Poutji Nou Sipozé Ni Kwentif Pou Jéhova?

1-2. Silon Sam 25:14, ki kawaktè nou ni pou dévlopé pou nou ni on bon wilasyon épi Jéhova?

KI KAWAKTÈ ou kwè ki enpòtan, pou nou sa ni on bon wilasyon épi on moun? Pitèt ou kay di, bon jan sipozé enmen èk sipòté yonn a lòt. Pitèt ou pa kay menm katjilé kwentif sé on kawaktè ki enpòtan pou ni on bon wilasyon épi on moun. Kanmenm, kon lévanjil-la pou atik sala di, ‘moun ki ni kwentif pou Jéhova sé bon kanmawad li’.​—Li Sam 25:14.

² Menm si nou ka sèvi Jéhova pou on chay tan, nou ni pou ni kwentif pou li. Konsa, kisa i vlé di pou ni kwentif pou Bondyé? Ki mannyè nou sa apwann pou ni kwentif pou Bondyé? Èk lè’y vini pou kwentif pou Bondyé, kisa nou sa apwann hòd ègzanp Obadaya, Chèf Pwèt Djèhòyada, èk Wa Jèhowach?

KISA I VLÉ DI POU NI KWENTIF POU BONDYÉ?

3. Ki diféwan bagay ki sa fè nou santi pè, èk ki mannyè pèwèz sa pwotéjé nou?

³ Délè i bon pou ni pèwèz, paski i sa édé nou pou fè bon disizyon. Pou ègzanp, si nou pè pou tonbé, sa kay anpéché nou maché pwé bòdaj falèz. Osi, si nou pè blésé kò nou, sa kay fè nou kouwi hòd sitiwasyon ki danjéwé. Èk, si nou pè pou donmajé wilasyon nou épi on moun nou enmen, sa kay anpéché nou di ében fè moun-lan kéchòy ki pa bon.

4. Ki mannyè Satan vlé nou santi konsèné Jéhova?

⁴ Satan vlé nou pè Jéhova. Konsa i vlé nou kwè Jéhova toujou faché, èk i vlé pini nou. Anfen, Satan vlé nou kwè nou pa sa janmen fè Jéhova kontan. (Jòb 4: 18, 19) Osi, Satan vlé nou pè Jéhova tèlman pou nou sa doubout sèvi’y. Mé nou pa vlé ni kalité pèwèz sala pou Jéhova. Pito sa, nou vlé enmen èk wèspèkté Jéhova tèlman nou kay jis santi pè pou kasé tjè’y.

5. Kisa i vlé di pou ni kwentif pou Bondyé?

⁵ On moun ki ni kwentif pou Bondyé enmen Bondyé, èk i pè pou fè bagay ki kay déplè’y ében ki kay donmajé wilasyon’y épi’y. Wi, Jézi té ni kwentif pou Bondyé. (Hib. 5:7) Kanmenm, i pa té ni pèwèz pou li. (Izay. 11:2, 3) Pito sa, i té enmen Jéhova ofon tjè’y èk i té toujou vlé obéyi’y. (Jan 14:21, 31) Konsa, menm kon Jézi, nou ni kwentif pou Bondyé èk an chay wèspé pou li. Èk sa sé paski i enmen nou an chay, i benyen lasajès, i jis, èk i ni an chay pouvwa. Osi, paski Jéhova enmen nou an chay, aksyon nou ka afèkté’y. Alò, si nou dézobéyi’y nou ka ba’y penn, mé si nou obéyi’y sa ka ba’y tjè kontan.—Sam 78:41; Pwov. 27:11.

