Fè Asiwé Ou Toujou Pawé Pou Jou Jéhova

1. Kisa nou ni pou fè pou chapé asou jou Jéhova?

LÈ Jéhova pasé jijman asou lèlmi’y èk sové pèp li, Bib-la ka kwiyé sa ‘jou Jéhova’b. Pou ègzanp, an tan pasé jou Jéhova té vini, lè Jéhova pasé jijman asou sèten nasyon èk sové pèp li. (Izay. 13:1, 6; Izik. 13:5; Zèf. 1:8) Mé la kay ni on ‘jou Jéhova’ an tan nou. Èk i ka koumansé lè sé gouvèdman-an ataké fo wilizyon. Épi i kay bout an ladjè Anmagèdonn. Konsa, kisa nou sa fè pou chapé asou jou sala? Èben, nou bizwen pwépawé, dépi apwézan, “paski tan sala kay pli mové pasé pyès lézòt tan ki ja janmen ni.” Jézi enstwi nou, nou pa sèlman ni pou pwépawé, mé osi, nou ni pou fè asiwé nou toujou pawé jou sala paski i kay vini “kay vini lè [nou] pa kay èspéyé.”​—Maf. 24:21; Louk 12:40.

2. Ki mannyè lèt Pòl an 1 Tèsalonnika sa édé nou?

² An pwèmyé lèt-la Pòl té ékwi jan Tèsalonnika, i sèvi an chay ilistrasyon pou édé sé Kwityen-an pwépawé pou gwan jou Jéhova. Pòl té sav jou Jéhova pa té kay vini an lè sala. Mé i ankouwajé sé fwè-a pou pwépawé pou jou sala, akonmsi i té ka vini denmen. (2 Tèsa. 2:1-3) Pòl té bay bon konsèy. Épi nou osi, sa apliké konsèy sala. Apwézan, annou konsidiwé èsplikasyon-an Pòl té bay konsèné (1) mannyè jou Jéhova kay vini, (2) ki moun ki pa kay chapé jou jijman Jéhova, èk (3) sa nou sa fè pou pwépawé pou jou Jéhova.

KI MANNYÈ JOU JÉHOVA KAY VINI?

3. Ki mannyè jou Jéhova kay vini menm kon on vòlè ki ka vini lannwit? (Gadé pòtwé-a osi.)

³ Pòl té sèvi twa (3) ilistrasyon pou moutwé mannyè jou Jéhova té kay vini. An 1 Tèsalonnika 5:2 Pòl di: “[Jou Jéhova] kay vini menm kon an vòlè ki ka vini lannwit.” Bon. Byen souvan sé lé swè sé vòlè ka fè mouvman yo. Èk yo ka fè zafè yo byen vit pou pyèsonn pa tjébé yo. Èk yo ka toujou vini a lè moun pa ka éspéwé. Alò, Jou Jéhova kay vini menm kon sa, èk i kay sipwi an chay moun. Jik sèvant Jéhova pé sipwi mannyè bagay kay fèt vit. Mé nou pa kay pè paski Jéhova kay sové nou.

4. Ki mannyè jou Jéhova kay menm kon lè on madanm ni mal pou akouché?

⁴ Mi on lòt ilistrasyon Pòl té sèvi. An 1 Tèsalonnika 5:3 i di: “[Jou Jéhova] kay vini sibit menm kon mal ka vini asou an madanm ki kay fè an ti manmay.” An madanm ki ansèt, pa sav ègzaktiman lè-a i kay akouché. Mé san dout i sav jou sala kay vini. I osi sav, lè jou sala wivé, mal-la ka pwan’y sibitman, épi i pa kay sa anpéché ti manmay-la fèt. An menm mannyè-a, nou asiwé jou Jéhova ka vini, menm si nou pa sav ègzaktiman ki jou èben ki nèditan i kay koumansé. Épi nou asiwé jou jijman Jéhova kay vini asou sé méchan-an sibitman. Yo kay sipwi, épi yo pa kay sa chapé.

5. An ki mannyè gwan twibilasyon-an kay menm kon douvan jou?

⁵ An twazyenm ilistwasyon’y, i ka sanm Pòl ka konpawé jou Jéhova épi douvan jou. Konsa, an ki mannyè jou Jéhova kay menm kon douvan jou? Ankò, Pòl mansyonnen on vòlè. (1 Tèsa. 5:4) On vòlè simyé vòlè lannwit. Èk délè, yo pé fiksé tèlman asou vòl-la yo ka fè-a, douvan jou ka vini asou yo épi yo pé pa menm òbzòvé. Èvèk jou sa bawé yo la èk èspozé yo. Sé kon sa gwan twibilasyon-an kay èspozé moun ki ka kontiné fè sa ki ka déplè Bondyé. Mé nou pa vlé fè kon moun ki ka déplè Bondyé. Okontwè, nou ka moutwé nou pawé pou jou Jéhova, lè nou moutwé “bonté” èk viv on “lavi ki nèt”. (Èfés. 5:8-12) Bon. Apwé sa, Pòl sèvi dé (2) lòt ilistwasyon pou dékwi moun ki pa kay chapé jou jijman jéhova.

