Kisa Nou Sa Fè Pou Twapé Pli Bennéfis Lè Nou Ka Li Bib-la?

1. Ki mannyè nou sav Lévanjil-la té enpòtan pou Jézi?

IMAJINÉ ou té la lè Jézi té ka enstwi. Èk i té ka sèvi tout sé lévanjil-la san on liv! Wi, Jézi té konnèt sé lévanjil-la byen. Anfen, pwenmyé mo pawòl-la ki sòti an bouch li apwé batenm li sété yon lévanjil. Èk dènyé mo pawòl li avan i mò, sété yon lévanjil.b (Dito. 8:3; Sam 31:5; Louk 4:4; 23:46) Épi, diwan minis Jézi lè i té asou latè-a, byen souvan, i té ka li sé lévanjil-la an piblik, i té ka sèvi yo an pawòl li, èk i té ka èspliké yo bay sé moun-lan.​—Maf. 5:17, 18, 21, 22, 27, 28; Louk 4:16-20.

2. Kisa ki édé Jézi pou konnèt sé lévanjil-la byen? (Gadé pòtwé-a ki asou kouvèti-a.)

² Jézi vini konnèt sé lévanjil-la byen paski i té ka tann pawanʼy sèvi sé lévanjil-la lè yo té ka palé épi fanmi-a.c (Dito. 6:6, 7) Osi, i té ni labitid-la pou alé épi fanmiʼy an légliz sé Jwif-la asou jou Sabaf-la. (Louk 4:16) Èk paditan i té la, i té ka byen kouté lè yo té ka li sé lévanjil-la. Pou ègzanp, ès ou chonjé sa ki té fèt an tanp-la, lè Jézi té annèk douz (12) lanné? Èben, “Jézi [té] an Kay Bondyé asid anpami sé titja lwa sé Jwif-la, ka kouté yo èk ka mandé yo kwèsyon. Tout sa ki tann li té sipwi pou wè lakonpwann li épi wépons li.” (Louk 2:46, 47, 52) Kon on jenn gason, Jézi té ka li sé lévanjil-la. Konsa, Jézi pa té sèlman konnèt sé lévanjil-la byen, mé i vini enmen yo. Èk i kité sa i té ka apwann la, enflouwansé aksyonʼy.

3. Kisa nou kay diskité an atik sala?

³ Konsa, menm kon Jézi lè nou ka li sé lévanjil-la wèglé, nou ka vini konnèt épi enmen Pawòl Bondyé pli. Mé ki mannyè nou sa fè asiwé nou ka jwenn an pil bennéfis lè nou ka liʼy? Yon mannyè sé si nou apwann an sa Jézi té di moun ki té konnèt Lwa-a byen. Moun tèl kon sé titja lwa-a, sé Fawizyen-an èk sé Sadisyen-an. Sé nonm sala té konnèt sé lévanjil-la. Yo té ka liʼy souvan. Mé yo pa té ka twapé bennéfis an sa yo té ka li-a. Kanmenm, Jézi té di yo sa yo ni pou fè pou twapé an pil bennéfis lè yo té ka li sé lévanjil-la. I di: (1) i té enpòtan pou konpwann sa yo té ka li-a, (2) pou twouvé lison an sa yo té ka li-a, èk (3) pou kité Pawòl Bondyé édé yo pou fè chanjman ki nésésè. Jòdi jou, si nou fè sé twa bagay sala, nou kay sa twapé pli bennéfis lè nou ka li Bib-la. Konsa, nou kay diskité yo an atik sala.

SÉ POUʼW LI ADAN ON MANNYÈ POUʼW SA KONPWANN

4. (a) Pou twapé tout sé bennéfis-la lè nou li Pawòl Bondyé, kisa nou vlé fè? (b) Ki lison nou ka twapé an Louk 10:25-29?

