‘Pa Dé Bon I Bon Pou Moun Ki Ka [Wèsté Fidèl]ʼ Pou Jéhova

1-2. (a) Kisa adan gouvèdman ja fè pèp Bondyé, mé ki mannyè pèp Bondyé ka wéyaji? (b)  Poutji nou sa ni lakontantman magwé nou ka èspéyansé pèsikasyon? (Bay an wimak asou pòtwé-a ki asou kouvèti Gad-la.)

APWÉZAN, la ni pli pasé twant (30) péyi oliwon latè-a koté gouvèdman ka pèsikité Témwen Jéhova, ében yo ka mété twavay yo anba bann. An adan sé péyi sala, sé gouvèdman-an ja mété sé fwè èk sè nou-an an pwizon. Ki kwim yo té fè? Yo pa té fè anyen mal an zyé Jéhova. Sèl sa yo ka fè sé, li èk étidyé Bib-la, patajé bon nouvèl-la épi vwézinaj yo, èk atandé sé mitin-lan ansanm épi lòt adowatè. Osi, yo pa ka patisipé an zafè politik. Mé magwé yo ka èspéyansé an chay òpozisyon, sé fwè èk sè sala ka wèsté fidèl pou Jéhova. Yo ka moutwé Jéhova yo enmenʼy ofon tjè yo, èk sa ka ba yo an chay lajwa!

² Pitèt ou ja wè pòtwé sé fwè èk sè nou-an ki ka èspéyansé pèsikasyon. Ès ou òbzòvé yo ka toujou souwi? Pou ki wézon yo sa ni an souwi asou fidji yo? Sé paski yo sav fidèlité yo ka plè Jéhova. (1 Kw. 29:17 pwèmyé pa-a) Sé menm kon Jézi té di: “Pa dé bon i bon pou moun ki ka jwenn pèsikasyon paski yo ka viv dwèt . . . Sé pouʼw kontan épi wéjwi, paski Bondyé ni péyimanʼw ka tjenbé baʼw.”​—Maf. 5:10-12.

AN ÈGZANP POU NOU

3. Silon Twavay 4:19, 20, kisa sé zapòt-la té fè lè yo té ka pèsikité yo, èk pouki yo té fè sa?

³ Sé fwè èk sè nou-an ka èspéyansé pèsikasyon menm kon sé zapòt-la té ka èspéyansé pèsikasyon, an pwèmyé syèk-la. Plizyè fwa, sé jij-la an konsèy sé Jwif-la koumandé sé zapòt-la pou “pa janmen enstwi sé moun-an an non Jézi ankò”. (Twav. 4:18; 5:27, 28, 40) Kisa sé zapòt-la té fè? (Li Twavay 4:19, 20.) Ében yo té sav, an moun ki ni pli lotowité té ja ba yo koumandman-an ‘pou pwéché Bon Nouvèl-la konsèné Jéziʼ. (Twav. 10:42) Pita épi Jan té ka wépwézanté sé zapòt-la. Konsa, épi kouwaj yo di sé jij-la an konsèy sé Jwif-la, yo té kay obéyi Bondyé pito yo obéyi lézòm, èk yo pa té kay doubout palé konsèné Jézi Kwi. Pa wépons yo, sé konmsi sé zapòt-la té ka di sé jij-la: ‘Zòt vwéman kwè zòt ni pli lotowité pasé Bondyé?ʼ

4. Kisa Twavay 5:27-29 di sé zapòt-la té fè, èk ki mannyè nou sa fè menm kon yo?

⁴ Lè sé zapòt-la té di, “sé Bondyé nou ni pou obéyi, sé pa nonm,” yo kité an bèl ègzanp pou tout Kwityen ki vwé. (Li Twavay 5:27-29.) Apwé yo bat sé zapòt-la, sé zapòt-la kité konsèy sé Jwif-la. Èk lévanjil-la di nou, “yo té kontan an chay paski Bondyé té konsidiwé yo vo asé pou yo té sa pwan pinisyon pou lapéti Jézi.” Èk yo kontiné pwéché!​—Twav. 5:40-42.

5. Ki kwèsyon nou ni pou wéponn?

⁵ Ègzanp-lan sé zapòt-la kité ban nou ka lévé déotwa kwèsyon. Pa ègzanp, sé zapòt-la di yo kay obéyi Bondyé pito yo obéyi nonm. Mé ki mannyè yo té sa fè sa èk a menm lè-a “wèspèkté lwa gouvèdman péyi-a”? (Ronm 13:1) Èk ki mannyè nou ‘sa obéyi sé moun-lan ki ka kondwi-aʼ menm kon zapòt Pòl té di, èk a menm lè-a kontiné wèsté fidèl pou Jéhova, Sivwen nou?​—Titòs 3:1.

