Ou Sa Ni Lakontantman Ki Wéyèl

1. Ki mannyè an moun sa ni lakontantman ki wéyèl?

Lakontantman ki wéyèl sé pa on bagay ou ni jòdi-a èk denmen i dispawèt. Sé an bagay an moun sa ni pou tout lavi’y. Ki mannyè? Jézi di: “Pa dé bon i bon pou moun ki sav yo bizwen Bondyé.” (Maf. 5:3) Jézi konnèt lézòm té fèt épi on dézi ki fò pou konnèt èk adowé Kwéyatè yo, Jéhova. Èk paski Jéhova sé ‘Dyé-a ki ni lakontantman,’ tout moun ki adowé’y sa ni lakontantman.​—1 Tim. 1:11 (NWT).

2-3. (a) Ki lòt konpanni moun ki sa ni lakontantman? (b)  Kisa nou kay diskité an atik sala, èk pouki?

² Ès sé lè nou pa ni pyès pwoblenm an lavi nou, nou sa ni lakontantman? Non. Jézi di an bagay ki kay sipwi nou. I di, “moun ki an lapenn” pou lapéti péché yo, ében paski yo ka èspéyansé difikilté an lavi yo sa ni lakontantman. Osi Jézi di, “moun ki ka jwenn pèsikasyon paski yo ka viv dwèt”, ében moun ki ka andiwé “lè moun ka [ensilté yo] pou lapéti” Jézi sa ni lakontantman. (Maf. 5:4, 10, 11) Mé ki mannyè an moun sa ni lakontantman anba sé sitiwasyon sala?

³ Jézi té ka enstwi nou, sé pa sèlman lè nou pa ni pwoblenm an lavi nou, nou sa ni lakontantman. Mé lè nou konnèt èk nou ka vansé pwé Jéhova, sé lè sala nou sa ni lakontantman. (Jémz 4:8) Ki mannyè nou sa fè sa? An atik sala nou kay diskité twa (3) bagay ki sa édé nou jwenn lakontantman ki wéyèl.

LI ÈK ÉTIDYÉ BIB-LA

4. Kisa ki pwèmyé bagay-la nou ni pou fè pou ni lakontantman ki wéyèl? (Sam 1:1-3)

⁴ PWÈMYÉ BAGAY-LA: Pou ni lakontantman ki wéyèl, nou ni pou li èk étidyé Pawòl Bondyé. Jézi konpawé Pawòl Bondyé épi manjé. Moun èk zannimo bizwen manjé pou viv. Mé sé sèlman moun ki sa li èk étidyé Pawòl Bondyé. Èk sé pou sa Jézi di: “Sé pa manjé tousèl nonm bizwen pou yo viv, mé yo bizwen obéyi tout pawòl ki sòti an bouch Bondyé.” (Maf. 4:4) Konsa nou pa ni pou kité yon jou pasé, pou nou pa li èk étidyé Pawòl Bondyé ki an Bib-la. Samis-la di: “Pa dé bon i bon pou moun-an ki . . . ka pwan plézi pou obéyi lwa Bondyé Senyè-a, èk i ka étidyéʼy lajouné kon lannwit.”​—Li Sam 1:1-3.

5-6. (a) Kisa nou sa apwann an Bib-la? (b)  Ki mannyè Bib-la sa édé nou?

⁵ An Bib-la, Jéhova ka moutwé nou sa nou sa fè pou jwenn lakontantman ki wéyèl, paski i enmen nou. Pou ègzanp, i ka di nou sa divwa’y pou nou yé, mannyè nou sa vini pwé’y, èk sa nou sa fè pou’y pawdonnen nou. Osi, i ban nou an bèl èspwa pou tan ki ka vini. (Jér. 29:11) Tout sé bèl bagay-la nou ka apwann an Bib-la, ka plen tjè nou épi lakontantman ki wéyèl.

⁶ Kon nou sav Bib-la ni an chay konsèy ki sa édé nou an lavi nou touléjou. Lè nou swiv konsèy Bib, nou sa ni lakontantman ki wéyèl. Konsa lè ou ka santi dékouwajé, pwan pli tan pou li èk mèdité asou Pawòl Bondyé. Jézi di, pa dé bon i bon pou “moun-an ki ka tann . . . èk ki ka [obéyi Pawòl bondyé]”.​—Louk 11:28.