NOU SA APWANN POU NI KWENTIF POU BONDYÉ

6. Ki mannyè nou sa apwann pou wèspèkté èk ni kwentif pou Bondyé? (Sam 34:11)

⁶ Nou pa té fèt épi kwentif ében wèspé pou Bondyé, konsa nou ni pou dévlopé’y. (Li Sam 34:11.) Alò, ki mannyè nou sa apwann pou wèspèkté èk ni kwentif pou Bondyé? Ében, yonn an sé mannyè-a nou sa fè sa, sé lè nou ègzanminé kwéyasyon’y. Wi, lè nou fè sa nou ka wè lasajès Jéhova, pouvwa’y, èk lanmityé-a i ni pou nou ‘an sé bagay-la i fè-a’, èk sa kay pousé nou pou ni pli wèspé èk lanmityé pou li. (Ronm 1:20) Pou ègzanp, yon sésé non’y sé Adrienne di: “Lè mwen gadé tout sé bagay-la Jéhova fè, èk mwen wè ki otan lasajès i ni, sa ka édé mwen wè Jéhova vwéman konnèt sa ki pli mèyè pou mwen.” Èvèk paski Adrienne té ka mèdité asou kwéyasyon, i di: “Jéhova ban mwen lavi, konsa, mwen pa vlé fè anyen ki kay donmajé wilasyon mwen épi’y.” Alò simenn sala, ès ou sa pwan on ti tan pou mèdité asou yonn an sé bagay-la Jéhova fè? Ében si’w fè sa, ou kay ni pli wèspé èk pli lanmityé pou Jéhova.—Sam 111:2, 3.

7. Ki mannyè lapwiyè sa édé nou dévlopé kwentif pou Jéhova?

⁷ An lòt mannyè nou sa dévlopé kwentif pou Bondyé sé lè nou pwédyé souvan. Sa sé paski chak fwa nou pwédyé, nou ka vini konnèt Jéhova pli mèyè. Osi, chak fwa nou mandé Jéhova pou ban nou fòs pou nou sa tjenbé fò, nou ka chonjé ki otan pouvwa i ni. An plis di sa, lè nou wimèsyé Jéhova pou wanson-an, sa ka fè nou chonjé ki mizi enmen Jéhova enmen nou. Èk, chak fwa nou mandé Jéhova pou édé nou épi on pwoblenm, sa ka fè nou chonjé Jéhova benyen lasajès. Wi, lè nou palé épi Jéhova an mannyè sala, sa kay fè nou dévlopé pli wèspé pou Jéhova. Èk sa kay fòtifyé détèminasyon nou pou tjenn kò nou hòd népòt bagay ki kay donmajé wilasyon nou épi Jéhova.

8. Kisa nou sa fè pou nou kontiné ni kwentif pou Bondyé?

⁸ Lè nou étidyé Bib-la èk nou éséyé apwann hòd sé bon ègzanp-lan èk sé mové ègzanp-lan ki an Bib-la, sa sa édé nou pou kontiné ni kwentif pou Bondyé. Apwézan nou kay palé konsèné dé (2) sèvant Jéhova ki té fidèl. Pwèmyé-a sé Obadaya, i té wèskonsab kay Wa Éhab, èk dézyenm-lan sé Chèf Pwèt Djèhòyada. Èk apwé, nou kay wè sa nou sa apwann an ègzanp Jèhowach wa péyi Jouda, ki doubout adowé Jéhova.

MOUTWÉ KOUWAJ MENM KON OBADAYA

9. Ki mannyè kwentif pou Jéhova té édé Obadaya? (1 Wa 18:3, 12)

⁹ Pwèmyé fwa-a Bib-la palé konsèné Obadayab i di: ‘Obadaya té ni an pil kwentif pou Jéhova.’ (Li 1 Wa 18:3, 12.) Alò, ki mannyè kwentif-la Obadaya té ni pou Jéhova té wédé’y? Pwèmyéman, kwentif li pou Jéhova fè’y vini an nonm ki té onnèt. Wi, moun té sa konfyé’y. Èk sé pou wézon sala wa-a té mété’y wèskonsab kay li. (Gadé Néhimaya 7:2.) Osi, paski Obadaya té ni kwentif pou Bondyé, sa ba’y an chay kouwaj. Èk Obadaya té bouzwen kouwaj sala paski i té ka viv lè Éhab té wa, èk Éhab té byen méchan. Anfen, Bib-la di: ‘An zyé Jéhova, Éhab té pli mové pasé tout wa ki té avan’y.’ (1 Wa 16:30) Apa di sa, madanm Éhab, Wenn Jèzibèl, té ka adowé Bal. Èk Jèzibèl té hayi Jéhova tèlman, i té jis éséyé anpéché moun adowé Jéhova an wéyonm-lan. Anfen, i té tjwé plizyè pwofèt Jéhova. (1 Wa 18:4) Wi, Obadaya té adowé Jéhova diwan an tan ki té byen difisil.

