay fè si an moun tanté nou pou fè imowalité sèksyouwal? Ében kisa nou kay fè si nou wè pònografi sibitman asou intannèt-la ében an lòt koté?

9-10. Mansyonnen déotwa wézon pouki nou ni pou widjèkté imowalité sèksyouwal?

⁹ Nou ni plizyè bon wézon pouki nou ni pou widjèkté imowalité sèksyouwal. ‘Madanm-lan ki sòt-la’ ka di: ‘Dlo moun vòlè dou’. Mé èspwèsyon-an ‘dlo moun vòlè’, kisa sa vlé di? Ében, Bib-la ka konpawé sèks ant yon madanm èk mawi kon glo ki ka wéfwéchi. (Pwov. 5:15-18) Wi, lè an nonm èk an fanm ki mayé ni sèks épi yonn a lòt, sa sé an bon bagay ki sa ba yo an chay plézi. Mé èspwèsyon-an ‘dlo moun vòlè’ ka palé konsèné imowalité sèksyouwal. Èk sa sé an mové bagay. Byen souvan, moun ka fè sa an sigwé, menm kon an moun ki ka vòlè. ‘Dlo moun vòlè’ pé sanm dou lè yo kwè lòt moun pa kay sav sa yo ka fè. Mé moun ki ka fè sa, ka annèk kwennen kò yo, paski Jéhova ka wè tout bagay. Èk sé moun sala kay pèd favè Jéhova. Kanmenm, pou pèd favè Jéhova sé pa an bagay ki ‘dou’ pyès. Anfen, sa sé pli mové bagay-la ki sa wivé nou. (1 Kòr. 6:9, 10) Èk apa di sa, la ni lòt mové wézilta.

¹⁰ Pou ègzanp, lè moun fè imowalité sèksyouwal, sa sa mennen hontèz asou yo. I sa fè yo santi yo pa vo anyen. I sa fè yo vini ansèt san yo vlé, èk i sa jis kasé fanmi. Konsa, lè nou widjèkté envitasyon fanm-lan ki sòt-la pou antwé ‘kay’ li èk manjé épi’y, sa ka moutwé a klè nou savan. Osi, imowalité sèksyouwal pa ka sèlman fè nou pèd favè Jéhova. I sa osi ban nou maladi ki sa jis tjwé nou. (Pwov. 7:23, 26) Èk chonjé, sé sa Pwovèb chapit 9 vèwsé 18 ka di konsèné moun ki antwé kay madanm-lan ki sòt-la. Vèwsé-a di: ‘Sé étwanjé-a ki antwé lakay li an fon Tonbo-a.’ Alò, pou ki wézon moun ka aksèpté envitasyon madanm-lan ki sòt-la, lè i ka mennen tèlman mové wézilta?​—Pwov. 9:13-18.

11. Pouki i danjéwé pou gadé pònografi?

¹¹ Adan moun kwè la pa ni anyen mové épi pònografi. Mé nou ni pou widjèkté’y paski i ka donmajé moun. I ka annékòz moun pou pèd wèspé ni pou kò yo ni pou lézòt moun. Èk lè an moun ni labitid-la pou gadé pònografi, i wèd pou kasé labitid sala. Osi, dépi an moun wè an pòtwé ki sal, i difisil pou tiwé imaj-la an lidé’y. Apa di sa, pònografi pa ka tjwé mové dézi pou fè imowalité sèksyouwal. Pito sa, i ka lévé dézi sala an tjè moun-lan. (Kòl. 3:5; Jémz 1:14, 15) Èk malèwèzman, an chay moun ki ka gadé pònografi ka fè imowalité sèksyouwal.