7. Lè ou ka li Bib-la, kisa ou sa fè pou’w twapé pli bennéfis?

⁷ Lè ou ka li Pawòl Bondyé pwan tan pou enjwi sa ou ka li. Ès ou ja èspéyansé an moun pwépawé an bèl ti manjé ba ou, èk ou manjé’y tèlman vit ou pa menm pwan gou’y? Mé apwé ou fini ou wéyalizé ou manjé twòp vit. Ou té sipozé pwan tan’w pou enjwi manjé-a. Menm bagay-la sa fèt lè ou ka li Bib-la. Konsa lè ou ka li Bib-la pwan tan pou katjilé asou sa ou ka li. Imajiné sé diféwan son-an èk sé vwa-a. Si’w fè sa, ou kay enjwi li Bib-la, èk ou kay twapé lakontantman ki wéyèl.

8. Pouki nou sa di, ‘èslav-la ki fidèl èk ki ni lasajès’ ka fè twavay-la Jézi apwenté’y pou fè-a? (Gadé nòt-la ki an bout paj-la osi.)

⁸ Jézi apwenté ‘èslav-la ki fidèl èk ki ni lasajès’ pou potjiwé manjé spiwityouèl an bon lè-a. Èk nou ni manjé spiwityouèl alabondans.b (Maf. 24:45) Tout manjé spiwityouèl-la èslav-la ki fidèl ka potjiwé bazé asou Bib-la. (1 Tèsa. 2:13) Konsa, manjé sala ka édé nou konpwann katjil Jéhova. Sé pou wézon sala nou ka li Gad-la, Awake!, èk lòt atik asou jw.org. Osi, nou ka pwépawé pou mitin nou diwan simen-lan èk an finisman simen-lan, èk toulé mwa nou ka gadé JW Broadcasting^®. Si nou kontiné li èk étidyé Bib-la, sa kay édé nou fè dézyenm bagay-la nou ni pou fè pou ni lakontantman ki wéyèl.

SWIV PWENSIP JÉHOVA

9. Kisa ki dézyenm bagay-la ki kay édé nou twapé lakontantman ki wéyèl?

⁹ DÉZYENM BAGAY-LA: Pou ni lakontantman ki wéyèl, nou ni pou swiv pwensip Jéhova. Samis-la di: ‘Pa dé bon i bon pou tout moun ki ni kwentif Jéhova èk ki ka maché an chimen’y.’ (Sam 128:1 NWT) Pou ni kwentif Jéhova vlé di, nou ka wèspèkté’y tèlman nou pa vlé fè anyen ki kay déplè’y. (Pwov. 16:6) Konsa nou ka fè tout sa nou pé pou swiv pwensip li i ban nou an Bib-la. (2 Kòr. 7:1) Si nou fè sé bagay-la Jéhova enmen-an, èk widjèkté sé bagay-la i hayi-a, nou kay ni lakontantman ki wéyèl.​—Sam 37:27; 97:10; Ronm 12:9.

10. Silon Ronm 12:2, kisa nou ni pou fè lè’y vini pou pwensip Jéhova?

¹⁰ Li Ronm 12:2. An moun pé konnèt Jéhova ni lotowité-a pou désidé sa ki dwèt èk sa ki pa dwèt, èvèk sa bon. Mé i osi ni pou swiv pwensip Jéhova pou i sa ni lakontanman ki wéyèl. Poutji? Annou konsidiwé ègzanp sala. Moun konnèt gouvèdman-an ni lotowité-a pou di yo ki mannyè pou kondwi machin yo asou chimen-an. Èk lè moun swiv lwa-a, sa ka anpéché aksidan épi lanmò. An menm mannyè-a, i pa asé pou sèlman konnèt pwensip Jéhova, nou sipozé swiv yo pou nou sa ni lakontanman. Èvèk lè nou swiv pwensip Jéhova, nou ka moutwé nou ka vwéman kwè sa sé pli mèyè mannyè-a pou viv lavi nou. (Pwov. 12:28) David té ka kwè sa osi èk sa sé poutji i di Jéhova: “Ou ka moutwé mwen chimen-an ki ka ban mwen lavi-a. Ou ban mwen tjè kontan paski ou toujou la épi mwen. A kotéʼw mwen ni plézi pou tout tan.”​—Sam 16:11.