⁴ Lè nou li Pawòl Bondyé, nou vlé konpwann sa i ka di nou. Si pa sa, nou pa kay twapé tout sé bennéfis-la. Pou ègzanp, Jézi té ka palé épi an nonm ki té on “titja lwa sé Jwif-la.” Lè nonm-lan mandéʼy: “Titja, ki sa mwen ni pou fè pou mwen ni lavi étonnèl? Jézi wéponn li, “Ki sa ki ékwi an lévanjil? Ki sa ou li andidanʼy?”” Konsa, Jézi té ka édé nonm sala pou twapé wépons-lan an Pawòl Bondyé. Épi nonm sala té bay on bon wépons, lèʼy té sèvi sé lévanjil-la ki té di “‘Ou ni pou kontan Bondyé Senyèʼw èk tout tjèʼw, . . . èk, ‘Ou ni pou kontan pwochenʼw menm kon ou kontan kòʼw.ʼ” (Livi. 19:18; Dito. 6:5) Mé gadé kèstyon-an nonm sala té mandé apwé sa. “I mandé Jézi, “Ki moun ki pwochen mwen?”” Kèstyon sala i té mandé-a té moutwé, i pa té byen konpwann sa i té ka li-a. Konsa, nonm sala pa té sav ki mannyè pou apliké lévanjil sala an laviʼy.​—Li Louk 10:25-29.

5. Kisa nou sa fè pou konpwann Bib-la pli mèyè? Èk pou ki wézon nou vlé fè yo?

⁵ Pou nou sa konpwann Pawòl Bondyé pli mèyè, mi yonndé bagay nou ni pou fè. Nou ni pou pwédyé avan nou koumansé li lévanjil-la. Nou vlé fè sa paski nou bouzwen lisentèspwi Jéhova pou édé nou konpwann sa pawòl li vlé di. Épi nou vlé mandé Jéhova pou lisentèspwiʼy pou édé nou fiksé asou sa nou ka li-a. Épi apwé sa, nou vlé fè asiwé nou pwan tan nou lè nou ka li lévanjil-la. Épi sa kay édé nou pou konpwann sa nou ka li-a. Konsa i bon pou lè nou ka li pou nou sa tann kò nou. Èben, nou sa kouté Bib-la asou òdiyo, épi an menm lè-a sèvi Bib nou pou swiv òdiyo-a. Si nou tann pawòl-la épi nou wèʼy an Bib-la, sa sa édé nou pou konpwann, pou chonjé, épi pou apwann pli an sa nou li an Pawòl Bondyé (Jòch. 1:8) Èk lè nou fini li, nou vlé pwédyé ankò, pou wimèsyé Jéhova pou Pawòl li. Èk osi pou mandéʼy pou édé nou apliké sa nou té li-a an lavi nou.

6. Ki lòt bagay nou sa fè pou konpwann Bib-la pli mèyè? Èk pou ki wézon nou vlé fè yo? (Gadé pòtwé-a osi.)

⁶ Mi dé lòt bagay nou sa fè pou konpwann Bib-la pli mèyè. Pwenmyé-a, nou sa mandé kò nou kwèsyon konsèné sa nou ka li-a. Kwèsyon tèl kon: ‘Ki moun ki ka palé. Bay ki moun i ka palé èk pouki? Ki koté èk ki lè sa ka pwan kou?ʼ Lè nou twapé wépons pou sé kwèstyon sala, sa kay édé nou pou jwenn pli gwo pwen-an, èk pou katjilé asou sa nou té li-a. Dézyenm-lan, kon ou ka li matjé sé ti pwen-an ou twapé. Lè nou ékwi sé ti pwen-an, i kay édé nou pou katjilé plis asouʼy, èk i kay édé nou konpwann sa nou té li-a pli mèyè. I osi kay édé nou pou chonjé sa nou té li-a. Konsa, nou pé matjé: sé kèstyon-an, sé wépons-lan, sa nou twouvé an wichach nou, sé gwo pwen-an, mannyè-a nou sa apliké sa nou té li, èben mannyè-a i té afèkté nou. Lè ou ékwi sé ti pwen sala, i kay édéʼw wè Pawòl Bondyé sé on konmisyon spésyal Bondyé voyé baʼw.