‘SÉ GOUVÈDMAN-ANʼ

6. (a) Silon Ronm 13:1, ki mannyè nou sipozé twété ‘sé gouvèdman-anʼ? (b)  Kisa nou sa di konsèné tout kondwitè lézòm?

⁶ Li Ronm 13:1. Silon vèwsé sala, Kwityen sipozé wèspèkté ‘sé gouvèdman-an.ʼ Sé gouvèdman-an ni wèskonsabilité-a pou tjenn lapé an péyi-a, pou fè asiwé moun obéyi lwa-a, èk délè yo ka jis fè défans pèp Bondyé. (Wév. 12:16) Konsa Bib-la ka ankouwajé nou pou péyé sé gouvèdman-an taks yo, péyé yo ladwenn yo, wèspèkté yo, épi ba yo lonnè. (Ronm 13:7) Sé gouvèdman-an ni an chay pouvwa, mé kanmenm, yo ni pouvwa sèlman paski Jéhova ka pèwmité yo pou ni pouvwa. Jézi té moutwé sa a klè lè Gouvènè Ronm Pons Pilat, té ka kwèsyonnenʼy. Lè Pilat diʼy i ni pouvwa-a pou ladjéʼy ében pou tjwéʼy, Jézi wéponn Pilat: “Ou pa ni pyès pouvwa anlè mwen si sé pa Bondyé ki ba ou pouvwa sala.” (Jan 19:11) Menm kon Pilat, sé gouvèdman-an, sé politisyen-an, èk anfen tout kondwitè lézòm, ni an limit asou pouvwa-a yo ni.

7. Ki lè nou pa sipozé obéyi sé gouvèdman-an, èk kisa tout gouvèdman ni pou chonjé?

⁷ Bib-la ka ankouwajé Kwityen pou obéyi lwa gouvèdman péyi-a. Kanmenm, nou pa sa obéyi lwa gouvèdman-an si yo mandé nou pou fè an bagay Bondyé di nou pou pa fè, ében si yo di nou pou pa fè an bagay Bondyé di nou ni pou fè. Pou ègzanp, sé gouvèdman-an pé di sé jenn fwè nou-an ni pou alé goumen ladjè pou péyi-a.b Ében yo pé mété an bann asou Bib nou ében sé piblikasyon nou-an. Yo pé jis vlé anpéché nou alé pwéché ében atandé sé mitin nou-an. Lè sé gouvèdman-an mal sèvi lotowité yo, tèl kon lè yo pèsikité disip Jézi, yo kay ni pou bay Bondyé an wépons. Jéhova ka obzòvé tout bagay!​—Éklé. 5:8.

8. Kisa ki diféwans-lan ant lotowité Jéhova, èk lotowité gouvèdman lézòm?

⁸ Sé gouvèdman-an ni an chay lotowité, mé sé pa yo ki ni tout lotowité. Sé Jéhova yonn ki ni kalité lotowité sala. Anfen plizyè fwa Bib-la ka kwiyé Jéhova, ‘Moun-lan Ki Ni Tout Lotowité.ʼ​—Dann. 7:18, 22, 25, 27.

‘MOUN-LAN KI NI TOUT LOTOWITÉʼ

9. Kisa pwofèt Dannyèl té wè an sé diféwan vizyon-an?

⁹ Pwofèt Dannyèl té wè diféwan vizyon ki té ka moutwé a klè, Jéhova ni pli lotowité pasé tout gouvèdman. Pwèmyéman, pwofèt Dannyèl té wè kat (4) gwo bèt mové. Sé bèt sala ka wépwézanté gouvèdman an tan pasé èk jòdi: Babilonn, Mido-Pèwja, Gris, Ronm, èk osi ‘Anglo-Americaʼ ki sòti hòd gouvèdman Ronm. (Dann. 7:1-3, 17) Adan an lòt vizyon pwofèt Dannyèl té wè Jéhova asid asou an twòn adan yon lodyans an syèl. (Dann. 7:9, 10) Mé sa pwofèt Dannyèl wè apwé sé vizyon sala sé yon avètisman pou tout kondwitè jòdi.

10. Silon Dannyèl 7:13, 14, 27, ki moun Jéhova ka bay lotowité-a pou kondwi latè-a, èk kisa sa ka di nou konsèné lotowité Jéhova?

¹⁰ Li Dannyèl 7:13, 14, 27. Lévanjil sala ka moutwé a klè, Jéhova ka pwan tout pouvwa èk lotowité hòd sé gouvèdman lézòm-lan èk i bay lòt moun pouvwa èk lotowité sala. Mé ki moun i bay pouvwa èk lotowité sala? Lévanjil-la di, sé ‘yon moun ki ka sanm gason lézòm-lan,ʼ sa vlé di Jézi Kwi. Èk osi i bay ‘sé moun sen-an ki ka sèvi Moun-lan Ki Ni Tout Lotowitéʼ, pouvwa èk lotowité sala. ‘Sé moun senʼ sala, sé san kawant kat mil (144,000) moun-lan ki kay kondwi pou ‘tout tanʼ. (Dann. 7:18) Konsa i a klè, sé Jéhova ‘Ki Ni Tout Lotowité,ʼ paski sé li tousèl ki sa pwan kalté aksyon sala.