11-12. (a) Kisa nou ni pou pwan pokosyon épi lè nou ni tèt cho, ében nou dékouwajé? (b)  Ki mannyè Filipay 4:8 sa édé nou chwazi bon anmizman?

¹¹ Lè nou ni tèt cho ében nou dékouwajé, nou pé katjilé nou vlé fè an bagay pou tiwé lidé nou asou pwoblenm nou. Èk nou sa konpwann sa. Mé nou ni pou pwan pokosyon pou pa fè bagay Jéhova hayi.​—Èfés. 5:10-12, 15-17.

¹² Zapòt Pòl ankouwajé sé Kwityen-an an Filipay pou kontiné katjilé asou, “bagay ki bon épi bagay ki ka plè Bondyé . . . bagay ki wèspèktab . . . bagay ki bèl, [épi] bagay ki nèt”. (Li Filipay 4:8.) Magwé zapòt Pòl pa té ka palé konsèné anmizman lè i ékwi sé pawòl sala, sa i di sa édé nou pou chwazi bon anmizman ki kay plè Jéhova. Mi an bagay ou sa fè: Kon ou ka li Filipay 4:8, chak koté ou wè mo pawòl-la “bagay” sèvi sé mo pawòl-la “chanson”, “pòtwé”, “liv”, ében “vidiyo gémz”. Si’w fè sa, sa kay édé’w konnèt kilès an sé bagay sala ki ka plè Bondyé, èk kilès ki pa ka plè’y. I byen enpòtan pou nou fè asiwé nou ka swiv pwensip Jéhova. (Sam 119:1-3) Lè sala nou kay ni an bon konsyans èk nou kay sa fè lòt bagay-la ki kay édé nou twapé lakontantman ki wéyèl.​—Twav. 23:1.

MÉTÉ ADOWASYON JÉHOVA PWÈMYÉ AN LAVI’W

13. Kisa ki twazyenm bagay-la ki kay édé nou twapé lakontantman ki wéyèl? (Jan 4:23, 24)

¹³ TWAZYENM BAGAY-LA: Fè asiwé ou mété adowasyon Jéhova pwèmyé an lavi’w. San dout, Jéhova méwité adowasyon nou paski sé li ki fè nou. (Wév. 4:11; 14:6, 7) Konsa nou ni pou fè asiwé bagay-la ki pli enpòtan an lavi nou sé, pou adowé Jéhova an “mannyè-a i vlé-a”. (Li Jan 4:23, 24.) Nou vlé lisentèspwi Bondyé djidé nou an adowasyon nou. Konsa nou kay sa adowé Jéhova an ling épi lavéwité-a ki an Pawòl li. Menm si nou ka viv adan an plas koté gouvèdman-an pa vlé nou adowé Jéhova, nou ni pou kontiné tjenn adowasyon Jéhova pwèmyé an lavi nou. Apwézan, la ni pli pasé yon san (100) fwè èk sè nou ki an pwizon paski yo sé Tèmwen Jéhova.c Mé sa pa ka anpéché yo ni lakontantman ki wéyèl. Èk yo ka fè tout sa yo pé pou pwédyé, étidyé Bib-la, èk palé épi lòt moun konsèné Jéhova épi Wéyòm li. Alò, lè moun kwititjé nou ében pèsikité nou, nou sa ni lakontantman ki wéyèl paski nou sav Jéhova kay édé nou andiwé èk i kay benni nou.​—Jémz 1:12; 1 Pita 4:14.