10. Ki mannyè nou sav Obadaya té ni an chay kouwaj?

¹⁰ Ében lè Jèzibèl té ka chaché pou sé pwofèt Bondyé-a pou tjwé yo, Obadaya pwan yon san (100) an sé pwofèt sala èk i séwé yo. Wi, Obadaya sépawé yo an dé (2) gwoup. I mété ‘senkant (50) pwofèt an chak gwoup épi i kontiné ba yo pen èk dlo’. (1 Wa 18:13, 14) Konsa, sa Obadaya té fè ka moutwé i té ni an chay kouwaj, paski si Jèzibèl té konnèt sa i té fè, i té kay tjwé’y. Wi, Obadaya pitèt té pè, paski i pa té vlé mò. Mé, Obadaya té enmen Jéhova èk pèp li pli pasé i té enmen lavi’y.

11. An ki mannyè Témwen Jéhova ka fè menm kon Obadaya? (Gadé pòtwé-a osi.)

¹¹ Jòdi jou, Témwen Jéhova ka wèsté an péyi koté twavay nou anba bann. An sé péyi sala, sé fwè èk sè-a ka kontiné moutwé sé moun-lan ki an lotowité wèspé. Kanmenm, menm kon Obadaya, yo pa ka doubout adowé Jéhova. (Maf. 22:21) Lè sé fwè èk sè sala obéyi Jéhova, yo ka moutwé yo ni kwentif pou Bondyé pito pou nonm. (Twav. 5:29) Wi, yo ka moutwé yo ni kwentif pou Bondyé lè yo kontiné pwéché, èk lè yo jwenn ansanm an sigwé pou adowé Jéhova. (Maf. 10:16, 28) Osi, sé fwè-a ka fè asiwé lézòt fwè èk sè ni sa yo bizwen pou yo sa kontiné ni on bon wilasyon épi Jéhova. Nou ni ègzanp Henri ki ka wèsté an Afwik, koté twavay nou té anba bann pou on sèten tan. Konsa diwan bann-lan, Henri volonté pou mennen piblikasyon bay sé fwè èk sè-a. I di: “Mwen sé on moun ki koutja. Alò mwen asiwé sé paski mwen ni an chay wèspé pou Jéhova, sa ban mwen kouwaj-la pou mennen sé piblikasyon-an bay sé fwè èk sè mwen-an.” Bon. Ès ou sa ni kouwaj menm kon Henri? Wi, ou sa ni kouwaj menm kon Henri, mé ou ni pou dévlopé kwentif pou Bondyé.

WÈSTE FIDÈL POU JÉHOVA MENM KON CHÈF PWÈT DJÈHÒYADA

12. Ki mannyè Chèf Pwèt Djèhòyada èk madanm li té wèsté fidèl pou Jéhova?

¹² Chèf Pwèt Djèhòyada té ni kwentif pou Jéhova. Wi, kwentif sala pousé’y pou wèsté fidèl pou Jéhova, èk pou ankouwajé lézòt moun pou adowé Jéhova tou. Pou ègzanp, Djèhòyada té moutwé i té ni kwentif pou Bondyé lè Atalaya, fi Jèzibèl koumansé kondwi kon wenn. Atalaya té tèlman méchan èk i té tèlman anvi pouvwa, i té jis éséyé tjwé tout sé ti ich li-a pou’y sa vini wenn! (2 Kw. 22:10, 11) Kanmenm, yonn an sé ti ich li-a chapé paski Jéhochabiyaf, madanm Djèhòyada sové’y. Non ti manmay-la sété Jèhowach. Djèhòyada èk madanm li séwé ti manmay-la èk yo byen otjipé’y. An mannyè sala yo fè asiwé yon moun an lafanmi David té kay vini wa. Wi, Djèhòyada té wèsté fidèl pou Jéhova, èk menm si i té pè Atalaya, sa pa té anpéché’y fè sa ki té dwèt.—Pwov. 29:25.