7. Kisa nou bouzwen lè nou ka li Bib-la, èk pouki? (Mafyou 24:15)

⁷ Jézi di, lè nou ka li Bib-la nou bizwen ni bon lakopwann. (Li Mafyou 13:12.) Mé kisa ki bon lakopwann? On moun ki ni bon lakopwann ka sèvi bon jijman. I ni abilité-a pou wè mannyè-a dé (2) pwen ka twavay ansanm, èk mannyè-a dé (2) pwen diféwan hòd yonn a lòt. Èk osi, i ka konpwann bagay ki ékwi èben bagay moun di ki pa a klè. Èk kon Jézi di, on moun kon sa ka wè mannyè bagay ki ka fèt oliwon nou ka moutwé pwofèsi Bib ka fèt vwé. (Mafyou 24:15.) Alò, nou bouzwen bon lakopwann pou jou sa jwenn bennéfis an plen lè nou ka li Bib-la.

8. Lè nou ka li Bib-la, kisa nou ni pou fè pou twapé lakopwann?

⁸ Jéhova ka bay tout sèvant li lakopwann. Mé nou ni pou pwédyé èk mandéʼy pou lakopwann èvèk lasajès. (Pwov. 2:6) Konsa, ki mannyè nou sa twavay a ling épi lapwiyè nou? Èben, nou sa fè sa lè nou byen gadé sa nou ka li-a, èk éséyé pou wè konnèksyon-an ant sa nou li-a èk bagay nou ja konnèt. Épi pou édé nou fè sa, nou sa sèvi sé piblikasyon nou-a. Pou ègzanp, nou ni Research Guide for Jehovahʼs Witnesses. Sé piblikasyon sala ka édé nou wè kisa yon lévanjil vlé di, èk sé diféwan mannyè-a nou sa aplikéʼy an lavi nou. (Hib. 5:14) Alò, kon nou ka twavay a ling épi lapwiyè nou, nou kay ni bon lakopwann lè nou li sé lévanjil-la.

SÉ POUʼW LI ADAN ON MANNYÈ POUʼW SA TWAPÉ WICHÈS KI AN BIB-LA

9. Ki lavéwité enpòtan sé Sadisyen-an pa té ka wè a klè?

⁹ Sé Sadisyen-an té byen konnèt sa ki té ékwi an sé pwèmyé senk (5) liv-la an Bib-la. Mé yo pa té ka wè a klè lavéwité-a ki té a sé liv sala. Pou ègzanp, lè sé Sadisyen sala té kwèsyonnen Jézi konsèné wézèwèksyon-an, Jézi di yo an Mak 12:26, “Bon, konsèné ès si moun kay wésisité hòd lanmò-a, mwen sav zòt ja li adan sé liv-la Moziz té ékwi-a koté i palé konsèné wazyé-a ki té ka bwilé-a. Bondyé di kon sa, ‘Sé mwen ki Bondyé-a Abrahanm, Ayzak épi Jakòb ka adowé-a.ʼ” (Mak 12:18, 26) Konsa, magwé sé Sadisyen-an té li sé lévanjil-la plizyè fwa, kèstyon sala Jézi té mandé yo-a ka moutwé, yo pa té ka wè a klè yon lavéwité ki té byen enpòtan an sé lévanjil-la. Èk sa sé lavéwité-a konsèné wézèwèksyon-an. ​—Mak 12:27; Louk 20:38.d

10. Lè nou ka li Bib-la, kisa nou vlé fè?

¹⁰ Konsa, kisa ki lison-an pou nou? Èben, lè nou ka li on wakont an Bib-la, ében yon vèwsé, nou vlé gadé pou kisa nou sa apwann hòd yo. Épi nou pa vlé gadé pou bagay ki ézé pou konpwann sèlman. Mé nou vlé fouyé fon an Bib-la pou gadé pou lòt pwensip èk lòt lavéwité ki ni an chay valè.