ÈSPÉWÉYANS AN FWÈ

14. Kisa ki wivé an jenn fwè an péyi Tajikistan, èk pouki?

¹⁴ Adan sé fwè èk sè nou-an ja èspéyansé sitiwasyon ki té byen difisil. Mé yo té ni lakontantman ki wéyèl paski yo fè sé twa (3) bagay-la nou mansyonnen-an. Annou konsidiwé ègzanp an jenn fwè ki té ni diznèf (19) lanné an péyi Tajikistan. Non’y sé Jovidon Bobojonov, èk i wifizé vini an manm an lawmé-a. Pou lapéti sa, li 4, Òktòb lanné 2019, yo fòsé’y kité kay li, yo mété’y an pwizon, èk yo twété’y kon yon kwiminèl. Plizyè péyi bay wapò an nouvèl-la konsèné mannyè-a yo té ka maltwété fwè Jovidon. Nouvèl-la di, yo bat li paski i pa té vlé vini an manm an lawmé-a, èk mété younifòm yo anlè’y. Apwé sa, yo kondanné’y èk yo voyé’y adan an pwizon koté yo ka fè sé pwizonnyé-a twavay wèd. I wèsté an pwizon jistan pwézidan péyi-a pawdonnen’y èk i di yo pou ladjé’y. Diwan tout tan sala fwè Jovidon wèsté fidèl pou Jéhova èk i té ni lakontantman ki té wéyèl. Ki mannyè i té sa fè sa? I té sa fè sa paski menm si i té ka èspéyansé difikilté, i té ka fè tout sa’y té pé pou tjenn wilasyon’y épi Jéhova fò.

15. Ki mannyè Jovidon té sa kontiné li èk étidyé Bib-la lè’y té an pwizon?

¹⁵ Lè Jovidon té an pwizon, i pa té ni an Bib èk i pa té ni pyès an sé piblikasyon nou-an, mé i kontiné li èk étidyé Pawòl Bondyé. Ki mannyè i té sa fè sa? Ében, toulé jou sé fwè èk sè-a té ka mennen manjé ba’y épi yo té ka ékwi tèks-la pou jounen-an asou sak papyé-a ki té ni konmisyon-an. Konsa i té sa li Bib-la èk mèdité asou’y toulé jou. Apwé i sòti an pwizon, mi konsèy-la i ka bay moun ki pòkò èspéyansé gwo tès. I ka di yo: “I byen enpòtan pou sèvi tan-an ou ni apwézan pou li Bib-la èk sé piblikasyon nou-an, pou’w sa apwann pli konsèné Jéhova.”

16. Pito Jovidon fiksé asou vyé katjil, kisa i té ka fiksé asou?

¹⁶ An lòt bagay Jovidon té ka fè sé sa, i té ka swiv pwensip Jéhova. Pito i katjilé asou vyé dézi èk fè bagay ki pa bon, i té ka fiksé asou Jéhova èk sé bagay-la Jéhova enmen. Jovidon té ka pwan plézi an sé bagay-la Jéhova fè-a. Pou ègzanp, toulé bon maten i té ka kouté sé jibyé-a ka chanté. Èk lé swè i té ka gadé lalin-lan èk sé étwal-la. Jovidon di: “Sé kado sala hòd Jéhova ka ban mwen lakontantman èk yo ka ankouwajé mwen.” Lè nou ka apwésyé Bib-la èk tout sé pwovizyon-an Jéhova ka ban nou, sa ka ban nou djèwté an tjè nou, èk djwèté sala ka édé nou andiwé.

17. Ki mannyè 1 Pita 1:6, 7 sa ankouwajé an moun ki ka èspéyansé gwo tès?

¹⁷ Jovidon osi té ka mété adowasyon Jéhova pwèmyé an lavi’y. I té sav mannyè i enpòtan pou wèsté fidèl pou Jéhova, paski Jézi té di: “Adowé [Jéhova], èk sé li sèlman pou sèvi.” (Louk 4:8) Sé konmandè lawmé-a èk sé sòlda-a té vlé fè Jovidon tounen do’y asou wilizyon’y. Mé pito Jovidon fè sa, i té ka pwédyé ofon tjè’y nwit kon jou. Èk i té ka mandé Jéhova pou édé’y wèsté fidèl. Magwé yo maltwété Jovidon i pa janmen tounen do’y asou Jéhova. Konsa Jovidon sa ni an chay djwèté an tjè’y, paski apwézan lafwa’y pli fò pasé avan i té èspéyansé gwo tès.​—Li 1 Pita 1:6, 7.

18. Ki mannyè nou sa ni lakontantman ki wéyèl?

¹⁸ Jéhova konnèt sa nou bizwen pou ni lakontantman ki wéyèl. Alò si ou fè sé twa bagay-la nou diskité an atik sala, ou kay ni lakontantman ki wéyèl menm si ou ka èspéyansé gwo tès. Konsa ou osi kay sa di: ‘Pa dé bon i bon pou pèp-la ki ni Jéhova pou Bondyé yo!’​—Sam 144:15.