12. Kisa ki kay édé nou pou pa gadé pòtwé ki sa lévé dézi-a pou fè imowalité sèksyouwal?

¹² Pou ègzanp, si an pòtwé sal pawèt sibitman asou pòtab nou, kisa nou sipozé fè? Ében, nou sipozé doubout gadé’y la menm! Kisa ki kay édé nou pou fè sa? Sé lè nou ka toujou chonjé, si nou kontiné gadé pòtwé ki sal, sa kay donmajé wilasyon nou épi Jéhova. Osi, la ni pòtwé ki pa pònografi, mé sé pòtwé sala sa lévé dézi sèksyouwal an tjè nou. Konsa, nou vlé wèsté lwen sé pòtwé sala, paski nou pa vlé planté pa menm yon ti gwenn an tjè nou ki sa lévé dézi-a pou fè imowalité sèksyouwal. (Maf. 5:28, 29) Pou ègzanp, David sé yon ansyen an péyi Thailand. I di: “Mwen ka mandé kò mwen: ‘Menm si sé pòtwé sala sé pa pònografi, si mwen kontiné gadé yo, ès Jéhova kay kontan?’ Wi, lè mwen mandé kò mwen kèstyon kon sa, sa ka édé mwen fè disizyon ki savan.”

13. Kisa ki kay édé nou pou fè bon disizyon?

¹³ Lè nou dévlopé kwentif pou Bondyé, sa kay édé nou fè bon disizyon. Sa sé paski Bib-la di, kwentif pou Jéhova sé ‘koumansman’, ében fondasyon ‘lasajès.’ (Pwov. 9:10) Èk nou ka wè sa a klè an koumansman Pwovèb chapit nèf (9), koté nou li konsèné lòt fanm-lan Bib-la ka kwiyé ‘lasajès ki vwé’.

AKSÈPTÉ ENVITASYON-AN HÒD ‘LASAJÈS KI VWÉ’

14. Ki lòt envitasyon nou ka twapé an Pwovèb 9:1-6?

¹⁴ Li Pwovèb 9:1-6. An sé vèwsé sala Jéhova ka ban nou an envitasyon. Chonjé sé Jéhova ki fè nou, èvèk sé li ki Sous tout lasajès. (Pwov. 2:6; Ronm 16:27) An sé vèwsé sala nou li konsèné an gwo kay ki ni sèt (7) poto. Konsa, sa ka moutwé nou ki, Jéhova donnan èk i ka byen kontan lè moun vlé apwann hòd li pou yo sa vini savan, èk fè bon disizyon.

15. Kisa Jéhova ka envité nou pou fè?

¹⁵ Ègzanp fanm-lan ki ka wépwézanté ‘lasajès ki vwé’ ka enstwi nou ki, Jéhova donnan èk i ka ban nou on pil bon bagay. Osi wakont-lan ka moutwé nou ki, madanm-lan byen pwépawé vyann li, diven’y, èk i awanjé tab li lakay li. (Pwov. 9:2) An plis di sa, silon vèwsé 4 èk 5: ‘Lasajès ki vwé ka di moun-lan ki pa ni bon sans: ‘Vini, manjé pen mwen.’ Mé, pouki nou sipozé antwé lakay lasajès ki vwé pou manjé manjé-a i ka ofè nou-an? Ében, sa sé paski Jéhova vlé pwotéjé zanfan’y èk i vlé yo ni lasajès. Konsa, i pa vlé nou fè lèwè nou kay wigwété pli ta. Èk sé pou wézon sala i ka ‘séwé lasajès menm kon an jè lajan bay moun ki dwèt.’ (Pwov. 2:7) Wi, lè nou tann konsèy Jéhova, nou ka byen kontan pou apliké’y an lavi nou. (Jémz 1:25) Èk lè nou ni kwentif pou Jéhova, sa ka ankouwajé nou pou fè bagay ki kay plè’y.