11. Ki mannyè 2 Timòfi 3:16, 17, kay édé nou twapé an pil wichès an Bib-la?

¹¹ Koumannyè ou sa twapé wichès ki an Bib-la lè ou ka liʼy? Konsidiwé sa ki ékwi an 2 Timòfi 3:16, 17. (Liʼy. ) Sé vèwsé sala di, “lévanjil-la enpòtan pou” : (1) enstwi lavéwité-a, (2) vèti nou lè nou fè bagay ki pa bon, (3) édé nou mété bagay annòd, èk (4) ban nou lésisyon asou mannyè pou nou sa viv dwèt. Èk nou sa twapé tout sé bennéfis sala an chak liv an Bib-la. Konsa, lè nou ka li on wakont, gadé kisa i ka enstwi nou konsèné Jéhova, divwaʼy èk pwensip li. Lévanjil-la ka osi vèti nou lè nou fè bagay ki pa bon. Alò, lévanjil-la ka édé nou wè èk widjèkté vyé katjil èk vyé atitid. Konsa, gadé pou sé vètisman-an. Èk sa kay édé nou wèsté fidèl pou Jéhova. Lè nou ka li sé lévanjil-la, gadé pou mannyè i sa édé nou mété bagay annòd. Pou ègzanp, si nou jwenn on moun an minis-la, ki ni on katjil ki pa dwèt, lévanjil-la sa édéʼy pou fè chanjman an katjil li. Konsa, noté sé lévanjil-la kisa édé moun. Lévanjil sa ban nou lésisyon asou mannyè pou nou sa viv dwèt. Épi i ka entwennen nou pou wè bagay mannyè-a Jéhova ka wèʼy. Konsa, gadé pou entwennman sala. Lè nou tjenn sé kat (4) bagay sala an lidé lè nou ka li Bib-la, nou kay twapé an pil wichès.

SÉ POUʼW KITÉ PAWÒL BONDYÉ ENFLOUWANSÉʼW

12. Pouki Jézi té mandé sé Fawizyen-an : “Ès ou pʼòkò li an lévanjil-la”?

¹² Asou yon lokazyon, sé Fawizyen-an té di Jézi sé disip li-a ka kasé lwa Sabaf-la. Mé Jézi wéponn yo èk i sèvi dé (2) ègzanp an lévanjil-la an liv Hozéya. Èk i moutwé ki, sé Fawizyen-an pa té konpwann pouki Bondyé té ba yo lwa Sabaf-la. Èk sa sété wézon-an yo pa té ka moutwé moun mizèwikòd asou jou Sabaf-la. Sé pou wézon sala, Jézi té mandé yo on kèstyon pou moutwé yo, yo té ni on vyé atitid lè yo té ka li sé lévanjil-la. I mandé: “Ès ou pʼòkò li an lévanjil-la?” (Maf. 12:1-7)e Konsa, pouki sé Fawizyen-an pa té kité sa yo té li an Pawòl Bondyé enflouwansé yo? Sé paski yo té ni an chay lògèy. Èk lè yo té ka li, yo té ka fèʼy pou kwititjé lézòt. Atitid sala té ka anpéché yo konpwann sa yo té ka li-a.​—Maf. 23:23; Jan 5:39, 40.

13. Ki atitid nou sipozé ni lè nou ka li Bib-la èk pouki?

¹³ Pawòl Jézi ka moutwé nou ki lè nou ka li Bib-la, nou ni pou ni on bon atitid. Nou pa vlé fè kon sé Fawizyen-an ki pa té ni imilité èk pa té pawé pou apwann. Mé pito, nou vlé ni imilité èk pawé pou apwann lè nou ka li Bib-la. Kon Jémz 1:21 di nou pou, “Abésé kòʼw bay Bondyé èk aksèpté pawòl-la i planté an tjèʼw-la.” Konsa, si nou aksèpté pawòl Bondyé, nou kay kitéʼy fè népòt chanjman ki nésésè an lavi nou. A lè sa-a, nou pa kay kwititjé ében ni lògèy, mé nou kay kité sé lésisyon-an ki an Bib-la konsèné mizèwikòd, konpasyon èk lanmityé enflouwansé nou.