11. Kisa Dannyèl té di ankò ki ka moutwé Jéhova ni twòp pli lotowité pasé sé nasyon-an?

¹¹ Sa Dannyèl té wè an vizyon sala ka dakò épi sa i té di avan. Dannyèl té di: ‘Bondyé an syèl, ka tiwé wa èk i ka mété wa.ʼ I osi té di: ‘Moun-lan ki Pli Ho-a ka kondwi an wéyòm lézòm, èk i ka ba népòt moun i vlé wéyòm-lan.ʼ (Dann. 2:19-21; 4:17) Ès Jéhova ja janmen tiwé wa èk mété wa? Mé wi!

12. Bay an ègzanp pou moutwé mannyè Jéhova té tiwé wa asou twòn yo an tan pasé. (Gadé pòtwé-a.)

¹² Jéhova ja moutwé a klè, i ni otan pli pouvwa pasé sé ‘gouvèdman-an.ʼ Annou konsidiwé twa (3) ègzanp. Féro sété wa péyi Éjip, èk i té mété pèp Jéhova an èslavaj. Plizyè fwa, Jéhova té koumandéʼy pou libéwé pèp li mé Féro wifizé pou fè sa. Jéhova libéwé pèp li anba lanmen Féro, épi i néyé Féro an Lanmè Wouj-la. (Ègz. 14:26-28; Sam 136:15) Bèlchaza sété wa péyi Babilonn èk i té ni an chay lògèy. I fè an fèsten épi ‘lévé kòʼy anho Senyè-a ki an syèlʼ. Osi, pito i glowifyé Jéhova, i té ka glowifyé ‘fo dyé ki fèt épi dajan èk lòʼ. (Dann. 5:22, 23) Mé Jéhova abésé Bèlchaza. Yo tjwé Bèlchaza ‘menm swè-aʼ i fè fèsten-an, èk wéyòm li vini anba lanmen moun hòd péyi Midiya épi Pèwja. (Dann. 5:28, 30, 31) Hèròd Agripa sété wa an péyi ‘Palestineʼ. I fè yo tjwé zapòt Jémz, èk i mété zapòt Pita an pwizon pouʼy sa tjwéʼy pli ta. Mé Jéhova anpéché Hèròd fè sa. Yon “nanj Bondyé voyé an maladi anlè Hèròd, . . . épi i mò”.​—Twav. 12:1-5, 21-23.

13. Bay an ègzanp ki ka moutwé Jéhova jis ni pouvwa asou plizyè kondwitè menm si yo ka twavay ansanm.

¹³ Jéhova ja moutwé i jis ni pouvwa asou plizyè kondwitè menm si yo ka twavay ansanm. Pou ègzanp, i té goumen bay jan Izwayèl, èk i édé yo pou détwi twantenyen (31) wa an péyi Kénann pou yo té wèsté an tè pwonmèt-la. (Jòch. 11:4-6, 20; 12:1, 7, 24) Jéhova té osi détwi wa Bennhédad èk twant dé (32) lòt kondwitè an péyi Siriya ki té ka goumen épi jan Izwayèl.​—1 Wa 20:1, 26-29.

14-15. (a) Kisa Wa Nèbyoukadnéza épi Wa Darayòs té di konsèné dwa-a Jéhova ni pou kondwi? (b)  Kisa samis-la té di konsèné Jéhova épi nasyon-an ki niʼy pou Bondyé yo?

¹⁴ Plizyè fwa, Jéhova ja moutwé sé li Ki Ni Tout Lotowité! Pou ègzanp lè Nèbyoukadnéza, wa péyi Babilonn té ka bavadé konsèné ‘fòs li, pouvwaʼy, épi laglwaʼy,ʼ Jéhova fèʼy vini fou, paski i pa té bay Jéhova lonnè-a. Apwé i twapé bon sans li ankò, Nèbyoukadnéza glowifyé ‘Moun-lan ki Pli Ho-a,ʼ épi i di ‘kondwit Jéhova sé an kondwit ki kay la pou tout tanʼ. I osi di: ‘La pa ni pyèsonn ki sa anpéché Jéhova fè saʼy vlé fè.ʼ (Dann. 4:30, 33-35) Wa Darayòs té mété Dannyèl an twou sé lyon-an paski Dannyèl té wèsté fidèl pou Jéhova. Mé lè wa Darayòs wè mannyè Jéhova sové Dannyèl anba sé lyon-an, i ‘koumandé moun toupatou an wéyòm li pou ni kwentif pou Bondyé Dannyèl-la, paski i sé Dyé vivan-an èk i la pou tout tan. Wéyòm li pa kay janmen détwi, èk i kay toujou ni dwa-a pou kondwi.ʼ​—Dann. 6:7-10, 19-22, 26, 27.