13. Lè Jèhowach té sèt (7) lanné, ki mannyè Chèf Pwèt Djèhòyada té moutwé i té fidèl pou Jéhova?

¹³ Lè Jèhowach té sèt (7) lanné, Djèhòyada fè an lòt bagay ki té moutwé i té vwéman fidèl pou Jéhova. Kisa i fè? Ében Djèhòyada fè an plan. Èk si Jéhova té benni plan’y-la, Jèhowach té kay vini wa, paski Jèhowach té vwéman sòti an lafanmi David. Mé si plan Djèhòyada pa té maché byen, asiwé Atalaya té kay tjwé’y. Kanmenm, Jéhova té benni plan Djèhòyada. Wi, sé chèf lafanmi Izwayèl-la èk sé Livayt-la té sipòté Djèhòyada èk yo fè Jèhowach wa. Èk osi yo tjwé Atalaya. (2 Kw. 23:1-5, 11, 12, 15; 24:1) Apwé sa, Djèhòyada ‘fè yon agwéman ant Jéhova, wa-a, èk sé pèp-la, épi yo pwonmèt yo té kay kontiné moutwé yo sé pèp Jéhova’. (2 Wa 11:17) An plis di sa, Djèhòyada té ‘mété moun pou véyé sé bayè-a ki an kay Jéhova, pou anpéché moun ki pa pwòp an zyé Bondyé antwé an kay li’.—2 Kw. 23:19.

14. An ki diféwan mannyè Jéhova té onnowé Djèhòyada?

¹⁴ An 1 Sanmyèl 2:30, Jéhova té di: ‘Mwen kay onnowé moun ki ka onnowé mwen.’ Wi, Jéhova té vwéman onnowé Djèhòyada. Pou ègzanp, i mété listwa Djèhòyada an Bib-la pou nou sa apwann hòd li. (Ronm 15:4) Èk lè Djèhòyada mò, Jéhova té onnowé’y osi. Wi, yo téwé’y ‘an Vil David menm koté épi sé wa-a, paski i té fè anpil bon bagay an Izwayèl pou Dyé vwé-a èk Kay Li.’—2 Kw. 24:15, 16.

15. Kisa nou sa apwann an wakont-lan konsèné Djèhòyada? (Gadé pòtwé-a osi.)

¹⁵ Wakont-lan konsèné Djèhòyada sa édé nou tout pou dévlopé kwentif pou Bondyé. Pou ègzanp, sé ansyen-an sa imité Djèhòyada lè yo ka toujou gadè pou mannyè pou pwotéjé sé fwè èk sè-a an kongwigasyon-an. (Twav. 20:28) Osi, wakont-lan konsèné Djèhòyada sa ankouwajé fwè èk sè ki an laj. An ki mannyè? Ében wakont-lan ka moutwé yo ki, si yo wèsté fidèl pou Jéhova, èk si yo kontiné dévlopé kwentif pou li, i pa kay janmen kité yo. Anfen, Jéhova kay kontiné sèvi yo pou akonpli divwa’y. Èk ki bennéfis jenn moun sa twapé an wakont sala? Ében, si yo mèdité asou mannyè-a Jéhova té twété Djèhòyada, sa kay ankouwajé yo pou wèspèkté èk onnowé fwè èk sè ki an laj, sitou fwè èk sè ki ja sèvi Jéhova pou an chay lanné. (Pwov. 16:31) An plis di sa, lè nou wéfléchi asou mannyè-a sé chèf lafanmi Izwayèl-la èk sé Livayt-la té sipòté Djèhòyada, sa sa ankouwajé nou tout pou sipòté sé fwè-a ki ka pwan douvan anpami nou.​—Hib. 13:17.