14. Kisa ki ka moutwé si nou ka kité Pawòl Bondyé enflouwansé nou? (Gadé sé pòtwé-a osi.)

¹⁴ Mannyè nou ka twété lézòt ka moutwé si nou ka kité Pawòl Bondyé enflouwansé nou. Kon nou ja wè, sé Fawizyen-an pa té kité Pawòl Bondyé chanjé atitid yo. Sé pou wézon sala yo “té kay kondanné sé moun-an ki pa koupab-la.” (Maf. 12:7) An menm mannyè-a, mannyè nou ka konsidiwé èk twété lézòt ka moutwé si nou ka kité Pawòl Bondyé enflouwansé nou. Pou ègzanp, ès nou toujou ka wè bonté an lézòt? Èben, ès nou toujou pwésé pou wè fòt yo? Èskè nou ni mizèwikòd èk pawé pou pawdonnen? Ében ès nou pwésé pou kwititjé lézòt èk tjenbé yo asou tjè? Sé wépons-lan pou sé kwèsyon sala sa moutwé si nou ka kité sa nou ka li chanjé katjil nou, santiman nou, èk aksyon nou.​—1 Tim. 4:12, 15; Hib. 4:12.

OU SA NI DJÈWTÉ LÈ OU LI BIB-LA

15. Ki mannyè Jézi té santi konsèné sé lévanjil-la?

¹⁵ Jézi enmen sé lévanjil-la. Ki mannyè nou sav sa? Paski Sam 40:8 té ja di mannyè Jézi té kay santi lè i di: ‘Mwen ka pwan plézi pou fè divwaʼw. Èk lwaʼw ofon tjè mwen.ʼ Wi, Jézi té enmen Pawòl Bondyé! Épi annékòz di sa, i té viv laviʼy pou plè Jéhova. Épi i té ni djèwté èk té sèvi Jéhova fidèlman. Jòdi jou, nou osi sa ni djèwté èk sa sèvi Jéhova fidèlman, lè nou li Bib-la èk apwann pou enmenʼy menm kon Jézi.​—Sam 1:1-3.

16. Kisa ou vlé fè pou ou sa twapé pli bennéfis lè ou ka li Bib-la? (Osi, gadé enfòmasyon-an anba sijé-a: “Pawòl Jézi Sa Édéʼw Pou Konpwann Sa Ou Ka Li.”)

¹⁶ Konsa, annou fè pwogwé an mannyè-a nou ka li Bib-la. Èk annou sèvi sa Jézi té di èk ègzanp li kon on djid. Kon nou ja diskité an atik sala, pou nou sa konpwann sa nou li an sé lévanjil-la, nou ni pou pwédyé, pwan tan nou pou li, mandé kèstyon, èk matjé sé ti pwen-an nou twapé. Épi nou ka sèvi lasajès èk bon lakopwann, lè nou byen gadé sa nou ka li-a, épi sèvi sé piblikasyon nou-a. Èk lè nou ka li sé lévanjil-la, nou vlé fouyé fon pou nou sa twapé lòt pwensip èk lòt lavéwité ki ni an chay valè. Èk osi, lè nou ka li Bib-la, nou ni pou ni on bon atitid, èk kité Pawòl Bondyé enflouwansé nou lè nou ka liʼy. Lè nou fè pli mèyè nou pou fè sé bagay sala, nou kay twapé pli bennéfis lè nou ka li Bib-la, èk nou kay vini pli pwé Jéhova.​—Sam 119:17, 18; Jémz 4:8.