¹⁵ Samis-la té di: “[Jéhova] ka kwazé plan sé nasyon-an, èk i ka anpéché yo fè sa yo ni lidé fè-a.” I osi di: “Pa dé bon i bon pou nasyon-an ki ni [Jéhova] pou Bondyéʼy-la. Pa dé bon i bon pou sé moun-an [Jéhova] ja chwazi pou wisivwè sa i pwonmèt-la.” (Sam 33:10, 12) Alò, nou ni bon wézon pou wèsté fidèl pou Jéhova!

DÈNYÉ LADJÈ-A

16. Kisa Jéhova kay fè bay pèp li ‘diwan [gwan twibilasyon-an]ʼ, èk poutji nou sa ni konfyans sala? (Gadé pòtwé-a.)

¹⁶ Nou ja li ében tann sa Jéhova ja fè an tan pasé. Kanmenm, kisa nou sa èspéwé Jéhova kay fè touswit an tan pou vini? Nou sa ni konfyans-lan ki, Jéhova kay sové pèp li ki fidèl ‘diwan [gwan twibilasyon-an]ʼ. (Maf. 24:21; Dann. 12:1) Diwan gwan twibilasyon-an an gwoup nasyon kay ataké sèvant Bondyé tout oliwon latè-a. Bib-la ka kwiyé gwoup nasyon sala Gòg ki sòti péyi Magòg. Menm si gwoup sala ni san katwiven twèz (193) nasyon-an ki an Nasyon Ini adanʼy, yo pa kay sa goumen kont Moun-lan Ki Ni Tout Lotowité èvèk lawméʼy, èk yo pa kay éwisi! Tann sa Jéhova di: ‘Asiwé mwen kay bay kò mwen laglwa èk mwen kay sanngtifyé kò mwen èk mwen kay fè sé nasyon-an konnèt mwen. Èk yo kay ni pou konnèt mwen sé Jéhova.ʼ​—Izik. 38:14-16, 23; Sam 46:10.

17. Silon Bib-la kisa ki kay wivé sé wa-a an latè-a an tan ki ka vini? Èk kisa ki kay wivé moun ki wèsté fidèl pou Jéhova?

¹⁷ Lè Gòg ki sòti péyi Magòg ataké pèp Jéhova, sa kay dènyé ladjè-a. Bib-la ka kwiyé ladjè sala Anmagèdonn. A lè sala Jéhova kay détwi “tout sé wa-a ki an latè-a”. (Wév. 16:14, 16; 19:19-21) Èk ‘sé sèlman moun ki ka fè sa ki dwèt ki kay viv asou latè-a. Épi moun-lan ki ka [wèsté fidèl] kay wèsté asouʼy.ʼ​—Pwov. 2:21.

NOU NI POU WÈSTÉ FIDÈL POU JÉHOVA

18. Kisa Kwityen ki vwé ja moutwé yo détèminé pou fè, èk pouki? (Dannyèl 3:28)

¹⁸ Pou plizyè syèk, an chay Kwityen ki vwé ja mété libèté yo èk jis lavi yo anwis paski yo enmen Jéhova, èk yo ja chwaziʼy kon Moun-lan ki ni dwa-a pou kondwi yo. Yo détèminé pou wèsté fidèl pou Jéhova. Yo menm kon Chadrak, Michak èk Abèdnigo. Jéhova té sové lavi yo an fou difé-a paski yo té wèsté fidèl pou li.​—Li Dannyèl 3:28.

19. Jéhova kay jijé pèp li silon kisa? Èk kisa nou sipozé fè apwézan?

¹⁹ Samis-la David té moutwé wézon-an i enpòtan pou wèsté fidèl pou Bondyé. I di: ‘Jéhova kay jijé sé pèp-la. Jijé mwen, Dyé Jéhova, silon sa mwen fè ki dwèt épi silon fidèlité mwen.ʼ (Sam 7:8) Osi, David ékwi: ‘Kité fidèlité mwen èk sa mwen fè ki dwèt pwotéjé mwen.ʼ (Sam 25:21) Wi, Jéhova kay jijé nou silon fidèlité nou. Konsa, népòt sa nou pé èspéyansé, pli mèyè mannyè-a pou viv lavi nou sé pou wèsté fidèl pou Jéhova. Si nou fè sa, nou kay sa di, menm kon samis-la ki té di: ‘Pa dé bon i bon pou moun ki ka [wèsté fidèl] . . . , pou moun ki ka maché an lwa Jéhova.ʼ​—Sam 119:1.