KI MOUN KI PA KAY CHAPÉ JOU JIJMAN JÉHOVA?

6. An ki sans majòwité moun ka dòmi? (1 Tèsalonnika 5:6, 7)

⁶ Sé sa ki ka dòmi-a. (Li 1 Tèsalonnika 5:6, 7.) Pòl ka konpawé moun ki pa kay chapé jou jijman Jéhova épi moun ki ka dòmi. Moun ki ka dòmi, pa sav sa ki ka fèt oliwon yo. Jòdi jou, la ni an chay moun ki menm kon sé moun-lan ki ka dòmi-a. Yo pa ka konpwann sé bagay enpòtan-an ki ka fèt oliwon yo. (Ronm 11:8) Menm si yo ka wè évidans-lan ki nou ka viv an dènyé tan-an, yo pa ka kwè gwan twibilasyon-an kay vini touswit. Mé lè on bagay fèt èk la ni gwo chanjman an latè-a, sa ka lévé adan di yo, épi yo ka vini antéwésé an lavéwité-a. Mé apwé on tan, sonmèy ka viwé pwan yo. Épi la ni on lòt konpanni moun ki ka kwè, la ni on jou jijman, mé yo ka di jou jijman sala byen lwen. (2 Pita 3:3, 4) Kanmenm, nou ka wè enpòtans-lan pou nou pa kité sonmèy pwan nou.

7. Pouki sé moun-lan Bondyé kay détwi-a, menm kon moun ki sou?

⁷ Sé sa ki sou-a. Zapòt Pòl konpawé moun Jéhova kay détwi épi moun ki sou. Pouki i té konpawé yo épi moun ki sou? Sa sé paski moun ki sou pa ka katjilé dwèt. Alò, sa ka annékòz yo pou fè mové disizyon. Konsa, menm kon moun ki sou, sé méchan-an pa ka katjilé dwèt. Lè Bondyé vèti yo, yo pa ka kouté. Konsa, yo ka mété kò yo asou chimen-an ki ka mennen distwiksyon. Mé Kwityen ki vwé ni pou tjenn bon sans yo èk kontiné katjilé dwèt. (1 Tèsa. 5:6) Yon moun ki ni gwo endikasyon di, on moun ki pa sou, “ka katjilé dwèt èk ka wèsté kam. Konsa, i ka konpwann sitiwasyon-an èk sa fè bon disizyon.” Mé, pouki nou ni pou kontiné katjilé dwèt èk wèsté kam? Sé paski nou pa vlé antwimélé an zafè politik èk lòt bagay an latè-a. Konsa, kon jou Jéhova ka vini, nou sav chalè-a kay vini pli cho pou sipòté sé bagay latè-a. Kanmenm, nou pa antjèt konsèné sa ki kay fèt, paski nou asiwé Jéhova kay ban nou lisentèspwi’y pou édé nou wèsté kam èk katjilé dwèt pou nou fè bon disizyon.​—Louk 12:11, 12.

SA NOU SA FÈ POU PWÉPAWÉ POU JOU JÉHOVA

8. Kisa nou ni pou abiyé kò nou épi? (Gadé pòtwé-a osi.)

⁸ Abiyé épi “bagay pou pwotèkté [kò’w].” (Li 1 Tèsalonnika 5:8.) Pòl konpawé nou épi sòlda ki ka doubout fò, èk ki byen abiyé pou ladjè. Sa sé on lòt bon ilistwasyon, paski on sòlda ni pou toujou pawé pou goumen lè la ni ladjè. An menm mannyè-a, nou ni pou toujou pawé pou jou jijman Jéhova. Konsa, nou ni pou abiyé kò nou épi lafwa, lanmityé èk èspwa. Épi sé kawaktè sala, kay vwéman édé nou.