16. Ki mannyè kwentif pou Bondyé té édé Alain, èk kisa ki té wézilta-a?

¹⁶ Annou konsidiwé mannyè kwentif pou Bondyé té édé Alain fè on bon disizyon. Alain sé yon fwè ki ka wann sèvis kon yon ansyen èk i sé yon titja osi. I di: “An chay an sé titja-a mwen ka twavay épi, té ka gadé pòtwé ki ni pònografi pou apwann konsèné sèks.” Mé Alain té sav sa té danjéwé. I osi di: “Paski mwen té ni kwentif pou Jéhova, mwen pa janmen gadé sé vyé pòtwé sala. Épi mwen di sé lézòt titja-a pouki mwen pa ka gadé yo.” Wi, Alain té ka apliké konsèy-la hòd ‘lasajès ki vwé’ èk i té ka ‘maché an chimen lakopwann.’ (Pwov. 9:6) Apwézan adan sé titja-a ka étidyé Bib-la, èvèk yo ka jis atandé mitin a kòz di bon ègzanp Alain.

17-18. (a) Ki bon bagay moun ki aksèpté envitasyon-an hòd Jéhova ka èspéyansé? (b) Èk kisa yo kay enjwi an tan pou vini? (Gadé pòtwé-a osi.)

¹⁷ Jéhova sèvi ègzanp dé (2) fanm, pou édé nou wè mannyè nou sa ni on bon lavi an tan pou vini. Moun ki aksèpté envitasyon-an hòd ‘fanm-lan ki sòt-la’ ka éséyé pou twapé plézi an imowalité. Mé, yo pa ka wéyalizé ki, sa kay afèkté yo adan an mové mannyè. Malèwèzman, yo pa kay twapé lavi an tan pou vini. Yo kay alé ‘an fon Tonbo-a’.​—Pwov. 9:13, 17, 18.

¹⁸ Kanmenm, moun ki aksèpté envitasyon-an hòd fanm-lan ki ka wépwézanté ‘lasajès ki vwé’ ni tjè kontan! Èk sa sé paski yo ka twapé tout bagay yo bizwen pou wèsté pwé Jéhova. (Izay. 65:13) Anfen, Jéhova té sèvi pwòfèt Izaya pou ékwi: ‘Kouté mwen byen, épi manjé sa ki bon, èk zòt kay twapé anpil plézi kon zòt ka manjé bon kalité manjé.’ (Izay. 55:1, 2) Wi, kon nou ka manjé hòd tab Jéhova, nou ka apwann mannyè pou enmen sa Jéhova enmen èk pou hayi sa i hayi. (Sam 97:10) Osi, nou ni tjè kontan paski nou ka envité moun pou apwann hòd ‘lasajès ki vwé’. Wi, nou menm kon sé sèvant-lan ki ‘asou sé mòn-lan ki an vil-la’ ki ka kwiyé: ‘Népòt moun ki pa ni èspéyans, kité’y antwé isi-a.’ Sé bennéfis-la nou èk lòt moun ki aksèpté envitasyon sala kay twapé sé pa pou apwézan sèlman, yo kay édé nou ‘viv’ pou tout tan. Wi, sé bennéfis sala sé pou tout tan, kon nou ka ‘maché an wout moun ki ni bon lakopwann.’—Pwov. 9:3, 4, 6.

19. Silon Ékléziyastis 12:13, 14, kisa nou détèminé pou fè? (Gadé osi bwèt-la “Bennéfis Nou Sa Twapé Lè Nou Ni Kwentif Pou Bondyé.”)

¹⁹ Li Ékléziyastis 12:13, 14. Wi, nou vlé ni kwentif pou Bondyé èk sa kay pwotéjé nou. Osi, kwentif pou Bondyé kay édé nou pou tjenn kò nou hòd imowalité, èk i kay édé nou pou ni on bon wilasyon épi Jéhova. An plis di sa, lè nou ni kwentif pou Jéhova èk lanmityé pou li, sa kay pousé nou pou envité moun pou gadé pou ‘lasajès ki vwé’ pou yo osi twapé bennéfis hòd li.