PA SWIV ÈGZANP JÈHOWACH

16. Kisa ki ka moutwé wilasyon-an Wa Jèhowach té ni épi Jéhova té afébli?

¹⁶ Chèf Pwèt Djèhòyada té édé Wa Jèhowach pou vini an bon moun. (2 Wa 12:2) Konsa lè Jèhowach té jenn, i té vlé plè Jéhova. Mé apwé Djèhòyada mò, Jèhowach koumansé kouté sé pwens-la ki té tounen kont Jéhova. Alò, wilasyon-an Wa Jèhowach té ni épi Jéhova té afébli. Èk kisa ki té wézilta-a? Ében Jèhowach épi sé pèp li-a ‘koumansé adowé sé poto sen-an ki fèt an bwa èk sé idòl-la’. (2 Kw. 24:4, 17, 18)Sa té fè Jéhova lapenn, konsa Jéhova té ‘kontiné voyé sé pwofèt li-a anpami yo pou édé yo tounen viwé . . . , mé yo pa té kouté yo’. Mé malèwèzman, pa menm pwofèt Zèkaraya ki sété gason Djèhòyada yo té kouté. Wi, Wa Jèhowach té vwéman engwa, i fè yo tjwé Zèkaraya ki pa té sèlman an pwèt, i té kouzen’y osi.—2 Kw. 22:11; 24:19-22.

17. Ki mannyè bagay té maché bay Wa Jèhowach?

¹⁷ Jèhowach pa té tjenn kwentif-la i té ni pou Jéhova, èk bagay pa té maché byen ba’y non plis. An 1 Sanmyèl 2:30, Jéhova té di: ‘Mwen kay fè moun ki pa ni wèspé pou mwen hont.’ Wi, Jéhova kité piti lawmé Siriya ganyen ‘gwo lawmé’ Jèhowach an batay èk yo ‘blésé Jèhowach byen mové’. Osi, apwé lawmé Sirya kité, sèvant Jèhowach tjwé’y, paski i té tjwé Zèkaraya. An plis di sa, sé moun-lan pa té téwé Jèhowach ‘koté yo ka téwé sé wa-a’, paski yo di Wa Jèhowach té twò méchan.​—2 Kw. 24:23-25.

18. Silon Jérémaya 17: 7, 8, kisa nou ni pou fè si nou pa vlé swiv mové ègzanp Jèhowach?

¹⁸ Kisa nou sa apwann an ègzanp Jèhowach? Ében, Jèhowach té menm kon an pyé bwa ki pa té sa doubout pa kò’y, paski wasin li pa té alé asé fon an tè-a. I té bouzwen an poto pou sipòté’y. Anfen, Djèhòyada sété poto-a ki té ka sipòté Jèhowach. Kanmenm, lè Djèhòyada mò, èk Jèhowach koumansé kouté sé apòsta-a, i pa té wèsté fidèl pou Jéhova. Wi, i tonbé menm kon an pyé bwa ki pa té byen wasiné, ki jwenn an ti van. Yon bèl lison nou sa apwann an ègzanp sala sé sa: Kwentif nou pou Bondyé pa sipozé dépan asou bon ègzanp fanmi nou, èben bon ègzanp sé fwè èk sè nou-an an kongwigasyon-an. Pito sa, nou vlé wèsté pwé Jéhova paski sa sé dézi nou menm. Èk nou kay sa fè sa si nou: (1) étidyé Pawòl Bondyé wèglé, (2) fè tan pou mèdité asou Pawòl Bondyé, èk (3) pwédyé souvan. Wi, si nou fè sé bagay sala nou kay dévlopé kwentif pou Papa nou Jéhova, èk nou kay vansé pli pwé’y.​—Li Jérémaya 17:7, 8; Kòl. 2:6, 7.

19. Kisa Jéhova ka mandé nou pou fè?

¹⁹ Jéhova pa ka mandé nou pou fè bagay ki difisil. Anfen, sa Jéhova ka mandé nou pou fè ékwi an Ékléziyastis 12:13. I ka di: ‘Ni kwentif pou Dyé vwé-a èk obéyi tout koumandman’y. Sé sa lézòm dwé fè.’ Konsa, lè nou ni kwentif pou Jéhova nou kay sa tjenbé fò anba népòt difikilté nou kay èspéyansé an tan pou vini. Wi, kwentif nou pou Jéhova kay édé nou tjenbé fò menm kon Obadaya èk Djèhòyada. Èk anyen pa kay kwazé wilasyon nou ni épi Jéhova.