9. Kisa lafwa ka fè ban nou?

⁹ On sòlda ka mété bagay pou pwotéjé tjè’y. An menm mannyè-a, lafwa èk lanmityé ka pwotèkté sa ki an tjè nou. An ki mannyè? Èben, sé kawaktè sala kay édé nou pou kontiné sèvi Jéhova èk swiv Jézi Kwi épi tout tjè nou. Konsidiwé sa: lafwa ka ban nou asiwans-lan ki, Jéhova kay ban nou bon bagay si nou chaché pou li épi tout tjè nou. (Hib. 11:6) Lafwa ka osi édé nou pou wèsté fidèl pou Jézi menm si nou ka èspéyansé twaka. Konsa, annou kontiné pou fòtifyé lafwa nou. Bon. Jòdi jou, nou ni an chay bon ègzanp ki sa édé bati lafwa nou. Sé fwè èk sè nou-a ka tjébé fò menm si yo ka èspéyansé pwòblenm lajan èben pèsikasyon.c Konsa, annou kontiné pou imité bèl ègzanp yo, tjenn lavi nou senp, èk mété lentéwé Wéyòm-lan pwèmyé. Lè nou fè sa, sa kay anpéché nou vivi dènyè lajan, èk i kay édé nou tjenn lafwa nou fò.

10. Ki mannyè lanmityé nou pou Bondyé èk pou pwochen nou, ka édé nou andiwé?

¹⁰ Lanmityé ka osi édé nou pou pa dòmi èk pou katjilé dwèt. (Maf. 22:37-39) Lanmityé nou pou Bondyé ka édé nou andiwé lè nou ka pwéché menm si nou ni pou “soufè pou lapéti Bon Nouvèl-la”. (2 Tim. 1:7, 8) Paski nou ni lanmityé pou tout moun, nou ka kontiné pwéché, nou ka alé kay an kay, nou ka kwiyé moun asou téléfòn-lan, èk nou ka ékwi lèt. Épi nou ni èspwa, yon jou yo kay chanjé épi yo kay vini enmen Jéhova épi tout tjè yo.​—Izik. 18:27, 28.

11. Ki mannyè nou sa moutwé lanmityé nou pou fwè èk sè nou? (1 Tèsalonnika 5:11)

¹¹ Nou ni pou moutwé fwè èk sè nou lanmityé. Ki mannyè nou sa fè sa? (Li 1 Tèsalonnika 5:11.) Nou sipozé ankouwajé yonn-a-lòt, menm kon sòlda ka sipòté kanmawad yo lè yo ka goumen ladjè. Mé délè, on sòlda pé fè on lèwè èk blésé on lòt sòlda paditan yo ka goumen ladjè. Mé i pa té kay janmen vlé blésé kanmawad li pa èspwé. An menm mannyè-a, nou pa janmen vlé fè fwè èk sè nou ditò èben wann yo mal pou mal. (1 Tèsa. 5:13, 15) Osi, nou sa moutwé lanmityé nou pou sé fwè-a ki ka pwan douvan an kongwigasyon-an, lè nou wèspèkté yo menm si yo ka fè lèwè délè. (1 Tèsa. 5:12) Anfen, lè Pòl té ékwi lèt sala, kongwigasyon-an ki té an Tèsalonnika té tou fwé. Èk yo pa té menm ni yon lanné. Konsa sé ansyen-an ki té la, pa té ni djè èspéyans. Èk yo pitèt té fè yonndé lèwè. Kanmenm, sé ansyen-an té méwité wèspé toujou. Konsa, kon gwan twibilasyon-an ka vini tou pwé, nou pé bizwen pou dépan asou sé ansyen-an èk sé diwèksyon-an yo ka bay, plis pasé avan. Èk mi on lòt bagay ankò. Lè gwan twibilasyon-an koumansé, nou pé pèd kontak épi pwensipal ofis-la, èvèk bwanch-lan. Alò, i enpòtan, dépi apwézan, pou nou wèspèkté èk enmen sé ansyen nou-a. Konsa, népòt sa ki pé fèt, annou kontiné katjilé dwèt. Èk pa katjilé asou lèwè yo paski nou sav, sé Jéhova ki ka sèvi Jézi pou djidé sé fwè fidèl sala.

12. Ki mannyè èspwa-a nou ni-a ka pwotèkté katjil nou?

¹² Menm kon on kastò ka pwotèkté tèt on sòlda, èspwa nou ka pwotèkté katjil nou. Si èspwa nou fò, nou kay wéyalizé ki sé bagay-la latè-a ka ofè-a, pa ni pyès valè. (Filip. 3:8) Wi, èspwa ka édé nou pou wèsté dous èk pou pa ni tjè antjèt. Èk sé sa Wallace èk Laurinda té èspéyansé. Yo ka wann sèvis an péyi Afwik. Èk yo té èspéyansé on sitiwasyon ki té byen twis. An twa (3) simenn, yo chak pèd on pawan an lanmò. Pou lapéti COVID, yo pa té sa witounen péyi yo pou wè fanmi yo. Wallace ékwi: “Èspwa wézéwèksyon-an ka édé mwen katjilé asou mannyè yo kay yé an latè nèf-la, èk pa asou mannyè yo té yé avan yo mò. Konsa, èspwa wézèwèksyon-an ka mwen débat épi lapenn.”

13. Ki mannyè nou sa twapé Lèspwi Bondyé?

¹³ Pòl di an 1 Tèsalonnika 5:19: “Pa anpéché Lèspwi Bondyé twavay.” Bon. Lè nou kité Lèspwi Bondyé twavay andidan nou, i ka fè nou zélé pou sa ki dwèt, èk i ka ban nou fòs-la pou twavay bay Jéhova. (Ronm 12:11) Alò, ki mannyè nou kay sa twapé Lèspwi Bondyé? Èben, nou sa mandé Jéhova pou’y an lapwiyè, étidyé pawòl li, èvèk asosiyé épi ògannizasyon’y. Konsa, lè nou fè sa, i kay édé nou mété sé bèl kawaktè-a Lèspwi Bondyé ka bay.—Gal. 5:22, 23.

14. Kisa nou ni pou fè si nou vlé kontiné wisouvwè Lisentèspwi Jéhova? (Gadé pòtwé-a osi.)

¹⁴ Lè Bondyé ban nou lisentèspwi’y, nou ni pou pwan pwokosyon pou nou “pa anpéché Lèspwi Bondyé twavay” andidan nou. Bondyé ka bay lèspwi’y pou moun ki ka éséyé tjenn katjil yo èk kondwit yo nèt. Mé i pa kay kontiné pou bay lèspwi’y pou moun ki ka kouwi vyé lavi. (1 Tèsalonnika 4:7, 8) Pou kontiné wisouvwè lisentèspwi-a, nou pa ni pou fè akonmsi “konmisyon [Bondyé] pa enpòtan.” (1 Tèsalonnika 5:20) Jéhova ka sèvi lisentèspwi’y pou ban nou konmisyon’y. Anpanmi sé konmisyon-an Bondyé ka bay, sé konmisyon-an konsèné gwan jou’y èk enpòtans li an tan nou. Konsa, nou vlé tjenn jou Jéhova an lidé nou, èk nou pa janmen vlé kwè Anmagèdonn pa kay vini an tan nou. Konsa, nou ka moutwé nou kwè jou sala kay vini touswit lè nou tjenn kò nou anbawasé ka fè sé bagay-la Bondyé vlé nou fè-a.​—2 Pita 3:11, 12.

“ÈGZANMINÉ TOUT SÉ KONMISYON-AN BYEN”

15. Kisa nou sa fè pou pa kité fo enfòmasyon kwennen nou? (1 Tèsalonnika 5:21)

¹⁵ Toutalè, sé sa ki ka opozé Bondyé kay di: “Tout bagay ka alé byen, i pa ni anyen mové ka fèt.” (1 Tèsalonnika 5:3) Osi, latè-a kay plè épi fo enfòmasyon. Èk sa kay kwennen an chay moun. Èk sé Démou-a ki kay dèyè fo enfòmasyon sala. (Wév. 16:13, 14) Mé lè i vini pou nou, kisa nou kay fè? Nou pa kay kité yo kwennen nou paski nou kay “ègzanminé tout sé konmisyon-an byen”. (Li 1 Tèsalonnika 5:21.) Konsa, nou ni pou ègzanminé sa nou tann èben sa nou li pou fè asiwé yo vwé. Wi, sa té vwéman enpòtan pou jan Tèsalonnika fè. Épi i kay pli enpòtan pou nou kon gwan twibilasyon-an ka apwoché. Konsa, pito nou aksèpté tout sa moun di, nou vlé fè asiwé nou konpawé sa nou tann, èben sa nou li, épi sa Bib-la èk ògannizasyon Jéhova ka di. Lè nou fè sa, nou pa kay kité fo enfòmasyon kwennen nou.​—Pwov. 14:15; 1 Tim. 4:1.

16. Ki èspwa nou ni? Épi kisa nou détèminé pou fè?

¹⁶ Nou sav Jéhova kay sové pèp li, kon on gwoup, diwan gwan twibilasyon-an. Kanmenm, nou pyès pa sav sa ki kay fèt denmen. (Jémz 4:14) Ki nou chapé gwan twibilasyon-an, èben nou mò avan sa, dépi nou wèsté fidèl, Jéhova kay ban nou kado-a lavi étonnèl-la. Pou sa ki annonté-a, yo kay an syèl épi Jézi. Èk pou sé lòt mouton-an, yo kay enjwi lavi an pawadi asou latè-a. Konsa, annou tout wèsté fiksé asou bèl èspwa-a nou ni-a. Èk annou fè asiwé, nou tou toujou pawé pou gwan jou Jéhova!